ޝުކުރިއްޔާއޭ ބުނާ ކަހަލަ އިޝާރާތަކުން ޝަހާއާއި ދިމާއަށް ބަލައިލުމާއިއެކު، މަޑުމަޑުން އެއް އަތަށް ބޯ އަރިކޮށްލިއެވެ. އެވީ ވަޤުތުގެކޮޅުގެ ތެރޭގައިވެސް ފާތުންގެ ޑައިރީ ކިޔާ، އޭނާގެ މަޒީގެ ޞަފްޙާތައް ހުޅުވާލުމަށް ވަޤުތު ހޯދައިގެން ފާތުންގެ ޙާލަތު ދެނެގަތް ކަމަށް ޓަކައެވެ.  އެއަށްފަހު، ފާތުން އެނބުރިލީ، ޝަހާގެ މަންމައާއި ދިމާއަށެވެ. އަދި ސަމާސާ ރާގަކަށް ތިވާހަކަ ދައްކާނީ ތަންކޮޅެއް ފަހުން ދޯއޭ ބުނެލިއެވެ. ފާތުން ކޮންމެވެސް ކަމެއް ސިއްރުކުރަން އުޅޭ ކަމުގެ އިޙުސާސެއް ޝަހާގެ މަންމައަށް ކުރެވުނެވެ. އަދި ސުވާލުން ފުރިގެންވާ ނަޒަރަކުން ޝަހާއާއި ދިމާއަށް ބަލައިލިއެވެ. ޝަހާވެސް ވަރަށް ނޫންކަމަށް ހަދާފައި، ލުއިލުއި ހިނިތުން ވުމަކުން ހީލިއެވެ.

ޝަހާގެ މަންމަ އިތުރު ސުވާލެއް ކުރުމުގެ ކުރިން ފާތުން ޝަހާ މަންމައާއި ސުވާލެއް ކުރިއެވެ. ”ޝަހާ ބައްޕަ ކޮބާ؟ ބައްޕަގެ ޙާލު ރަނގަޅުތަ؟“ އެ ސުވާލަށް ޖަވާބު ދިނުމުގެ ބަދަލުގައި،  ޝަހާގެ މަންމަ އަނެއްކާވެސް އެނބުރި ބަލައިލީ ޝަހާއާއި ދިމާއަށެވެ. މިފަހަރުވެސް ސުވާލުން ފުރިގެންވާ ނަޒަރަކުންނެވެ. ޝަހާ ބައްޕަގެ އެއްވެސް މަޢުލޫމާތެއް ފާތުންއަށް ނުދެނީހޭ އަހާލާ ކަހަލަ ގޮތަކަށެވެ. އެވަޤުތު ޝަހާވެސް ފުން ނޭވާއެއް ލުމާއިއެކު، ފާތުންގެ ކައިރީގައި އިށީންދެލިއެވެ. ”ފާތުން، އަހަރެންގެ ބައްޕަ ނިޔާވިތާ މިހާރު އަށް އަހަރު ވެއްޖެ. މިހުރިހާ ކަމެއްގެ ތެރެއިން އަދި ފާތުން ކައިރީގަ އެވާހަކަ ބުނާނެ ފުރުޞަތެއް ނުލިބިގެން މިއުޅެނީ.“ ފާތުންއަށް ލިބުނީ ކުއްލި ސިހުމެކެވެ. އަދި އެހާމެ ދެރަވެސް ވިއެވެ. އެއާއިއެކު، ޝަހާގެ ބައްޕައަށް ވީގޮތެއް އޮޅުން ފިލުވުމަށް ކެތްމަދުވިއެވެ. އެހެނަސް މި ދެތިން ދުވަހުގެތެރޭގައި، ޝަހާ އުޅުނު ގޮތްވެސް ފާތުން ޤަބޫލު ކުރިއެވެ. ”އެއީ އެހާ ވަރުގެ ކަމެއް ނޫން. ޝަހާގެ ހުރިހާ ވަޤުތެއް ކަހަލަ ގޮތަކަށް ހުސްކޮށްފަ ތިހުރީ ހަމަ އަހަރެންނަށް ޓަކާ. ތިކަހަލަ ވާހަކަތަކަކީ ވަރަށް ވިސްނާފަ އަދި ވަރަށް ހަމަޖެހިގެން ނޫނީ ނުދެއްކޭނެ ވާހަކަތައްކަންވެސް އަހަރެން ޤަބޫލުކުރަން. ދެން ބުނެބަލަ ޝަހާ ބައްޕައަށް ވީކިހިނެއްތަ؟“ ޝަހާއާއި މެދު އެއްވެސް ޝަކުވާއެއް ނެތްކަން ހާމަ ކުރުމަށްފަހު، ފާތުން ކުރަން ބޭނުންވި އަސްލު ސުވާލު ކޮށްލިއެވެ.  ”އަނެއްހެން ބަލިކޮންނެއްވެސް ނޫން އުޅުނީކީ. ހަމަ ކުއްލިޔަކަށް ހާޓްއެޓޭކެއް ޖެހުނީ. ހޮސްޕިޓަލަށް ގެންދިޔައިރުވެސް އޮތީ ނިޔާވެފަ.“ ފާތުން ކުރި ސުވާލަށް ޖަވާބު ދިނީ ޝަހާގެ މަންމައެވެ. އެވާހަކަތައް ދެއްކުމަކީ، އަދިވެސް ޝަހާއަށް އެހާ ފަސޭހަ ކަމެއް ނޫންކަން ޝަހާ މަންމައަށް އެނގޭތީއެވެ. އެކަން ފާތުންއަށްވެސް ވަރަށް ރަނގަޅަށް އެނގުނެވެ. އެހެނީ އެދެބަފައިންގެ މެދުގައި އޮންނަ ވަރުގަދަ އަދި ލޯބިވެތި ގުޅުން އެންމެ ރަނގަޅަށް އެނގޭނެ ފަރާތަކީވެސް ފާތުން ކަމަށް ވާތީއެވެ. މައިންބަފައިން ވަކިވެގެން ދިޔުމަކީ ކިހާ ހިތްދަތި ކަމެއްކަން ފާތުންއަށް އިޙުސާސް ކުރެވޭތީވެސް މެއެވެ. އަދި ޝަހާގެ ބައްޕައަށް ހެޔޮ ރަޙުމަތް ލައްވާ، ފާފަ ފުއްސެވުމަށް އެދި ދުޢާ ކުރިއެވެ.

އެވަޤުތު އެކޮޓަރި ތެރޭގައި ހުރީ، ޝަހާގެ ދެމައިންގެ އިތުރުން އަޙްމަދު ކޮއްކޮއެވެ. ފާތުންއަށް ލިބުނު ޚަބަރުގެ ސަބަބުން މޫނުމައްޗަށް ވެރިވެފައިވާ އުދާސްކަން ފިލުވާލަން އަޙްމަދު މަސައްކަތް ކުރިއެވެ. އެގޮތުން އަޙްމަދު ގަސްތުކުރީ މަޢުލޫ ބަދަލުކޮށްލާށެވެ. ވާހަކައިގެ މިސްރާބު ބަދަލުކޮށް، ހަތަރު މީހުން އެކުގައި ވަރަށް އުފާވެރި ވަޤުތުކޮޅެއް ހޭދަކުރަމުން ގެންދިޔައެވެ. ވޭތުވެދިޔަ އެތައް އަހަރެއްގެ ތެރޭގައި ފާތުންއަށް ނުލިބުނު ހިތްހަމަޖެހުމާއި އުފާ، މިވީ ކުޑަ ވަޤުތުކޮޅުގެ ތެރޭގައި ލިބިގެން ހިނގައްޖެއެވެ. ފާތުންގެ މޫނުމަތިން ފެނުނު ހިތްހަމަ ޖެހުމާއި އުފާވެރިކަން ފެނިފައި އަޙްމަދުގެ ލޮލުން އުފާވެރިކަމުގެ ކަރުނަ ހިލިލިއެވެ. އެމަންޒަރު ޝަހާއަށް ފެނުމާއިއެކު، އަޙްމަދުގެ އުޅަނބޮށީގައި މަޑުމަޑުން ކޮށްޓާލިއެވެ. އަދި ބުމަ ހިއްލާލަމުން ކިހިނެއްވީތޯ އިޝާރާތުން ސުވާލު ކޮށްލިއެވެ. އެއީ މޮޅިވެރިކަމުގެ ކަރުނައެއް ނޫންކަން ޝަހާއަށްވެސް އެނގެއެވެ. އެހެންކަމުން ޝަހާވެސް އަޙްމަދަށް ކޮށްލި އިޝާރާތަކީ ސަމާސާ ގޮތަކަށް ކޮށްލި އިޝާރާތެކެވެ. އެކަން އަޙްމަދަށްވެސް އެނގުނެވެ. އަޙްމަދުވެސް ވައި އަޑުން އަދި އެހާމެ ސިއްރުން، ޝަހާގެ އެސުވާލުގެ ޖަވާބު ދިނެވެ. ”ދޮންތަގެ މޫނުމަތިން މިހާ އުފާވެރިކަން އަހަރެންނަށް މިފެނުނީ ކިތައް އަހަރު ފަހުން ކަމެއްވެސް ބުނާކަށް ނޭންގެ. ދޮންތަގެ މުޅި ދިރިއުޅުން މިލާ މޯޅިވެފަ އޮންނަތާ ކޮން ޒަމާނެއް. ތެންކްޔޫ ޝަހާދައްތާ.“ ޝުކުރުވެރިވާ ކަހަލަ ގޮތަކަށް މޭގައި އަތް އަޅާލާފައި އަޙްމަދުގެ ހިތުގެ ޝުޢޫރު ޝަހާގެ ކުރިމަތީގައި ފާޅު ކުރިއެވެ. ”މިހާރު އެފެންނަނީ އަސްލު ފާތުން.“ ހިތްހަމަ ޖެހުމާއިއެކު، ޝާހާވެސް ބުނެލިއެވެ. ”އަހަރެންގެ ދުޢާއަކީ ދޮންތަގެ ޙަޔާތަށް އުފާވެރިކަން އައުން. އަދި ދޮންތަގެ ބަނަވެފައިވާ ދިރިއުޅުމަށް އުޖާލާކަން ގެނެސްދޭނެ މީހަކު ދޮންތަގެ ޙަޔާތަށް އައުން.“ ”އާމީން“ އަޙްމަދުގެ ދުޢާގައި ޝަހާވެސް ޝާމިލުވެލިއެވެ. އެހެނީ އެއީ ޝަހާވެސް އެންމެ ބޭނުންވާ ގޮތްކަމަށް ވާތީވެސް މެއެވެ. އެވަޤުތު ފާތުން ގެންދިޔައީ ޝަހާ މަންމައާއިއެކު، ތަފާތު މަޖާ ވާހަކަ ދައްކަމުން ހެމުންނެވެ. ކުއްލިޔަކަށް ފާތުންގެ ނަޒަރު  ޝަހާ އަދި އަޙްމަދާއި ދިމާއަށް ދިޔައެވެ. ”މި ދެމީހުން މާ ސިއްރުސިއްރުން މި ދައްކަނީ ކޮން ވާހަކައެއްބާ؟“ ކަނާއަތުގެ ޝަހާދަތް އިނގިލި މަޑުމަޑުން ކޯތާފަތްމަތީގައި ބާއްވާލަމުން ފާތުން ސުވާލު ކޮށްލިއެވެ. ހިނިތުންވެލުމާއިއެކު، ސަމާސާ ރާގަކަށެވެ. ”އެބުނާހެން ދެމީހުން ތިބެގެން ކޮން ސިއްރު ވާހަކައެއްތަ މި ދައްކަނީ؟“ ޝަހާގެ މަންމަވެސް ފާތުންއާއި ބައިވެރި ވެލިއެވެ. ”އަނެއްހެން މާބޮޑު ވާހަކައެއް ނުދައްކަން. އެކަމަކު ދޮންތަގެ ޙާލު މިހާރު ތަންކޮޅެއް ރަނގަޅުހެން ހީވާތީ ކުޑަކޮން ސެލިބްރޭޓް ކޮށްލަން ކަމަށް އެބަ ވިސްނަން. ހިނގާ މިރޭ ކުޑަ ގޮތެއް ހަދާލަމާ ދޯ. ދޮންތަގެ އަނެއް ފްރެންޑަށްވެސް އިންވައިޓް ކޮށްލަމާ. މަންމަވެސް ގެންނަށް ވާނެ އެއްނު ދޯ.“ އަނެއް ފްރެންޑް ކަމަށް އަޙްމަދު އެބުނަނީ އަޙްސަންއަށްކަން ފާތުންއަށް އެނގުނެވެ. އަދި އެގޮތް ރަނގަޅުވާނެ ކަމަށް ފާތުން ޢިޝާރާތުން އަންގާލިއެވެ.  އަޙްމަދުގެ ހިތްހަމަ ޖެހުން ހަތް އުޑުމަތީގައި ހުރި ކަހަލައެވެ. އެހެނީ ފާތުންގެ ދިރިއުޅުމުގެ ޙާލަތު މިހާތަނަށް އެންމެ ގާތުން ދުށް މީހަކީ އަޙްމަދެވެ. ފާތުން ތަޙައްމަލު ކުރަމުން ގެންދިޔަ ހުރިހާ ކަމެއް އެންމެ ގާތުން ފެންނަން ހުރިއިރުވެސް އެއިން އެއްވެސް ކަމަކަށް ކޮށްދެވޭނެ މާބޮޑު ކަމެއް ނެތި، މަޖުބޫރީ ޙާލަތެއްގައި ކުރިމަތީގައި ހުނަންނަން ޖެހުނު ދުވަސްތައް އަޙްމަދު ދުވަހަކުވެސް ހަނދާނެއް ނުނެތޭނެއެވެ. އެހެންނަމަވެސް އެ އަނދަވަޅުން ފާތުން ސަލާމަތްކޮށްގެން މިހާ ހިސާބަށް ގެނެސްދެވުނު ކަމުގެ ހިތްހަމަ ޖެހުންވެސް އެބައޮތެވެ. އެ ހިތްހަމަ ޖެހުމާއި އުފާ ފާޅުކުރަން މިއަދު އަޙްމަދު ބޭނުމެވެ. ފާތުން ކުރި ސުވާލަށް ޖަވާބު ދިނުމުގައި ވާހަކަ އޮޅުވާލިއެއް ކަމަކު، މިވަޤުތު އަޙްމަދު އެފާޅުކުރަނީ އޭނާގެ ހިތުގެ ޝުޢޫރެވެ. ”ތީ ވަރަށް ރަނގަޅު ޚިޔާލެއް. ހައްވައަށް އަވަހަށް ގުޅާ. މަވެސް ތިކަމުގަ ޝާމިލުވާން ބޭނުން. އަހަރެން ކޮށްދޭންވީ ކޮންކަމެއް؟“ ޝަހާ މަންމަވެސް އަޙްމަދުގެ އެޚިޔާލުގައި ޝާމިލުވެލިއެވެ. ”ޝަހާ މަންމަ އަތުން އަޅާ މީރު ފޮނި ބޯކިބާ ކާން ބޭނުން.“ މާޒީ ހަނދާން ކޮށްލަމުން ފާތުން ބުނެލިއެވެ. އެވަޤުތު ޝަހާގެ ދެމައިންނަށް އެއްފަހަރާ ފާތުންއާއި ދިމާއަށް ބަލައިލެވުނެވެ. ”ފާތުމަތު އަދިވެސް އަހަރެން އަޅާ ބޯކިބާ މަތިން ހަނދާން އެބަހުރިތަ؟“ ހައިރާން ކަމާއިއެކު ޝަހާގެ މަންމަ ސުވާލު ކުރިއެވެ. ”ތެދެއް ފާތުން؟ އަދިވެސް މަންމަ އަޅާ ފޮނި ބޯކިބާ މަތިން ހަނދާން އެބަ ހުރި؟“ ޝަހާވެސް ހައިރާން ވިއެވެ. ”ކީއްވެ ހަނދާން ނުހުންނަންވީ. ހަނދާންވޭތަ ކުޑައިރު ޝަހާ މަންމަ ކައިރީގަ ރޮއެގެންވެސް ބޯކިބާ އަޅުވަމެއްނު. މިހާރުދެން އެގޮތަށް ރޮއެގެން ނުކުރުވިޔަކަސް ރިކުއެސްޓެއް ކޮށްލެވިދާނެތާ ދޯ. ޕްލީސް ޝަހާ މަންމާ.“ ތުއްތު ކުއްޖެއް ފަދައިން ފާތުން އާދެސް ކޮށްލިއެވެ. ފާތުންގެ އަތްމަތީގައި ޝަހާ މަންމަގެ އަތް ބާއްވާލިއެވެ. އަދި ވަރަށް ލޯބިން ފާތުންގެ އެދުމަށް އިޖާބަ ދިނެވެ. ”ފާތުމަތަކީވެސް ޝަހާ ފަދައިން އަހަރެންގެ ދަރިއެއްގެ ގޮތުގައި އަބަދުވެސް ދެކޭ ކުއްޖެއް. އެހެންވީމަ، ޝަހާއެކޭ އެއްފަދައިން ފާތުމަތަށްވެސް އަހަރެން ކައިރިން ކަންކަމު ކިޔުމުގެ ޙައްޤު އޮންނާނެ. އިންޝާﷲ ފާތުމަތުގެ ތި އެދުން ފުރިހަމަ ކޮށްދޭނަނަން. އެކަމަކު މިވަޤުތު އިހަށް ގެއަށް ގޮސްލާނަން އިނގޭ. މިހާރު އެއޮއް އިރުވެސް އޮއްސުނީ. ނަމާދު ވަޤުތުވެސް ޖެހުނީ. ދެން އެހެން ނޫނަސް ބޯކިބާވެސް އެޅޭނީ ގެއަށްވެސް ގޮސްގެންތާ ދޯ.“ އެއްލޯ މަރާލަމުން ޝަހާގެ މަންމަ ފާތުން ކައިރިއަށް ގުދުވެލާފައި ސަމާސާ ގޮތަކަށް ބުނެލިއެވެ. ޝަހާވެސް އަނެއް ދުވަހު އަންނާނަން ކަމަށް ބުނެ، މަންމަ ގޮވައިގެން ދިޔުމަށް ހިނގައިގަތެވެ. ”ދެން އެހެން ވިއްޔާ ސެލިބްރޭޓް ކުރާނީ މާދަމާ ހަވީރު. އޭރުންތާ ޝަހާ އަދި އަޙްސަންވެސް ފްރީ ވެގެން އާދެވޭނީ ދޯ.“ ޕާރޓީ ބޭއްވުމާއިމެދު ފާތުންގެ ޚިޔާލު ފާޅުކޮށްލިއެވެ. ”ތީ އަދި މާރަނގަޅު ގޮތެއް.“ ކޮޓަރިން ބޭރަށް ނިކުންނަން ދަމުން ޝަހާ ބުނެލިއެވެ.

ޝަހާ މަންމަ ގޮވައިގެން ކާރުގައި ގެއަށް ދިޔަ މަގުމަތީގައި، ޝަހާ މަންމަގެ ހިތުގައި ފާތުންއާއި ގުޅޭގޮތުން އުފެދިފައިވާ ހުރިހާ ސުވާލެއްގެ ޖަވާބު ހޯދަން ބޭނުންވެގެން ސުވާލުކުރަން ފެށިއެވެ. ”މަންމަގެ ފަރާތުން ތި ސުވާލުތައް އަންނާނެކަން މާކުރިންވެސް އެނގޭ.“ ޝަހާ ބުނެލިއެވެ. ”ދެން އެހެން ވިއްޔާ މަންމަ ކައިރީގަ ބުނެ ނުދެވޭނެ ކަހަލަ ކަމެއް އޮތީތަ؟ ޝަހާއަށްވެސް އެނގޭނެ ފާތުމަތަކީ މަންމައަށްވެސް ކިހާ ޚާއްޞަ ކުއްޖެއްކަން.“ ޝަހާގެ މަންމަ ފާތުންގެ މާޒީ އޮޅުންފިލުވުމަށް ކެތްމަދުވެފައި އިން ކަހަލައެވެ. ”ނޫން މަންމާ، އެކަހަލަ އެއްވެސް ކަމެއް ވެގެންނެއް ނޫން. އެކަމަކު..“ ”އެކަމަކު ކިހިނެއްވީ؟ މަންމައަށް ހާދަ ހީވެޔޭ ފާތުމަތާ ގުޅިފައޮތް ވަރަށް ބޮޑުކަމެއް ޝަހާ މަންމައަށް ސިއްރުކުރާހެން.“ ވަރަށް ކަންބޮޑުވެފައި އިންކަހަލަ ގޮތަކަށް ޝަހާއާއި ދިމާއަށް ބަލައިލަމުން މަންމަ ބުނެލިއެވެ. ”ތެދުތެދަށް ބުނާނަމަ މަންމައަށް އެއްވެސް ކަމެއް ސިއްރު ކުރަނީކީ ނޫން. ދެންމެގަ މަންމަ ތިބުނީނު ފާތުންއަކީ މަންމައަށް ކިހާ މުހިންމު މީހެއްކަން. އެހެންވީއިރު، ފާތުންގެ ދިރިއުޅުމުގެ ޙަޤީޤަތް އަޑުއަހާކަށް މަންމައަކަށް އެހާ ފަސޭހައެއް ނުވާނެ. މަންމަ ކައިރީގަ އެއްވެސް ވާހަކައެއް ބުނެނުދެވިގެން މިއުޅޭ އަސްލު ސަބަބަކީ އެއީ.“ ހުރިހާ ވާހަކައެއް ކިޔައިދޭން ބޭނުންވިޔަސް ފާތުންގެ ވާހަކަތައް ކިޔައި ނުދެވިގެން އުޅޭ ސަބަބު ޝަހާ މަންމައަށް ތެދުތެދަށް އޮޅުން ފިލުވައިދިނެވެ. ”އެކަމަކުވެސް މަންމަ ބޭނުން ފާތުމަތާ ބެހޭގޮތުން ޝަހާއަށް އެނގޭ ހުރިހާ އެއްޗެއްވެސް އޮޅުންފިލުވަން. އޭރުންތާ މަންމައަށްވެސް ދެން ކަންތައް ކުރަންވީ ގޮތްވެސް އެނގޭނީ ދޯ.“ ޝަހާ މަންމަގެ ވާހަކަ ކުރިޔަށް ގެންދަމުން އިތުރަށް ސުވާލު ކުރިއެވެ. ”ދެން އެހެންވިއްޔާ ބުނެބަލަ، މަންމަ ފާތުމަތު ކައިރީގަ އޭނަގެ ފިރިމީހާޔާ ބެހޭގޮތުން ސުވާލު ކުރީމަ ފާތުމަތު އޭގެ ޖަވާބު ނުދިނީ ކީއްވެ؟ މަންމައަށް އެނގޭ އެސުވާލުގެ ޖަވާބު ޝަހާއަށްވެސް އެނގޭނެކަން.“ އެސުވާލަކީ މަންމަގެ ފަރާތުން އަންނާނެ ސުވާލެއްކަން ޝަހާއަށް މާކުރިންވެސް އެގެއެވެ. ”ފާތުންއަކީ މިހާރަކު މީހެއްގެ އަތްބެއް ނޫން. އޭނަ ވަރިކުރިތާ ދުވަސްކޮޅެއް ވެއްޖެ.“ ”ކީކޭ؟ ފާތުމަތު ވަރި ކޮށްފައޭ؟ އޭނަ އިނދެގެން އުޅުނީ އެރަށު މީހަކާތަ؟“ ޝަހާގެ މަންމައަށް ލިބުނު ސިހުމާއިއެކު، އިތުރަށް އޮޅުން ފިލުވަން ބޭނުންވިއެވެ. އެވަޤުތު ޝަހާ އޭނާގެ ކާރު އޭގެ މަޑު ދުވެލީގައި ދުއްވާފައި ގޮސް، ގެއާއި އަރާ ހަމަކުރިއެވެ. ކާރުގެ އިންޖީނު ނިވާލުމަށްފަހު ދޮރު ހުޅުވާލާފައި ކާރުން ފައިބާ، އަނެއް ފަރާތަށް ގޮސް އޭނާގެ މަންމަ ފޭބުމަށް ދޮރު ހުޅުވާލަ ދިނެވެ. ”ޝަހާ ކީއްވެތަ މަންމަގެ މި ސުވާލުތަކަށް ޖަވާބު ނުދޭން ތިއުޅެނީ؟“ ޝަހާގެ މަންމަ ކޮންމެވެސް ވަރަކަށް ހިތްހަމަ ނުޖެހިފަ ހުރިހެން ޝަހާއަށް ހީވާން ފެށިއެވެ. ”މަންމަ އިހަށް ގޭތެރެއަށް ހިނގާބަލަ. މިތާ މަގުމަތީގަ ހުރެގެން ވާހަކަ ދެއްކުމަށްވުރެ ރަނގަޅުވާނީ ގެއަށް ވަދެ ވާހަކަ ދެއްކުމެއްނު ދޯ.“

އެވަޤުތު ކޮންމެވެސް މީހަކު ފަހަތުން އައިސް ގޮވާލިހެން ހީވެގެން ދެމައިން އެއްފަހަރާ ފަހަތަށް ބަލައިލިއެވެ. ފަހަތުން އައިސް އެދެމައިން ކައިރިޔަށް ހުއްޓުނީ ފާތުންގެ ކުޑަބެގެ ދެމަފިރިންނެވެ. ފަހަތުން ގޮވާލީ ފާތުން ކުޑަބެގެ އަނބިމީހާއެވެ. ފާތުން ކިޔާގޮތުން ނަމަ ކުޑަބެ ދައްތައެވެ. ޝަހާގެ ދެމައިން ކައިރިޔަށް އައިސް ފާތުންއާއި ބެހޭގޮތުން ޝަހާއާއި ކުޑަބެ ދައްތަ ސުވާލުކުރިއެވެ. ”ޝަހާ އެކޮއެ ފާތުމަތުގެ އެއްވެސް ޚަބަރެއް ނުވޭތަ؟ މާލެއިން ދިޔަ ފަހުން އަހަރުމެންނަކަށްވެސް އެއްވެސް ޚަބަރެއް ނުވޭވިއްޔަ ދޯ ސަޢީދު. ޝަހާ ތިޔައީ އޭނަގެ އެންމެ ގާތް އެކުވެރިޔާ. ހަމަ ގައިމުވެސް ޝަހާއާއި ގުޅުން އޮންނާނެއެއްނު. އަހަރެން އެއްގޮތަކަށްވެސް ހިއެއް ނުކުރަން ފާތުމަތު އެހެން ވާނެ ކަމަކަށް. ފާތުމަތަކީ ދޮންބޭބެ ނުލާހިކު ލޯބިން ގެންގުޅެ ބޮޑުކުރި ދަރިއެއް. އަހަރުމެންވެސް އޭނައާއިމެދު ދެކެނީ ދަރިއެއް ގޮތަށް. އެހެން ހަދާނެ ކަމަކަށް ހިތަކަށްވެސް ނާރާ ދޯ ސަޢީދު“. ފާތުންގެ ކުޑަބެވެސް އޭނަގެ އަނބިމީހާގެ ބަހަށް އެއްބަސްވުމުގެ ގޮތުން އާނއެކޭ ބުނެލިއެވެ. އެހެންނަމަވެސް ކުޑަބެގެ މޫނުމައްޗަށް ވެގެން ދިޔަގޮތް ޝަހާ ވަރަށް ރަނގަޅަށް ފާހަގަ ކުރިއެވެ. ކުޑަބެގެ ޙަޤީޤަތް ޝަހާއަށް އެނގޭކަމެއް ކުޑަބައަކަށް ނޭންގެއެވެ.  އެވަޤުތު ޝަހާގެ މަންމަ ފާތުންގެ ވާހަކަ ބުނަން އުޅޭހެން ހީވެގެން ޝަހާ އެކަމަށް ހުރަސް އެޅުމުގެ ގޮތުން ވާހަކައިގެ މަޢުލޫ ބަދަލުކޮށްލިއެވެ. ޝަހާ މަންމަގެ އަތުގައި ހިފާ، މަޑުމަޑުން އަތަށް ފިތާލުމާއިވެސް އެކުގައެވެ. ”ކުޑަބެ ކިހިނެއްތަ؟ ހާދަ ދުވަހެއް ކޮށްލާފައޭ ދޯ މިދިމާވީ؟ ކުޑަބެ ދައްތަ ރަނގަޅުތަ؟“ އެދެމަފިރިންނަށް ޝަހާ ކުރިމަތި ކުރުވި ސުވާލުތަކުން، އެދެމަފިރިން ކުރި އެއްވެސް ސުވާލަކަށް ޝަހާ ޖަވާބުދޭން ބޭނުން ނުވާކަން ޝަހާ މަންމައަށް ވިސްނުނެވެ. އެހެންކަމުން، ޝަހާ މަންމަ އިޚްތިޔާރުކުރީ ހަނު ހުރުމަށެވެ. ”އާނ ދެން މާކަށް ގޯހެއް ނޫން. އެކަމަކު ޑޮކްޓަރަކަށް ދައްކައިފިއްޔާ ކޮންމެސް މައްސަލައެއްގެ ވާހަކަ ބުނާނެތާ ދޯ. ކޮންމެސް ވަރަކަށް ލޭ މަތިވެގެން މިއުޅެނީ. އަނެއްހެން ދެން ހުރިހާ ކަމެއްވެސް ރަނގަޅު.“ ”އެހެންތަ؟ ބަލައިގެން އުޅެއްޗޭ ކުޑަބޭ. ޤަވައިދުން ބޭސްކާން ހަނދާން ކުރަންވާނެ އިނގޭ. ދެން ގޮސްލާނަން އިނގޭ. ވަރަށް ބޮޑަށް ލަސްވެސް ވެއްޖެ.“ ޝަހާ މަސައްކަތް ކުރީ ފާތުންއާއި ބެހޭގޮތުން އިތުރު ސުވާލެއް ކުރުމުގެ ކުރިން އެތަނުން ދިއުމަށެވެ. ”އާން އެންމެ ރަނގަޅު. އެކަމަކު ފާތުމަތުގެ ޚަބަރެއް ވިއްޔާ އަންގާލައްޗޭ އިނގޭ.“ ޖަވާބުގައި ހީނލާފައި ޝަހާ އޭނާގެ މަންމަ ގޮވައިގެން ގެއާއި ދިމާއަށް މިސްރާބު ޖެހިއެވެ.

ގޭތެރެއަށް ވަނުމާއިއެކު، އޭރުގައި  ޝަހާ މަންމައާއި ދެއްކި ވާހަކައަށް އަޅާނުލާ ކޮޓަރިއާއި ދިމާއަށް މިސްރާބު ޖެހުމުން ޝަހާ މަންމަ ކައިރިޔަށް ކޮންމެވެސް ވަރަކަށް ހިތްހަމަ ނުޖެހުނެވެ. އަދި ތަންކޮޅެއް އަޑު ހަރުކޮށް ޝަހާއަށް ގޮވާލިއެވެ. ކޮންމެވެސް ވަރަކަށް ކަންބޮޑުވެ ހުރެ، ޝަހާ އޭނާގެ މަންމައާއި ދިމާއަށް އެނބުރިލިއެވެ. ފާތުންގެ ފުރިހަމަ މަޢުލޫމާތު މަންމައަށް ނުދީ ދެން ސަލާމަތްވާން ނެތްކަން ޝަހާއަށް އެނގުނެވެ. އެހެންކަމުން މަންމަ ކައިރިޔަށް ގޮސް ސިޓިންގރޫމްގެ ސޯފާގައި އިށީނުމަށް އިޝާރާތް ކޮށްލަމުން ޝަހާވެސް އިށީންދެލިއެވެ. އަދި އޭނާގެ މަންމަގެ އަތްމަތީގައި މަޑުމަޑުން އަތް ބާއްވާލަމުން ދައްކަން އުޅޭ ވާހަކަ ވަރަށް ކެތްތެރި ކަމާއި ހިތްވަރާއިއެކު، އަޑުއެހުމަށް އިލްތިމާސް ކުރިއެވެ. ޝަހާ މަންމަގެ މޭ ބާރަށް ތެޅެން ފެށިކަހަލައެވެ. އެހެނީ ޝަހާ ދައްކަން އެއުޅެނީ ކުޑަ ކަމެއްގެ ވާހަކައެއް ނޫންކަން މަންމައަށް އިޙުސާސް ކުރެވުނެވެ. ”އަނެއްކާ ކޮންކަހަލަ ވާހަކައެއް؟ ކޮންމެ ކަހަލަ ވާހަކައަކަށް ވިޔަސް މަންމަ ހިތްވަރު ކުރާނަން އިންޝާﷲ. ދަރިފުޅު އެއްވެސް ވާހަކައެއް ސިއްރު ނުކޮށް ފާތުމަތުގެ ހުރިހާ ވާހަކައެއްވެސް މަންމައަށް ކިޔައިދީ.“ ފުން ނޭވާއެއް ލުމާއިއެކު، ފާތުން މާލެ ދޫކޮށްލާފައި ރަށަށް ހިޖުރަކުރި ސަބަބުން ފެށިގެން މިހާތަނަށް ޖެހެންދެން  ޝަހާއަށް އެނގިފައޮތް ހުރިހާ ވާހަކައެއް ޝަހާގެ މަންމައަށް ކިޔައިދިނެވެ. އެހުރިހާ ވާހަކަތަކެއް ކިޔައިދީ ނިމުނުއިރު، ޝަހާގެ މަންމަގެ ލޮލުން ހިފެހެއްޓުމެއްނެތި ކަރުނަ ފައިބަމުން ދިޔައެވެ. ޝަހާއަށްވެސް އިނީ ރޮވިފައެވެ. ފާތުންގެ ކުޑަބެ ދައްތަ ކުރި ސުވާލުތަކަށް ޝަހާ ޖަވާބު ނުދިނީ ކީއްވެގެންކަންވެސް މިހާރު ޝަހާގެ މަންމައަށް ވަރަށް ރަނގަޅަށް އޮޅުން ފިލައިފިއެވެ. އަދި ފާތުންގެ ކުޑަބެއަށް ޓަކައި ޝަހާ މަންމަގެ ހިތުގައި ޤަދަރާއި އިޙުތިރާމް މުޅިން ނެތިގެން ދިޔައެވެ.

އެރޭގެ ކެއުމަށް އިންސާފު ކުރުމަށް ކާމޭޒުދޮށުގައި އިށީނުމާއިއެކު، ފާތުންގެ ޚަބަރެއް ބަލައިލަން ޝަހާގެ ހިތަށް އެރިއެވެ. އެހެންކަމުން، އަޙްމަދުގެ ފޯނަށް ގުޅައިގެން ފާތުންއާއި ވާހަކަ ދެއްކިއެވެ. ފާތުން ބުނި ގޮތުގައި އެއިރު ކޮންމެވެސް ވަރަކަށް ދަށްބަނޑުގައި ރިހުން ހުއްޓެވެ. އަދި ފާތުން ކައިރީގައި އަޙްސަން އެބައިން ކަމަށްވެސް ބުންޏެވެ. ފާތުންއާއި ބެހޭގޮތުން އަޙްސަންއަކަށްވެސް އަދި މާބޮޑު އެއްޗެއް ނޭންގެއެވެ. ހަމައެކަނި ފާތުންގެ ބޮޑުދައިތަ ހައްވަ ދިން މަޢުލޫމާތެއް ފިޔަވައެވެ. އެހެނީ ޝަހާއަކަށްވެސް ހަމަޖެހިލައިގެން އަޙްސަންއަށް އެއްވެސް އެއްޗެއް ކިޔައިދޭނެ ވަޤުތެއް ނުލިބެއެވެ. ޝަހާ ބޭނުންވަނީ ހުރިހާ ވާހަކަތަކެއްވެސް އަޙްސަންއަށް ކިޔައިދޭށެވެ. އެހުރިހާ ކަމެއް އެނގުމުން ދެން އަޙްސަން ކަންތައް ކުރާނެ ގޮތެއް ބަލަންވެސް ޝަހާ ބޭނުންވެއެވެ. ކޮންމެ ގޮތެއްވިޔަސް ފާތުންގެ ދިރިއުޅުން އަލުން އާރާސްތުކުރަންވެސް ޝަހާ ބޭނުންވެއެވެ. ޝަހާ ޤަބޫލުކުރާ ގޮތުގައި އެކަން އެންމެ ފުރިހަމައަށް ކޮށްދެވޭނެ މީހަކީ އަޙްސަންއެވެ. އެހެންނަމަވެސް ފާތުންގެ ޙަޔާތުގެ ހިތި ޙަޤީޤަތް އެނގުމުން ދެން ފާތުންއާއިމެދު އަޙްސަން ދެކޭނީ ކިހިނެއްކަމެއް ޝަހާއަކަށް ނޭންގެއެވެ. އަޙްސަން، ފާތުންދެކެ ޙަޤީޤަތުގައިވެސް ލޯބިވާނަމަ، ކޮންމެ ޙާލެއްގައިވެސް އަދި ކޮންމެފަދަ ޙާލަތެއްގައިވެސް ފާތުން ބަލައިގަންނާނެއެވެ. ޝަހާގެ ހިތުގެ ކަނެއްގައި އަޙްސަންއަށް ޓަކައި ލޯތްބެއް ފޮރުވިފައި އޮތުން އެއީ އެހެން ކަމެއްތާއެވެ. އެއީ އެހާ ފަސޭހައިން ނެތިގެން ދާނެ އެއްޗެއް ކަމަކަށް ޝަހާގެ ހިތް ޤަބޫލެއް ނުކުރެއެވެ. އެހެނަސް ފާތުންގެ ދިރިއުޅުން އާރާސްތުކުރުން މިހާރު ޝަހާއަށް މާ މުހިންމެވެ. ފާތުންއާއި ވާހަކަ ދައްކާ ނިންމާލުމަށްފަހު، ކާން ފެށުމުގެ ކުރިން އަނެއްކާވެސް ފޯނު ނަގާ ކޮންމެވެސް މީހަކަށް ގުޅާލިއެވެ. މިފަހަރު ގުޅީ ޑރ. ފަރީޝާއަށެވެ. ފާތުން އޭނާގެ ބަނޑުގައި ރިއްސާ ވާހަކަ ބުނުމުން އެކަމާ ބެހޭގޮތުން ފަރީޝާއާއި މަޝްވަރާ ކޮށްލަން ބޭނުން ވެގެންނެވެ. ފާތުންގެ ޙާލު ފަރީޝާއަށް ކިޔައި ދިނުމުން އަނެއް ދުވަހު ޑިއުޓީއަށް ގޮސް އެންމެ ފުރަތަމަވެސް ފާތުން ކައިރިއަށް ދާނެ ކަމުގެ ޔަޤީންކަން ފަރީޝާ ޝަހާއަށް ދިނެވެ. އެގޮތުގެ މަތިން ހިތްހަމަ ޖައްސާލައިގެން ޝަހާ ދިޔައީ ނިދާށެވެ. އަނެއް ދުވަހުގެ ހެނދުނުގެ ޑިއުޓީ އޮތުމާއިވެސް އެކުގައެވެ.

ކޮޓަރިއަށް ވަދެ، އެދުގައި އޮށޯވެލުމާއިއެކު، އަނެއްކާވެސް ވިސްނެން ފެށުނީ ފާތުންގެ ޑައިރީއިން ޝަހާއަށް އެނގިފައިވާ އެއްޗެއް އަޙްސަންއަށް ކިޔައިދޭނެ ގޮތަކާއި މެދުގައެވެ. އެހެންކަމުން ފޯނު ނަގާ، އަޙްސަންއަށް މެސެޖެއް ކުރިއެވެ. މާދަމާ ބައްދަލު ކޮށްލަން ބޭނުންވާ ވާހަކަ ބުނުމަށެވެ. ފާތުންއާއި ބެހޭގޮތުން ދައްކަން ވެފައި އޮތް ވާހަކައެއް އޮތްކަމަށްވެސް މެސެޖުގައި ބުނަމުންނެވެ. މާގިނައިރުތަކެއް ނުވެ އަޙްސަންގެ ޖަވާބުވެސް އައެވެ. އޮފީސް ނިންމާލާފައި މެންދުރު ކެއުމަކަށް ދިއުމަށް ޝަހާއަށް ދަޢުވަތު ދިނެވެ. ޝަހާވެސް އެގޮތަށް އެއްބަސް ވިއެވެ. ފޯނު ބޭއްވުމާއިއެކު، އެކި ކަންކަމާމެދު ވިސްނަން އޮއްވާ ޝަހާއަށް ނިދުނީ ކޮންއިރަކު ކަމެއްވެސް ނޭންގެއެވެ. ޝަހާއަށް ސިއްސައިގެން  ހޭލެވުނީ ފޯނު ރިންގްވާ އަޑަށެވެ. ފޯނު ނަގާ ބަލައިލިއިރު، އަނެއްކޮޅުން ގުޅަނީ އަޙްމަދުކޮއްކޮއެވެ. ރަނގަޅަށް ލޯ ހުޅުވާލާފައި ފާރުގައި ހުރި ގަޑިޔާއި ދިމާއަށް ބަލައިލިއެވެ. މެންދަމު އެއްގަޑި ތިރީސް ވަނީއެވެ. މިހާ ދަންގަޑިއެއްގައި އަޙްމަދުކޮއްކޮ ގުޅާނީ ވަރަށްބޮޑު ކަމެއް ވެގެންކަން ޝަހާއަށް އެނގުނެވެ. އެހެންކަމުން ވަރަށް ބިރުން އިނދެ ފޯނު ނެގިއެވެ. އަނެއްކޮޅުން އަޙްމަދު ވާހަކަ ދެއްކިއިރު ހުރީ ރޮވިފައެވެ. އަދި ވީ އެންމެ އަވަހަކަށް ހޮސްޕިޓަލަށް އައުމަށް ޝަހާގެ ކިބައިން އެދުނެވެ.

• ނުނިމޭ –