އެއާއެކީ ޤައުމަކަށް ބޭނުންވަނީ ހަރުދަނާ އަޚްލާޤެއްގެ މަތީގައި ތިބެގެން އިންސާނީ ކަރާމާތަށް ޙުރުމަތްތެރިކޮށް ހިތާ، އެކަކު އަނެކަކުގެ ޚިޔާލަށް އިޙްތިރާމްކުރާ، ކޮންމެ ކަމެއްގެވެސް ޙަޤީޤަތް ބަލައި، ތިމާފަދަ އަނެކުންނަށްވެސް އިޙްތިރާމް ކުރުމުގެ ތަހުޛީބީ ސިފަތައް އަށަގަނެފައިވާ ބައެއްކަމަށް ވަޒީރު ވިދާޅުވިއެވެ. ޢިލްމު ޙާޞިލްކުރާ ބޭފުޅުން މިފަދަ ސިފަތަކުން ސިފަލިބި ނަމޫނާ ބޭފުޅުންނަށް ވާންޖެހޭކަމަށް ވެސް ވަޒީރު ހީނާ ވިދާޅުވިއެވެ.
ވިލާ ކޮލެޖްގެ މިއަހަރުގެ ދަސްވެނިވުމުގެ ފުރަތަމަ ދަންފަޅި ޝަރަފްވެރިކޮށްދެއްވަމުން އެކަމަނާ ދެއްކެވި ވާހަކަފުޅުގައި ވިދާޅުވީ ޤައުމެއްގައި ޢިލްމީ ރޫޙެއް ބިނާކޮށް ފިކުރީ ވިސްނުންތަކެއް އާލާކުރެވެނީ އެ ޤައުމެއްގެ ތަރުބަވީ ނިޒާމާ ތަޢުލީމީ ނިޒާމުގެ ތެރެއިންކަމުގައެވެ. އެހެންކަމުން ޢިލްމީ ރޫޙެއް އުފައްދައި އީޖާދީ އަދި ފިކުރީ ވިސްނުންތަކެއްގެ މަތީގައި ޤައުމެއް ދެމެހެއްޓުމުގެ އެންމެ ބޮޑު އެއް މަސްއޫލިއްޔަތެއް އެޅިފައި ވަނީ ތަރުބިއްޔަތު ކުރުމާ އުނގަންނައިދިނުމުގެ ދާއިރާގެ ބޭފުޅުންގެ އިސްތަށިފުޅުގައިކަމަށް ވަޒީރު ވިދާޅުވިއެވެ. އެހެންކަމުން ޤައުމު އެއް ޖީލުން އަނެއް ޖީލަށް ނަގަހައްޓައިދޭ އެއް ބަޔަކީ އެ ޤައުމެއްގައި އުނގަންނައިދިނުމުގެ ދާއިރާގެ ބޭފުޅުންކަމަށް ވަޒީރު ހީނާ ވިދާޅުވިއެވެ.
އެކަމަމާ ވިދާޅުވީ ޢިލްމީ މީހުންގެ ގޮތުގައި މުޖުތަމަޢުގެ ތެރެޔަށް ނުކުންނައިރު، މަޢުލޫމާތުގެ މުއްސަނދިކަމާއި އެއްވަރަށް، ޢިލްމީ ތެދުވެރިކަމާއި ނަފުސުގެ އަޚްލާޤު ހުރުމަކީ މުހިއްމުކަމެއް ކަމަށެވެ. ޙާޞިލުކުރާ ސަނަދަކީ ހަމައެކަނި ލިޔުމެއް ނޫންކަމާއި، އެ މަސްއޫލިއްޔަތު އަދާކުރުމަށް ލިބިފައިވާ ހުނަރުގެ ބޭނުންކޮށް ޤައުމަށް ޚިދުމަތްކުރެއްވުމަށް ވެސް ވަޒީރު ގޮވައިލެއްވިއެވެ.
ވިލާ ކޮލެޖުން މިއަހަރު ދަސްވެނިވި ދަރިވަރުންނަކީ ހަމައެކަނި މަޢުލޫމާތުން މުއްސަނދި ބަޔަކަށް ވުމުގެ ބަދަލުގައި، ޢިލްމީ ތެދުވެރިކަމާއި ނަފުސުގެ އަޚްލާޤު އިސްކުރާ ނަމޫނާ ބަޔަކަށް ވުމަށް ވުމަށް ވެސް ވަޒީރު އެދިވަޑައިގެންނެވިއެވެ.
ވިލާ ކޮލެޖްގެ މިއަހަރުގެ ދަސްވެނިވުމުގެ ފުރަތަމަ ދަންފަޅީގައި ވިލާކޮލެޖުން ތަޢުލީމު ހާސިލުކުރި 201 ދަރިވަރުން ވަނީ ދަސްވެނިވެފައެވެ.
