މިޖަލްސާގައި އެމްޑީޕީގެ ޗެއަރ ޕާސަން އަދި ކުރީގެ ރައީސް މުޙައްމަދު ނަޝީދާއި، ކުރީގެ ރައީސް އިބްރާހީމް މުޙައްމަދު ޞާލު ވަނީ ވާހަކަފުޅު ދައްކަވައިފައެވެ. އަދި ބައެއް ސިޔާސީ ޕާޓީތަކުގެ ލީޑަރޝިޕްގެ ބޭފުޅުންނާއި ބޭރުގެ ބައެއް އިއްޒަތްތެރީން ވެސް ވަނީ މިޖަލްސާގައި ބައިވެރިވެފައެވެ.
އިފްތިތާހީ ޖަލްސާއަށްފަހު ދެންއޮންނާނީ އިންވެސްޓްމަންޓް ފޯރަމެވެ. އެފޯރަމް އޮންނާނީ މާދަމާ ހަވީރުން ފެށިގެން ރޭގަނޑާ ހަމައަށެވެ. މިފޯރަމަށް ކައުންސިލްތަކުން ހަތްދިހައަށްވުރެ ގިނަ މަޝްރޫ ހުށަހަޅާނެއެވެ. އޭގެ އަގު މިލިއަނުން ގުނާލެވޭ ކަމަށް މައުލޫމާތު ލިބިފައިވެއެވެ. އަދި ބައެއް ކައުންސިލްތަކުން އެރަށެއްގައިހުރި ވިޔަފާރީގެ ފުރުސަތުތަކާބެހޭ ގޮތުން ޕްރެޒެންޓޭޝަން ހުށަހަޅާނެއެވެ. ކޮންގްރެސްގެ ރަސްމީ މަސައްކަތް ފެށުމަށް ހަމަޖެހިފައިވަނީ ހޮނިހިރު ދުވަހުއެވެ.
