މިސަރުކާރުގެ މިސްރާބުހުރީ ހައްގުތައް ހަނިކުރުމާ ދިމާއަށް: މައުރޫފް

ރައީސް ޑރ. މުހައްމަދު މުއިއްޒުގެ ސަރުކާރުގެ މިސްރާބުހުރީ ރައްޔިތުންގެ ހައްގުތައް ހަނިކުރުމާ ދިމާއަށް ކަމަށް ކެންދޫ ދާއިރާގެ މަޖިލިސް މެންބަރު މައުރުފް ޒާކިރު ވިދާޅުވެއްޖެއެވެ. އެކްސްގައި ކުރެއްވި ޕޯސްޓެއްގައި އޭނާ ވިދާޅުވެފައިވަނީ ފާއިތުވި ސަރުކާރުތަކާ އަޅާބަލާއިރު މަސައްކަތްތެރިންގެ ހައްގުތައް ހިމާޔާތް ކުރުމަށް މުހިންމު ގިނަ މަސައްކަތްތަކެއް ރައީސް އިބްރާހީމް މުހައްމަދު ސާލިހުގެ ސަރުކާރުން ކޮށްދީފައިވާ ކަމަށެވެ. އެކަންކަން ކޮށްދީފައިވަނީ އޭރުގެ އިކޮނޮމިކް މިނިސްޓަރު ފައްޔާޒު އިސްމާއީލްގެ ލީޑަރޝިޕްގައި ކަމަށްވެސް އޭނާ ވިދާޅުވެފައިވެއެވެ. މިއީ ދެބަސްނުވެވޭނެ ހަގީގަތެއް ކަމަށްވެސް އޭނާ ވިދާޅުވެފައިވެއެވެ. އެ ސަރުކާރުން "އިގްތިސާދީ އުނދަގޫތަކާއެކުވެސް މާނަވީ ރަނގަޅު ކުރިއެރުންތައް ވަނީ ހޯދާފައި،" އޭނާ ވިދާޅުވެފައިވެއެވެ.