މިމަސައްކަތް ކޮށްފައިވަނީ ށ. ފުނަދޫ ރައްޔިތުންގެ ބައިވެރިވުމާއެކު ކަމަށް ތިމާވެށްޓާ ބެހޭ ވުޒާރާއިން ވަނީ ވިދާޅުވެފައެވެ.
މި ހަރަކާތަކީ މުޖުތަމަޢުގެ ބައިވެރިވުން އިތުރުކުރުމަށާއި، ރަށުގެ ޤުދުރަތީ ވެށްޓާއި ތިމާވެށި ރައްކާތެރިކޮށް ބެލެހެއްޓުމުގައި ރަށުގެ އެކި ފަރާތްތަކާއި ސްޓޭކްހޯލްޑަރުންގެ ދައުރު ފުޅާކޮށް، އެފަރާތްތައް ބާރުވެރިކުރުވުމުގެ މަޤްޞަދުގައި ކުރިއަށް ގެންދިޔަ ހަރަކާތެއް ކަމަށް ތިމާވެށްޓާ ބެހޭ ވުޒާރާއިން ވިދާޅުވެފައިވެއެވެ.
މި ހަރަކާތް އިންތިޒާމުކުރުމުގައި ށ. ފުނަދޫ ކައުންސިލުން ވެދެއްވި އެހީތެރިކަމަށާއި، ކުނި އެއްކުރުމަށް ބޭނުންވާ ކޮތަޅު ފޯރުކޮށްދީ ޕާޓްނަރެއްގެ ގޮތުގައި ބައިވެރިވި ޕާލޭ މޯލްޑިވްސްއަށް ޚާއްޞަ ޝުކުރެއް އަދާ ކުރައްވާ ކަމަށް ތިމާވެށްޓާ ބެހޭ ވުޒާރާއިން ވިދާޅުވެފައިވެއެވެ. މީގެއިތުރުން، މި ހަރަކާތުގެ ތެރޭގައި ފުރަތަމަ އެހީގެ ޚިދުމަތް ފޯރުކޮށްދިން ށ. ފުނަދޫ ހޮސްޕިޓަލަށާއި، ބައިވެރިންގެ ރައްކާތެރިކަމާއި އަމާންކަން ކަށަވަރުކޮށްދިން ފުނަދޫ ޕޮލިސް ސްޓޭޝަނަށް ވެސް ވަނީ ޝުކުރު އަދާކުރައްވާ ކަމަށް ވަނީ ވިދާޅުވެފައެވެ.
މިފަދަ ގުޅިފައިވާ ހަރަކާތްތަކުގެ މައިގަނޑު އަމާޒަކީ އެންމެން ގުޅިގެން ރާއްޖޭގެ ޤުދުރަތީ ޚަޒާނާތަކާއި ތިމާވެށީގެ މުއްސަނދިކަން ރައްކާތެރިކުރުމަށް ކުރެވޭ މަސައްކަތްތައް އިތުރަށް ހަރުދަނާކުރުން ކަމަށް ވެސް ވިދާޅުވެފައިވެއެވެ.
