ގދ. ފަރެސްމާތޮޑާގައި ކުރިން ބޭނުން ކުރަމުންދިޔަ އިންޖީނުގެއިން އެރަށުގެ ރައްޔިތުންނަށް ދިމާވަމުން ދިޔަ އުނދަގުލުން ސަލާމަތްވެ ހާސްކަން ފިލައިފިއެވެ.
ކުރީގެ އިންޖީނުގެ ހުރީ އެރަށު ސްކޫލާ (ހުވަދޫ ސްކޫލް) ވަރަށް ކައިރީގައެވެ. އެހެން ކަމުން ކިޔަވާ ކުދިންނާއި ޓީޗަރުންނަށް ދުމުގެ ސަބަބުން ސިއްހީ މައްސަލަތައް ދިމާވިއެވެ. ބޯ އެނބުރުން ފަދަ އެއްތައްކަމެއް ދިމާވިއެވެ. އެކަމުގެ ޝަކުވާ އޭރު ޓީޗަރުންނާއި ބެލެނިވެރިންނާއި ދަރިވަރުންވެސް ކުރިއެވެ. އިންޖީނުގެ އަޑުގެ ސަބަބުން ސްކޫލުގައި ކިޔަވައިދޭން ދަތިވިއެވެ. އެހެންނަމަވެސް އެހުރީހާކަމެއް މިހާރުވަނީ ނިމުކަމަށް އައިސްފައެވެ.
އެރަށުގައި އިންޖީނުގެއެއް ހުންނަ ކަމެއްވެސް މީހުންނަށް ނޭނގޭ ކަހަލައެވެ. ”ކުރީގެ އިންޖީނުގެ ސަބަބުން ދަތިތަކެއް ދިމާވި ކަމެއް މިހާރު ހަނދާންހުރި މީހަކުވެސްނެތް. ކަމެއްވީކަމެއްވެސް ދަންނަ ބަޔަކު މިހާރު ނެތް. އެހާބޮޑަށް މިހާރު ފަސޭހަ،“ އެރަށު މީހަކު ބުންޏެވެ.
ކުރީގެ އިންޖީނުގޭގެ ބަދަލުގައި މިހާރުވަނީ އެރަށު އެއާޕޯޓު އޮންނަ ސަރަހައްދުގައި ޒަމާނީ އިންޖީނުގެއެއް ބިނާކޮށް ޚިދުމަތްދޭން ފަށައިފައެވެ. އެތައް އަހަރެއްގެ ކުރިއަށް ޕްލޭންކޮށްގެން އަޅާފައިވާ މިއިންޖީނުގެ އެއާޕޯޓު ސަރަހައްދަށް ބަދަލުކުރީ ފެނަކަ ކޯޕަރޭޝަންގެ ކުރީގެ މެނޭޖިން ޑިރެކްޓަރ އަހުމަދު ސައީދު މުހައްމަދުގެ މޭސްތިރި ކަމުގެ ދަށުންނެވެ.
އިންޖީނުގެ އެއާޕޯޓު ސަރަހައްދަށް ބަދަލުކޮށް ފެނަކައިން އޭރުވަނީ ތާރީޚުގެ ތެރެއަށް ވަދެފައެވެ. އެއީ މީހުން ދިރިއުޅޭ ރަށަކަށް އެކުންފުނީން މުޅިން އަލަށް މޫދުއަޑިން ކަރަންޓު ކޭބަލެއް އަޅައި އެއްވިއުގައަކުން ގުޅާލައިގެންނެވެ. އެވިއުގަ މެދުވެރިކޮށް ފަރެސްމާތޮޑާ އެއާޕޯޓުން ފަރެސްމާތޮޑާއަށް ކަރަންޓުގެ ޚިދުމަތް ފޯރުކޮށްދޭން ފެށިއެވެ. އެއީ ފެނަކަ ކޯޕަރޭޝަންގެ ތާރީޚުގައި އަލަށްކުރި ކަމެކެވެ.
ފެނަކަ ކޯޕަރޭޝަންގެ އެމްޑީއަކަށް ސައީދު ހުންނެވި ދުވަސްވަރު ވަނީ ރާއްޖޭގެ ރަށްރަށުގައި މީހުންދިރިއުޅޭ ސަރަހައްދުގައިހުރި އެތައް އިންޖީނުގެއެއް މީހުން ނޫޅޭ ސަރަހައްދުތަކަށް ބަދަލުކޮށްފައެވެ. އިންޖީނުގެތައް ރިލޮކޭޓުކޮށް ޒަމާނީ އިންޖީނުގެތައް ރައްޔިތުންނަށް ހޯދައިދިނީ އޮފީސް އިމާރާތަކާވެސް އެކުގައެވެ. ސައީދުގެ މި މަސައްކަތުން އިންޖީނުގެތައް ރިލޮކޭޓު ކުރުމުން ރައްޔިތުންނަށް ލިބެމުންދިޔަ ތަކުލީފުތަކަށް ވަނީ ނިމުން އައިސްފައެވެ.
