ފަލަސްޠީނުގެ ރައްޔިތުންނާ ދެކޮޅަށް ހަނގުރާމައިގެ ހަތިޔާރެއްގެ ގޮތުގައި ބަނޑުހައިހޫނުކަން ބޭނުންކުރުމަށް އިޒްރޭލުން ”ގަސްތުގައި އަދި ސިސްޓަމެޓިކްކޮށް“ ކުރިއަށްގެންދާ ކެމްޕޭނާ ދެކޮޅަށް އަޑުއުފުލުމަކީ ޔޫކޭގެ ކާބޯތަކެތީގެ ސިނާއަތުގެ މެންބަރުންގެ ހައިސިއްޔަތުން، އެމީހުންގެ ޒިންމާއެއް ކަމަށް ބުނެ ސިޓީއެއް ފޮނުވައިފިއެވެ.
1،000 އަށްވުރެ ގިނަ ޔޫކޭގެ ޝެފުންނާއި ކާބޯތަކެތީގެ ލިޔުންތެރިން، އަދި ރެސްޓޯރަންޓް ވެރިން، ސްޓައިލިސްޓުން، އަދި ކާބޯތަކެތީގެ ސިނާއަތުގެ އެހެނިހެން ފަންނުވެރިން ވަނީ ޔޫކޭ ސަރުކާރުން އިޒްރޭލަށް ހަތިޔާރު ވިއްކުން ހުއްޓާލުމަށާއި، ޣައްޒާއަށް އަޅާފައިވާ ބްލޮކޭޑް ނިމުމަކަށް ގެނައުމަށް އިޒްރޭލަށް ބާރުއެޅުމަށް އިނގިރޭސި ބޮޑުވަޒީރު ކިއެރ ސްޓާމަރއަށް ހުޅުވާލެވިފައިވާ ސިޓީއެއްގައި ގޮވާލައިފައެވެ.
ޔޫކޭގެ ކާބޯތަކެތީގެ ސިނާއަތުގެ ފަންނުވެރިން ބުނާ ގޮތުގައި، ހަނގުރާމައިގެ ވަސީލަތެއްގެ ގޮތުގައި ބަނޑުހައިހޫނުކަން ބޭނުންކުރުމަކީ ޖެނީވާ ކޮންވެންޝަންގެ 54 ވަނަ މާއްދާގެ ދަށުން މަނާކުރެވިފައިވާ ކަމެކެވެ. އަދި މިއީ އިންޓަރނޭޝަނަލް ކްރިމިނަލް ކޯޓުގެ ރޯމް ސްޓެޓިއުޓްގެ 8 ވަނަ މާއްދާގެ ދަށުން ހަނގުރާމައިގެ ކުށެއްގެ ގޮތުގައި ވެސް މާނަ ކުރެވިފައިވާ ކަމެކެވެ.
ޣައްޒާގެ ސަރުކާރުގެ މީޑިއާ އޮފީހުން ބުނެފައިވާ ގޮތުގައި، މަދުވެގެން 58 މީހުން ނުރަނގަޅު ކާނާ ކެއުމުގެ ސަބަބުން މަރުވެފައިވެއެވެ. އަދި އިޒްރޭލުން 80 ދުވަހުގެ މުއްދަތަށް ހިސާރުކޮށް ބަނޑަށް ޖައްސާފައިވާތީ 300 އަންހެނުންގެ ދަރިންވެސް ބައިގެން ގޮސްފައިވެއެވެ.
