ރަސްފަންނު މޫދުން ކިސަޑު ނަގަން މާދަމާ ފަށަނީ

މާލޭ، ރަސްފަންނުގެ މޫދަށް އެރޭ ސަރަޙައްދުގެ އަޑީގައި އުފެދިފައިވާ ކިސަޑު ނެގުމުގެ މަސައްކަތް މާދަމާ ފަށާނޭ ކަމަށް މާލޭސިޓީކައުންސިލުން ވިދާޅުވެއްޖެއެވެ. އެކައުންސިލުން ވިދާޅުވެފައިވަނީ އެސަރަހައްދުގެ 500 އަކަ މީޓަރުގެ ބޮޑުމިނުގައި އެއް ފޫޓުގެ ފުންމިނަށް ކިސަޑު ޖަމާވެފައިވާކަން ފާހަގަކުރެވިފައިވާ ކަމަށެވެ. އެހެން ކަމުން އެ ކިސަޑު ނެގުމުގެ މަސައްކަތް މާދަމާ ހެނދުނު 9:00 ގައި ފާށާނޭ ކަމަށް ވިދާޅުވެފައިވެއެވެ. އެ ސަރަހައްދުން ކިސަޑު ނަގައި، ބީޗަށް ވެލި އެޅުމުގެ މަސައްކަތް ކުރިއަށް ގެންގޮސް، މަސައްކަތް ނިމެންދެން ރަސްފަންނުގެ މޫދަށް އެރޭ ސަރަހައްދު އާންމުންނަށް ވަނީ ބަންދުކޮށްފައި ކަމަށް ވެސް ސިޓީކައުންސިލުން ވިދާޅުވިއެވެ.