ޝަހާ ކަންބޮޑުވާގޮތް ވިއެވެ. ”އަނެއްކާ ކިހިނެއްވީ އަޙްމަދުކޮއްކޯ؟ ފާތުންއަށް ކަމެއްވީތަ؟“ ޝަހާ ބިރުން ތުރުތުރު އަޅަން ފެށިއެވެ. ”އަހަރެން މި ގުޅަނީ ފަރީޝާއަށް.“ ޝަހާ ހަދާނެގޮތް ހުސްވި ކަހަލައެވެ. ”ޑރ. ފަރީޝާ އެބަ ހުންނެވި މިތަނުގަ. ޑރ. ބުނުއްވީ ޝަހާދައްތައަށް ގުޅާށޭ. އަދި ބުނުއްވީ ވަރަށް އަވަހަށް އަންނަން ބުނާށޯ.“ މިރޭ އިރާކޮޅު ގުޅައިގެން ވާހަކަ ދެއްކިއިރުވެސް ކޮންމެވެސް ވަރަކަށް ބަނޑުގައި ރިއްސާތީ އުޅުން ވާހަކަ ފާތުން ބުނިކަން ޝަހާ ކުއްލިޔަކަށް ހަނދާންވިއެވެ. އެއީވެސް ޝަހާގެ ކަންބޮޑުވުން އިތުރުވި ކަމެކެވެ. އެޚިޔާލު އައުމާއިއެކު،  ޝަހާ އަވަސްވެގަތީ، މަންމައަށް ގޮވުމަށެވެ. އެހެނީ ޝަހާ އޭނާގެ މަންމަ ކައިރީގައި ނުބުނެ ހޮސްޕިޓަލަށް ހިނގައްޖެނަމަ ކަންބޮޑުވާނެތިއެވެ. އަދި ހަމަ އެހެންމެ މަންމަ ހިތްހަމަ ނުޖެހޭނެކަން އެނގޭތީވެސް މެއެވެ. ދުވެފައި ގޮސް މަންމަގެ ކޮޓަރީގައި ޓަކި ޖަހަން ފެށިއެވެ. ކަންބޮޑުވެފައި ހުރިވަރުން ދޮރުގައި ޓަކިޖެހުނީ ކިހާ ބާރު މިނެއްގައި ކަންވެސް ޝަހާއަކަށް އިހުސާސެއް ނުކުރެވުނެވެ. މަންމަ ސިއްސައިގެން ގޮސް ފުންމައިގެން އެނދުން ތެދުވެ، ދުވެފައި ކަހަލަ ގޮތަކަށް އައިސް ކޮޓަރި ދޮރު ހުޅުވާލިއެވެ. ޝަހާ ހުރިގޮތް ފެނިފައި މަންމަ ކަންބޮޑުވިއެވެ. އަދި ކިހިނެއްތޯވީ ސުވާލުކުރިއެވެ. ބުނެވޭ ނުބުނެވޭ އެއްޗެއް ނޭންގޭ ޙާލު އަވަހަށް ހޮސްޕިޓަލަށް ދިއުމަށް ތައްޔާރުވުމަށް މަންމަ ކައިރީގައި ބުންޏެވެ. ހަމަ އެވަޤުތު އަމިއްލަ ކޮޓަރިއާއި ދިމާއަށް ދުއްވައިގަތެވެ. ވާނުވާ ނޭންގޭ ޙާލު މަންމަވެސް އަވަސްވެގަތީ ތައްޔާރުވާށެވެ. އެހެނީ ވަރަށް ބޮޑު ކަމެއް ދިމާވެގެން މެނުވީ އެފަދަ ވަޤުތެއްގައި އަވަހަށް ހޮސްޕިޓަލަށް ދިއުމަށް ޝަހާ ނުބުނާނެކަން އެނގޭތީވެސް މެއެވެ. ގާތްގަނޑަކަށް ފަސްވަރަކަށް މިނެޓް ތެރޭގައި ޝަހާ  ތައްޔާރުވެގެން ނިކުމެ މަންމައަށް ގޮވަން ފެށިއެވެ. އަދި ވަރަށް އަވަސްކުރުމަށް އެދުނެވެ. މަންމަވެސް ވީއެންމެ އަވަހަކަށް ތައްޔާރުވެގެން ނިކުމެއްޖެއެވެ.

ޝަހާ މަންމަ ގޮވައިގެން ހޮސްޕިޓަލަށް ދިޔައީ، މީގެ ކުރިން ދުވަހަކުވެސް ދުއްވާފައި ނުވާހާ ބާރު ދުވެއްޔެއްގައި ކާރު ދުއްވާފައެވެ. ހޮސްޕިޓަލާއި ހަމައަށް  ދެވުމުން، އަވަސް އަވަހަށް ކާރު ޕާކު ކުރުމަށްފަހު މަންމައަށް އަވަހަށް އައުމަށް ބުނުމާއިއެކު، ފާތުން އެނދުމަތި ކޮށްފައި އޮތް ކޮޓަރިއާއި ދިމާއަށް ދުއްވައިގަތެވެ. މަންމަވެސް ދުވަމުން ކަހަލަ ގޮތަކަށް ފަހަތުން ދިޔައެވެ. ވާނުވާ ނޭންގޭ ޙާލުގައެވެ. އެހެނީ އިރާކޮޅު ފާތުންއާއި ގުޅައިގެން ވާހަކަ ދެއްކިނަމަވެސް އޭގެ އެއްވެސް މަޢުލޫމާތެއް ޝަހާ މަންމައަކަށް ނުދެއެވެ. ވާނީވެސް އެހެންތާއެވެ. ހަވީރު ފާތުންއާއިއެކު ހޭދަކުރި މަޖާ އަދި ހިތްހަމަ ޖެހޭ ވަޤުތުކޮޅަށް ފަހު، މިފަދަ ކަމެއް ދިމާވެދާނެ ކަމަށް ޝަހާ ހިތަށްވެސް ނާރައެވެ. އެހެންކަމުން އެއީ މާބޮޑު ކަމެއްގެ ގޮތުގައި ނަގާކަށް އެވަޤުތު ޝަހާގެ ހިތަކަށްވެސް ނާރައެވެ. ޝަހާ ދުވެފައިގޮސް ކޮޓަރީގެ ދޮރު ހުޅުވާލި ވަޤުތަކީ ވިއްސާ ކޮޓަރިއަށް ފާތުން ގެންދިއުމަށް ތައްޔާރުވަމުން ދިޔަ ވަޤުތެވެ. އެއިރު ފާތުން އަޑުން އަޑުނަގާ ރޮނީއެވެ. ތެޅިފޮޅެމުންނެވެ. އެމަންޒަރު ފެނުމާއިއެކު، ފާތުންގެ ބަނޑުގައި ވަރަށް ބޮޑަށް ރިހޭކަން ޝަހާއަށް އެނގުނެވެ. ފާތުން ސްޓެރެޗަރއަށް ލުމަށްޓަކައި އެނދުން އުފުލައިލި ވަޤުތު ޝަހާ ފެނުމުން، ޝަހާއާއި ދިމާއަށް އަތް ދިއްކޮށްލިއެވެ. އަދި ފާތުންގެ ކައިރިއަށް އައުމަށް އެދުނެވެ. ޝަހާ ވަރަށް ބާރަށް ގޮސް ފާތުންގެ އަތުގައި ހިފިއެވެ. ރޮވިފައިވާ ޙާލުގައި ހުރެއެވެ. ހަމަ އެހާމެ ބިރުވެސް ގަތްފައި ހުރެވެސް މެއެވެ. ޝަހާއަކީ ޑޮކްޓަރަކަށް ވިއެއްކަމަކު، މިއީ ޝަހާގެ އެހާ ގާތް މީހަކު އެފަދަ ޙާލެއްގައި އޮއްވާ، ފެނުނު ފުރަތަމަ ފަހަރެވެ. ބިރުގަތުމުގެ އަސްލަކީ އެއީ ކަމަށްވެސް ވެދާނެއެވެ. ޝަހާ ގޮސް ފާތުންގެ އަތުގައި ހިފުމުން، ފާތުންވެސް ޝަހާގެ އަތުގައި ބާރަށް ހިފާ ފިތާލިއެވެ. ފާތުންގެ ކައިރިން ދުރަށް ނުދާށޭ ބުނާކަހަލަ ގޮތަކަށެވެ. އެވަޤުތު ޝަހާގެ މަންމަވެސް  އައިސް ކޮޓަރިއަށް ވަނެވެ. އަދި ފާތުންގެ ޙާލަތު ފެނިފައި ޝަހާ މަންމަވެސް ކަންބޮޑު ވިއެވެ.  ދަރިފުޅާ ފާތުމަތުއޭ ގޮވާލުމާއިއެކު، ކައިރިއަށް ގޮސް ހުއްޓުނެވެ. ހައްވަ އަދި އަހްމަދުގެ ޙާލަތުވެސް ވަކި ރަނގަޅެއް ނޫނެވެ. އެހެނީ މި މަންޒަރަކީ އެދެމައިންނަށް އައު މަންޒަރެއް ނޫނެވެ. މީގެ ކުރިން ފާތުންއަށް މިހެން ދިމާވުމުން ދެން ނިކުތް ނަތީޖާވެސް އެންމެ ގާތުން ފެނިފައިވަނީ އެދެމައިންނަށެވެ. ވީމާ، އެކަމުގެ ބިރުވެސް އެދެމައިންގެ ހިތުގައި އޮންނާނެތާއެވެ.

”ޝަހާ، މަގޭ ދަރިފުޅު. މަ ބޭނުމެއް ނޫން މި ދަރިފުޅު މަގޭ އަތުން ބީވެގެން ދާކަށް.“ އާދޭސް ކުރާ ކަހަލަ ގޮތަކަށް ރޮމުން ފާތުން ބުނެލިއެވެ. ފާތުންއަށް އޭގެ ޖަވާބު ދިނުމުގެ ބަދަލުގައި ޝަހާ ބަލައިލީ ޑރ. ފަރީޝާއާއި ދިމާއަށެވެ. ސުވާލުން ފުރިގެންވާ ނަޒަރަކުންނެވެ. އެވަޤުތު ފަރީޝާގެ މޫނުމަތިން ފެނުނީ ނާއުންމީދީ ޝުޢޫރެކެވެ. ފާތުންގެ ދަރިފުޅު ސަލާމަތް ކުރެވޭނެ ކަމުގެ ޔަޤީންކަން ނެތްކަމަށް ބުނާކަހަލައެވެ. ޝަހާގެ ލޮލުން ހިފެހެއްޓުމެއްނެތި ކަރުނަ އޮހެން ފެށިއެވެ. އެހެން ނަމަވެސް އުންމީދު ކަނޑާލާކަށް ޝަހާ ބޭނުމެއް ނޫނެވެ. އެވަޤުތު ފާތުންއާއި ދިމާއަށް އެނބުރިލުމާއެކު، ފާތުންގެ އުންމީދު އައު ކޮށްދެވޭތޯ މަސައްކަތް ކުރިއެވެ. ”ފާތުން އިންޝާﷲ ހުރިހާ ކަމެއްވެސް ރަނގަޅުވާނެ. އެހާބޮޑަށް ސްޓްރެސް ނުވެ ވޭތޯ ބަލާ. ފާތުން ކައިރީގަ އަހަރެން އެބަ ހުރީމޭ. ބަލާބަލަ، ހުރިހާ އެންމެންވެސް އެބަ ތިއްބޭ. ފާތުން ތީ ރިޔަލް ފައިޓަރއެއްނު ދޯ.“ އެކި ގޮތްގޮތަށް މަސައްކަތް ކޮށްގެން ފާތުން ހަމަ ޖެއްސޭތޯ ޝަހާ މަސައްކަތް ކުރަމުން ގެންދިޔައެވެ. ހިތް ބިރުގެންފައިވާ ޙާލުގައި ހުރެމެއެވެ. އެހެނަސް މިފަދަ ދަނޑިވަޅެއްގައި ޝަހާގެ ހިތުގައި އޮތް ބިރު ފާތުންއަށް އެނގޭކަށް ޝަހާ ބޭނުމެއް ނުވެއެވެ. ”އެކަމަކު ހާދަ ބޮޑަކަށް ބަނޑުގަ އެބަ ރިއްސައޭ. ކުރިންވެސް ވީ މިހެން ވިއްޔަ. އޭރުވެސް އަހަރެންނަށް އަހަރެންގެ ދަރިފުޅު ނުފެނޭ. ކޮންމެ ފަހަރަކު އެހެންވަނީ. ކީއްވެތަ ޝަހާ“ ފާތުންގެ އެވާހަކަތައް އަޑު އިވިފައި ހައްވައަކަށް ކެތެއް ނުވިއެވެ. އެހެނަސް ފާތުންއަށް އެމަންޒަރު ފެނިދާނެތީވެސް ހައްވަ ކަންބޮޑުވިއެވެ. އެހެންކަމުން ފާތުންއަށް ނޭންގޭ ގޮތަށް މަޑުމަޑުން ކޮޓަރިން ބޭރަށް ނިކުތެވެ. އަޙްމަދުވެސް އޭނާގެ މަންމަ ފަހަތުން ބޭރަށް ނިކުތެވެ. ”މަންމާ. މަންމަ ހިތްވަރު ކޮށްގެންނު ދޮންތައަށް ހިތްވަރު ދެވޭނީ. އަހަރެންނަށްވެސް އެނގޭ މަންމަ ތި ވިސްނަނީ ކޮންކަމަކާ މެދުގަކަން. އަހަރެންވެސް މިހުންނަނީ ވަރަށް ހިތްވަރު ކޮށްގެން. މިވަޤުތު ދޮންތައަށް ބޭނުންވަނީ އަހަރުމެން އެންމެންގެ އަޅާލުމާ އެހީތެރިކަން. ހެޔޮނުވާނެ މަންމާ، ދޮންތަ ކުރިމަތީގަ ނުރޮއްޗޭ.“ އަޙްމަދަށްވެސް ހުރީ ރޮވިފައެވެ. އޭނަގެ ދޮންތައަށް ދެން އިތުރު ތަކުލީފެއް ކުރިމަތިވާކަށް އަޙްމަދު ބޭނުމެއް ނޫނެވެ. އެހެނަސް ތަޤުދީރުގެ މައްޗަށް ބާރު ފޯރުވޭނީ ކާކަށް ހެއްޔެވެ. އެގޮތުގެ މަތިން މިއަދުވެސް އަޙްމަދު އެހުރީ ކެތްތެރި ވެގެންނެވެ. މިއަދު ކޮންމެ ގޮތަކަށް ކަންތައް ދިޔަސް، ފާތުންގެ ކުރިމަގުގައި އުފާވެރިކަން އޮންނާނެ ކަމުގެ އުންމީދު އަޙްމަދުގެ ހިތުގައި އެބައޮތެވެ. ކީއްވެގެން އަދި ކިހިނެއް ކަމެއްވެސް ނޭންގެއެވެ.

ވިއްސާ ކޮޓަރިއަށް ފާތުން ގެންދިއުމަށް މިސްރާބު ޖެހުމާއިއެކު، ޝަހާ މަޑުމަޑުން ޑރ. ފަރީޝާއަށް ގޮވާލިއެވެ. އެވަޤުތު ފަރީޝާވެސް ޝަހާއާއި ދިމާއަށް އެނބުރިލިއެވެ. ޝަހާ ކަންބޮޑުވެފައި ހުރިކަން ފަރީޝާއަށް އެނގެއެވެ. ”ޝަހާ، ފޯލްސް ހޯޕެއް ދޭކަށް ބޭނުމެއް ނޫން އިނގޭ. ވަރަށް ބޮޑަށް އިންފެކްޝަން އުފެދިފަ ހުރީ. އަދި އެވަރަށް ބްލީޑްވެސް ވޭ. އެހެންވީމަ، ދަރިފުޅު ސަލާމަތް ކުރެވޭނެ ކަމުގެ ޔަޤީންކަން ދޭކަށް ނުކެރޭނެ. ހަމަ ގައިމުވެސް ފާތުން ސަލާމަތް ވޭތޯ ބަލަން ޖެހޭނެތާ ދޯ.“ އެވަޤުތު ޝަހާގެ ފައިކޮޅުން ވާގިދާން އުޅުނުހެން ހީވެގެން ކައިރީގައި ހުރި ފާރުގައި މަޑުމަޑުން އަތް ވިއްދާލިއެވެ.

ޑރ. ފަރީޝާ މަޑުމައިތިރި ކަމާއިއެކު، ޝަހާގެ ކޮނޑުގައި އަތް ބާއްވާލިއެވެ. ހިތްވަރު ކުރާށޭ ބުނާކަހަލަ ގޮތަކަށެވެ. އެއަށްފަހު، ފާތުން ކައިރިއަށް ދިއުމަށް ހިނގައިގަތެވެ. އެހެނަސް އަނެއްކާވެސް ޝަހާއާއި ދިމާއަށް އެނބުރިލިއެވެ. މިވަޤުތު ފަރީޝާގެ މޫނުމަތިން ފެންނަން ހުރީ ޒާތެއްގެ ރުޅިވެރިކަމެކެވެ. ”ޝަހާ، ފާތުންގެ ޙާލަތު ކޮންމެ ގޮތަކަށް ދިޔަސް، ދަރިފުޅު ސަލާމަތްވިޔަސް ނުނީ ނުވިޔަސް އަހަރެންގެ ވަރަށް ބޮޑު ރިކުއެސްޓެއް އެބަ އޮތް.“ ޝަހާގެ ކޮނޑުގައި އަތް އަޅާލައިގެން ހުރެ ފަރީޝާ ވާހަކަ ދެއްކިއެވެ. ”ކޮންކަހަލަ ރިކުއެސްޓެއް؟“ ފަރީޝާ ބުނަން ބޭނުންވެގެން އެއުޅެނީ ކީކޭކަން ޚިޔާލަކަށްވެސް ގެންނާކަށް ޝަހާއަކަށް ނޭންގުނެވެ. ”ފާތުންއަށް މި ޙާލު ޖެއްސި މީހަކު ހުރިތާކުން ހޯދައިގެން އޭނައަށް ޙައްޤު އަދަބު ދޭންވާނެ. އެކަން ކުރެވޭނީ ޝަހާއަށް.“ ”އިންޝާﷲ، ފާތުންއަށް އިންސާފު ހޯދައިދިނުން އެއީ އަހަރެންގެ ޙަޔާތުގެ އެންމެ ބޮޑު އެއް މަޤްޞަދަށް ހަދާނަން. އަހަރެންނަށް ޔަޤީން މިކަމުގަ އަޙްސަންވެސް އެއްބާރުލުން ދޭނެކަން.“ އައަށްފަހު، ޑރ.ފަރީޝާ އަވަސްވެގަތީ ފާތުންގެ ފަރުވާއާއިގެން ކުރިއަށް ދިއުމަށެވެ.

މިހާރު ފަތިސް ވަނީއެވެ. ވާނުވާ ނޭންގޭ ހާލު، އެންމެންވެސް ތިބީ ވިއްސާ ކޮޓަރީގެ ބޭރުގައެވެ. ޑޮކްޓަރ ބޭރަށް ނިކުންނަވާ ދެއްވާނެ ޚަބަރެއްގެ އިންތިޒާރުގައެވެ. އަދިވެސް ފާތުންގެ ޚަބަރެއް ނުލިބެއެވެ. މިހުރިހާ ކަމެއްގެ ތެރޭގައި އުޅުނުއިރު، އަޙްސަންއަށް އަންގާލާކަށް ޝަހާގެ ޚިޔާލެއްވެސް ނެތެވެ. އެހެންނަމަވެސް މީގެ އިރުކޮޅެއް ކުރިން ޑރ. ފަރީޝާ، ޝަހާގެ ކިބައިން އެދުނު ކަންތަކާއިމެދު ވިސްނާލުމާއިއެކު، ކުއްލިޔަކަށް އަހްސަން މަތިން ހަނދާން ވިއެވެ. ހަމަ އެވަޤުތު  އަވަހަށް ފޯނު ނަގާ، އަޙްސަންއަށް ގުޅިއެވެ. މާގިނައިރު ރިންގު ނުވަނީސް އަނެއްކޮޅުން ފޯނު ނަގައިފިއެވެ. ”ޝަހާ ހާދަ ފަތިހަކާ ތިގުޅީ؟ އަނެއްކާ ފާތުން ރަނގަޅުތަ؟“ ފޯން ކޯލަށް އަޙްސަން ޖަވާބު ދިންގޮތުން ކަންބޮޑުވެފައި ހުރި މިންވަރު ޝަހާއަށް އިޙުސާސް ކުރެވުނެވެ. ”ރަނަޅެއް ނޫން.“ މިހެން ބުނުމާއިއެކު، ރޭގައި ފާތުންއަށް ގުޅި ވަޤުތުން ފެށިގެން ކަންތައް ވީގޮތް ޝަހާ، އަޙްސަންއަށް ކިޔައިދިނެވެ. ”އަހަރެން ހަމަ މިހާރު މިދަނީ ހޮސްޕިޓަލަށް.“ ޝަހާއަށް އިތުރު އެއްޗެއް ނުބުނެވި އުޅެނިކޮށް އަޙްސަން ފޯނު ކަނޑާލިއެވެ.

މާގިނައިރު ތަކެއް ނުވެ އަޙްސަން ހޮސްޕިޓަލަށް އަތުވެއްޖެއެވެ. އަޙްސަންގެ ހިތުގައިވެސް ޖަވާބު ނުލިބޭ އެތައް ސުވާލުތަކެއް އެބަ ހުއްޓެވެ. އެހެނަސް އޭގެ ޖަވާބު ޝަހާއަށް އެނގޭ ކަމެއް އަޙްސަންއަކަށް ނޭންގެއެވެ. ވީއިރު، އެކަމާއި ބެހޭގޮތުން ޝަހާއާއި ސުވާލެއްވެސް ކޮށްލާކަށް އަޙްސަން ހިތަށްވެސް ނާރާނެތާއެވެ. ކަން އޮތީ މިހެން ކަމުގައި ވީނަމަވެސް ޝަހާ ބޭނުންވަނީ ވީ އެންމެ އަވަހަކަށް އެހުރިހާ ވާހަކައެއް އަޙްސަންއަށް ކިޔައިދޭށެވެ. އޭގެ ފަހަތުގައި ޝަހާގެ ދެ މަޤްޞަދެއް އެބައޮތެވެ. އެއްކަމަކީ، ފާތުންގެ ޙަޔާތުގައި ވޭތުވެދިޔަ ސަތާރަ އަހަރު ހިނގާފާއިވާ ކަންކަމުގެ ޙަޤީޤަތް އެނގުމުންވެސް އަޙްސަންގެ ހިތުގައި ފާތުންއަށް ޓަކައި އޮތް ލޯބި ހަމަ އެގޮތުގައި ދެމި އޮވޭތޯ ބެލުމެވެ. އަނެއް މަޤްޞަދަކީ ފާތުންއަށް އިންސާފު ހޯދައި ދިނުމުގައި އަޙްސަންގެ އެހީތެރިކަން ހޯދުމެވެ. ޝަހާ ގޮނޑިން ތެދުވެގެން އައިސް ރޭގައި އަޙްސަންއަށް ކުރި މެސެޖް ހަނދާން ކޮށްލަދިނެވެ. އަދި މިހާރުގެ ޙާލަތު އޮތްގޮތުން މެންދުރާއި ހަމައަށް މަޑުކުރަން މާބޮޑަށް ލަސްވެދާނެ ކަމަށް ޝަހާ ބުންޏެވެ. ”ދައްކަން ތިއުޅެނީ ވަރަށް މުހިންމު ވާހަކައެއްތަ؟ މިކަހަލަ ވަޤުތެއްގަ؟“ އަޙްސަން އެމޭރުމުން ޝަހާއާއި ސުވާލު އެކުރީ ދައްކަން އެއުޅެނީ ކޮންކަހަލަ ވާހަކައެއްކަން ނޭންގޭތީކަން ޝަހާއަށް އެނގުނެވެ. އެހެނީ މި ދަނޑިވަޅުގައި ފާތުންގެ ޚަބަރެއް ލިބުމަށް ވުރެ މުހިންމުކަމެއް އަޙްސަންއަށްވެސް ނޯންނާނެކަން ޝަހާއަށް އެނގެއެވެ. ”މިހާ ނާޒުކު ދަނޑިވަޅެއްގަ މިތާ ހުރެފަ އަޙްސަން ކައިރީގަ މިހެން ބުނާނީ ވަރަށް ބޮޑަށް މުހިންމު ވާހަކައެއް ވީމަތާ ދޯ. މީ ފާތުންއާ ގުޅިފަ އޮތް ވާހަކައެއް. އުންމީދުކުރަން އަޙްސަން އަޑު އަހާނެ ކަމަށް.“ ޝަހާ އެހެން ބުނުމާއިއެކު، ވަރަށް ޝައުޤުވެރި ކަމާއިއެކު، ޝަހާއާއި ދިމާއަށް އަޙްސަން އެނބުރިލިއެވެ. ”ފާތުންއާ ގުޅެގޮތުން ޝަހާއަށް އެނގޭ އިތުރު އެއްޗެއް އޮތީތަ؟“ ހައިރާން ކަމާއިއެކީ އަޙްސަން ސުވާލު ކުރިއެވެ. އެވަޤުތު ވަރަށް ކެތްތެރި ކަމާއިއެކު ހަމަޖެހިގެން އިނދެ ޝަހާ ދައްކަން އެއުޅޭ ވާހަކަ އަޑުއެހުމަށް އަޙްސަންގެ ކިބައިން ޝަހާ އިލްތިމާސް ކުރިއެވެ. އެވަޤުތު އަޙްސަންގެ ފުރިހަމަ ސަމާލުކަން ޝަހާއަށް ދިނެވެ. ފުން ނޭވާއެއް ލުމާއިއެކު، ފާތުންގެ ޑައިރީއިން ޝަހާއަށް އެނގިފައިވާ ހުރިހާ ވާހަކައެއް އަޙްސަންއަށް ކިޔައިދިނެވެ.

އެހުރިހާ ވާހަކައެއް ކިޔައިދީ ނިމުނުއިރު އަޙްސަންގެ މޫނުމަތިން ފެންނަން ހުރީ މަސްހުނި ވެފައިވާ އިހުސާސް ތަކެކެވެ. ރޮވޭ ކަހަލަ ގޮތަކަށް ފެންނަން ހުއްޓެވެ. ހަމަ އެއާއިއެކު، ރުޅިއާއި ހައިރާންކަންވެސް އަޙްސަންގެ މޫނުމައްޗަށް އަރާ ފައިބަމުން ދިޔަހެން ޝަހާއަށް ހީވިއެވެ. އެހެނީ އިރުކޮޅެއް ވަންދެން އެއްވެސް އެއްޗެއް ނުބުނެ، އަދި އެއްވެސް ކަހަލަ ހަރަކާތެއް ނެތި އިނުމުންނެވެ. ”އަޙްސަން!“ ހައިރާނުން ފުރިގެންވާ ކަހަލަ ގޮތަކަށް ޝަހާ، އަޙްސަންއަށް ގޮވާލިއެވެ. ”ޝަހާއަށް ހީވަނީ ކިހިނެއް؟ ތި ހުރިހާ ވާހަކަތަކެއް އެނގުނީމަ އަހަރެން މި އިންނަނީ ހަދާނެ ގޮތެއް ނޭންގިފަ. ތިބުނާ ރަޝީދެއް ވީތަނަކުން ހޯދައިގެން އިންސާފުގެ ކުރިމައްޗަށް ގެންނަން ބޭނުން. ދެން އޮތީ ފާތުންގެ ވާހަކަ. އޭނަގެ ޙަޔާތުން ބަރުބާދު ވެގެންދިޔަ ސަތާރަ އަހަރު އަހަރުމެންކުރެ އެކަކަށްވެސް އަނބުރާ ގެނެސް ދެވޭނެތަ؟ އަހަރެންނަކަށް، ޝަހާއަކަށް، ބޮޑުދައިތައަކަށް، ނޫނީ އަހްމަދުކޮއްކޮ އަކަށްވެސް ކޮށްދެވޭނެ ކަމެއް ނޫން އެއީކީ. ފާތުން ތަހަންމަލު ކުރަމުން ދިޔަ ވޭނާ ހިތާމަ އަދި އޭނައަށް ނަފްސާނީ ގޮތުން ކުރަމުން ދިޔަ އަސަރު، ޙަޤީޤަތުގައި އަހަރުމެންނަށް ތަސައްވުރުވެސް ނުކުރެވޭނެ. އެކަމަކު ކުރެވިދާނެ އެއްކަމެއް އެބަ އޮތް. އެކަން ކުރެވޭނީވެސް މަށަށް“ ހައިރާނުން ފުރިގެންވާ ނަޒަރަކުން ޝަހާ، އަހްސަންއާއި ދިމާއަށް ބަލައިލިއެވެ. ޝަހާ ހީކުރީ ފާތުންއަށް އިންސާފު ހޯދައިދޭން މަސައްކަތް ކުރާނެ ވާހަކަ ބުނަން އުޅެނީ ކަމަށެވެ. ”ފާތުންއަށް އިންސާފު ހޯދައިދިނުންތަ؟“

”ނޫން. ފާތުންގެ ދިރިއުޅުން އަލުން އާރަސްތު ކުރަން މަސައްކަތް ކުރުން. ކުރިމަތީގަ އެހެރަ ކޮޓަރި ތެރެއިން ޑޮކްޓަރ ނިކުންނަވާފަ މިވަޤުތު ކޮންމެފަދަ ޚަބަރެއް ދެއްވިޔަސް އަހަރެން ފާތުން ދުލެއް ނުކޮށްލާނަން. އަހަރެންގެ ހަޔާތުގެ ބައިވެރިއެއްގެ ގޮތުގައި އަބަދުވެސް ދެކެމުން އައީ ފާތުން. އިންޝާﷲ މުޅި އުމުރަށްވެސް އެގޮތުގަ ދެމި ހުންނާނަން.“

ޝަހާގެ ލޮލުން ހިފެހެއްޓުމެއް ނެތި ކަރުނަ އޮހޮރެން ފެށިއެވެ. ޝަހާގެ ފުރަތަމަ ލޯބި، އެކުވެރިޔާގެ ޙަޔާތް އާބާދު ކުރުމަށްޓަކައި ޤުރުބާން ކޮށްލެވުމުގެ ހިތާމަ ކަމެއް ނުވަތަ ފާތުންއަށް އޭނާގެ ޙަޔާތް އައު ފެށުމަކުން ފެށުމުގެ ފުރުޞަތު ލިބުމުގެ އުފާކަމެއް ބުނެދޭކަށް ޝަހާއަކަށް ނޭންގެއެވެ. އެނގޭހާވެސް އެއްޗަކީ، ހިތުތެރޭގައި ވޭނުން ފުރިގެންވާ  ގިސްލުމެއް ފޮރުވިފައި އެބަ އޮތްކަމެވެ. އެއާއިއެކު، ތުންފަތުގައި އުފާވެރިކަމުގެ ހިނިތުން ވުމެއްވެސް ދައުރުވަމުން ދާކަމެވެ. ލޯބި ބީވެގެން ދިޔައީއެވެ. މުޅި އުމުރަށެވެ. މީގެ ކުރިން ހިތުގައި އޮތް އުންމީދުވެސް ކަފުން ކުރަން ޖެހުނީއެވެ. އެހެނަސް އެކުވެރިޔާގެ ޙަޔާތް އާރާސްތު ކުރެވޭނެ ކަމުގެ އުންމީދެއް އައުވެއްޖެއެވެ. އާނއެކެވެ. ފާތުންއަށް އަޙްސަން ހޯދައިދޭން ޝަހާ މަސައްކަތް ކުރިއެވެ. އެހެނަސް ޙަޔާތުގެ ވަކި ހިސާބަކުން ޝަހާގެ ހިތުގައިވެސް އުންމީދެއް އާލާ ވެގެން ދިޔައެވެ. ވޭތުވެ ދިޔަ ސަތާރަ އަހަރަކީ، ފާތުންގެ ޙަޔާތުގައި އެތަކެއް ތޫފާނެއް އައި ސަތާރަ އަހަރެވެ. އެހެނަސް އެއިން އެއްވެސް ކަމެއްގެ ހިލަމެއްވެސް ޝަހާއަކަށް ނުވެއެވެ. ފާތުންއާއި އަލުން ބައްދަލުވާނެ ކަމުގެ އުންމީދުވެސް ޝަހާ ކަނޑާލިއެވެ. ވީއިރު، ޝަހާގެ ޙަޔާތަށް އަޙްސަން އަނބުރާ އަންނާނެ ކަމުގެ ފޮނި އުންމީދު އާލާ ނުކުރެވެންވީ ކީއްވެގެން ހެއްޔެވެ؟ ރަޙުމަތްތެރި ކަމުގެ ގުޅުމަކުން ނަމަވެސް ބަދަހި ގުޅުމެއް އުފެދިފައި އޮތަތީވެސް މެއެވެ. އެހެނަސް އެއީ މާޒީއެވެ. މިއަދުގެ ޙަޤީޤަތަށް ވިސްނާނަމަ، ފާތުންގެ ޙަޔާތް އާބާދު ކުރުމަށް ވުރެ މުހިންމު ކަމެއް ޝަހާއަކަށް ނެތެވެ. އެކަމަށް ފާތުން އާނބަސް ބުނާނަމަ، އެކަމަށް ޓަކައި ކޮންމެ ފަދަ ޤުރުބާނީއެއް ވާންވެސް ޝަހާ އެހުރީ ތައްޔާރަށެވެ.

މިފަދަ އެތައް ފިކުރު ތަކެއްގެ ތެރެއަށް ގެއްލިފައި އިންދާ، ޝަހާ ސިއްސައިގެން ދިޔައީ، ޑރ. ފަރީޝާ އައިސް ޝަހާގެ ކޮނޑުގައި މަޑުމަޑުން އަތް އަޅާލާފައި ޝަހާއަށް ގޮވާލި އަޑަށެވެ.

• ނުނިމޭ –