ފަހަތް ބަލައިލުމާއިއެކު، ފާތުންގެ މޭ ބާރަށް ތެޅެން ފެށިއެވެ. ފަހަތުގައި ހުރީ ދެވަނަ ދެމިހެއް ނޫނެވެ. ގެއަށް ވަނީއްސުރެ، އެމީހަކު ހޯދުމަށް ޓަކައި ފާތުންގެ ކަޅި އެކި ދިމަދިމާއަށް ހިންގަމުން ގެންދިޔަ މީހާއެވެ. އާނއެކެވެ. ފުރިހަމަ ހިނިތުން ވުމަކާއިއެކު، ފަހަތުގައި ހުއްޓި ހުރީ އަޙްސަންއެވެ. އަތުގައި އޮތީ، ތަފާތު ކުލަކުލައިގެ ފިނިފެންމަލާއި، އޯކިޑް އަދި ތަފާތު  ވައްތަރުގެ މާމެލާމެލިން ޖަރީކޮށްފައިވާ މާބޮނޑިއެކެވެ. އަޙްސަން ފެނިގެން އެފަދަ ގޮތަކަށް މޭތެޅުން އެއީ މީގެކުރިން ފާތުން ދުވަހަކުވެސް އިހުސާސްކުރި ކަމެއް ނޫނެވެ. އެހެނަސް މިފަހަރު މިހެން މިވީ ކީއްވެގެން ކަމެއް ޚުދު ފާތުންއަކަށްވެސް ނޭންގުނެވެ. ނޫންކަމަށް ހަދާފައި މަޑުމަޑުން ފާތުން އޭނާގެ މޭގައި އަތް އަޅާލިއެވެ. ލަދުވެތި ކަމާއި، އުފާވެރި ކަމުގެ ލުއިލުއި ހިނިތުން ވުމެއްވެސް ތުންފަތް މައްޗަށް ވެރިވެފައި ހުއްޓެވެ. ނަމަވެސް އެކަން ދައްކަން ބޭނުންނުވާ ކަހަލައެވެ. މީގެ ކުރިން އެއްވެސް ޖެހިލުމެއްނެތި އެމީހަކާއި ވާހަކަ ދައްކަމުން ގެންދިޔަ މީހާ ފެނުމުން މިއަދު ފާތުންއަށް މިވީ ކިހިނެއްބާއެވެ. ”ދޮންތާ، ކިހިނެއްވެފަ ތީނީ؟“ ފާތުން ގެންގުޅެ ބޮޑުކުރި ބައްޕަ ފަރާތުގެ ކުއްޖަކު ސުވާލުކޮށްލި އަޑަށް، ފާތުން ދިޔައީ ސިއްސައިގެންނެވެ. ދެންތިބި ކުދިންވެސް އެކުއްޖާއާއި އެއްބައިވެ، ފާތުންއާއި ދިމާކޮށްލިއެވެ. ފާތުންގެ ޢުމުރުފުރައިގެ ހުރިހާ ކުދިންގެ ތެރެއިންވެސް އެންމެ ދޮށީ ފާތުންއެވެ. އެހެންކަމުން، އަޙްމަދެކޭ އެއްފަދައިން، ފާތުންއަކީ އެހުރިހާ ކުދިންގެވެސް ދޮންތައެވެ. ”ދޮންތައަށް ކަމެއް ވެއްޖެތަ؟ ހަމަ ރީތިކޮންނެއްނު މީނީ! ދެން މިމީހުންވެސް މަށާ ބެހޭނެ ގޮތެއް ނޭންގިގެން ދޯ ތިއުޅެނީ. ދެން މަށާ ނުބެހި ދޭބަލަ ޝަހާއަށް ގޮވާލަދޭން. ބުނޭ ޝަހާދައްތަގެ ފްރެންޑެއް އައިސް އެބަހުއްޓޭ.“ ވަރަށް ލުދުވެތިވެފައި އިންކަހަލަ ގޮތަކަށް އިނދެ އެކުދިން ކައިރީގައި  ފާތުން ބުނެލިއެވެ. ”އާން މިދަނީ ޝަހާދައްތަގެ ފްރެންޑް އައިސް ހުރި ވާހަކަ ބުނަން.“ ދެއަތުގެ ދެ އިނގިލިން ކޮމާކޯޅީގެ ނިޝާން ޢިޝާރާތުން ދައްކާލަމުން އެތަނުން އެއްކުއްޖަކު ބުނެލިއެވެ. ދެންތިބި ހުރިހާ ކުދިން ލާނެއް ގޮތަކަށް ހޭންފެށިއެވެ. އަދި އެހެން ބުނުމާއިއެކު ހެމުން ހެމުން ހުރިހާކުދިން އެތަނުން ދުރަށް ދިޔައީއެވެ. އޭރުވެސް ހުރިތަނުން ގުޑާނުލާ، މާބޮނޑި ހިފައިގެން ހުރިގޮތަށް އަޙްސަން ހުރީއެވެ.

އެކުދިން ދިއުމާއިއެކު، އަޙްސަން މަޑުމަޑުން ކުރިއަށް ޖެހިލިއެވެ. ފާތުންއާއި ތަންކޮޅެއް ކައިރިވެލުމުގެ ބޭނުމުގައެވެ. ”އަހަރެން މިތާ އިށީނދެލިޔަސް އެންމެ ރަނގަޅުތަ؟“ ކައިރީގައި ހުރި ގޮނޑި ދައްކާލަމުން އަޙްސަން އަހާލިއެވެ. ”އަހަރުމެންގެ ޒުވާން ދުވަސްވަރު، މީހަކު ކޮޅަށް ހުންނަންޏާ ބުނޭނު ކޮޅަށް ހުއްޓަކަސް ސިފައިންގެއަކަށް ނުވައްދާނޭ. އަހަރެންނަކަށް ހިއެއްނުވޭ އަޙްސަން މިހާރުދެން އަމުދުން ވައްދާނެހެނެއް. އުމުރު އެވަރަކަށް ތަނެއް ނުދޭނޫންތަ؟“ ސަމާސާ ކޮށްލުމުގެ ގޮތުން ފާތުން ބުނެލިއެވެ. ޒާތަކަށް ހީނލާފައި އަޙްސަން އެގޮޑީގައި އިށީނެވެ. ”ކީއްވެ ޒުވާން ދުވަސްވަރޭ ތިބުނީ؟ މިހާރަކު ޒުވާނެއް ނޫންތަ؟ މަށަށް ހީވަނީ މަ އަދިވެސް ހަމަ ޒުވާންހެން. ހަމަގައިމުވެސް މަ މިއީ މުސްކުޅިއެކޭ އެއްވެސް މީހަކު ނުބުނާނެ.“ ސަމާސާ ކޮށްލުމުގެ ނިޔަތުގައި އަޙްސަން ބުނެލިއެވެ. ”މަވެސް ނުބުނަމެއްނު އަޙްސަން މުސްކުޅިއެކޭ. މަވެސް މުސްކުޅިއެއް ނޫނޭ. އެކަމަކު އޭރުގެ ޅަދޮނޅުކަމެއް ދެނެއް ހަމަގައިމުވެސް ނާންނާނެތާ ދޯ.“ ވަރަށް ހިތްހަމަ ޖެހިލާފައި އިނދެ ފާތުން ބުނެލިއެވެ. ”ތިރީސްފަސް އަހަރަކީ މުސްކުޅި ޢުމުރެކޭ އެއްވެސް މީހަކު ނުބުނާނެ. މަށެއްވެސް އަދި މުސްކުޅިއެއް ނުވޭ.“ ޝަހާގެ އަޑު އިވުމާއިއެކު ދެމީހުންނަށް އެއްފަހަރާ ޝަހާ އަންނަ ދިމާއަށް ބަލައިލެވުނެވެ. މަޑުމަޑުން ހިނގާލާފައި އައިސް ޝަހާވެސް އެޖަމާޢަތުގައި ބައިވެރި ވެލިއެވެ. އެމީހުން ތިބީ ގޭތެރޭގައި ދެންތިބި އެންމެންނާއި ތަންކޮޅެއް ދުރުގައި ވަކިންނެވެ. އެމީހުން ދައްކާ ވާހަކައިގެ އަޑު އެހެން މީހުންނަށް މާރަނގަޅަށް އޮޅުން ނުފިލާނެ ހިސާބެއްގައެވެ. ގޭތެރޭގެ އަޑުފަށްގަނޑުގެ ސަބަބުންވެސް މެއެވެ. އެހެނީ މުޅިގޭތެރެ ވަނީ ހުނުމާއި ސަކަރާތުގެ އަޑުން ގުގުމާލާފައެވެ. ޢީދެއް އައިސްގެން އުޅޭ ކަހަލައެވެ. ފާތުންގެ ކުޑަބެގެ ދެމަފިރިންނާއި، ހައްވަ އަދި ޝަހާގެ މަންމަވެސް ތިބީ ވަރަށް އުފާވެފައެވެ. ފާތުންގެ ޢާއިލާގެ އެހެން މެންބަރުންވެސް ދިޔައީ މަޖާކޮށް ސަކަރާތް ޖަހަމުންނެވެ. ”އެކަމަކު އަހަރެންނަށް މިއަދު އެބަ އިޙުސާސް ކުރެވޭ އެދުވަސް އަނބުރާ އައިސް އޮތްހެން. މިބުނީ އަހަރެންގެ އެންމެ ޒުވާން ދުވަސްވަރު ކަހަލަ އިޙުސާސެއް އެބަ ކުރެވެޔޭ. ތަފާތަކީ މަންމަޔާ ބައްޕަ ނެތްކަން.“ ގޭތެރޭގެ ހަލަބޮލި މާޙައުލަށް ފާތުންގެ ނަޒަރު ހިންގާލިއެވެ. މާޔޫސްކަމާއި އެކުގައެވެ. ”ފާތުންގެ އިޙުސާސްތައް އަހަރެންނަށްވެސް ކޮންމެސް ވަރަކަށް އެބަ އިޙުސާސް ކުރެވޭ. އަހަރެންވެސް މިއަދު މިއުޅެނީ، ވަރަށް ބޮޑަށް ބައްޕަ މިސްވާތީ. ފާތުންއަށް އެނގޭތަ؟ މިގޭތެރެއިން މިކަހަލަ އާރޯކަމެއް މިފެންނަނީ ޒަމާންތަކަކަށް ފަހު. ގޮތަކަށް ބުނަންޏާ ފާތުން މާލެ ދޫކޮށްލާފަ ދިޔަފަހުން މިހާތަނަށް ޖެހެންދެން މިފަދަ ދުވަހެއް ނުދެކެން.“ ޝަހާވެސް އޭނާގެ އިޙުސާސްތައް ބޭރުކުރަން ފެށިއެވެ. ”އުފަލާހިތާމަޔަކީ އިންސާނާގެ ދިރިއުޅުމުގެ މުހިންމު ހިއްސާތަކެއް. ކޮންމެ މީހެއްގެ ޙަޔާތުގަވެސް އެދެބައިވެސް އެކުލެވިގެންވުން މުހިންމު. އުފާވެރިކަން އަހަރުމެންނަށް ދަސްކޮށްދެނީ، ދިރިއުޅުމާމެދު ފައްސި ވިސްނުމަކުން ވިސްނަން. ލިބޭ ކާމިޔާބީ ތަކަށް ޝުކުރުވެރިވާން. އަމިއްލަ އުފެއްދުންތެރިކަމާ ޚިޔާލު ތަނަވަސްކުރަން. ހިތާމަ ދަސްކޮށްދެނީ، އެހެން މީހުންގެ އިޙުސާސްތަކަށް އިޙުތިރާމުކޮށް އަޅާލުމާ އޯގާތެރިކަން އިސްކުރަން. ކެތްތެރިކަމާ ހިތްވަރުގަދަ ކުރުމަކީވެސް ލިބޭ ހިތާމަތަކުން ދަސްވާ ކަންކަން. ޢަޒުމު ވަރުގަދަކޮށް، ހިތްވަރާއެކު ކުރިޔަށް ދާން. މި ދެޙާލަތިގުވެސް ﷲ އަށް ޝުކުރު ކުރުން މުހިންމު.“ އަޙްސަންގެ މިވާހަކަތައް އަޑު އަހަން އިނދެފައި، ފާތުން އަދި ޝަހާ އެކަކު އަނެކަކަށް ވަރަށް ސީރިއަށް ނަޒަރަކުން ބަލައިލިއެވެ. އަދި ދެމީހުންގެ ހިނިގަނޑު އެއްފަހަރާ ފަޅައިގެން ދިޔައެވެ. އެކަކު އަނެކަކުގެ ހިތުގައި އޮތް އެއްޗެއް އެނގުނު ކަހަލައެވެ. އަޙްސަން ހައިރާންވިއެވެ. ބުނެވުނު އެއްޗެއް ކަމުނުދިޔައީ ބާއޭ ހީވާކަހަލަ ގޮތަކަށެވެ. ”ޤާނޫނީ ވަކީލުކަން ކުރުމުގެ އިތުރަށް މިހާރު ފަލްސަފާގެ ޢިލްމުވެސް ކިޔަވައިދޭން ފެށީތަ؟“ ޝަހާ މިހެން ބުނުމާއިއެކު، ފާތުންއާއި ދިމާއަށް އަތް ދިއްކޮށްލިއެވެ. ފާތުންވެސް ޝަހާ ދިއްކޮށްލި އަތުގައި އޭނާގެ އަތްތިލައިން ޖަހާލިއެވެ. އެހެނީ ފާތުންވެސް ބޭނުންވީ އަޙްސަންއާއި ސަމާސާ ކޮށްލާށެވެ. ”އަހަރެންނަކީ ފަލްސަފާވެރިއެއް ނޫން. އެކަމަކުވެސް ޢުމުރުގެ މިހާ ހިސާބަށް އަންނައިރު ކޮންމެވެސް ތަޖުރިބާތަކެއް ލިބިފަ ހުންނާނެތާ ދޯ.“ ވަރަށް ސީރިއަސް ވެލާފައި އިނދެ އަޙްސަން ޖަވާބުދިނެވެ. ”އޯހޯ. މީހަކު ސީރިއަސް ވެއްޖެ. ދެން ޝަހާވެސް އޭނަޔާ ދިމާކުރުން ހުއްޓާލާބަލަ.“ ފާތުންވެސް އަޙްސަންއާއި ސަމާސާކޮށްލަން ބޭނުންވި ކަހަލައެވެ. ”އާން އޯކޭ. އިސް ޣާޒީ ކަލޭގެ ހުކުމް އިއްވަފާނެ ދޯ.“ ފާތުންއާއި ބައިވެރިވެލުމުގެ ގޮތުން ޝަހާ ބުނެލިއެވެ. އަދި ދެމީހުން އެއްކޮން ހޭން ފެށިއެވެ. ”އިސް ޣާޒީއޭ ބުނީމަ އެއްޗެއް ހަނދާން ވެއްޖެ.“ ފާތުންއާއި ދައްކަން އައި ވާހަކަ އަޙްސަން ކުއްލިޔަކަށް ހަނދާންވިއެވެ. ”އަނެއްކާ ކޯޗެއް؟“ ޝަހާ އަދި ކޮންމެވެސް ވަރަކަށް ސީރިއަސް ވިއެވެ. އަޙްސަންގެ މޫނުމަތިން ސީރިއަސްކަން ފެނުމާއި އެކުގައިވެސް މެއެވެ. ”މިއީ އަސްލު ވަރަށް ސީރިއަސް ވާހަކައެއް ވީމަ އަހަރެން ބޭނުންވަނީ އަހަރުމެން ތިންމީހުން އެކަނި ތިބޭ ވަޤުތެއްގަ މިވާހަކަ ދައްކަން. ހިނގާބަލަ ކޮފީއަކަށް ދާން.“ އަޙްސަންގެ ޚިޔާލު ހުށައަޅަން ބޭނުންވާގޮތް ބުނެދިނެވެ. ފާތުން އަދި ޝަހާ އެކަކު އަނެކަކާއި ދިމާއަށް ބަލައިލުމަށްފަހު، އެއަށް ފަހުން ޖަވާބެއް ދޭނަންކަމަށް ބުންޏެވެ. އެހެނީ މިވަޤުތު ފާތުންގެ ޙާލަތުވެސް އަދި މާރަނގަޅު ކަމަށް ނުފެންނާތީއެވެ.

ތިން މީހުން ވާހަކައިގައި ތިއްބާ، ޝަހާގެ މަންމަ ޝަހާއަށް ގޮވާލިއެވެ. ޝަހާގެ ރައްޓެއްސަކު ގުޅައިގެން ވާހަކަ ދައްކަން ބޭނުންވާ ކަމަށް ބުނުމަށްޓަކައެވެ. ޝަހާ ކޮންމެވެސް ވަރަކަށް ހައިރާންވާގޮތް ވިއެވެ. މޯބައިލް ފޯނުގެ މިފަދަ ޒަމާނެއްގައި ގޭގެ ލޭންޑްލައިނަށް ގުޅާނެ ރައްޓެއްސަކީ ކާކުބާއޭ ހިތަށް އެރިއެވެ. ފާތުން އަދި އަޙްސަންވެސް ކުރީ ހަމަ އެސުވާލެވެ. ހައިރާންކަންމަތީ ހުރެ، ޝަހާ ގޮސް ފޯނުގެ އަތްގަނޑު ނަގާ ކަންފަތުގައި ޖަހާލިއެވެ. އަދި މަޑުމަޑުން އައްސަލާމު ޢަލައިކުމް ބުނެލިއެވެ. އަނެއްކޮޅުން ޖަވާބު ދިނީ ކޮންމެވެސް ވަރަކަށް ދަންނަ ފިރިހެން އަޑެކެވެ. ”ތީ ކޮން ބޭފުޅެއްތޯ؟ ނޭންގުނު.“ ހައިރާންވެފައި ހުރެ ޝަހާ އަނެއްކާވެސް ސުވާލުކުރިއެވެ. ”ބޭފުޅުންގެ ކެޓަގަރީއަކަށް އެއްވެސް ޒަމާނެއްގަ އަޅުގަނޑެއް ނުފެތޭ. ނަމަކީ ފައިސަލް. އެއްޒަމާނެއްގަ ތިބާއާއިއެކު ތަޢުލީމު ޙާޞިލުކުރަން އުޅުނިން.“ އަނެއްކޮޅުން ވާހަކަ ދައްކަމުން ގެންދިޔައީ ޝަހާ، ފާތުން އަދި އަޙްސަންއާއި އެކު މަތީ ޘާނަވީގައި ކިޔަވަން އުޅުނު ފައިސަލްއެވެ. އޭރުގައި އަޙްސަންގެ އެންމެ ގާތް އެކުވެރިޔާއެވެ. ”އޭ. ފައިސަލް. ކޮންތާކު ތިއުޅެނީ؟“ ޝަހާއަށް ހަޅޭއްލަވައިގަނެވުނީ، ކިހާ ބާރުމިނެއްގައި ކަންވެސް ޝަހާއަކަށް އިޙުސާސެއް ނުކުރެވުނެވެ. އަޙްސަން ކުއްލިޔަކަށް ތެދުވެގެން ފޯނު ކައިރިއަށް ދުއްވައިގަތެވެ. އެވަޤުތު ފާތުންވެސް މަޑުމަޑުން ތެދުވެގެން އެދިމާލަށް ހިނގައިގަތެވެ. އެވަޤުތު ޝަހާ މަންމަ އައިސް ފާތުން އަތުގައި ހިފައިގެން އެހިސާބަށް ގެންގޮސްދިނެވެ. އަޙްސަން އެހިސާބަށް އަރާ ހަމަވިއިރު އަނެއްކޮޅުން ފައިސަލް ވާހަކަ ދައްކަމުން ގެންދިޔައެވެ. ”ސާބަސް ޝަހާ މަގޭ ކަންފަތު ތޫރި ފަޅާނުލިޔަސް އަހަރެން އުޅޭތަނެއް އެހިދާނެއެއްނު.“ ފައިސަލަ އޭނާގެ ސްޓައިލްގައި ބުނެލިއެވެ. އަޙްސަން އައިގޮތަށް އައިސް ޝަހާއަތުން ވަޤުތުން ފޯނު އަތުލިއެވެ. ޖަހައިގަންނަ ކަހަލަ ގޮތަކަށެވެ. އަޙްސަންގެ ކިބައިންވެސް ފެނިގެން ދިޔައީ އެމީހުން ސްކޫލުގައި އުޅުނު ދުވަސްވަރުގެ ގޮތްގަނޑެވެ. ”އޭ ފައިސަލް ކޮންތާކު ތިއުޅެނީ؟ އަހަރެން ކޮން ޒަމާނެއް ފައިސަލްގެ ޚަބަރެއް ނުވެގެން އުޅޭތާ.“ އަޙްސަންގެ އަޑުގައި ހުރީ އުފާވެރިކަމާއި، ހައިރާންކަން އެކުލެވިފައެވެ. ”ދެން ކީއްވެ ޕޮލިހަށް ނޭންގީ؟ ކަމޯން އަޙްސަން، މިފަދަ ޒަމާނެއްގަ މީހަކު ހޯދަން އެއީ އެހާ އުނދަގު ކަމެއްތަ؟ ބައި ދަ ވޭ. އަޙްސަން ތިގޭގަ ކީއްތިކުރަނީ؟ އަނެއްކާ؟“ ”އޭ ނޫނޭ. ތި ހީކުރާ ކަހަލަ ކަމެއް ނެތް އިނގޭ.“ ފައިސަލް އެކުރި ސުވާލު އަޙްސަންއަށް ވަރަށް ރަނގަޅަށް ވިސްނިއްޖެއެވެ. ”އަދި އެބަ އޮތް އިތުރު ސަޕްރައިސްއެއްވެސް. ދެން މިތާ ހުރި މީހާޔާ ވާހަކަ ދައްކާލީމަ އެނގޭނެ.“ މިހެން ބުނުމާއިއެކު، ފޯނުގެ އަތްގަނޑު ފާތުން އަތަށް އަޙްސަން ދިއްކޮށްލިއެވެ. ”އައްސަލާމު ޢަލައިކުމް ފައިސަލް.“ ސަމާސާ ގޮތަކަށް ފާތުން ބުނެލިއެވެ. ”ތީ އަނެއްކާ ކާކު؟“ މިފަހަރު ސަލާމް ގޮވާލީ ކާކުކަމެއް ފައިސަލްއަކަށް ނޭންގުނެވެ. ”އަޅުގަނޑަށް ކިޔަނީ ފާތުމަތު ޢަލީ. ގާތް ރައްޓެހިން ލޯބިން ކިޔާ އުޅެނީ ފާތުން.“ ތިން މީހުންގެ ޚަބަރު އެއްތަނަކުން ލިބުމަކީ ފައިސަލްއަށް ވަރަށް ބޮޑު ހައިރާންކަމެއް ލިބުނު ކަމެކެވެ. އެހެނީ ޒަމާން ތަކަކަށްފަހު ވެސް ތިން މީހުން އެއްތަނަކުން ބައްދަލުވުން އެއީ ވާނެ ކަމެއް ކަމަކަށް ފައިސަލްއަށް ޤަބޫލުކުރަން ދަތިވިއެވެ. ”އަޅެ ހެޔޮނުވާނެ ތި ތިންމީހުން އެއްތާ ތިކުރަނީ ކީއްތޯ އަހަރެންނަށް ބުނެލަދީބަލަ. މަގޭ ބޮލަށް އެނބުރުން އަރަން ފަށައިފި.“ “ މިހާ ދުވަސް ވެގެން ދިޔައިރުވެސް ފައިސަލްގެ ތި މަޖާ މިޒާޖަކަށް ބަދަލެއް ނާދެ ދޯ. އެހެންވީމަ ވަރަށް ފައްކާ. ދެން ބުނެބަލަ. ފައިސަލް ތިއުޅެނީ ކޮންތާކުތަ؟“ ފާތުން ވަރަށް ހިތްހަމަ ޖެހިގެން ހުރެ ފައިސަލްއާއި ވާހަކަ ދައްކަމުން ގެންދިޔައެވެ. ”އަހަރެން މިހާރު މިހުރީ މާލޭގަ.“ ފައިސަލް ބުނި އެއްޗެއް ޝަހާ އަދި އަޙްސަންއަށް އެންގުމުގެ ގޮތުން ފާތުން ފޯނުގެ އަތްގަނޑުގައި އަތް އަޅާލާފައި މިހާރު ހުރީ މާލޭގައި ކަމަށް ބުނެދިނެވެ. އެވަޤުތު ފޯނުގެ އަތްގަނޑު އަޙްސަން އަތަށް ދިނުމަށް ވަރަށް އިޙުތިރާމާއިއެކު، ފާތުންގެ ކިބައިން އަޙްސަން އެދުނެވެ. ފާތުން، އަޙްސަން އަތަށް އަތްގަނޑު ދިއްކޮށްލިއެވެ. ޝަހާގެ ގެއަށް ހަމަ މިހާރު އައުމަށް އަޙްސަން ފައިސަލްއަށް އަމުރު ކޮށްލިއެވެ. ހަމަ މިހާރު މިދަނީ ކަމަށް ބުނެ ފައިސަލްވެސް ފޯނު ބޭއްވީއެވެ.

ކުޑައިރުކޮޅެއްގެ ތެރޭގައި ފައިސަލް ޝަހާގެ ގެއަށް އަތުވެއްޖެއެވެ. ފައިސަލްއަށް މަރުޙަބާ ކިއުމަށް އަޙްސަން އަދި ޝަހާ ހުރީ ބޭރަށް ނިކުމެއެވެ. ބަލާބެލުމަށް، ކޮންމެވެސް ވަރެއްގެ ބަދަލެއް ފައިސަލްއަށްވެސް އައިސް ހުރިކަން ފާހަގަވިއެވެ. އެހެނީ ހަށިގަނޑު ކޮންމެވެސް ވަރަކަށް ފުޅާކަމަށް ފާހަގަވެއެވެ. އޭގެ އިތުރުން އުމުރަށް އިތުރު ވެފައިވާ ސަތާރައަހަރުގެ ތަފާތު ފިޔަވާ ދެން މާބޮޑު ބަދަލެއް ފައިސަލްއަކަށްވެސް އައިސްފައެއް ނެތެވެ. ފާތުން އިނީ ގޮނޑިއެއްގައި އިށީނދެލައިގެން ފައިސަލްގެ އިންތިޒާރުގައެވެ.  އަރާމުކޮށްލަން ކޮޓަރިއަށް ދާން ބުނުމުންވެސް ފައިސަލް އަންނަންދެން މަޑުކުރާނީ ކަމަށް ބުނެފައެވެ. ފައިސަލް ގޭތެރެއަށް ވަދެ، ފާތުން ހޯދާލިއެވެ. ގޭތެރޭގެ ހަލަބޮލިކަމުން ހައިރާންވެ ހުރުމާއިވެސް އެކުގައެވެ. އެހެނީ މިވަޤުތު އެގޭތެރޭގެ މާޙައުލުގައި ހިނގަމުން އެދަނީ ކޮންކަހަލަ އުފާ ފާޅުކުރުމެއް ކަމެއް ފައިސަލްއަކަށް ނޭންގޭނެތާއެވެ. ފާތުން ފެނިފައި ފައިސަލްއަށް ލިބުނީ ހައިރާން ކަމެކެވެ. އެހާމެ ދެރަވެސް ވިއެވެ. ހިކިގެން ގޮސް އަނަރޫފަ ވެފައިވާ މިންވަރު ފެނިފައެވެ. ފާތުންއަށް ވެފައި އެހުރީ ކީއްތޯ ބަލަން ފައިސަލް ކެތްމަދުވިއެވެ. ފައިސަލް އޭނާގެ ރައްޓެހިން ކައިރިއަށް އައެއްކަމަކު، އެމީހުންގެ ދިރިއުޅުމުގައި ހިނގަމުން ދަނީ ކޮންކަހަލަ ތޫފާނެއް ކަމެއް އަދި ނޭންގެއެވެ. ހަމަ އެހެންމެ ވޭތުވެދިޔަ ދުވަސްތަކުގައި ފައިސަލްގެ ޙަޔާތުގައި ހިނގާދިޔަ އެއްވެސް ކަމެއް އޭނާގެ މި ރައްޓެހިންނަކަށްވެސް ނޭންގޭނެތާއެވެ. ފައިސަލް ގޮސް ފާތުން ކައިރީގައި ހުރި ގޮނޑީގައި އިށީނދެލިއެވެ. އެވަޤުތު އެތަނަށް އައީ ފާތުންގެ ބޮޑުދައިތަ ހައްވައެވެ. ފާތުން ތަންކޮޅެއް ވަރުބަލި ވެފައި ހުރެދާނެ ކަމަށް ބަލާ، އަރާމުކޮށްލަން ދިއުމަށް ބުނުމަށެވެ. ޝަހާގެ މަންމަވެސް އައިސް ފާތުން ކައިރީގައި އަރާމުކޮށްލުމަށް ދިއުމަށް ބުންޏެވެ. ހައްވަ އަދި ޝަހާ މަންމަގެ ބުނި ބުނުމަށް އެއްބަސް ވެލުމުގެ ގޮތުން އަޙްސަންވެސް ފާތުންގެ ކިބައިން އެދުނީ، އަރާމުކޮށްލުމަށް ދިއުމަށެވެ. އެހެންނަމަވެސް އެތައް ޒަމާނަކަށްފަހު ފާތުންގެ މާޒީގެ އުފާވެރި ދުވަސްތައް އާލާކޮށްލަން ލިބުނު މިފަދަ ދަނޑިވަޅެއް ދޫކޮށްލާކަށް ފާތުން ބޭނުމެއް ނުވިއެވެ. އަނެއްކޮޅުން ޒަމާންތަކަކަށްފަހު، ފައިސަލްއާއި ބައްދަލު ވުމުން އޭނާގެ ޙަޔާތުގައި ހިނގާދިޔަ ކަންކަމާއި އޭނާގެ ވިޔަފާރީގެ މަސައްކަތް ދާގޮތުގެ މަޢުލޫމާތު އޮޅުންފިލުވާލަންވެސް ފާތުން ބޭނުންވިއެވެ. އެހެންކަމުން އަދި ކުޑައިރުކޮޅަކު މަޑުކޮށްލާނީ ކަމަށް ފާތުން ބުންޏެވެ. ޝަހާވެސް ފާތުންގެ އެ އެދުމަށް އެއްބަސްވިއެވެ. އަދި ފާތުން ކައިރީގައި އޭނާވެސް އެބަ އިނިން ކަމަށް ބުނެ ހައްވަ އަދި ޝަހާގެ މަންމަ ހިތްހަމަ ޖައްސާލަދިނެވެ. އެގޮތަށް އެދެމީހުންވެސް އެއްބަސްވެގެން އެތަނުން ދިޔައީއެވެ. މާގިނައިރުތަކެއް ނުވެ، އެތަނަށް އައީ ފާތުންގެ ކުޑަބެއާއި އެޢާއިލާގެ އެންމެހާ މެންބަރުންނެވެ. އެމީހުންވެސް އައީ، ގެއަށް ދާންވެގެން ފާތުންއާއި ސަލާމް ކޮށްލުމަށްޓަކައެވެ. ”ދަރިފުޅާ ކުޑަބެމެންވެސް ދެން މިވަޤުތު ގޮސްލާނަން އިނގޭ. ކޮންމެވެސް ވަރަކަށް ހަމަޔަކަށް އެޅުނީމަ ގޭދޮށަށް އައިސްލައްޗޭ އިނގޭ. ކުޑަބެމެންވެސް އަދި އަންނާނަން.“ މިހެން ބުނުމާއިއެކު އެދެމަފިރިންނާއި ފާތުންގެ ކޮއްކޮމެން ދިޔައީއެވެ. މިހާރު އެތާ ތިބީ ހަތަރު އެކުވެރިންނެވެ.

ފައިސަލް އިނީ ހިތުގައި ސުވާލު މާކެއް ޖެހިފައެވެ. އެހެނީ ފައިސަލްގެ ނަޒަރުގައި ފާތުންގެ ގެއަކީ، މިގެއާއި ޖެހިގެން ހުރި ގެއެވެ. ވީއިރު ފާތުން މިގޭގައި އަރާމުކުރަންވީ ކީއްވެގެން ހެއްޔެވެ؟ އަދި އޭނާގެ ކުޑަބެ އެމޭރުމުން ވާހަކަ އެދެއްކީ ކީއްވެގެންބާއޭ ފައިސަލްގެ ހިތަށް އެރިއެވެ.  ފާތުން ގެންގުޅެ ބޮޑުކުރި މަންމައާއި ބައްޕަ ނިޔާވިކަން ފައިސަލްއަށްވެސް އޮތީ އެނގިފައެވެ. އެހެނަސް މިހާރު ފައިސަލް ކުރިމަތީގައި ހިނގަމުން މިދާ އެއްވެސް ކަމެއްގެ މަޢުލޫމާތެއް އޭނާއަކަށް ނޭންގެއެވެ. އެހުރިހާ ސުވާލެއް ކުރަން ބޭނުންވިއެއް ކަމަކު، މިއީ އެންމެ ރަނގަޅު ދަނޑިވަޅު ނޫންކަން ފައިސަލްއަށްވެސް އިހުސާސް ކުރެވެއެވެ. އެހެންކަމުން ރަނގަޅު ވަޤުތެއް ބަލާފައި އަޙްސަން ކައިރިން ހުރިހާ ކަމެއް އޮޅުންފިލުވުމަށް ނިންމައިގެން އިނީއެވެ. ފައިސަލްގެ ވިސްނުމަކީ އެއީ ކަމުގައި ވީނަމަވެސް، ދަނޑިވަޅު ބަލާފައި ޝަހާ، ފާތުން އަދި އަޙްސަން އެއްބަސް ކިޔާފައި، ފައިސަލްއާއި ސުވާލުކުރަން ފެށިއެވެ. ”ކޮބާ ފައިސަލް، މިހާރު ތިއިނީ ހޮޓް ސީޓުގަ އިނގޭ.“ އަޙްސަން ބުނެލިއެވެ. ”އެކީއްވެ އަހަރެން އެކަނި ހޮޓް ސީޓަށް ލާންވީ؟ މަވެސް ބޭނުން ތި ތިންމީހުންވެސް ހޮޓްސީޓަށް ލާން.“ ބަލާބެލުމަށް ހީވަނީ، މިވަޤުތު އަދި އެއްވެސް ވާހަކައެއް ފައިސަލްވެސް ދައްކަން ބޭނުން ނުވާހެނެވެ. ”ނޫނޭ. އެހާ ގިނަ ދުވަސްވަންދެން އެއްވެސް ޚަބަރެއް ނުވެ ހުރި މީހާ ދޯ އެންމެ ފުރަތަމަ ޖަވާބުދާރީ ވާން ޖެހޭނީ.“ ފާތުން ބުނެލިއެވެ. ”އަޅެ ބުނެބަލަ. ކޮންތާކުތަ މިއޮއް ހުރިހާ ދުވަހު ތިއުޅުނީ؟ މެރީ ކޮށްފިންތަ؟ ކިޔަވާށޭ ކިޔާފަ ގޮއްސަ ކިޔެވިންތަ؟“ ފާތުންގެ ސުވާލުތަކަށް ނިމުމެއް ގެންނަން ބޭނުން ނުވި ކަހަލައެވެ. ”ސާބަސް ފާތުން. ފަހަރަކު ސުވާލެއް ކޮށްބަލަ. އެފަކީރު ހާސްވެދާނެޔޭ.“ ސަމާސާ ރާގަކަށް ޝަހާ ބުނެލިއެވެ. އެހެންނަމަވެސް އަޙްސަންއަށް ފާހަގަވީ މުޅިން އެހެން ކަމެކެވެ. އެހެނީ ވާހަކަ ދައްކަން ބޭނުންވިޔަސް ފަށާނެ ގޮތެއް ނޭންގިފައި އިންކަހަލަ ގޮތަކަށް ފައިސަލް އިންހެން އަޙްސަންއަށް ހީވިއެވެ. އަޙްސަން ވަރަށް އޯގާތެރި ކަމާއިއެކު، ފައިސަލްގެ ކަކޫ މަތީގައި އޭނާގެ އަތް ބާއްވާލިއެވެ. ”ފައިސަލް! އެއްވެސް މައްސަލައެއް އުޅެނީތަ؟ ވާހަކަ ދައްކަން ބޭނުން ނުވަންޏާ އޯކޭ އިނގޭ.“ އަޙްސަން އެހެން ބުނުމުން ޝަހާވެސް ވަރަށް ރަނގަޅަށް ފައިސަލްއާއި ދިމާއަށް ނަޒަރު ހިންގާލިއެވެ. ”ފައިސަލް!“ މިފަހަރު ގޮވާލީ ޝަހާއެވެ. ”އަހަރުމެންނަށް މިހާރު މިފެންނަނީ މީގެ އިރުކޮޅެއް ކުރިން ފޯނުން ވާހަކަދެއްކި ފައިސަލް ނޫންހެން ހާދަ ހީވެޔޭ. ދޯ ފާތުން.“ ޝަހާ ފާތުންއަށް ދޯ ދިނެވެ. ފައިސަލް އިންގޮތް މިހާރު ފާތުންއަށްވެސް ފާހަގަ ކުރެވިއްޖެއެވެ. އެހެނީ އެމީހުން ދަންނަ ފައިސަލްއަކީ ސަކަ މިޒާޖެއްގެ ވެރިއެކެވެ. މިހާ ސީރިއަސްކަން ދުވަހަކުވެސް އޭނާގެ ކިބައިން ފެނިފައި ނުވާތީ އެމީހުންވެސް ފައިސަލްއާއި ސަމާސާ ކޮށްލީއެވެ. ”ފައިސަލް! ވާހަކަ ދައްކާލަން ބޭނުންތަ؟“ ޝަހާ އޭނާގެ ޑޮކްޓަރީ ޒާތުގައި ސުވާލުކޮށްލިއެވެ. ”ތިމީހުންނަށް ކީއްވެގެން ތި ހީވަނީ މަގޭ އެއްވެސް މައްސަލައެއް އެބަ އުޅެޔޭ؟ ވެދާނެތާ ހާސްވާވަރު ބަލާލަން ވެގެން އިންގޮތެއް ކަމަށްވެސް. ކުދިންނޭ މިއީ ފައިސަލް. ތިޔަ ކުދިންގެ އެކުވެރި ފައިސަލް. ތިޔަ ކުދިންނަށް ކިތަންމެ ބަދަލުތަކެއް އައިސް ހުރިކަމަށް ވިޔަސް މި ފައިސަލްގެ މިޒާޖަކަށް ކުޑަވެސް ބަދަލެއް ނާދެ. ދެން ހިނގާ ތިކުރި ސުވާލުތަކުގެ ޖަވާބަށް ދަމާ ދޯ. އެހެނީ މި ނިކަމެތި އަޅާ މިއިނީ ހޮޓްސީޓަށް ލާފަ ވިއްޔަ. ކޮންމެ ސުވާލެއް ކުރިޔަސް ޖަވާބު ދޭން ޖެހޭނެތާ ދޯ.“ ތިން މީހުން އެއްފަހަރާ ހިންދެމިލިއެވެ. އަދި ހަމަޖެހުމުގެ ނޭވާއެއްލިއެވެ. ”ސާބަސް ފައިސަލް. މީނަ ދުވަހަކުވެސް ބަދަލެއް ނުވާނެ.“ ފައިސަލްއާއި ދިމާއަށް އަތް ހޫރާލަމުން ފާތުން ބުނެލިއެވެ. ”ދެން ހަމަ ސީރިއަސްކޮން ބުނެބަލަ. މެރީ ކޮށްގެންތަ ތިއުޅެނީ؟“ އަނެއްކާވެސް ފާތުން އަހާލިއެވެ. ”އާން މެރީކުރިން. އެކަމަކު މިހާރު މިހުރީ ހުސްކޮން. އަތްބެއް ނެތް. އެކަމަކު ކުއްޖަކު އެބަހުރި. ގާރލްއެއް.“ ފައިސަލް އޭނާގެ ޒަވާޖީ ޙަޔާތުގެ ވާހަކަތައް ކިޔައިދޭން ފެށިއެވެ. ”އަތްބެއް ނެތޭ؟“ އަޙްސަން ސުވާލުކޮށްލިއެވެ. ”އާން. އަހަރެން ކައިވެނި ކުރީ ލަންޑަންއަށް ކިޔަވަން ގޮސް ހުރިއިރު އަހަރެންނާއިއެކު ކިޔަވަން އުޅުނު ލަންޑަން ކުއްޖަކާ. އޭނާއަށް އޭރުގަ ކިޔަނީ ކެތްރީން. އެކަމަކު ފަހުން އަހަރެންނާއި ކައިވެނި ކުރަން ވެގެން އިސްލާމްވީ. އޭގެފަހުން އޭނާއަށް މުސްލިމް ނަމެއް ދިނީ އަހަރެން.“ ފައިސަލްގެ ވާހަކަ މިހާ ހިސާބަށް ދިއުމުން ޝަހާ ސުވާލުކޮށްލިއެވެ. ”ދެން އެހެންވިއްޔާ މުސްލިމު ވުމަށްފަހު ކިޔަނީ ކޮން ނަމެއް؟“ ފައިސަލް ވަރަށް ނުބުނަށް އިނދެފައި ޝަހާ ކުރި ސުވާލަށް ޖަވާބު ދިނެވެ. ”ޝަހާ.“ ”ކީކޭ؟ ޝަހާއޭ!“ ތިން މީހުންނަށް އެއްފަހަރާ ސުވާލު ކޮށްލެވުނެވެ.

• ނުނިމޭ –