ފުލުހުން ވިދާޅުވީ ނުރައްކާތެރިކޮށް އުޅަނދުފަހަރު ދުއްވާ ފަރާތްތަކުގެ މައުލޫމާތު ޕްރޮފައިލްކުރުމުގެ މަސައްކަތް މިހާރު ކުރިއަށްދާ ކަމަށެވެ. މިފަދަ ފަރާތްތައް ދިވެހި ފުލުހުންގެ ޚިދުމަތަށް ހާޒިރުކޮށް ނަސޭހަތްތެރިވުމަށްފަހު، މި އަމަލުތައް ތަކުރާރުކުރާނަމަ، ޓްރެފިކް ޤާނޫނާއި ޤަވާއިދުތަކުގެ ދަށުން ކުރިން ކުރަމުން އައި ޖޫރިމަނާގެ އިތުރުން، އިތުރު އިންޒާރަކާ ނުލައި ޖިނާއީ ތަހުގީގު ހިންގާނޭ ކަމަށް ފުލުހުން ވިދާޅުވިއެވެ.
ޚާއްސަ ސަމާލުކަމެއް ދީގެން ފިޔަވަޅު އެޅުމަށް ހަމަޖެހިފައިވަނީ:
ޒިގްޒެގްކޮށް ދުއްވާ މީހުން
އުޅަނދަށް ބަދަލުގެނެސް ސައިލެންސަރު އަޑުގަދަކޮށް ދުއްވާ މީހުން
ބިންމަތީގައި ހަރު ގާނަމުން ދުއްވާ މީހުން
ދުވެލިމަތަ ތަކަށް މަޑުނުކޮށް ބާރު ސްޕީޑުގައި ދުއްވާ މީހުން
ކަމާގުޅޭ އިދާރާތަކުގެ ހުއްދަ ނުނަގައި ރޭސްޖެހުމާއި ހުނަރުދައްކާ ފަރާތައް
ނުރައްކާތެރިކޮށް އޯވަޓޭކްކުރާ ފަރާތްތައް
މަސްތުގެ ހާލަތުގައި ދުއްވާ ފަރާތްތައް
ފުލުހުން މަޑުކުރަން އެންގުމުން މަޑުނުކޮށް ފިލުމާއި ފިލަން މަސައްކަތްކުރާ މީހުން
ފުލުހުން ވިދާޅުވީ ނުރައްކާތެރިކޮށް ދުއްވާ އުޅަނދުފަހަރު ހޯދައި، އުޅަނދު ދުއްވި މީހާގެ އިތުރުން އުޅަނދުގެ ވެރިމީހާއާ މެދުވެސް ފިޔަވަޅު އަޅާނޭ ކަމަށެވެ. އަދި އުޅަނދުފަހަރު 30 ދުވަހުގެ މުއްދަތަށް ފުލުހުންގެ ބެލުމުގެ ދަށަށް ގެނެސް، ކަނޑައެޅިފައިވާ މުއްދަތުގެ ތެރޭގައި ވެރިފަރާތުން ހަވާލުނުވާ އުޅަނދުފަހަރު، އޮންނަ އުސޫލުގެ ދަށުން ނައްތާލާނޭ ކަމަށް ވެސް ފުލުހުން ވިދާޅުވިއެވެ.
"މީގެ އިތުރުން، މިފަދަ އަމަލުތަކުގައި ސަރުކާރުގެ މުއައްސަސާތަކާއި ކުންފުނިތަކުގެ މުވައްޒަފުން ޝާމިލުވާކަން ދިވެހި ފުލުހުންގެ ޚިދުމަތަށް ފާހަގަކުރެވިފައިވާތީ، އެ ފަރާތްތަކާމެދު އެޅެންހުރި އިދާރީ ފިޔަވަޅުތައް އެޅުމަށް އެ މުއައްސަސާތަކަށް މި މައުލޫމަތު ދިވެހި ފުލުހުންގެ ޚިދުމަތުން މި ގެންދަނީ ހިއްސާކުރަމުންނެވެ."
މީގެއިތުރުން، ނުރައްކާތެރިކޮށް ތަކުރާރުކޮށް ދުއްވާ މީހުންގެ ވަނަވަރު އާންމުކުރާނޭ ކަމަށް ވެސް ވިދާޅުވެފައިވެއެވެ. "މިފަދަ ކަންކަމާ ގުޅިގެން އާންމުން ހިއްސާކުރާ ފޮޓޯއާއި ވީޑިއޯ ފަދަ މައުލޫމާތުގެ ސައްހަކަން ކަށަވަރުކުރުމަށްފަހު، ގާނޫނީ ގޮތުން އަޅަންޖެހޭ ފިޔަވަޅުތައް އަޅަމުން ގެންދާނެ ވާހަކަވެސް ދަންނަވަމެވެ."
