ކަރާޗީ: ޕާކިސްތާނުގައި ކުރިން އިތުރުވެފައިނުވާ ވަރަށް ޓެރަރިސްޓް ހަމަލާތައް މިއަހަރު އޮގަސްޓުމަހު އިތުރުވެފައިވާކަމށް ތަފާސް ހިސާބުތަކުން ދައްކައިފިއެވެ.
ޕާކިސްތާން އިންސްޓިޓިއުޓް ފޯ ކޮންފްލިކްޓް އެންޑް ސެކިއުރިޓީ ސްޓަޑީޒް (ޕީއައިސީއެސްއެސް) އިން ނެރުނު ރިޕޯޓެއްގައި ބުނެފައި ވަނީ އޮގަސްޓް މަހު، އާންމުންގެ ތެރޭން 92 މީހަކާއި ސަލާމަތީ ފަރާތްތަކުގެ 54 މީހަކާއި ހަނގުރާމަވެރިންގެ 108 މީހަކާއެކު ޖުމުލަ 254 މީހުން މަރުވެފައިވާ ކަމަށެވެ. އޭގެ އިތުރުން 150 މީހަކަށް ވަނީ އަނިޔާވެފައި ކަމަށް ބުނެފައި ވެއެވެ. އެއީ، އާންމުންގެ 88 މީހަކާއި ސަލާމަތީ ފަރާތްތަކުގެ 35 މީހަކާއި ހަނގުރާމަވެރިންގެ 27 މީހެކެވެ.
މިއީ 2018 ވަނަ އަހަރުގެ ޖުލައި މަހުގެ ފަހުން ހަނގުރާމަވެރިންގެ ޙަމަލަތަކުން މިހާތަނަށް އެންމެ ގިނަ މީހުން މަރުވި މަހެވެ. ބަލޫޗިސްތާނުގައި ވަކި ވެގަތުމަށް ޙަމަލަ ދެމުންދާ ފަރާތްތަކުން ބުނަމުން ދަނީ، ޗައިނާއަށް ދީފައިވާ އިންވެސްޓްމެންޓްތަކުން ރައްޔިތުންނަށް ގެއްލުން ވަމުންދާ ކަމަށެވެ.
ވަކިވެގަތުމުގެ ހަރަކާތްތައް ޒަމާންތަކެއް ވަންދެން ހިންގާފައިވާ އަދި މިހާރުވެސް ހިންގަމުންދާ މަޝްހޫރު މި ސަރަހައްދުގައި އަނިޔާވެރި ހާދިސާތައް ޖުމުލަކޮށް %277 އަށް އިތުރުވެފައިވެއެވެ. 2024 ވަނަ އަހަރުގެ ޖުލައި މަހާ އަޅާބަލާއިރު ހަމަނުޖެހުންތަކުގައި މަރުވާ މީހުންގެ އަދަދު %938 އަށް އިތުރުވެފައި ވެއެވެ.
އޮގަސްޓުމަހު އެކަނިވެސް ބަލޫޗިސްތާނުގައި 49 ޓެރަރިސްޓް ހާދިސާއެއް ހިނގާފައިވެއެވެ. އެއީ އޭގެ ކުރީ މަހުގެ 13 ހާދިސާއާ އަޅާބަލާއިރު ބޮޑު އިތުރު ވުމެކެވެ.
އިޤްތިޞާދީ ދަތިކަމާ ހެދި، ބަލޫޗިސްތާނުގެ އިތުރުން ޕާކިސްތާނުގެ އެހެން ސަރަހައްދުތަކުގައި ވެސް ހަމަނުޖެހުން ވަނީ އާންމު ވެފައެވެ. ނަމަވެސް ޚައިބަރު ޕަޚްތޫންޚްވާގެ ގަބީލާ ސަރަހައްދުތަކުގައި ޓެރަރިސްޓް ހާދިސާތައް ފަންސަވީސް ޕަސެންޓު މަދުވެފައި ވެއެވެ. އަދި އާންމުން މަރުވާ ނިސްބަތްވެސް %43 އަށް މަދުވެފައިވެއެވެ. އެހެންނަމަވެސް ހަނގުރާމަވެރިން މަރުވާ ޢަދަދު 98 ޕަސެންޓަށް އިތުރުވެ ސިފައިންނާއި ފުލުހުން މަރުވާ ނިސްބަތް ވެސް 54 ޕަސެންޓަށް ވަނީ އިތުރު ވެފައެވެ.
މީގެ އިތުރުން ސިންދުގައި ވެސް ނިސްބަތުން ހަމަޖެހުން އިތުރު ވެފައިވާއިރު އޮގަސްޓް މަހު ޓެރަރިސްޓް ދެ ހާދިސާއެއް އެ ޕްރޮވިސްގައި ހިނގާފައި ވެއެވެ. އަދި ޖުލައި މަހު ނުވަ ހާދިސާއެއް ދިމާވެ ހަތް މީހަކު މަރުވެފައި ވެއެވެ. ޕަންޖާބުގައި ވެސް އޮގަސްޓް މަހު ޓެރަރިސްޓް އެއް ހާދިސާއެއް ހިނގާފައިވާއިރު، އެ ހާދިސާގައި ހަނގުރާމަވެރިންގެ ދެ މީހަކު މަރުވެ، ސަލާމަތީ ދެ މީހަކު ޒަޚަމްވެފައިވެއެވެ.
ބަލޫޗިސްތާނުގައި އަނިޔާވެރިކަން މި އިތުރުވުމަކީ 2024 ވަނަ އަހަރު ޕާކިސްތާނަށް ކުރިމަތިވެފައިވާ ސަލާމަތީ ގޮންޖެހުންތައް ދައްކައިދޭ ކަމެކެވެ. އެ ސަރަހައްދަށް ބަލާއިރު، 2023 ވަނަ އަހަރުގެ މި މުއްދަތާ އަޅާބަލާއިރު ހަނގުރާމަވެރިންގެ ހަމަލާތައް %51 އިތުރުވެފައި ވެއެވެ. އަދި މީހުން މަރުވާ ނިސްބަތް %21 އިތުރު ވެފައި ވެއެވެ.
