މީރާ އާއި އިންސްޓިޓިއުޓް އޮފް ޗާރޓަރޑް އެކައުންޓެންޓްސް އޮފް ދަ މޯލްޑިވްސް (ސީ.އޭ މޯލްޑިވްސް) އާ ގުޅިގެން، ”މޯލްޑިވްސް ޓެކްސް ފޯރަމް 2025“ ގެ ނަމުގައި ބާއްވާ ޓެކްނިކަލް ފޯރަމް މިއަދު ފަށައިފިއެވެ.

”ޝޭޕިންގ އަ ސްމާޓަރ ޓެކްސް ފިއުޗަރ ޓުގެދަރ“ މި ޝިއާރުގެ ދަށުން ބާއްވާ މި ފޯރަމަކީ ދިވެހިރާއްޖޭގައި ބާއްވާ މިފަދަ ފުރަތަމަ ފޯރަމް ކަމަށް މީރާއިން ވަނީ ވިދާޅުވެފައެވެ.

މި ފޯރަމްގެ ޝަރަފުވެރި މެހެމާނުގެ ގޮތުގައި ބައިވެރިވެފައިވަނީ، މިނިސްޓަރ އޮފް ފޮރިން އެފެއަރޒް، ޑރ. އަބްދުﷲ ޚަލީލެވެ. މި ފޯރަމްގައި ވާހަކަފުޅު ދައްކަވަމުން މިނިސްޓަރ ވަނީ ޓެކްސް ނިޒާމުގެ މުހިއްމުކަމާއި ގުޅޭގޮތުން ވާހަކަފުޅު ދައްކަވައިފައެވެ. މިގޮތުން، އިންވެސްޓަރުންނާއި، ޑިވެލޮޕްމަންޓް ބޭންކުތަކާއި، ސަރުކާރުތަކުންވެސް ބަލަނީ ޤައުމަކުން އަމިއްލަ އާމްދަނީ ހޯދައި ބަލަހައްޓާގޮތްކަމާއި، ޒަމާނީ، އިތުބާރު ހުރި ޓެކްސް ނިޒާމަކީ މިހާރު ބައިނަލްއަޤްވާމީ ކޮންމެ މުޢާމަލާތެއްގައިވެސް ގައުމަކަށް ގެންދެވޭނެ އެންމެ ވަރުގަދަ އެއް ކޯލިން ކާޑުކަން ފާހަގަކުރެއްވިއެވެ.

މިނިސްޓަރގެ އިތުރުން ކޮމިޝަނަރ ޖެނެރަލް އޮފް ޓެކްސޭޝަންވެސް މި ފޯރަމް އިފްތިތާހުކުރުމުގެ ރަސްމިއްޔާތުގައިވާހަކަފުޅުދެއްކެވިއެވެ. ކޮމިޝަނަރ ޖެނެރަލްގެ ވާހަކަފުޅުގައި ބައިނަލްއަޤްވާމީ ޓެކުހުގެ މައިދާނުގައި މީރާއިން ހޯދާފައިވާ ކުރިއެރުންތައް ފާހަގަކޮށް، މި ފޯރަމް ފަދަ އިތުރު ފޯރަމްތައް ކުރިއަށް އޮތް އަހަރުތަކުގައިވެސް ކުރިއަށްގެންދަވަން ވިސްނަވާފައިވާކަމަށް ވިދާޅުވިއެވެ.

މި ފޯރަމްގައި ޓެކުހުގެ ދާއިރާގެ ފަންނީ މާހިރުންނާއި، ޓެކްސް ލޯޔަރުން، އެކައުންޓިންގ ޕްރޮފެޝަނަލްސް އަދި  މި ދާއިރާގެ ތަޖުރިބާކާރުން ބައިވެރިވެ، ޓެކްސް ތަންފީޒުކުރުމުގައި ދިމާވާ ގޮންޖެހުންތަކާއި، ޓެކްސްދައްކާ ފަރާތްތަކަށް ދިމާވާ ގޮންޖެހުންތަކާއި، ބައިނަލްއަޤްވާމީ ޓެކުހުގެ މައިދާނުގައި ޓެކްސް ތަންފީޒުކުރުމުގައި ދިމާވާ ގޮންޖެހުންތަކަށް ހައްލުހޯދުމަށްޓަކައި އެކުލަވައިލައިފައިވާ ސިޔާސަތުތަކާއި ގުޅޭގޮތުން މަޝްވަރާކޮށްފައިވާ ކަމަށްވެސް މީރާއިން ވިދާޅުވިއެވެ. ތަފާތު ފަސް މަޢުޟޫއަކަށް ޕެނަލްތަކުގައި މަޝްވަރާތައް ކުރިއަށް ގެންގޮސްފައިވެއެވެ. މިގޮތުން، ދިވެހިރާއްޖޭގައި ވަޒަންވެރިވެފައިނުވާ ފަރާތްތައް ޓެކްސްދެއްކުމުގައި ދިމާވާ ގޮންޖެހުންތަކާއި، ފާހަގަވާ މައްސަލަތައް އަދި އެ ފަރާތްތަކުން ސަމާލުކަންދޭންވީ ކަންކަމަށް ޕެނަލްގައި އަލިއަޅުވާލައިފައިވެއެވެ. އަދި ގުޅުންހުރި ފަރާތްތަކުގެ މެދުގައި ކުރާ މުޢާމަލާތްތަކާއި ގުޅޭގޮތުން ބަލަހައްޓަންޖެހޭ ލިޔެކިޔުންތަކާއި ގުޅޭގޮތުންވެސް މަޝްވަރާތައްކުރިއަށް ގެންގޮސްފައިވެއެވެ. އަދި މިހާރު ހުށަހަޅައިފައި ހުންނަ މިފަދަ ލިޔެކިޔުންތަކުގައި ހުރި ހުސްކަންކަން ފާހަގަކޮށް، އެއް ސްޓެންޑަރޑްއަކަށް ޑޮކިއުމަންޓްތައް ތައްޔާރުކުރާނެގޮތާއި ގުޅޭގޮތުން މައުލޫމާތު ހިއްސާކޮށްފައިވާ ކަމަށްވެސް ވިދާޅުވެފައިވެއެވެ.

މީގެއިތުރުން، ޑިޖިޓަލް ޓްރާންސްފޮމޭޝަން އޮފް އެޑްމިނިސްޓްރޭޝަން އާ ގުޅޭގޮތުންވެސް ޕެނެލްގައި މަޝްވަރާކުރަން ހަމަޖެހިފައިވެއެވެ. މި ޕެނަލްގައި ޓެކުހުގެ އިލްތިޒާމްތައް އޮޓޮމޭޓްކުރުމަށްޓަކައި މީރާއިން ކުރަން ކަނޑައަޅައިފައިވާ މަސައްކަތްތަކާގުޅޭގޮތުންވެސް އަލިއަޅުވައިލައިފައިވެއެވެ. މީގެއިތުރުންވެސް، އިންޓަރނޭޝަނަލް ޓެކްސޭޝަންގެ އެންމެ ފަހުގެ އަޕްޑޭޓްސްވެސް ޕެނަލް ޑިސްކަޝަންތަކުގައި މަޝްވަރާކޮށްފައިވެއެވެ. މީގެތެރޭގައި ޑެސްޓިނޭޝަން ބޭސްޑް ޓެކްސޭޝަން އަދި ޑިޖިޓަލް އިކޮނޮމީގައި ދިމާވާ ގޮންޖެހުންތައް ހައްލުކުރުމަށްޓަކައި ޓޫ-ޕިލަރ ސޮލިއުޝަންގެ ނަމުގައިވެސް އޯ.އީ.ސީ.ޑީއިން ތަޢާރަފުކޮށްފައިވާ ގްލޯބަލް ޓެކްސް ރިފޯމް ފްރޭމްވޯރކާގުޅޭގޮތުންވެސް މަޝްވަރާތައް ކުރިއަށްގެންގޮސްފައިވެއެވެ.