މާލޭގައި ފެންބޮޑުވެ ބައެއް ގެތަކަށް ފެން ވަންނަން ފަށައިފި

މާލެއަށް ބޯކޮށް ވާރޭވެހި މަގުތަކުގައި ފެންބޮޑުވަމުން ދާތީ، ފެން ހިންދުމުގެ މަސައްކަތް ފަށައިފި ކަމަށް އެމްއެންޑީއެފުން ވިދާޅުވެއްޖެއެވެ. މި މަސައްކަތުގައި ހަރަކާތްތެރިވަނީ އެމްއެންޑީއެފްގެ ފަޔަރ އެންޑް ރެސްކިޔު ސަރވިސް އިންނެވެ. އެމްއެންޑީއެފުން ވިދާޅުވެފައިވަނީ ފެން ހިންދުމަށްޓަކައި މާލޭގެ ހަތް ސަރަހައްދެއްގައި ޕަންޕު ބަހައްޓައިގެން މިވަގުތު މަސައްކަތްކުރަމުންދާ ކަމަށެވެ. ފެންބޮޑުވެ މާލޭގެ ބައެއްގެތަކަށް މިހާރުވަނީ ފެން ވަންނަން ފަށައިފައެވެ. އެހެންވެ ފެންހިންދުމުގެ އިތުރަށް ވެލިބަސްތާ ޖެހުމުގެ މަސައްކަތް އެމްއެންޑީއެފް މާލެ އޭރިއާ ކޮމާންޑުގެ ސިފައިން ދަނީ ކުރަމުންނެވެ.