ޚަބަރު
ޑައިވަރުން ހޯދަން އުޅުމުގެ ތެރޭގައި މަހުދީ ނިޔާވެއްޖެ
ފެލިދެއަތޮޅުގައި ފީނަން ދިޔަ ޑައިވަރުން ހޯދުމުގެ މަސައްކަތުގައި އުޅުނު އެމްއެންޑީއެފްގެ ޑައިވަރަކު ނިޔާވެއްޖެއެވެ.
ނިޔާވެފައިވަނީ ސްޓާފް ސާޖަންޓް މުޙައްމަދު މަހުދީ ކަމަށް އެމްއެންޑީއެފުން ވަނީ ވިދާޅުވެފައެވެ. އޭނާ ނިޔާވެފައިވަނީ ޑައިވް ކުރުމުގެ ތެރޭގައި ހާލުދެރަވެގެން ކަމަށް އެމްއެންޑީއެފުން ވިދާޅުވެފައިވެއެވެ.
ފެލިދެއަތޮޅުގައި ޑައިވް ކުރަނިކޮށް ގެއްލިފައިވާ ފަސް ޑައިވަރުންގެ ތެރެއިން އެކެއްގެ ހަށިގަނޑުވަނީ ފެނިފައެވެ. މަހުދީ ނިޔާވީ ބާކީ ހަތަރު ޑައިވަރުން ހޯދުމުގެ މަސައްކަތުގައި އުޅެނިކޮށްނެވެ.
"ގެއްލުނު ހަތަރު ޑައިވަރުން ހޯދުމަށް، އެމްއެންޑީއެފުން ކުރިއަށްގެންދާ، ސާޗް އެންޑް ރެސްކިއު އޮޕަރޭޝަނުގައި މިއަދު ޑައިވްކުރަނިކޮށް ހާލުދެރަވި، އެމްއެންޑީއެފްގެ ސްޓާފް ސާޖަންޓް މުޙައްމަދު މަހުދީ ނިޔާވެއްޖެ،" އެމްއެންޑީއެފުން ވިދާޅުވެފައިވެއެވެ.
