ދިވެހި އަންހެނެއްގެ ތިން ފިރިން ތިބި މައްސަލައެއް ތިލަވެފައިވާ ކަމަށް ފެމިލީ ކޯޓުން ވިދާޅުވެއްޖެއެވެ.
މި މައްސަލަ ތިލަވީ އާއިލާއާބެހޭ ގަވާއިދުގެ ދަށުން ދަރިންގެ ހަރަދަށް މިހާރު ކަނޑައަޅާފައިވާ އަދަދު މަދުކަމަށް ބުނެ، ގަލޮޅު އުތުރު ދާއިރާގެ އެމްޑީޕީގެ މެމްބަރު މުހައްމަދު އިބްރާހިމް (ކުޑޫ) މަޖިލީހަށް ހުށަހެޅުއްވި މައްސަލައާ ގުޅޭ ގޮތުން ބަހުސް ކުރުމަށް މަޖިލީހުގެ ގަވާއިދު ކޮމިޓީން މިއަދު ބޭއްވި ބައްދަލުވުމުގައެވެ. އެ ބައްދަލުވުމުގައި ފެމިލީކޯޓުގެ ލީގަލް އޮފިސަރު އަހުމަދު މައުސޫމް ވިދާޅުވީ، ދަރިންގެ ހަރަދު ނުދޭން ގާނޫނާއި ގަވާއިދުގައި ކަނޑައަޅާގައިވާ އުސޫލުތަކަށް ފިލަން ބޭރު ގައުމުތަކުގައި ކައިވެނިކުރާ މައްސަލަތަކާއި، ކައިވެނިތައް ކޯޓުގައި ރަޖިސްޓްރީ ނުކުރާ މައްސަލަ ކަންބޮޑުވާ މިންވަރަށް އިތުރުވެފައިވާ ކަމަށެވެ. މީގެ ސަބަބުން ހިތާމަކުރަންޖެހޭ ހާލަތްތަކެއް ދިމާވެފައިވާ ކަމަށް އޭނާ ވިދާޅުވިއެވެ. އެއީ ”އެއް އަންހެނެއް، ތިންފިރިން އެބަތިބި،“ އޭނާ ވިދާޅުވިއެވެ.
އޭނާ ވިދާޅުވީ އެހާލަތު ދިމާވީ، ފުރަތަމަ ކައިވެނި ރައްޖޭން ބޭރުގައި ކުރުމަށްފަހު، އެކައިވެނި ރަޖިސްތްރީ ނުކުރެވޭ ހާލަތުގައި، އެކައިވެނި ނެތް ކައިވެއްޏެއްގެ ގޮތުގައި ދޫކޮށްލުމަށްފަހު، އެމީހުން އަމިއްލައަށް އިތުރު ކައިވެންޏެއް ރާއްޖޭން ބޭރުގައި ކުރުމަށްފަހު، ދެވަނަ ކައިވެންޏަށްވެސް ގޮތެއް ކަނޑަނޭޅި ތިންވަނަ ކައިވެންޏެއް ކުރުން ކަމަށެވެ. މިއީ ނަސަބު އޮޅި ނުރައްކާތެރި ހާލަކަށް ކަންކަން ހިނގައިދާނޭ ކަމެއް ކަމަށް ވިދާޅުވިއެވެ.
އެކަން އެގޮތަށް ވިޔަނުދިނުމަށް އުސޫލުތަކެއް ކަނޑައަޅާފައިވާ ކަމަށް އޭނާ ވިދާޅުވިއެވެ. އެގޮތުން ފެމިލީ ކޯޓުގެ ހުއްދަނެތި ރާއްޖޭން ބޭރުގައި ކައިވެނި ނުކުރެވޭގޮތަށް ކަނޑައަޅާފައިވާނޭ ކަމަށެވެ. އެހެންނަމަވެސް ރާއްޖޭން ބޭރުގައި ކައިވެނިކުރަނީ އުސޫލުތަކާ ހިލާފަށް ކަމަށް މައުސޫމް ވިދާޅުވިއެވެ.
އަންހެނެއްގެ ގިނަ ފިރިން ތިބެގެން މައްސަލަ ތިލަވި މިއީ ފުރަތަމަ ފަހަރުނޫން ކަމަށް ވެސް ވިދާޅުވިއެވެ. ހައިކޯޓުގައި މިހާރު ކުރިއަށްދާ މައްސަލައެއްގެ ތެރެއިންވެސް އެފަދަކަމެއް ތިލަވެފައިވާ ކަމަށް ވިދާޅުވިއެވެ.
