ބަނގްލަދޭޝްގެ މުޙައްމަދު ޔޫނުސް 57 ބޭފުޅުންގެ ވަފްދަކާއެކު ބެއިޖިންއަށް ފުރައި ވަޑައިގަންނަވާއިރު ބަންގްލަދޭޝްގެ ވަގުތީ ވެރިޔާ ދަނީ ޗައިނާގެ މައްޗަށް ބަރޯސާ ބަންނަމުންނެވެ. ގްރޭޓް ހޯލް އޮފް ދަ ޕީޕަލްސްގައި ޝީ ޖިންޕިންއާ ޔޫނުސް ބައްދަލު ކުރައްވާއިރު، އޭނާ މަޝްވަރާ ކުރައްވާނީ ޗައިނާއިން ބަނގްލަދޭޝްއަށް މާލީ އެހީތެރިކަމަށެވެ.

2024 ވަނަ އަހަރުގެ އޮގަސްޓް މަހު ވެރިކަމާ ހަވާލުވެވަޑައިގަތް ފަހުން ޔޫނުސް ގެ ވެރިކަމުގައި އިންޑިއާ ގުޅުމަކީ އިސްކަމެއް ދޭ ގުޅުމެއް ނޫނެވެ. ޔޫނުސް އަދިވެސް އިންޑިއާއަށް ރަސްމީ ޒިޔާރަތެއްގައި ވަޑައެއް ނުގަންނަވައެވެ.

ޔޫނުސްގެ މަޝްވަރާތަކުގައި އިސްކަން ދެއްވާނީ ދެ ގައުމުގެ ގުޅުން ބަދަހި ކުރުމަށާއި އެއް ޗައިނާ ސިޔާސަތަށް ބަނގްލަދޭޝްގެ ތާއީދު އޮތް ކަމަށެވެ.

ޔޫނުސް ގެ ވެރިކަމުގައި، ބަންގްލަދޭޝްގެ ޖިއޮޕޮލިޓިކަލް އެލައިންމަންޓް ވަނީ ބަދަލުވެފައެވެ. ޗައިނާއަށް ބަރޯސާވާ މިންވަރު ވަނީ އިތުރު ވެފައެވެ.

އަދި އޭގެ އިތުރުން އެންމެ ބޮޑަށް ފާހަގަ ކުރެވޭ ކަމަކީ، ބަނގްލަދޭޝްއިން ސަރަހައްދީ އެއްބާރު އަނެއް ބާރާ ދެކޮޅަށް ކުޅުވުމަށް މަސައްކަތް ކުރާ ކަމެވެ. އެއީ ކުދި ޤައުމުތަކުން މިއަދާހަމައަށް ބޭނުން ކުރަމުން ގޮސްފައިވާ އުކުޅެވެ. ނަމަވެސް ބަނގްލަދޭޝް ފަދަ އެތައް އިގްތިސާދީ މަސްލަހަތަކުން ބަނދެވިފައިވާ ޤައުމަކުން އިޤްތިޞާދީ އަދި ސްޓްރެޓެޖިކް ފައިދާ ބޮޑުކުރުމަށް ކުރާ ވަރުގެ ކަމެއް ނޫނެވެ.

ޗައިނާގެ އިގްތިސާދީ ބާރާއި އިންވެސްޓްމަންޓްތަކުގެ ސަބަބުން އިންފްރާސްޓްރަކްޗާ ތަރައްގީކުރުމާއި ވިޔަފާރީގެ ފުރުސަތުތަކާއި މާލީ އެހީތެރިކަން ފަދަ ފައިދާތަކެއް ލިބިދާނެ އެވެ. ނަމަވެސް އެ ބަރޯސާވުމަކީ ޚާއްޞަކޮށް ޗައިނާގެ ސިޔާސަތުތައް ނުވަތަ އިޤްތިޞާދީ ޙާލަތު ބަދަލުވެއްޖެނަމަ ނާޒުކުކަން އުފެދިދާނެ ކަމެކެވެ. މިސާލަކަށް އިންފްރާސްޓްރަކްޗަރ މަޝްރޫޢުތަކަށް ޗައިނާގެ ލޯނަށް ބަރޯސާވާ ޤައުމުތަކަށް ދަރަނީގެ ގޮންޖެހުންތަކެއް ކުރިމަތިވެފައިވާ ތަން ވަނީ ފެނިގެން ގޮސްފައެވެ.

އަދި ޗައިނާގެ ވިޔަފާރިއަށް މާބޮޑަށް ބަރޯސާވުމަކީ ޗައިނާގެ ޑިމާންޑްތައް އިތުރުވެ، ޖިއޮޕޮލިޓިކަލް ޓެންޝަންތައް އުފެދި، އިގްތިސާދީ ނުރައްކާތެރިކަމަށް ގައުމުތަކަށް ހުށަހެޅިދާނެ ކަމެކެވެ. މި ފައިދާތަކާއި ނުރައްކާތައް ބެލެންސް ކުރުމަކީ ގިނަ ގައުމުތަކަށް ނުކުރެވޭނެ ކަންކަމެވެ.

ބަންގްލަދޭޝް އިން ހިނގުމަށް އިޚުތިޔާރުކުރާ މަގަކުން މީގެ ކުރިން ސްރީލަންކާއާއި ރާއްޖެއިން ވާނީ ހިނގާފައެވެ. ދެގައުމަށްވެސް ހާލަތުގެ ދަތިކަމާ ހެދި ސިޔާސަތު ބަދަލު ކުރަން މަޖުބުރުވިތަން ވަނީ ފެނިގެން ގޮސްފައެވެ.

ބަންގްލަދޭޝް ބޭނުންވަނީ ޗައިނާގެ ފައިސާއެވެ. އޮގަސްޓް މަހުން ފެށިގެން ޑާކައިން ވަނީ، 14 ފަރާތަކަށް ސޯލާ އަދި އިންފްރާސްޓްރަކްޗަރ އަށް 230 މިލިއަން ޑޮލަރުގެ އެއްބަސްވުމުގައި ސޮއިކޮށްފައެވެ.

ބަނގްލަދޭޝްގެ ހާލަތަށް ބަލާއިރު ސަރަހައްދުގެ އެހެން ގައުމުތަކުގެ ޗައިނާ ގުޅުމުން ދަރަނީގެ ބޮޑުއަދަދެއް ދެއްކުމަށް އެޤައުމުތަކަށް ޖެހިފައިވާ ތަން ފެނެއެވެ.

ސްރީލަންކާގެ ދަރީގެ ބޮޑު ބައެއް ދިމާވެފައި ވަނީ، ހަމްބަންޓޯޓާ ބަނދަރު ފަދަ ފައިދާއެއް ނެތް ބޮޑު ލޯނުތަކެއް ނެގުމަށް ފަހު އެވެ. ޗައިނާއިން %6.3 އިންޓަރެސްޓްގައި އެއް ބިލިއަން ޑޮލަރަށް ވުރެ އިތުރަށް ފައިސާ ނަގާފައި ވެއެވެ. 2022 ވަނަ އަހަރުގެ ނިޔަލަށް ސްރީލަންކާ އޮތީ 51 ބިލިއަން ޑޮލަރުގެ ޑިފޯލްޓަކާ ކުރިމަތިލާން ޖެހިފައެވެ. ސްރީލަންކާގެ އެންމެ ބޮޑު ދަރަނި ދިންފަރާތަކީ ޗައިނާއެވެ. ސްރީލަންކާގެ އިގްތިސާދު އިންފްލޭޝަންގެ %50 އަށް އުފުލި، ދިރިއުޅުން ދަތިވެ، މުޒާހަރާތަކުގެ ސަބަބުން ރައީސް ގޮޓަބަޔާ ރާޖަޕަކްސާ ވެރިކަމުން ދުރުވުމަށް މަޖުބޫރުވިއެވެ. އެއިރު ސްރީލަންކާ ސަލާމަތް ކުރަން ދިޔައީ އިންޑިއާއެވެ.

އިންޑިއާގެ ހަތަރު ބިލިއަން ޑޮލަރުގެ ބެއިލްއައުޓާއި އައިއެމްއެފްގެ ޑީލަކީ ލައިފްލައިންތަކެއް ކަމުގައިވިއަސް ހަމްބަންޓޯޓާ ބަނދަރު ޗައިނާއަށް 99 އަހަރަށް ކުއްޔަށް ދިނުމަށް މަޖުބޫރުވިއެވެ.

3.4 ބިލިއަން ޑޮލަރުގެ ދަރަންޏެއް ބޮލުއެޅިފައިވާ ރާއްޖެއަށް ހިނގަމުން މިދާ 2025 ވަނަ އަހަރު 600 މިލިއަން ޑޮލަރުގެ ދަރަނި ދައްކަން ޖެހެއެވެ. އަދި 2026 ވަނަ އަހަރު 1 ބިލިއަން ޑޮލަރު ދައްކަން ޖެހޭނެއެވެ.

ޕާކިސްތާނުގެ ސީޕެކް ކޮރިޑޯވެސް އެފަދައެވެ. ޕާކިސްތާނުން ޗައިނާއަށް ދައްކަންޖެހޭ 28.78 ބިލިއަން ޑޮލަރު ގެ ދަރަންޏަކީ، އެގައުމުގެ ބޭރުގެ ދަރަނީގެ %22 ޕަސެންޓެވެ. ސީޕެކްއަކީ ޕާކިސްތާނަށް ވުރެން ބޮޑަށް އޭގެ ފައިދާ ޗައިނާއަށް ކުރާ އިންވެސްޓްމެންޓެކެވެ. ގަވްދާރު ބަދަރުންވެސް އެއާޕޯޓުންވެސް އާމްދަނީއެއް ނުލިބެއެވެ. ޕާކިސްތާނުގެ އާދޭހަކީ، ދަރަނި ދެއްކުން ލަސްކޮށް ދިނުމެވެ.

ސަރަހައްދުގެ ޤައުމުތަކުން މިފެނިގެން ގޮސްފައި ވަނީ ފުރަތަމަ ލޯ މަރާލާ އިންފްރާސްޓްރަކްޗަރއަށް މިހާރު ހޭދަކޮށްފައި ފަހުން ދަރަނީގެ ދަންތުރައިގައި ޖެހުމުގެ ވިސްނުމުންނެވެ. ސަރަހއްދުގެ ގައުމުތަކުގައި މިއަދާހަމައަށް ކަން ގޮސްފައިވާ ގޮތުން ބަނގްލަދޭޝްއިން އިބްރަތް ހާސިލުކުރަން ޖެހެއެވެ.