ސާއިދުއަށް މާދުރަށް ނުދެވެނީސް، ސާރާ ވަރަށް އޯގާތެރިކަމާއި އެކީ އޭނާއަށް ގޮވާލިއެވެ. ސާއިދުއަށް ބޭއިޚްތިޔާރުގައި ހުއްޓިލެވުނެވެ. އެހެންނަމަވެސް ހަމަ އެހުރި ފިޔަވަޅުމަތީގައި ހުއްޓި ހުރެވުނީއެވެ. ބުދެއް ފަދައިންނެވެ. ކޮންމެހެން ސާރާއާއި ދިމާއަށް އެނބުރި ބަލައިލާކަށްވެސް ޚިޔާލެއް ނެތެވެ. އެހެންނަމަވެސް ސާރާ މަޑުމަޑުން ހިނގާލާފައި ސާއިދުއާއި ހަމައަށް ދިޔައެވެ. ވާނުވާ ނޭންގިހުރެ، ޝަފްނާވެސް ސާރާގެ ފަހަތުން ދިޔައެވެ. ސާރާ ބުނި ވާހަކައަށް ޖަވާބުދޭން ޝަފްނާ އެވަޤުތު ވިސްނި ކަމުގައި ވިޔަސް، އޭނާވެސް މިހާރު ބޭނުންވަނީ ސާއިދު ހުއްޓުވި ސަބަބު ބަލާށެވެ.

ސާއިދުއާ، އަރާ ހަމަވުމުން އިރުކޮޅެއް ވަންދެން އޭނާއާއި ދިމާއަށް ބަލަހައްޓައިގެން ހުރުމަށަފަހު، ބާރަށް ހޭން ފެށިއެވެ. ސާއިދުއާއި ޝަފްނާއަށް ލިބުނު ހައިރާންކަން ދެގުނަ އިތުރުވިއެވެ. އަދި ސުވާލުން ފުރިގެންވާ ނަޒަރަކުން އެކަކު އަނެކަކާއި ދިމާއަށް ބަލައިލިއެވެ. ސާރާ އޭނާގެ ހިނގަނޑު މައިތިރިކުރަން މަސައްކަތް ކުރަމުން ގެންދިޔައެވެ. ”އަހަރެންގެ ސަމާސާ ހިތި ވީތަ؟ ބަލަ އެއީ އަހަރެން ސީރިޔަސްކޮން ބުނި އެއްޗެއް ނޫނޭ. ޝަފްނާ ހަދާ އެއްޗެއް ބަލައިލަން ވެގެން އަހަރެން ކޮށްލި ސަމާސާއެއް އެއީ.“ ސާއިދު މަޑުމަޑުން ފުން ނޭވާއެއް ލިއެވެ. ސާރާއަށް ހިލަމެއް ނުވާނެ ހެންނެވެ. ޝަފްނާ ގާތަށް ކޮންމެވެސް ވަރަކަށް ރުޅި އައެވެ. އަދި ސާރާއާއި ދިމާއަށް އެއްޗެހި ގޮވަން ފެށިއެވެ.

”ސާރާ ބުނަންތަ ރަނގަޅު ވާހަކައެއް. ސަމާސާވެސް ހުންނާނެ ކޮށްފަ ނުކުރާނެ ކަންކަން. އަހަރެން ހިއެއް ނުކުރަން ސާރާއަކީ ތިހާ ވިޔާނުދާ ޚިޔާލު ގެންގުޅޭ ކުއްޖެއް ކަމަކަށް.“ އެހެން ބުނުމާއިއެކު ޝަފްނާ އެތަނުން ދުރަށް ދާން ހިނގައިގަތެވެ. ސާއިދު އަދިވެސް އެހުރީ ބުނާނެ އެއްޗެއް ނޭންގިފައެވެ. ސާރާ ކޮންމެހެން ޝާފްނާ ދިޔަނުދީ މަޑުކުރުވާކަށްވެސް ނޫޅެއެވެ. އެހެނެއްކަމަކު އޭނާގެ ސަމާލުކަން ހުރީ ސާއިދުއަށެވެ. ”ސޮރީ.“ ސާއިދު ސިއްސައިގެން ގޮސް، ސާރާއާއި ދިމާއަށް ބަލައިލިއެވެ. ސުވާލުން ފުރިގެންވާ ނަޒަރަކުންނެވެ. ލަދުވެތި ގޮތަކަށް އިސްދަށަށް ޖަހާލުމާއިއެކު، ސާރާ އަނެއްކާވެސް މަޑުމަޑުން އިސްއުފުލާލުމާއިއެކު، ސާއިދުއާ ދިމާއަށް ބަލައިލިއެވެ. އޭރުވެސް ސާއިދުގެ ދުލުން ބަހެއް ބުނަން ޚިޔާލުވެސް ނެތް ކަހަލައެވެ.

”ސާއިދު އެއްވެސް އެއްޗެކޭ ނުބުނެ ތި ހުންނަނީ އަހަރެންނަށް މަޢާފުކުރަން ބޭނުން ނުވާތީ ދޯ؟“ ސާއިދުއަށް ރެޔަކާލީ ދެނެވެ. ”ނޫނޭ. އެއްގޮތަކަށްވެސް އެހެންނެއް ނޫން. އެކަމަކު ސާރާއަށް އައިސް ތިހުރި ކުއްލި ބަދަލާމެދު ބުނާނެ އެއްޗެއް ނޭންގިފަ އަހަރެން މި ހުންނަނީ.“ ”އަހަރެންނަކީ ހަމަ އެހާ ގޯސް މީހެކޭތަ ތި ބުނަނީ؟“ ޝަކުވާއެއްގެ ސިފައިގާ ސާރާ ކޮށްލި ސުވާލަށް ސާއިދު ޖަވާބުދޭން ބޭނުންވިއެވެ. އެހެންނަމަވެސް އެވަޤުތު އާނާގެ ފޯނު ރަނގަބީލުވާން ފެށިއެވެ. ސާއިދު ބަލައިލިއިރު، އޭނާ ރިސޯޓަށް ދާން އޮތް ފެރީގެ ކައްޕިތާނު އޭނާއަށް ގުޅަނީއެވެ. ފޯނު ނެގުމުގެ ކުރިން ސާއިދު ބަލައިލީ އަތުކުރީގައި އޮތް ގަޑިއަށެވެ. ގަޑިން ދެގަޑި ފަނަރަ ވީއެވެ. ސާއިދު ސިއްސައިގެން ގޮސް ފޯނު ނަގާ، ވަރަށް އަވަހަށް އެބަދަން ކަމަށްބުނެ ފޯނު ކަނޑާލިއެވެ. ހަމައެއާއިއެކު ގެއަށް ދިޔުމަށް ހިނގައިގަތެވެ. ދިޔުމުގެ ކުރިން ސާރާއާއި ދިމާއަށް ބަލައިލިއެވެ. ”އަހަރެން ސާއިދުއަށް ފޯނު ކުރިއްޔާ ވާހަކަ ދައްކާނަންތަ؟“ ސާއިދު ގެއަށް ދިޔުމަށްޓަކާ އެނބުރިލަން އެޅި ފިޔަވަޅު މައްޗަށް ހުއްޓުނެވެ. އަދި އަނެއްކާވެސް ސާރާއާއި ދިމާއަށް އެނބުރިލިއެވެ.

”އަހަރެން ސާރާއާއި ދައްކަން ބޭނުންވާ ލައްކަ ވާހަކަ އެބަހުރި. އެކަމަކު މިވަޤުތު މަޑުކުރެވޭކަށް ނެތް.“ އެހެން ބުނުމާއިއެކު އިރުކޮޅަކު މަޑުކޮށްލިއެވެ. އަދި ކޮންމެވެސް ވަރަކަށް ވިސްނާލާފައި، ސާއިދު އަނެއްކާވެސް ވާހަކަ ދައްކަން ފެށިއެވެ. ”އެންމެ ރަނގަޅު، ސާރާ ގުޅައިފިއްޔާ އަހަރެން ފޯނު ނަގާނަން. އެކެމަކު އެކަން ކުރެވޭނީ ސާރާއަށް އަހަރެންގެ ނަންބަރު ލިބިގެން ދޯ.“ ސާއިދު އެހެން ބުނުމާއިއެކު، ސާރާ މަޑުމަޑުން ހީލިއެވެ. ”އަހަރެންނަށް ސާއިދުގެ ނަންބަރު ހޯދަން އެހާބޮޑު ތަކުލީފެއް އުފުލަން ޖެހޭނެހެނެއް ހިއެއް ނުވޭ.“ އެވަޤުތު ސާއިދު ކޮންމެވެސް ވަރަކަށް ވިސްނާލުމާއިއެކު، މަޑުމަޑުން ބޯ ޖަހާލިއެވެ. އެހެނީ އޭނާގެ ފޯނު ނަންބަރު ހަމަ ގައިމުވެސް އޭނާގެ ރައްޓެހިންގެ އަތުން ސާރާއަށް ލިބޭނެކަން ވިސްނާލެވުމުންނެވެ. އެވަޤުތު އެންމެ ރަނގަޅޭ ބުނުމާއިއެކު ސާއިދު ކުރިޔަށް ހިނގައިގަތެވެ. އެވަޤުތުވެސް ސާއިދުއަށް ސާރާއާއި ދިމާއަށް ބަލައިލެވުނެވެ. ފުރިހަމަ ހިނިތުން ވުމަކާއިއެކު، ސާރާ ހުރީ ސާއިދުއާއި ދިމާއަށް ބަލަހައްޓައިގެންނެވެ. އެހިނދު، މިވަނީ ކީއްކަން ނޭންގޭ ޙާލު އެހެނަސް އުންމީދަކާއިއެކު އޭނާ އެދިޔައީ ފުރާށެވެ.  ސާއިދުގެ ހިތް އޮތީ އާސްމާނުގައެވެ. އެހެނީ ވަރަށް ޅަފުރައިގެ އުމުރުން ފެށިގެން އޭނާގެ ހިތް އެދެމުން އަންނަ ކަންތައް ކާމިޔާބުވާނެ ކަމުގެ ކުލަވަރު މިއަދު ފެނިއްޖެއެވެ. އެހެންނަމަވެސް މިވަޤުތު ކުރާނެކަމެއް ނެތެވެ. ހިތް ކިތަންމެ ނޭދުނަސް ޖެހޭނީ ދާށެވެ. އެހެނަސް ފޮނި އުންމީދު ތަކަކާއި އެކުގައެވެ. އަނެއްކާވެސް ވަކި ހިސާބަށް ދިޔުމުން ސާރާ އާއި ދިމާއަށް އެނބުރި ބަލައިލިއެވެ. އޭރުވެސް ސާރާ ހުރީ ފުރިހަމަ ހިނިތުން ވުމަކާއިއެކު ސާއިދުއާއި ދިމާއަށް ބަލަހައްޓައިގެންނެވެ.

ގެއަށްގޮސް ވަނުމާއިއެކު ދުވެފައި ކަހަލަ ގޮތަކަށް ކޮޓަރިއަށް ވަދެ، ދަބަސް ހިފައިގެން ސާއިދު ނިކުތެވެ. މަންމަ ކައިރިޔަށް ގޮސް ސަލާމް ކޮށްލުމަށްފަހު، ގެއިން ނިކުމެގެން ދިޔައީ ފޮނި އުންމީދު ތަކަކާއިއެކުގައެވެ. ރިސޯޓަށް ދެވުމުން އޭނާގެ ޑިޔުޓީއަށް ދިޔުމަށް އަވަސްވެގަތެވެ. އެހެންނަމަވެސް އޭނާއާއި އެކުގައި މަސައްކަތްކުރާ އެންމެންނަށްވެސް މިއަދު ފެންނަނީ މުޅިން ތަފާތު ސާއިދުއެކެވެ. އާދަޔާއި ޚިލާފު ހިނިތުންވުމެއް މޫނުމައްޗަށް ވެރިވެފައި ވެއެވެ. މަސައްކަތުގައި ހުރި ޖޯޝާއި ފޯރި އެތައްގުނައެއް އިތުރެވެ. ފަތުރުވެރިންނާއި ކުރިމަލުމުގައިވެސް އާދަޔާއި ޚިލާފު ޝަޚްސިއްޔަތެއް ދައްކުވައިދޭކަން ސާއިދުގެ ވަށައިގެންވާ އެންމެންނަށް އެނގެއެވެ. އެހެންނަމަވެސް އެއިން އެއްވެސް ކަމަކަށް ސާއިދުގެ ފަރުވާލެއް ނެތް ކަހަލައެވެ. އެންމެފަހުން ކެތް ނުކުރެވިގެން އޭނާއާއިއެކު މަސައްކަތްކުރާ އެހެން ރިސެއްޕްޝަނިސްޓެއް ކަމަށްވާ ވާހިދު އޭނާއާއި ސުވާލުކުރަން ފެށިއެވެ. ”އަހަރެންނަށް މިއަދު މިފެންނަނީ، މީގެ ދެތިންދުވަސް ކުރިން  ރަށަށްދިޔަ ސާއިދުތަ ނޫނީ އޭނަގެ ނިބޫތަ؟ ރަށަށް ގޮއްސަ އައިފަހުން ހާދަ ތަފާތޭ؟“ ވާހިދު ކުރި ސުވާލުގެ ޖަވާބުގައި ސާއިދުވެސް އޭނާއާއި ކޮށްލީ ސުވާލެކެވެ. އެހެންނަމަވެސް ހިނިތުން ވުމަކާއިއެކުގައެވެ. ”އަނެއްކާ ކިހިނެއްވީ؟ އަހަރެންގެ ކިބައިން ތަފާތެއް ފެންނަނީތަ؟ ތީ ވަރަށްބޮޑު ކުށްހީއެއް.“ ސާއިދު ހީލާފައި ބުންޏެވެ. ވާހިދު ފާޑަކަށް ސާއިދުގެ ފައިން ފެށިގެން ބޮލާއި ހަމައަށް ބަލަމުން މަޑުމަޑުން ވަށައިގެން އެނބުރެން ފެށިއެވެ. ހީވަނީ ތަނެއްގައި ބަހައްޓާފައި ހުރި ހަނދާނީ ބިނާއެއް ވަށައިގެން ދިރާސާކުރަން އުޅޭހެންނެވެ. އެހެނީ ވާހިދުގައި އޭނާގެ މިޒާޖުގައި ސަކަ ގޮތެއް ހުންނަ މީހެކެވެ. އެގޮތުން ބަލާނެ ވަރަކަށް ބަލާ ނިމުމުން، ފާޑަކަށް ތިރީ ތުންފަތަށް ދިގުކޮށްލާފައި އެއްލޯ މަރައިގެން ހުރެ މަޑުމޑުން ބޯޖަހާލިއެވެ. ”އަހަރެންނަށް ޝައްކު ކުރެވޭ ބައެއް ކަންކަން އެބަ ފެނޭ. ހީވާގޮތުން ވަރަށް ފައްކާ ހުވަފެނެއް ފެނުނީ. އެހެން ނޫނީ…. ހިތް އެދޭކުއްޖާ އާނއެކޭ ބުނީ.“ އޭރުވެސް ވާހިދު ގެންދިޔައީ، ސާއިދު ވަށައިގެން އެނބުރެމުން ދިޔައެވެ. ސާއިދުވެސް ދިޔައީ ވާހިދުގެ ޢަމަލުތައް ވަރަށް ރަނގަޅަށް ބަލަމުންނެވެ. އެހެންނަމަވެސް ވާހިދުގެ އެންމެފަހު ޖުމުލަ އަޑު އިވުމާއިއެކު، ސާއިދުގެ މޫނުމަތީގެ ކުލަވަރު ބަދަލުވެގެން ދިޔަތަން ވާހިދުއަށް ވަރަށް ރަނގަޅަށް ފެނުނެވެ. ”އެހެންވީމަ އަހަރެންގެ ކުށްހީ މިއޮތީ ސީދާ ހީއަކަށް ބަދަލުވެފަ ކަމަށް އަހަރެންނަށް ޔަޤީންވެއްޖެ ކަމަށް އަންގާ އަޢުލާނުކުރަން.“ ވާހިދު އެހެން ބުނުމާއިއެކީ، ތަންކޮޅެއް ދުރުގައި ތިބި ބަޔަކަށް ގޮވާލަން ތައްޔާރު ވެލިއެވެ. ސާއިދު ގަންނާކުރެއްވި ބިރުން ވާހިދުގެ އަނގަމަތީގައި އަތް އެޅިއެވެ. ”އިހަށް މަޑުކޮށްބަލަ. ތިކަހަލަ ކުށްހީގެ މައްޗަށް ބިނާކޮށް ކަންކަން އަޢުލާނު ކުރާތީއެއްނު ކަންތައް ގޯހުން ގޯހަށް ދަނީ. އެއްވެސް ކުއްޖަކު އާނއެކޭ ބުނި ވާހަކައެއް އަހަރެންނެއް ނުބުނަމެއްނު ދޯ.“ ވާހިދު ހާސްވާކަމަށް ހަދާފައި ތެޅެން ފެށިއެވެ. އަދި މަޑުމަޑުން ސާއިދުގެ އަތުގައި ދަތް އެޅިއެވެ. ސާއިދު ސިއްސައިގެން ގޮސް އަތް ނައްޓުވާލިއެވެ. ”އެންމެރަނގަޅު، އަހަރެން އެއްވެސް މީހަކު ކައިރީގަ އެއްވެސް އެއްޗެކޭ ނުބުނާނަން. އެކަމަކު އަސްލު ވެގެން ތިއުޅޭގޮތެއް  ބުނެލަދީބަލަ.“ ވާހިދުގެ އެވާހަކައިން، ސާއިދު ކޮންމެވެސް ވަރަކަށް ޖެހިލުންވާގޮތް ވިއެވެ. އަދި މަޑުމަޑުން އިސްދަށަށް ޖަހާލިއެވެ. ވާހިދު އަނެއްކާވެސް ބޯ ތިރިކޮށްލާފައި ސާއިދުއާއި ދިމާއަށް ބަލައިލިއެވެ. މިފަހަރު ވާހިދުވެސް ހުރީ ވަރަށް ސީރިޔަސް ވެފައެވެ. ”އަސްލުގަ މާބޮޑުކަމެއް ނުވޭ. އެކަމަކު އަހަރެންވެސް އުންމީދުކުރާ ކަމެއް އޮވެދާނެތާ ދޯ.“ ސާއިދު އެހެން ބުނުމާއިއެކު ފުން ނޭވާއެއް ލިއެވެ. އަދި އޭނާގެ ޑިޔުޓީ ގަޑި ނިމުނީމަ ބައްދަލު ކޮށްލާނަން ކަމަށްވެސް ވާހިދު ކައިރީގައި ބުންޏެވެ. އެގޮތަށް އެއްބަސް ވެގެން ވާހިދުވެސް ދިޔައީއެވެ.

އަނެއްކޮޅުން ސާރާއަށް ވެގެން އުޅޭގޮތެއް ޚުދު އޭނާއަށްވެސް ނޭންގޭ ކަހަލައެވެ. މީގެ ދެދުވަސް ކުރިޔާއި ހަމައަށް ސާއިދުއަށް ނަފުރަތު ކުރަމުން އައިސް، ކުއްލިޔަކަށް އޭނާގެ ވިސްނުން ބަދަލުވީ ކީއްވެގެން ބާއޭ އަމިއްލަ ނަފްސާއިވެސް ސުވާލުކުރަމުން ގެންދަނީއެވެ. ރޭގަނޑުގެ ނިދިންވެސް މަޙުރޫމު ވަނީއެވެ. ކެއިން ބުނއިމާއި މަސައްކަތާއިވެސް ދުރުވަނީއެވެ. ބުނެދޭން ނޭންގޭ އުނދަގޫތަކެއް އޭނާ ވަށާލާފައިވާ ކަހަލައެވެ. އެންމެފަހުން ކެތްނުވެގެން އޭނާ ޝަފްނާއަށް ގުޅައިގެން ގެނައެވެ. ”ޝަފޫ ބުނެބަލަ، އަހަރެންނަށް ކިހިނެއްތަ މިވަނީ؟“ އެވަޤުތު ޝަފްނާ، ސާރާއާއި ދިމާއަށް ވަރަށް ރަނގަޅަށް ބަލައިލިއެވެ. ”ސާރާއަށް އެބަ ކަމެއް ވޭތަ؟“ ފަރުވާލެއް ނެތްކަހަލަ ގޮތަކަށް ޝަފްނާ ސުވާލު ކޮށްލިއެވެ. ސާރާ އެކުރާ ސުވާލުގެ ޙަޤީޤީ މުރާދު ރަނގަޅަށް އެނގިހުރެމެއެވެ. ވާނީވެސް އެހެންނެއް ނޫންހެއްޔެވެ. އެމީހަކަށްޓަކާ ޝަފްނާގެ ހިތުގައި ވިންދުޖަހާ މީހާ، ރެއާއި ދުވާލު ކިޔަނީ ސާރާގެ ތަސްބީހަ ވިއްޔާއެވެ. ކެތްކުރެވޭނީވެސް ވަކި ވަރަކަށް ނޫންހެއްޔެވެ. މައްޗަށް އޮތް ފުށް ދަށަށް ޖެހުނީ، ޝަފްނާގެ އުންމީދު ތަކުގައި ކުލަޖެހެން ދާދި ގާތުގައި އޮއްވާކަމަށް ޝަފްނާއަށް ޤަބޫލުކުރެވެން ފެށުނުތާ އަދި މާގިނަދުވަހެއްވެސް ނުވެއެވެ. އެހެނަސް ޙަޤީޤީ ލޯތްބަކީ އެހާ ފަސޭހައިން ބަދަލުވާނެ އެއްޗެއް ނޫންކަންވެސް ޝަފްނާ ޤަބޫލުކުރެއެވެ. އަނެއްކޮޅުން ސާރާއަކީ އޭނާގެ އެންމެގާތް އަދި އެމީހަކަށް ޝަފްނާ އެންމެ އިތުބާރުކުރާ އެއް އެކުވެރިޔާއެވެ. އެހެންކަމުން ސާރާ ހިތްހަމަ ނުޖެހޭފަދަ ކަމެއް ކުރާކަށްވެސް ޝަފްނާ ބޭނުމެއް ނުވާނެއެވެ. އެހެންނޫންނަމަ އޭނާގެ އިހުސާސްތައް ސާއިދުއަށް އިހުސާސް ކޮށްދޭކަށް އޭނާ ޖެހިލުމެއް ނުވެއެވެ. އެހެނީ ލަދަކާހުރެ ތަދެއް ނުފިލާނެކަންވެސް ޝަފްނާއަށް ވިސްނެއެވެ. ހައްތަހާވެސް ސާރާއަށްޓަކާ ސާއިދު ކުރާ އުންމީދުގެ ބޮޑުކަމުންނެވެ. ސާއިދުގެ ހިތުގައި އޮންނަ ޔަޤީންކަން ފަނޑުކޮށްލާކަށްވެސް ޝަފްނާ ބޭނުމެއް ނޫނެވެ. މިކަހަލަ ފުން ޚިޔާލުތަކެއްގެ ތެރެއަށް ޝަފްނާ ގެއްލިފައި އިންދާ، އޭނާ ސިއްސައިގެން ދިޔައީ ސާރާ ގޮވާލި އަޑަށެވެ. ”މިހާރަކަށް އައިސް އަހަރެންނަށް ފާހަގަކުރެވޭ ޝަފޫ ވަރަށް ފަސޭހައިން ޚިޔާލަކަށް ގެއްލޭކަން. އަނެއްކާ ކިހިނެއްތަ ތިވަނީ؟ ކަމެއް އުޅެނީތަ؟“ ދިމާކޮށްލާ ކަހަލަ ގޮތަކަށް ސާރާ ސުވާލުކޮށްލިއެވެ. ޝަފްނާ ފުންނޭވާއެއް ލުމާއިއެކު ނޫނެކޭ ބުނުމުގެ ގޮތުން ދެއަތަށް ބޯ ހޫރާލިއެވެ. އެހެނަސް އޭނާގެ ދުލަކުން ބަހެއް ނުނިކުމެއެވެ. ކުޑައިރުކޮޅެއް ވަންދެން އެހެން އިނުމަށްފަހު، ޝަފްނާ، ސާރާއާއި ސުވާލު ކޮށްލިއެވެ. ”އަސްލު އެހާ އެމަޖެންސީކޮށް އަހަރެން ތި ގެނައީ ކިހިނެއްވީތަ؟“ ޝަފްނާގެ އެސުވާލުން ސާރާއަށް އަނެއްކާވެސް އޭނާގެ ޚިޔާލީ ދުނިޔެއަށް ދިޔުމަށް މަޖުބޫރު ކުރުވިއެވެ. ”ސާރާ މަޑުމަޑުން އިށީންދެލިއެވެ. އަދި ދަތްދޮޅީގައި އަތް ވިއްދާލުމާއިއެކު ޚިޔާލުކުރަން ފެށިއެވެ. ”ޝަފޫ ހަމަ އަސްލުވެސް ބުނަންތަ. އަހަރެންނަށް މިވާގިތޮތެއް ބުނެދޭކަށް ނޭންގެ. ކާހިތެއްނުވޭ. އެއްތަނެއްގަ ގިނައިރު މަޑުކުރާ ހިތެއްނުވޭ.“ ”ބައެއްމީހުން ބުނާނެ ތީ ޑިޕްރެޝަންގެ ޢަލާމާތެއް ކަމަށް.“ ސަމާސާ ރާގަކަށް ޝަފްނާ ބުނެލިއެވެ. ”ދެން ޝަފޫ، އަހަރެން މި ދައްކާ ވާހަކަ އިހަށް ރަނގަޅަށް އަޑުއަހާލަބަލަ.“ ސާރާގެ އެދުމަށް ކިޔަމަންވުމުގެ ގޮތުން ޝަފްނާ މަޑުމަޑުން ބޯޖަހާލުމާއިއެކު، އަޑުއެހުމަށް ސަމާލުކަން ދިނެވެ. ”އަސްލުވާގޮތަކީ، އަހަރެން ނުވިސްނަން އުޅުނަސް ސާއިދުއާމެދު ވިސްނެނީ. މީގެ ކުރިން އަހަރެން ނުލާހިކު ފޫހިވާ މީހެއް އެއީ. ޝަފޫއަށްވެސް އެނގޭނެ ސްކޫލު ދައުރުން ފެށިގެންވެސް އަހަރެން އޭނާއަކަށް އެހާ ލައިކެއް ނުވޭކަން. އެކަމަކު އޭރުވެސް އަހަރެން އޭނާއަށް ކުރާ ބޮޑެތި ޖެއްސުންތަށްވެސް އޭނަ ބަލައިގަންނަނީ ހިނިތުންވުމަކާއެކީ. އެންމެފަހުން ޕާޓީގަވެސް އަސްލު އޭނަގެ މައްސަލައެއް ނެތް. އަހަރެން އެތަނުގަ މައްސަލަ އުފެއްދީވެސް. އެވެސް އަސްލު އޭނަ ލަދުގަންނަވާލަންވެގެން. އެކަމަކު އެރޭވެސް އަހަރެން ސަލާމަތް ކޮށްދިނީ. އޭގެ ފަހުންވެސް އޭނައަށް ނޭންގި ކުރެވުނު ކަންތަކަށްވެސް އަހަރެންގެ ކިބައިން މަޢާފަށް އެދުނު.“ ސާރާ އެހުރިހާ ވާހަކައެއް ދައްކަމުން ގެންދިޔައިރުވެސް އިނީ ފުން ޚިޔާލަކަށް ގެއްލިފަ އިންކަހަލަ ގޮތަކަށެވެ. ލުއިލުއި ހިނިތުންވުމެއް ތުންފަތް މައްޗަށް ވެރިވެފައި ހުއްޓެވެ  ”ދެން އެހެންވިއްޔާ މިހާރު ތިކުރަނީ ކޮންޚިޔާލެއް. މިބުނީ، އަނެއްކާ ސާއިދުއާމެދު ސާރާގެ ވިސްނުން ފައްސިވާން ފެށީތަ؟“ ޒާތެއްގެ ޝައްކެއްގެ މަތީގައި އިނދެ ޝަފްނާ ސުވާލު ކޮށްލިއެވެ. ”އަހަރެންނަކަށްވެސް ނޭންގެ ސީދާ ބުނެދޭކަށް އަހަރެންނަށް މިވަނީ ކީއްކަމެއް. އެނގޭހާވެސް އެއްޗަކީ މިދުވަސްކޮޅު އަހަރެންގެ ޚިޔާލުތަކުން ސާއިދު ފިލައިގެން ނުދާކަން.“ ޝަފްނާގެ ހިތް ނުތަނަވަސްވާން ފެށިއެވެ. މަޑުމަޑުން ކޮޅަށް ތެދުވެލާފައި ހަމަޖެހިލިއެވެ. ”ދެން އެހެންވިއްޔާ ތީގެ އެއްވެސް އިޝާރާތެއް ސާއިދުއަށް ވެފަ އެބައޮތްތަ؟“ ހިތްހަމަ ޖެހޭކަހަލަ ޖަވާބެއްގެ އުންމީދުގައި ޝަފްނާ ސުވާލުކޮށްލިއެވެ. ”އަހަރެން ސާއިދު ކައިރީގަ ބުނިން އޭނައަށް ގުޅާނަމޭ.“ ޝަފްނާ ކޮށިއަރާ ކަހަލަ ގޮތެއްވިއެވެ. އެހެންނަމަވެސް އޭގެ ހިލަމެއް ސާރާއަށް ނުވިކަހަލައެވެ. އޭނާ އެގެންދަނީ އޭނާގެ ހިތުގެ އަޑި އަދިވެސް ޝަފްނާއަށް އިއްވަމުންނެވެ. ”އަހަރެންނަކަށް ނޭންގެ ގުޅާފަ ބުނާނީ ކީކޭކަމެއް. އެކަމަކު ސާއިދުގެ އަޑު އަހަރެންގެ ކަންފަތުގަ ޖެހުނަސް ހިތްހަމަ ޖެހޭނެ ކަންނޭންގެ.“ ސާރާގެ އެޚިޔާލު ބަދަލުކޮށްލުވަން ޝަފްނާ ބޭނުންވިކަހަލައެވެ. ”އަހަރެންނަކަށް ނުފެނޭ ގުޅާކަށް. އެއީ ސާރާ މިއޮއް ހުރިހާ ދުވަހު ތި އައީ އޭނާއަށް ނަފުރަތު ކުރަމުން. އެކަން އޭނައަށްވަސް އެނގޭ. އެއީ އަހަރެމެން ހުރިހާ ރައްޓެހިންނަށްވެސް އެނގޭކަމެއް. އެހެންވިއްޔާ ސާރާ ގުޅީމަ އޭނައަށް ހީވާނީ އަނެއްކާވެސް ކޮންމެސް ޖެއްސުމެއް ކުރަން ގުޅީ ކަމަކަށްނު.“ ޝަފްނާގެ ވާހަކަ އަޑުއަހާފަ ސާރާ ކޮންމެވެސް ވަރަކަށް މާޔޫސްވާގޮތް ވިއެވެ. ހިތި ކަމަށްވިޔަސް ޝަފްނާ އެ ބަޔާންކުރީ ޙަޤީޤަތެވެ. ”ތިކަން އަހަރެންވެސް ޤަބޫލުކުރަން. އެހެންވީމަ އަހަރެން އޭނައަށް ގުޅާފަ އެންމެ ފުރަތަމަވެސް މަޢާފަށް އެދޭނީ. ދެން އޭނަ އެކަން ބަލައިގަތިއްޔާ ވާހަކަ ކުރިޔަށް ގެންދެވޭނެތާ ދޯ. އެހެންނޫނީ އޭނަގެ ރުހުން ލިބޭނެ ދުވަހަކަށް އިންތިޒާރުކުރުން ނޫންގޮތެއް ނެތް.“ ސާރާގެ ވިސްނުން ހުރިގޮތް އެނގުމުންވެސް ޝަފްނާ ބޭނުންވީ ސާއިދު، ސާރާއާއި ދުރުގައި ބެހެއްޓޭނެ ކޮންމެ ކަމެއް ކުރުމަށެވެ. ”އެކަމަކު މިއޮއް ހުރިހާ ދުވަހު ސާރާ ބުނަމުން ތި އަންނަނީ ސާރާގެ ޙަޔާތުގެ ބައިވެރިއެއްގެ ކިބައިގެ މިވެނި އެވެނި ޝަރުތުތަކައް ހުންނަންވާނެ ކަމަށް ބުނަމުންނެއްނު. އެ ގިންތިއަކަށް ސާއިދުއެއް ނުފެތޭނު. ދެނޯ؟“ ސާރާ މަޑުމަޑުން ހީލާފައި އޭގެ ޖަވާބު ދިނެވެ. ”އެއީ އަހަރެންގެ ވިސްނުމުގެ ކޮށިކަން. ޙަޔާތުގެ ބައިވެރިއަކީ ރަނގަޅު އިންސާނަކަށް ވެފަ ދީނީ ކަންކަމަށް އިސްކަން ދޭނަމަ އެމީހަކާއެކީ ދިރިއުޅުން ހޭދަކުރުމަކީ ވަރަށް ފަސޭހަކަމެއް ކަމަށް މިހާރު އަހަރެންނަށްވެސް ޤަބޫލުކުރެވޭ.“

ޝަފްނާ ގޮތްހުސްވާން ފެށިކަހަލައެވެ. އެހެންކަމުން ފަހުން ބައްދަލުވެލާނަން ކަމަށްބުނެ ދިޔުމަށް ހިނގައިގަތެވެ. އެވަޤުތު ސާރާ މަޑުމަޑުން ޝަފްނާއަށް ގިވާލިއެވެ. ޝަފްނާ އެނބުރި ބަލައިލުމުން، އޭނާ އަސްލު ގެނައި މަޤްޞަދު ހާމަކުރިއެވެ. ”އަހަރެން އަސްލު ޝަފޫ ކައިރީގަ އަންނާށޭ ބުނި ކަންތަކުގެ ވާހަކައެއް ނުބުނަމެއްނު ދޯ.“ ”އަނެއްކާ ކޮންކަހަލަ ކަމެއް. މަ ހީކުރީ ސާރާގެ ހޮތުގެ ޙާލު އިއްވާލެނީމަ ހިތްހަމަ ޖެހިއްޖެ ކަމަށް.“  ސާރާ ކުއްލިޔަކަށް ފުންމައިގެން ތެދުވެ، ޝަފްނާގެ އަތުގައި ހިފައިގެން ގެންގޮސް އެނދުގައި ބޭންދިއެވެ. އަދި އޭނާގެ މޯބައިލް ފޯނު ނަގާ، ސާއިދުއަށް ގުޅުމަށް ބުންޏެވެ. ޝަފްނާ ދިޔައީ ސިއްސައިގެންނެވެ. ”އަހަރެން އަތަކު ނެތް ސާއިދުގެ ނަންބަރެއް.“ ޝަފްނާއަށް ބުނެވުނުހާވެސް އެއްޗަކީ އެއީއެވެ. ”އެކަމާ ހާސްނުވެބަލަ. އަހަރެން އަތިގަ އެބައޮތޭ ސާއިދުގެ ނަންބަރު. އެއީ ދެން ހޯދާކަށް މާ އުނދަގޫ އެއްޗެއްވެސް ނޫނެއްނު. މިއޮތީ ސާއިދުގެ ނަންބަރު.“ އެހެން ބުނުމާއިއެކު ސާއިދުގެ ނަންބަރު ލިޔެފައިވާ ކަރުދާސްކޮޅު ޝަފްނާގެ އަތަށް ދިއްކޮށްލިއެވެ. ”ގުޅަންވީ؟“ ޝައްކުން ފުރިގެންވާ ނަޒަރަކުން ބަލައިލުމާއިއެކު ޝަފްނާ އަހާލިއެވެ. ”އާން ގުޅާބަލަ. އަހަރެން ވާހަކަ ދައްކާނަމޭ.“ ”ދެން އެހެންވިއްޔާ ސާރާ އަމިއްލައަށް ގުޅާބަލަ.“ އެހެންބުނުމާއިއެކު، ޝަފްނާ އަތުގައި އޮތް ސާރާގެ ފޯނު އޭނާއަތަށް ދިއްކޮށްލިއެވެ. ސާރާ ފުންނޭވާއެއްލުމާއިއެކު ޝަފްނާ އޭނާގެ ގާތުގައި މަޑުކޮށްލުމަށް އެދުނެވެ. ޙަޤީޤަތުގައި ޝަފްނާގެ ފަރާތުން ސާރާ ބޭނުންވަނީ ހިތްވަރެކެވެ. އެކަނި ހުރެ ކުރަން ކެރޭ ވަރަށްވުރެ ބޮޑުކަމެއް ކަމަށް ސާރާއަށް ޤަބޫލުކުރެވުމަކީވެސް ޝަފްނާގެ ފަރާތުން ހިތްވަރަކާއި އެހީތެރި ކަމަކަށް ސާރާ ބޭނުންވި ސަބަބެކެވެ. ”އެންމެ ރަނގަޅު.“ އެހެން ބުނުމާއިއެކު ފޯނު އަތަށްނަގާ، ސާއިދުގެ ނަންބަރު ޖަހަންފެށިއެވެ.

ސާއިދުގެ ފޯނު ރަނގަބީލުވާ އަޑަށް ޖީބުން ފޯނު ނަގާ އެއަށް ބަލައިލިއެވެ. ނުދަންނަ ނަންބަރެކެވެ. އެހެންނަމަވެސް ކާކުތޯ ބަލައިލުމުގެ ބޭނުމުގައި ސާއިދު ފޯނު ނެގީއެވެ. އަނެއްކޮޅުން ވާހަކަ ދެއްކި މީހަކުގެ ޖަވާބުގެ ބަދަލުގައި، ކަންބޮޑުވެފައިވާ އަޑަކުން ސާއިދުއަށް ބުނެލެވުނީ ”ސާރާއޭ.“ ސާއިދުގެ ދެލޯ ބޮޑުވެގެން ދިޔައެވެ. އެވަޤުތު އޭނާ ހުރީ އޭނާގެ ކޮޓަރީގައި އެކަންޏެވެ. ހަދާނެގޮތެއް ނޭންގިގެން މަޑުމަޑުން ފަހަތަށް ޖެހެމުން ގޮސް އެނދުގައި އިށީންދެލެވުނެވެ. ގައިން ވަރުދޫވެފައި ކަހަލަ ގޮތަކަށެވެ. އޭރުވެސް މައިނޭވާލެވެމުން ދިޔައެވެ. ”ސަ..ސާރާ ހަމަ އަސްލުވެސް އަހަރެންނަށް ގުޅީތަ؟ ކަމަކުތަ؟“ ސާއިދުއަށް ޤަބޫލުކުރަން އުނދަގޫވިއެވެ. ކިޔޭ ނުކިޔޭ އެއްޗެއްވެސް ނޭންގޭ ކަހަލައެވެ.