މިހާރު ހިނގަމުންދާ އެމްޑީޕީގެ ކޮންގްރެސްގައި މިއަދު ވާހަކަ ދައްކަވަމުން އޭނާ ވިދާޅުވީ "އަޅުގަނޑުމެން މިއަދު މިވާ ގުރުބާނީ، އަޅުގަނޑުމެން މިއަދު މިކުރާ މަސައްކަތް މާދާމާ (އެމްޑީޕީ) ވެރިކަމަށް އައިސް މި މެންބަރުންނާއި ރަށްރަށުގެ ހަރުގެ ތަކުގައި މަސައްކަތްކުރާ މީހުންގެ އަގުވަޒަން ކުރަންޖެހޭނެ. ހަމަ އެހެންމެ ޕާޓީ މަތިން ހަނދާން ނައްތާލައިގެން ވެސް ނުވާނެ،"
ބައެއް އިސްލާހުތަކާ ބެހޭގޮތުން ބަހުސްކުރައްވަމުން އޭނާ ވިދާޅުވީ މުހިންމު ބައެއް ކަންކަމުގައި ޕާޓީގެ ގައުމީ މަޖިލިސް އެއްކުރާއިރު "ކޯރަމް ހަމަވަނީ ކިރިޔާ" ކަމަށެވެ. ގައުމީ މަޖިލީހުގެ މެންބަރުންގެ މިހާރުގެ އަދަދަކީ 122 ކަމަށާއި އެހެންނަމަވެސް އެންމެ ނުރައްކާތެރި ހާލަތުގައި ކުއްލިއަކަށް ގައުމީ މަޖިލީސް ބާއްވަން ޖެހުނަސް ތިރީސް މެންބަރުން ހަމަވަނީ ކިރިޔާ ކަމަށް އޭނާ ވިދާޅުވިއެވެ. މިސާލަކަށް ނޫސްވެރިންތަކެއް ހައްޔަރުކޮށް ޖަލަށްލިފަހަރު "އަޅުގަނޑުމެންގެ ގައުމީ މަޖިލީސް އެއްވާން ޖެހުނީމާ ކިރިޔާ ކޯރަމް ހަމަވީ. އެތައް ގަޑިއިރަކު މަޑުކުރަންވެސް ޖެހުނު،" އޭނާ ވިދާޅުވިއެވެ.
މިހާލަތަށް ދިއުމުން ގައުމީ މަޖިލިސްގެ މެމްބަރުންގެ "ޕާފޯމަންސް" ރަނގަޅު ކުރުމަށްޓަކައި ގެނެވިދާނޭ އިސްލާހުތައް އެބަހުރި ކަމަށް އޭނާ ވިދާޅުވިއެވެ. އެފަދަ ހާލަތްތަކުގައި ގައުމީ މަޖިލިސް މެންބަރުން ވަކިކުރެވޭނޭ އުސޫލުތަކެއް ހިމެނޭ އިސްލާހުތަކެއް ކުރީގެ ޗެއަރޕާސަން ފައްޔާޒު އިސްމާއީލް ވަނީ ހުށަހަޅާފައި ކަމަށް އޭނާ ވިދާޅުވިއެވެ. ފައްޔާޒުގެ އިސްލާހުތަކަށް ތާއިދު ކުރެއްވީ އީވާ ޢަބްދުﷲއެވެ. މިއީ ގައުމީ މަޖިލީހުގެ މެންބަރުން ޒިންމާދާރު ކުރުވަން ހުށަހެޅި އިސްލާހުތަކެއް ކަމަށް އޭނާ ވިދާޅުވިއެވެ.
