ޚަބަރު
ރިޔާސީ ޕްރައިމަރީގައި ތާއިދު ކުރާނީ ފައްޔާޒަށް: ނަޝީދު
އެމްޑީޕީގެ ރިޔާސީ ޕްރައިމަރީގައި ފައްޔާޒު އިސްމާއީލަށް ތާއިދު ކުރައްވާނޭ ކަމަށް ރައީސް މުޙައްމަދު ނަޝީދު ވިދާޅުވެއްޖެއެވެ.
މިހާރު ކުރިއަށްދާ ނޫސްވެރިންގެ ބައްދަލުވުމުގައި ރައީސް ނަޝީދު ވިދާޅުވީ ރިޔާސީ ޕްރައިމަރީގައި ފައްޔާޒަށް ތާއިދު ކުރުމާއެކު އެމަނިކުފާނު އެމްޑީޕީގެ ޗެއަރޕާސަންގެ މަގާމަށް ކުރިމަތިލައްވާނޭ ކަމަށް ވެސް ވިދާޅުވެފައެވެ.
ރައީސް ނަޝީދާއި ފައްޔާޒް އިސްމާޢީލަކީ އެމްޑީޕީގެ ތެރޭގައި ވަރަށްބޮޑަށް ގުޅިގެން މަސައްކަތް ކުރައްވަމުންނެވެ. މީގެ ކުރިން ފައްޔާޒު ވަނީ އެމްޑީޕީގެ ރިޔާސީ ޕްރައިމަރީގައި ވާދަކުރައްވާނޭ ކަމަށް އިއުލާން ކުރައްވައިފައެވެ.
ރިޔާސީ ޕްރައިމަރީގައި ރައީސް އިބްރާހީމް މުޙައްމަދު ސާލިހާއި އަބްދުﷲ ޝާހިދު ފަދަ ބޭފުޅުން ވެސް ވާދަކުރައްވާނޭ ކަމަށް ބެލެވެއެވެ. ރައީސް ނަޝީދު ވިދާޅުވީ ފައްޔާޒު އިސްމާއީލާ ގުޅިގެން ދެބޭފުޅުން އެކުގައި މަސައްކަތް ކުރައްވާ ކަން ރައީސް ސާލިހަށް ވެސް އެނގިވަޑައިގަންނަވާނެއެވެ.
