ލައިވް ޕްރެސްއެއް ކުރިއަށްދަނިކޮށް އަމީން ގުޅުމަކީ ރަނގަޅު ކަމެއްނޫން

ހައްވާ ޔުމްނު ރަޝީދު ގެއެއްގެ މަތީ ބުރިއަކުން ވެއްޓުނު މައްސަލައިގައި ފުލުހުންގެ ލައިވް ޕްރެސް ކޮންފަރެންސެއް ކުރިއަށް ދަނިކޮށް ދައުލަތުގެ މިނިސްޓަރަކު ގުޅުމަކީ ރަނގަޅު ކަމެއްނޫން ކަމަށް ޔުމްނުގެ މައްސަލަ ބަލާ "ރިޔާސީ ކޮމިޝަން" އިން ވިދާޅުވެއްޖެއެވެ. މިހާރު ކުރިއަށްދާ ޕްރެސްގައި ނޫސްވެރިއަކު ކުރި ސުވާލަކަށް ޖަވާބު ދެއްވަމުން އެކޮމިޝަންގެ ރައީސް ޑރ. މުހައްމަދު މުނައްވަރު ވިދާޅުވީ ކޮމިޝަނުގެ މަސައްކަތް އަދި އެހިސާބަށް ނުދާ ކަމަށެވެ. އެހެންވީމާ ޔުމްނުގެ މައްސަލާގައި ނުފޫޒު ފޯރުވި މީހުންނާއި އެކަމުގައި ޝާމިލްވާ މީހުންނަކީ މިވެނި ބައެއްކޭ ބުނާ ހިސާބަށް ތަހުގީގު ކުރިއަށް ނުދާ ކަމަށެވެ. އެހެނަމަވެސް ޕްރެސް ކުރިއަށް ދަނިކޮށް ދައުލަތުގެ މިނިސްޓަރަކު ގުޅިނަމަ ގުޅުމަކީ ރަނގަޅު ކަމެއް ނޫން ކަމަށް މުނައްވަރު ވިދާޅުވިއެވެ.