އެމްޑީޕީގެ ރައީސްގެ މަގާމާއި ނާއިބު ރައީސްގެ މަގާމް އުވާލައި ޕާޓީގެ އެންމެ އިސްވެރިއަކީ ޗެއަރޕާސަން ކަމަށް ބަދަލު ކުރުމަށް ކޮންގްރެސްއަށް އިސްލާހެއް ހުށަހަޅައިފިއެވެ.
މިހާރު ހިނގަމުންދާ އެމްޑީޕީގެ ކޮންގްރެސްއަށް މި އިސްލާހު ހުށަހެޅުއްވީ އެޕާޓީގެ ކުރީގެ ޗެއަރޕާސަން ފައްޔާޒު އިސްމާޢީލެވެ. ފައްޔާޒު ވިދާޅުވީ ޕާޓީގެ ރައީސަކާއި ޗެއަރޕާސަނެއް ހުރުމުން ކަންކަން ކުރިއަށް ގެންދިއުމުގައި ބައެއްފަހަރު ދަތިތަކެއް ދިމާވާ ކަމަށެވެ.
"އަޅުގަނޑުމެން އަބަދުވެސް އަޑުއަހާ ވާހަކައެއް އޮންނާނެ، އެއްއުރައެއްގައި ދެކަނޑިއަކަށް ނޯވެވޭނެޔޭ. މިއީ ސިޔާސީ ޕާޓީއެއް. ޕާޓީގެ ހިންގުން ޕާޓީގެ ލީޑަރޝިޕަށް ފަސޭހަވާންޖެހޭ. އެގޮތުން އަޅުގަނޑު މިހުށަހަޅަނީ ޕާޓީގެ ރައީސް އަދި ނާއިބު ރައީސްގެ މަގާމު އުވައިލުމާއި ޕާޓީގެ އެންމެ އިސްފަރާތަކީ ޕާޓީގެ ޗެއަރޕާސަން ކަމަށް ބަދަލުކުރަން،" ފައްޔާޒު ވިދާޅުވިއެވެ.
މީގެ އިތުރުން ޕާޓީގެ ޗެއަރޕާސަންގެ ނާއިބުންގެ ގޮތުގައި މިހާރު ތިއްބަވާ ދެބޭފުޅުންގެ އަދަދު ދެއަކުން ތިނަކަށް ބަދަލު ކުރުމަށް ފައްޔާޒުގެ އިސްލާހުގައި ވިދާޅުވެފައެވެ. ތިން ނާއިބުންގެ ތެރެއިން އެއްބޭފުޅަކީ އަންހެން ބޭފުޅަކަށް ވާންޖެހޭނޭ ކަމަށް ވެސް ފައްޔާޒުގެ އިސްލާހުގައި ވިދާޅުވެފައިވެއެވެ.
ފައްޔާޒުގެ މި އިސްލާހުތަކަށް ތާއީދު ކުރެއްވީ އީވާ ޢަބްދުﷲ އެވެ.
