މާލީ އިދާރާތަކުގެ މިނިވަންކަމަށް އަންނަ ކޮންމެ ބަދަލަކީ، އިންވެސްޓަރުންގެ އިތުބާރު ގެއްލި، ބޭރުގެ އިންވެސްޓްމަންޓްތައް މަދުވެ، ފައިސާގެ އަގު ދަށްވެ. ޢާންމު ރައްޔިތުންގެ ދިރިއުޅުމުގެ ފެންވަރަށް ސީދާ އަސަރުކުރާނެ ކަމެއް ކަމަށް މޯލްޑިވްސް ޓްރޭޑު އެސޯސިއޭޝަން (އެމްޓީއޭ) އިން ބުނެފިއެވެ.
އެޖަމިއްޔާއިން ނެރެފައިވާ ނޫސްބަޔާނެއްގައި ވަނީ މާލީ މުވައްސަސާތަކުގެ މިނިވަންކަން ދެމެހެއްޓުމަށް ބައެއްކަންކަން ފާހަގަކޮށް އެކަންކަން ކުރުމަށް ސަރުކާރަށް ގޮވާލައިފިއެވެ.
އެގޮތުން ސަރުކާރުން މާލީ އިދާރާތަކުގެ މިނިވަންކަމަށް އިޙްތިރާމްކޮށް، އެ މުއައްސަސާތަކުގެ ހިންގުމަށް ސިޔާސީ ނުފޫޒު ނުފޯރުވުމާއި، މާލީ އިދާރާތަކުގެ އިސް މަޤާމުތަކަށް ޢައްޔަންކުރާ ފަރާތްތަކަކީ ޤާބިލު، ތަޖުރިބާހުރި އަދި ޕްރޮފެޝަނަލް ފަންނުވެރިން ކަމުގައި ކަށަވަރުކުރުމާއި، ޤައުމަށް ކުރިމަތިވެފައިވާ އިގްތިސާދީ ބޮޑެތި މައްސަލަތަކަށް ހައްލު ހޯދުމަށް މާލީ ދާއިރާއާއި ގުޅުންހުރި ޖަމިއްޔާ ޖަމާއަތްތަކުގެ މަޝްވަރާ ހޯދުމެވެ.
ޤައުމުގެ މާލީ ހަރުދަނާކަމަކީ އެންމެހާ ދިވެހި ރައްޔިތުންގެ މުސްތަޤްބަލާ ގުޅިފައިވާ ކަމެއް ކަމަށާއި، އެހެންކަމުން، މި ކަމުގައި ސަރުކާރާއި ރައްޔިތުންގެ މަޖިލިސް، އަދި ސަރުކާރުގެ ހުރިހާ މުއައްސަސާތަކުން ޒިންމާދާރު ގޮތެއްގައި މަސައްކަތްކުރުމަށް އެ ޖަމިއްޔާއިން ވަނީ ގޮވާލައިފައެވެ.
އެބަޔާނުގައި ބުނެފައިވަނީ ފަހަކަށް އައިސް އެމް.އެމް.އޭ އާއި މާލީ އެހެން އިދާރާތަވައްކުގެ އިސް މަގާމްތަކުގައި ތިބި ފަރާތްތައް އިސްތިއުފާ ދެމުންދާކަމީ، ރާއްޖޭގެ މާލީ ހާލަތު ރަނގަޅު މިސްރާބަށް މީޒާން ވަމުންނުދާ ކަމުގެ އާލާމާތެއްކަމަށެވެ. މިއީ ޤައުމުގެ އިޤްތިޞާދީ ސަލާމަތަށް ނުރައްކާވެފައިވާކަމުގެ ރަނގަބީލެއްކަމަށްވެސް ބުނެފައިވެއެވެ.
އެގޮތުން, ސަރުކާރުން އެމްއެމްއޭއަށް ހުޅުމާލެއިން ބިމެއް ގަތުމުގެ ނަމުގައި އެޗްޑީސީއަށް 15 ބިލިއަން ރުފިޔާ ނަގައި އެފައިސާއިން ޚަރަދުކޮށް ސާކިއުލޭޝަނަށް ނެރުމަށް ނިންމާފައިވާކަމަށް އަޑުތައް ފެތުރިފައި ވަނިކޮށް, އެމްއޭގެ ބޯޑުގެ ބައެއް މެމްބަރުން ވަނީ އިސްތިއުފާ ދެއްވާފައެވެ. ހަމައެއާއެކު, އެމްއެމްއޭގެ ޑެޕިއުޓީ ގަވަރުނަރު މަގާމުން ވަކިކުރުމުގެ މައްސަލަ ސަރުކާރަށް ނިސްބަތްވާ މެމްބަރަކު މަޖިލީހަށް ހުށަހަޅުއްވާފައިވަނިކޮށް ޑެޕިއުޓީ ގަވަރުނަރު އިސްތިއުފާ ދެއްވާފައިވާކަން ހިތާމައާއެކު ފާހަގަކުރާކަމަށް ވެސް ބުނެފައިވެއެވެ.
އެ ބަޔާނުގައި ބުނެފައިވަނީ މާލީ އިދާރާތަކުގެ މިނިވަންކަމާއި ހަރުދަނާކަން ދެމެހެއްޓުމަކީ، ހަރުދަނާ އިޤްތިޞާދެއް ބިނާކުރުމުގައި އެންމެ މުހިންމު އަސާސް ކަމަށެވެ. ހަމަ އެއާއެކު ސިޔާސީ ނުފޫޒުތަކުން މިފަދަ މުއައްސަސާތައް ސަލާމަތްވެތިބެ, މާލީ އިގްތިސާދީ ސިޔާސަތުތައް ދެމެހެއްޓުމުގެ ފުރިހަމަ މިނިވަންކަން އެ މުވައްސަސާތަކަށް އޮންނާޖެހޭނޭ ކަމަށް ވެސް ބުނެފައިވެއެވެ.