އިންޑިއާގެ ބޮޑުވަޒީރު ނަރެންދުރަ މޯދީ މި ހަފްތާގައި މޮރިޝަސްއަށް ކުރެއްވި ދެ ދުވަހުގެ ދަތުރުފުޅުގައި އިންޑިއާ އާއި މޮރިޝަސްގެ ގުޅުން ވަރުގަދަ ޕާޓްނަޝިޕަކަށް އަޕްގްރޭޑް ކޮށްފި އެވެ. މޮރިޝަސްގެ ގައުމީ ދުވަހުގެ މުނާސަބަތުގައި މޯދީ ވަނީ ބައިވެރިވެ ވަޑައިގެން ފައެވެ.
މުހައްލިލުން ދެކެނީ، މިއީ އިންޑިއާ ކަނޑުގައި އިންޑިއާގެ ދައުރު ބޮޑުކޮށް، ޗައިނާގެ ހަރަކާތްތައް އިތުރުވަމުންދިއުމާ ދެކޮޅށް އިންޑިއާއިން އަޅާ ފިޔަވަޅެއް ކަމަށެވެ.
މޯދީ އާއި މޮރިޝަސްގެ ބޮޑުވަޒީރު ނަވިންޗަންދްރާ ރަމްގޫލާމް ވަނީ އިންޑިއާ ކަނޑު މިނިވަން، އަމާން، އަދި ހުޅުވާފައިވާ ކަނޑެއްގެ ގޮތުގައި ބޭއްވުމަށް އެއްބަސްވެވަޑައިގެންފައެވެ. ޚާއްސަކޮށް ކަނޑުގެ ސަލާމަތާ ގުޅޭ ގޮތުން އިތުރަށް ދެ ގައުމުން ގުޅިގެން އެކުގައި މަސައްކަތް ކުރުމަށް ވެސް ވަނީ ސޮއިކޮށް އެއްބަސްވެފައެވެ.
މި ދަތުރުގައި މޮރިޝަސް އިން ވަނީ އެގައުމުގެ އެންމެ މަތީ ޝަރަފް މޯދީއަށް އަރުވާފައެވެ.
އިންޑިއާއިން ވަނީ މޮރިޝަސްގެ ތަރައްގީގެ މަޝްރޫއުތަކަށް 11 މިލިއަން ޑޮލަރު ދޭން ވައުދުވެފައެވެ. އަދި އެގައުމުގެ ޕާލަމެންޓަށް އާ މަޖިލިސް އިމާރާތެއް އެޅުމަށް އެހީތެރިވެދިނުމަށްވެސް ވައުދުވެފައވެ.
މޮރިޝަސްގައި ޗައިނާގެ ނުފޫޒު ދަނީ ކުރިއަރަމުންނެވެ. ޗައިނާއާއެކު 2019 ވަނަ އަހަރުގެ ވިޔަފާރީގެ އެއްބަސްވުމެއް އެކުލަވާލާފައި ވެއެވެ. މިދިޔަ އަހަރު ޗައިނާއާއެކު ކުރާ ވިޔަފާރި ވަނީ 1.1 ބިލިއަން ޑޮލަރަށް އަރާފައެވެ.
ނިއުދިއްލީގެ ތަޖުރިބާކާރު ހަރްޝް ޕަންޓް ވިދާޅުވީ، ޗައިނާއަކީ މިހާރު މޮރިޝަސްގައި ބޮޑު ކުޅުންތެރިއެއް ކަމަށެވެ. އިންޑިއާ އިން ހަރަކާތްތެރިވަނީ، ސިއްހަތާއި ތައުލީމާއި ކަނޑުގެ ސަލާމަތީ ކަންކަމުގައެވެ.
އިންޑިއާގެ އެގައުމުގެ ސިފައިންނާއި ކަނޑުގެ ސިފައިން ވަނީ ގައުމީ ދުވަހުގެ ޕެރޭޑްގައި ބައިވެރިވެފައެވެ. އަދި އިންޑިއާގެ ހަނގުރާމަ މަތީ މަނަވަރެއް ކަމަށްވާ އައިއެންއެސް އިމްފަލް ވަނީ ޕޯޓް ލޫއިސްއަށް ޒިޔާރަތްކޮށްފަ އެވެ.
މިދިޔަ އަހަރު އިންޑިއާއިން ވަނީ މޮރިޝަސްގެ މައި ޖަޒީރާގެ އުތުރުން އޮންނަ ކުދިކުދި ދެ ޖަޒީރާ ކަމަށްވާ މޮރިޝަސްގެ އަގަލެގާ އައިލެންޑްސްގައި އެއާޕޯޓަކާއި ބަނދަރެއް ހަދައި ދީފަ އެވެ.
މި ސަރަހައްދަކީ ވާދަވެރިކަމުގެ ހޮޓްސްޕޮޓެކެވެ. ޗައިނާއާއި އިންޑިއާ އިންވެސް ދަނީ އިންޑިޔާ ކަނޑުގެ ޤައުމުތަކާ ގުޅެމުންނެވެ. އަދި ޑިއޭގޯ ގާސިއާގައި އެމެރިކާ އާއި އިނގިރޭސިވިލާތުގެ މުހިއްމު މަރުކަޒެއް ހިމެނެއެވެ. އިނގިރޭސިވިލާތުން ޗާގޯސް ޖަޒީރާތައް އަތުލުމަށް މޮރިޝަސް އިން ކުރާ މަސައްކަތަށް ވެސް މޯދީ ތާއީދު ކުރެއްވި އެވެ.
މޮރިޝަސްގެ ރައްޔިތުންގެ 70 ޕަސެންޓަކީ އިންޑިއާގެ ދަރިކޮޅުގެ މީހުންނެވެ.
