ސަރުކާރުގެ ސިޔާސީ މަގާމުތަކަށާއި އެމްބަސީތަކުގެ ވަޒީފާތަކަށް ރައީސް ޑރ. މުހައްމަދު މުއިއްޒު އައްޔަންކުރައްވާފައިވަނީ އެމަގާމްތަކަށް އެކަށީގެންނުވާ މީހުންކަމަށް ކުރީގެ ރައީސް އަބްދުﷲ ޔާމީން އަބްދުއްގައްޔޫމް ވިދާޅުވެއްޖެ އެވެ.
ޕީއެންއެފް އޮފީހުގައި ރޭ ބޭއްވި ޖަލްސާއެއްގައި ވާހަކަދައްކަވަމުން ޔާމީން ވިދާޅުވީ ރައީސް މުއިއްޒު، ވައުދުފުޅުވެވަޑައިގެންފައިވަނީ އިލްމީ އަދި ގާބިލް ކެބިނެޓެއް އެކުލަވައިލައި ސިޔާސީ މަގާމުތަކަށް ވެސް އެފަދަ ގާބިލް ބޭފުޅުން އައްޔަން ކުރެއްވުމަށް ކަމަށެވެ. އެހެންނަމަވެސް ފެންނަނީ އޭގެ އިދިކޮޅަށް ކަންކަން ވަމުންދާ މަންޒަރު ކަމަށް ރައީސް ޔާމީމް ވިދާޅުވިއެވެ. ”މިއީ ދުނިޔޭގައި ކެރިއަ މީހުންނާއެކު ވާހަކަދައްކަން ދިވެހިރާއްޖޭގެ މޫނު ބަލާ ލޯގަނޑުގެ ގޮތުގައި ފޮނުވާ މީހުންނަކީ،“ ޔާމީން ވިދާޅުވި އެވެ.
އެމަނިކުފާނު ވިދާޅުވީ ސަރުކާރުގެ ކެބިނެޓުގައި ރަނގަޅު ބޭފުޅުންވެސް އެބަތިއްބެވި ކަމަށެވެ. އެހެންނަމަވެސް ބައެއް ބޭފުޅުންނަކީ އިނގިރޭސިބަހުން ވާހަކަދައްކަވަން އެނގިވަޑައިނުގަންނަވާ ބޭފުޅުންކަމަށް ރައީސް ޔާމީން ވިދާޅުވިއެވެ. އެފަދަ ބޭފުޅުން ވާހަކަފުޅުދެއްކެވުމުން ދިވެހިރާއްޖެއަށް ކުރިމަތިލާން ޖެހެނީ ލަދުވެތިކަމާ ކަމަށް ވެސް ވިދާޅުވިއެވެ. މިއީ ކަންބޮޑުވާ ކަމެއް ކަމަށް އެމަނިކުފާނު ވިދާޅުވިއެވެ.
