ގެއިން ނިކުމެގެން ތަނަކަށް ދިއުމަށް ޓަކައި، ނުވަތަ ކޮންމެހެން ވެސް ބޭނުންވާ އެއްޗެއް ހޯދުމަށްޓަކައި ގޮސް، އެނބުރި ގެއަށް އާދެވޭނެކަމުގެ އެއްވެސް ޔަޤީންކަމެއް މިއަދު އެބަ އޮތްބާވައެވެ.؟ ދުވާލު ބުރަ މަސައްކަތުން މިންޖުވެގެން ސިކުނޑި ތާޒާކޮށްލައި ރޭގަނޑުގެ އަރާމު ފިނީގައި ބުރެއް ޖަހާލަން ބޭރުމަގަށް ނިކުމެ ދުއްވަމުންދާއިރު ހޯދަން ބޭނުންވެގެން ތިޔަ އުޅޭ ހަޤީޤީ ހިތްހަމަޖެހުން ހިތަށް އެބަ ލިބޭ ބާވައެވެ؟ ނޫނީ އެނބުރި ގެއަށް އާދެވެންދެން އިނދެވެނީ ބިރުވެރިކަމެއްގެ ތެރޭގައި ބާވައެވެ؟ ފިހާރައަކުން އެއްޗެއް ގަނެގެން ނިކުމެ މަގުމަތިން ހިނގާލާފައި ގޮސް ސައިކަލަށް އެރޭނެކަމުގެ އެއްވެސް ޔަޤީންކަމެއް މިއަދު އެބަ އޮތް ބާވައެވެ؟ މިއީ ހައްތަހާވެސް ހުރި ބިރުވެރިކަމާއި އުދާސްތަކެވެ.
މަގުމަތީގެ ރައްކާތެރިކަމަކީ އަޅުގަނޑުމެން އެންމެންގެ ފުރާނައާ ސީދާ ގުޅިފައިވާ ވަރަށް މުހިންމު ކަމެކެވެ. ނަމަވެސް، މިއަދު އަޅުގަނޑުމެންގެ މުޖުތަމަޢުގައި މަގުމަތީގެ ރައްކާތެރިކަމަށް އެކަށީގެންވާ ސަމާލުކަމެއް ދެވެމުން ނުދާކަން ފާހަގަކުރެވެއެވެ. ޚާއްޞަކޮށް ޤަވާއިދާ ޚިލާފަށް އުޅަނދުފަހަރު ދުއްވުމުގެ މައްސަލައަކީ ދުވަހެއް ދުވަހަކަށް އިތުރުވެގެން ގޮސްފައިވާ ވަރަށް ބޮޑު މައްސަލައެކެވެ.
ޤަވާއިދާ ޚިލާފަށް އުޅަނދުފަހަރު ދުއްވުމުގެ ސަބަބުން ދިމާވާ ނުރައްކާތެރި ހާދިސާތައް އިންތިހާއަށް ގިނަވަމުންދާކަން ފާހަގަކުރެވެއެވެ. ބާރު ސްޕީޑުގައި ދުއްވުމާއި، ޓްރެފިކް ބައްތިތަކަށް ސަމާލުކަން ނުދިނުމާއި، ލައިސަސްނެތި އެއްގަމު އުޅަނދުފަހަރު ދުއްވުމާއި، މޯބައިލް ފޯނުން ވާހަކަ ދައްކަމުން އުޅަނދުފަހަރު ދުއްވުންފަދަ ކަންކަމަކީ އަޅުގަނޑުމެންގެ މުޖުތަމަޢުގައި އާންމުވެފައިވާ ކަންކަމެވެ. މިފަދަ ޢަމަލުތަކުގެ ސަބަބުން އެތައްބައެއްގެ ފުރާނަ ގެއްލި، އެތައް ޢާއިލާއެއް ހިތާމައިގެ ކަރުނައިގައި މުޅި އުމުރު ހޭދަކުރަންޖެހިފައިވެއެވެ.
ތަނެއް ދޮރެއް ނުބަލާ ބާރު ސްޕީޑްގައި ޤަވާއިދާ ޚިލާފަށް އުޅަނދުފަހަރު ދުއްވުމުގެ ސަބަބުން ހިނގާ ނުރައްކާތެރި ހާދިސާތަކުގައި، ގެއްލުންވަނީ ހަމައެކަނި އެ އުޅަނދެއް ބާރަށް ދުއްވަންއިންނަ ފަރާތަށް އެކަންޏެއް ނޫނެވެ. މަގުމަތީގައި ހިނގާ ބިނގާވެ އުޅޭ މީހުންނަށާއި އެހެން އުޅަނދުފަހަރުގައި ދަތުރުކުރާ ފަރާތްތަކަށްވެސް މީގެ ނުރައްކާތެރިކަން އިންތިހާއަށް ބޮޑެވެ. އެހެންކަމުން، މިއީ މުޅި މުޖުތަމަޢުއަށް ކުރިމަތިވެފައިވާ ބޮޑު ނުރައްކަލެކެވެ.
މި މައްސަލައަށް ޙައްލެއް ހޯދުމަށްޓަކައި ޤަވާއިދާ ޚިލާފަށް އުޅަނދުފަހަރު ދުއްވާ ފަރާތްތަކަށް އެކަށީގެންވާ ފިޔަވަޅު އެޅުމަކީ ކޮންމެހެން ކުރަންޖެހޭ ކަމެކެވެ. މީގެތެރޭގައި އެފަދަ ފަރާތްތައް ޖޫރިމަނާކުރުމާއި، ލައިސަންސް ހިފެހެއްޓުމާއި، އަދި ތަކުރާރުކޮށް މިފަދަ ކުށްތައް ކުރާ ފަރާތްތަކަށް ޖަލު ޙުކުމް ކަނޑައެޅުން ހިމެނެއެވެ. މީގެ އިތުރުން، މަގުމަތީގެ ރައްކާތެރިކަމާ ގުޅޭ ހޭލުންތެރިކަން އިތުރުކުރުމުގެ ޕްރޮގްރާމްތައް ހިންގުމަކީވެސް މުހިންމު ކަމެކެވެ.
މަގުމަތީގެ ރައްކާތެރިކަން ޔަޤީންކުރުމަށް ޓަކައި ސަރުކާރުން ވެސް އިތުރު ފިޔަވަޅުތަކެއް އަޅަންޖެހެއެވެ. މީގެ ތެރޭގައި މަގުތައް ރަނގަޅު ފެންވަރަކަށް ހެދުމާއި، ޓްރެފިކް ބައްތިތަކާއި މަގު ހުރަސްކުރާ ތަންތަން އިތުރުކުރުން ހިމެނެއެވެ. އަދި މީގެއިތުރުން، ޓްރެފިކް ފުލުހުންގެ ޢަދަދު އިތުރުކޮށް، އެ ބޭފުޅުންނަށް އިތުރު ތަމްރީނުތައް ދިނުމަކީވެސް މުހިންމު ކަމެކެވެ.
ސްކޫލްތަކުގައި ކުދިންނަށް ޅަފަތުގައި މަގުމަތީގެ ރައްކާތެރިކަމާ ބެހޭ މަޢުލޫމާތު ދިނުމަކީވެސް ވަރަށް މުހިންމު ބޭނުންތެރި ކަމެކެވެ. މިގޮތުން، ސްކޫލްތަކުގައި މަގުމަތީގެ ސަލާމަތާއި ރައްކާތެރިކަމާ ގުޅޭ މާއްދާއެއް ކިޔަވައިދިނުމަކީ ވިސްނާލަންޖެހޭ ކަމެކެވެ. މިއީ ކުޑައިރުއްސުރެ ކުދިންގެ ހިތްތަކުގައި މަގުމަތީގެ ރައްކާތެރިކަމުގެ މުހިންމުކަން އަށަގެންނެވުމަށް ވަރަށް މުހިންމު ފިޔަވަޅެކެވެ.
އަދި ހަމައެހެންމެ، މީޑިއާގެ ޒަރީޢާއިން މަގުމަތީގެ ރައްކާތެރިކަމާ ގުޅޭ ހޭލުންތެރިކަން އިތުރުކުރުމުގެ ޕްރޮގްރާމްތައް ގިނަކުރުމަކީވެސް މުހިންމު ކަމެކެވެ. ޓީވީ އާއި ރޭޑިއޯ އަދި ސޯޝަލް މީޑިއާގެ ޒަރީޢާއިން މިފަދަ މެސެޖުތައް ފެތުރުމަކީ މުޅި މުޖުތަމަޢުގެ ހޭލުންތެރިކަން އިތުރުކުރުމަށް ކޮންމެހެން ބޭނުން ކަމެކެވެ.
އަމާންކަމާ ރައްކާތެރި މަގުމައްޗެއް ބޭއްވޭނީ އަޅުގަނޑު އެންމެން އެ ޒިންމާގައި ބައިވެރިވެގެންނެވެ. ގަވާއިދުތަކަށް ޙުރުމަތްތެރިކޮށް ހިތައި، އަޅުގަނޑުމެންގެ އަމިއްލަ ނަފްސަށާއި އެހެން މީހުންގެ ފުރާނައަށް ރައްކާތެރިވުމަކީ އަޅުގަނޑުމެން ކޮންމެ މީހެއްގެ ވެސް ވާޖިބެއް ކަމުގައި ދެކިގެންނެވެ. މުޖުތަމަޢުގެ އެންމެން މިކަމަށް ސަމާލުވެ، އެއްބާރުލުންދީގެން މެނުވީ މި މައްސަލައަށް ދާއިމީ ޙައްލެއް ނުލިބޭނެއެވެ. އެހެންކަމުން، އަޅުގަނޑުމެން އެންމެން މިކަމަށް ވިސްނައި، މަގުމަތީގެ ރައްކާތެރިކަން ކަށަވަރުކުރުމަށް ކުރަންޖެހިފައިވާ މަސައްކަތްތައް މިއަދު ވަރަށް ވެސް ގިނައެވެ.
މަގުމަތީގެ ރައްކާތެރިކަމަކީ އަޅުގަނޑުމެން އެންމެންގެ ފުރާނައާ ގުޅިފައިވާ ވަރަށް މުހިންމު ކަމެކެވެ. ޤަވާއިދާ ޚިލާފަށް އުޅަނދުފަހަރު ދުއްވުމުގެ މައްސަލައަކީ މުޅި މުޖުތަމަޢުއަށް ކުރިމަތިވެފައިވާ ނުރައްކަލެކެވެ. މި މައްސަލައަށް ޙައްލު ހޯދުމަށްޓަކައި ސަރުކާރާއި، ރައްޔިތުންނާއި، އަދި މުޅި މުޖުތަމަޢު ގުޅިގެން މަސައްކަތްކުރަންވީއެވެ. އަޅުގަނޑުމެން އެންމެން މިކަމަށް ސަމާލުވެ، އަޅަންޖެހޭ ފިޔަވަޅުތައް އަޅައިފިނަމަ، އަޅުގަނޑުމެންގެ މަގުތަކަކީ އެންމެންނަށް ރައްކާތެރި ތަނަކަށް ހެދުމަކީ ޙަޤީޤަތަކަށް ހެދިދާނެ ކަމެކެވެ.
