ޚަބަރު
އިހްތިޖާޖު ކުރުން ހުއްޓުވުމުގެ ސަބަބެއް ސަރުކާރަށްނެތް: ފައްޔާޒު
އެމްޑީޕޕީން މިހާރު ކޮންމެރެއަކު މާލޭގައި ކުރަމުންދާ މުޒާހަރާތައް ހުއްޓުވުމުގެ އެއްވެސް ސަބަބެއް މިސަރުކާރަށް ނެތް ކަމަށް އެމްޑީޕީގެ ކުރީގެ ޗެއަރޕާސަން ފައްޔާޒު އިސްމާއީލް ވިދާޅުވެއްޖެއެވެ.
ރޭ އެމްޑީޕީން ކުރި މުޒާހަރާގައި ފުލުހުންގެ ބެލުމުގެ ދަށަށް ގެންދިޔަ އެންމެހާ މެންބަރުން ދޫކޮށްލުމަށް ގޮވާލައި ފައްޔާޒު އެކްސްގައި ކުރެއްވި ޕޯސްޓެއްގައި ވިދާޅުވެފައިވަނީ "ރައްޔިތުންގެ 70 ޕަސެންޓު ނޫނެކޭ ބުނި ސަރުކާރަކަށް އިހުތިޖާޖު ކުރުން ހުއްޓުވުމުގެ އެއްވެސް ލެޖިޓިމަސީއެއް ނެތް،" ކަމަށެވެ.
ފައްޔާޒު ވިދާޅުވެފައިވަނީ "އިންތިހާބުތަކުން ބަލިވުމުން އާންމުންނަށް އަނިޔާކުރުމަކީ ހުދުމުޚުތާރު ވެރިން ބާރުގައި ތިބުމަށް ކުރާ ކަމެއް،" ކަމަށެވެ.
ފައްޔާޒުގެ މި ޕޯސްޓުގައި ވިދާޅުވެފައިވަނީ ރޭ އެމްޑީޕީން ކުރި މުޒާހަރާގެ ތެރެއިން ހައްޔަރުކުރި އެންމެހާ މެންބަރުން ވަގުތުން ދޫކޮށްލުމަށް ސަރުކާރަށް ގޮވާލައްވާ ކަމަށެވެ. ރޭގެ މުޒާހަރާއިން ހައްޔަރު ކުރި މީހުންގެ އަދަދެއް ނޭނގެއެވެ. ފުލުހުންނާ އެކަމާ ސުވާލު ކުރުމުން ޖަވާބެއް ނުދެއްވައެވެ.
އެމްޑީޕީގެ ބައެއް މަސްދަރުތަކުން ބުނެފައިވަނީ ރޭގެ މުޒާހަރާއިން ހައްޔަރު ކުރި ދެމީހަކަށް އަނިޔާވެފައިވާ ކަމަށެވެ. އެ އަނިޔާތަކަށް ހޮސްޕިޓަލުގައި ފަރުވާދީފައިވާ ކަމަށް ވެސް މައުލޫމާތު ލިބިފައިވެއެވެ.
