ފްރީ ބަލޯޗިސްތާން މޫވްމަންޓް (އެފްބީއެމް) އިން ވަނީ މެއި 28 ގައި ޔުނައިޓެޑް ކިންގްޑަމް (ޔޫކޭ) އާއި ޔޫރަޕުގެ އެކި ގައުމުތަކުގައި މުޒާހަރާތަކެއް ބޭއްވުމަށް ނިންމައިފައެވެ. މި މުޒާހަރާތައް ބާއްވަނީ 1998 ވަނަ އަހަރު ޕާކިސްތާނުން ބަލޯޗިސްތާނުގައި ކުރި ނިއުކްލިއަރ ޓެސްޓުތަކުގެ 27 ވަނަ އަހަރީ ދުވަސް ފާހަގަކުރުމުގެ ގޮތުންނެވެ.
އެފްބީއެމްއިން ނެރުނު ނޫސް ބަޔާނެއްގައި ބުނެފައިވާ ގޮތުގައި، މި މުޒާހަރާތަކުގެ މަޤްޞަދަކީ 1998 ވަނަ އަހަރު ޗަގައި ސަރަޙައްދުގައި ކުރި ނިއުކްލިއަރ ޓެސްޓުތަކުގެ ސަބަބުން އިންސާނުންނަށާއި، ތިމާވެއްޓަށާއި އަދި ޞިއްޙަތަށް ކުރަމުންދާ ދިގު މުއްދަތުގެ އަސަރުތަކަށް ބައިނަލްއަޤްވާމީ ގޮތުން ސަމާލުކަން ހޯދުމެވެ.
ލަންޑަނުގައި އެފްބީއެމް ޔޫކޭއިން އިސްނަގައިގެން ބްރިޓިޝް ބޮޑުވަޒީރުގެ ރަސްމީ ގެ ކަމުގައިވާ 10 ޑައުނިންގ ސްޓްރީޓުގެ ކުރިމަތީގައި މެންދުރުފަހު 3:00 އިން 5:00 އަށް ސުލްޙަވެރި މުޒާހަރާއެއް ބާއްވާނެއެވެ. އެފްބީއެމް ޔޫކޭގެ ތަރުޖަމާނެއް ބުނި ގޮތުގައި މިއީ ބަލޯޗިސްތާނުގެ ތާރީޚުގެ އަނދިރި ބާބެކެވެ. އޭނާ އިތުރަށް ބުނީ ”27 އަހަރު ވަންދެން އަޅުގަނޑުމެންގެ ރައްޔިތުން ވަނީ ޕާކިސްތާނުގެ ނިއުކްލިއަރ އެދުންތަކުގެ ނަތީޖާ ތަޙައްމަލުކުރަމުން ގޮސްފައެވެ. ކެންސަރު، އުފަންވާއިރު ކުދިންގެ ގައިގައި ހުންނަ އުނިކަން، ތިމާވެށި ހަލާކުވުން، އަދި ނުރައްކާތެރި ޞިއްޙީ ކާރިސާއެއް މިހާރުވެސް ދަނީ ކުރިމަތިވަމުންނެވެ. ދުނިޔެއިން މި ދެމިގެންދާ ކާރިސާއަށް އަޅާނުލާ ތިބެގެން ނުވާނެއެވެ.“
އެފްބީއެމްއިން ބުނާ ގޮތުގައި 1998 އިން ފެށިގެން ކޮންމެ އަހަރެއްގެ މެއި 28 ގައި ބަލޯޗް މުޖުތަމަޢުތަކުން ވަނީ ނިއުކްލިއަރ ޓެސްޓުތަކުގެ ސަބަބުން ދިގު މުއްދަތަކަށް ކުރަމުންދާ ނޭދެވޭ އަސަރުތަކާ ބެހޭ ގޮތުން ހޭލުންތެރިކަން އިތުރުކުރުމަށް މުޒާހަރާތައް ބާއްވަމުން ގޮސްފައެވެ.
