"ކޮމިއުނިޓީ އެމްޕަވަމަންޓް ހަބް ނުވަތަ މި މަރުކަޒަކީ، އިސްލާމީ ކަންތައްތަކާ ބެހޭ ވުޒާރާގެ ޒަކާތު ފަންޑުން ޚަރަދުކޮށް، އިޖުތިމާޢީ ތަރައްޤީއާއި ބެހޭ ވުޒާރާއާއި އެފްޑީސީ ގުޅިގެން ހަދަމުންދާ މަރުކަޒެކެވެ. ރާއްޖޭގައި ނުކުޅެދުންތެރިކަން ހުންނަ ފަރާތްތަކަށް ދެމުންދާ ޚިދުމަތްތައް ހަރުދަނާކޮށް، އެ ފަރާތްތަކަށް މުޖްތަމައުގައި ފަސޭހަކަމާއެކު އުޅުމަށް އިސްކަންދީގެން މި ސަރުކާރުން ދަނީ ގިނަ މަސައްކަތްތަކެއް ކުރަމުން" ކަމަށް ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ވަޒީރު ވިދާޅުވިއެވެ.
ވަޒީރު ވިދާޅުވީ" މި މަރުކަޒު އޮކްޓޫބަރު މަހު ހުޅުވުމަށް ދަނީ ތައްޔާރުވަމުން. މި މަރުކަޒުގެ ބޭނުމަކީ ނުކުޅެދުންތެރިކަން ހުންނަ ފަރާތްތަކަށް ބޭނުންވާ ހުނަރާއި ޢިލްމު ފަހިކޮށްދިނުން. އަދި މިހާރުވެސް ކުރިއަށް އެބަގެންދެވޭ ސައިން ލޭންގުއޭޖް ޕްރޮގްރާމެއް. ވޮކެބްލަރީއެއް ތައާރަފްކުރުމުގެ މަސައްކަތް އެފަދަ ވޯކްޝޮޕެއްގެ މަސައްކަތް އެބަދޭ."
މި ސަރުކާރުން ނުކުޅެދުންތެރިކަން ހުންނަ 416 މީހުންނަށް ވަޒީފާގެ ފުރުސަތު ފަހިކޮށްދީފައިވާ ކަމަށާއި، ނުކުޅެދުންތެރިކަން ހުންނަ ކުދިންނަށް ޚާއްސަ ކޮށްގެން ތަރައްޤީކުރާ އެމްޕަވަރމަންޓު ހަބު އަންނަ މަހު ހުޅުވުމަށް ތައްޔާރުވަމުންދާކަމަށް ވަޒީރު ވިދާޅުވިއެވެ.
40-18 އަހަރާއި ދެމެދުގެ އުމުރުފުރާގެ މީހުންނަށް ޚިދުމަތް ދިނުމަށް އަމާޒު ކޮށްގެން ތަރައްޤީ ކުރާ އެމްޕަވަރމަންޓް ހަބަކީ، ނުކުޅެދުންތެރިކަން ހުންނަ ފަރާތްތަކުގެ ހުނަރުތައް ތަރައްޤީ ކުރުމަށާއި، މަސައްކަތުގެ ތަޖުރިބާއާއި އިޤުތިޞާދީ މިނިވަން ކަމަށް މަގުފަހިކޮށްދޭ ފުރުޞަތުތައް ހޯދައިދިނުމުގެ މަޤުސަދުގައި ތަރައްޤީ ކުރާ ތަނެއް ކަމަށް އިޖުތިމާޢީ ވުޒާރާއިން ވިދާޅުވެއެވެ.
ޖުމްލަ 5500 އަކަފޫޓުގެ ޖާގައެއްގައި ހުޅުމާލެ ފޭސް 2ގައި ހުޅުވާ މި ހަބުގައި ހުންނާނެ ބައިތަކުގެ ތެރޭގައި ހޮސްޕިޓަލިޓީ އަދި ކަލިނަރީ ތަމްރީނާއި، މަސައްކަތުގެ ތަޖުރިބާ ފޯރުކޮށްދިނުމަށް އިންކްލޫސިވް ކެފޭއެއްގެ އިތުރުން ނުކުޅެދުންތެރިކަން ހުންނަ ފަރާތްތައް އުފައްދާ ތަފާތު ތަކެތި މާކެޓުކޮށް ވިއްކުމަށް ޢާންމުންނަށް ހުޅުވާލާފައިވާ ފިހާރައެއް ހިމެނެއެވެ.
މީގެއިތުރުން ހަބުގެ ހަރަކާތްތަކުގައި ބައިވެރިވާ ފަރާތްތަކުގެ ޝައުޤުވެރިކަމާއި ގުޅުންހުރި އަދި ހުނަރު ތަރައްޤީ ކުރުމަށް ތަފާތު ޕްރޮގްރާމްތައް ހިންގުމަށް ހަބުގައި 3 ވޯރކްޝޮޕް ޖާގައެއްގެ އިތުރުން، ކޮމްޕިއުޓަރާއި އިންފޮމޭޝަން ޓެކްނޮލޮޖީގެ ތަމްރީން ދޭ ތަނެއް ހިމެނެއެވެ. މީގެއިތުރުން އިޖުތިމާޢީ ގުޅުން ބަދަހި ކުރުމަށް ތަފާތު ހަރަކާތްތައް ހިންގުމަށް އެކްޓިވިޓީ ރޫމާއި، މަލްޓި މީޑިއާ ރޫމެއްވެސް މި ހަބުގައި ހުންނާނެއެވެ.
