މިކަން ކުރިއަށްދަނީ އެމްޑީޕީ ހަރުގޭގައެވެ.
މި ކޮންގްރެސްގައި ހާހަކަށްވުރެގިނަ މަންދޫބުން ބައިވެރިވާނޭ ކަމަށް މައުލޫމާތު ވަނީ ލިބިފައެވެ. އެމްޑީޕީގެ ޑެޕިޔުޓީ ޗެއަރޕާސަން މުޙައްމަދު ޝިފާޒު ވިދާޅުވެފައިވަނީ މިއީ ވަރަށް ޚާއްސަ ކޮންގްރެސްއެއް ކަމަށާއި އެމްޑީޕީގެ އެންމެހާ މެންބަރުން ފަޚުވެރިވާނޭފަދަ ކޮންގްރެސްއަކަށް މި ކޮންގްރެސް ހައްދަވައިދެއްވާނޭ ކަމަށެވެ.
ކޮންގްރެސް ފަށާނީ މާދަމާރޭގައެވެ. މާދަންރޭ އޮންނާނީ ހުޅުވުމުގެ ރަސްމިއްޔާތެވެ. ހުކުރުދުވަހުގެ ދަންފަޅި ފަށާނީ މެންދުރުފަހުގައެވެ. އެދުވަހު ހަވީރުން ފެށިގެން ރޭނގަށް އޮންނާނީ އިންވެސްޓްމެންޓް ފޯރަމެވެ. މިއީ ކޮންގްރެސްގައި ހިމެނޭ އެންމެ މުހިންމު އެއްކަމެވެ. މި ފޯރަމްގެ ސަބަބުން ރަށްރަށުގައި ހުރި ވިޔަފާރީގެ ފުރުސަތުތަކާއި ރަށްރަށުގައި ފެށިދާނެ ވިޔަފާރިތަކުގެ މައުލޫމާތު ބައިވެރީންނަށް ލިބިގެންދާނެއެވެ.
ހޮނިހިރު ދުވަހުގެ ހެނދުނު 9:00 ގައި ފަށާ ދަންފަޅީގައި އޮންނާނީ ޕާޓީގެ އަސާސީ ގަވާއިދަށް ބަހުސްކުރުމާއި އިސްލާހު ހުށަހެޅުމެވެ. އަސާސީ ގަވާއިދަށް ގެންނަ އިސްލާހުތައް ފާސްކުރުން އޮންނާނީ އެ ރޭގައެވެ.
ޝިފާޒު ވިދާޅުވީ ކޮންގްރެސް އަޑުއެހުމާއި ބަލަން ބޭނުންވާ ފަރާތްތަކަށް އެފުރުސަތު އާންމުކޮށް ހުޅުވާލާފައިވާ ކަމަށެވެ.
ކޮންގްރެސް އޮންނާނީ މާލޭސިޓީ ހޯލުގައެވެ. އެތަނުގައި ޖާގައޮތް މިންވަރަކުން ކޮންގްރެސް އަޑުއަހަން އަންނަ މީހުންނަށް ޖާގަ ދެއްވާނޭ ކަމަށް ވެސް ޝިފާޒު ވިދާޅުވިއެވެ.
