ޝިފާޒު ވިދާޅުވީ ކޮންގްރެސް ބާއްވަނީ ފައިސާއަކުން ނޫންކަމަށާއި އެކަންކުރަނީ ޕާޓީގެ ރޫޙުގައި މަސައްކަތްކުރާ ޕާޓީގެ މެންބަރުން ކަމަށެވެ.
"އަޅުގަނޑުމެން މި ކޮންގްރެސް މިބާއްވާނީ ފައިސާއަކުންނޫން. އަޅުގަނޑުމެން ވަރަށްބޮޑަށް މަސައްކަތްކުރީން ސޯޝަލް ސެންޓަރު ލިބޭތޯ. ސްކޫލެއްގެ ހޯލެއް ލިބޭތޯ. ސެންޓްރަލް ޕާކު ލިބޭތޯ ވެސް ބެލީން. އެއިން އެއްވެސް ތަނެއް ނުލިބުނީމައި މިދަތި ޖާގައިގައި (މާލޭ ސިޓީހޯލުގައި) މިކަން މިކުރަނީ. މިއީ އެމްޑީޕީއަށް ސަޕޯޓުކުރާ މެންބަރުން ކޮށްދޭ ކަމެއް،" ޝިފާޒު ވިދާޅުވިއެވެ.
އެމްޑީޕީއަކީ އަބަދުވެސް ވަރުގަދަ ޢަޒުމަކާއި ރޫޙެއްގައި މަސައްކަތްކުރާ ކެރޭ މެންބަރުންތަކެއް އުޅޭ ޕާޓީއެއް ކަމަށާއި މިފަދަ ކޮންމެ ކަމެއްގައި ވެސް މެންބަރުންދަނީ ޕާޓީވަންތަކަމުގައި ނަމޫދާ ދައްކަމުން ކަމަށް ޝިފާޒު ވިދާޅުވިއެވެ. މި ބޮޑު ހަރަކާތްވެސް މި ބޭއްވެނީ އެ ޢަޒުމާއި އެ ރޫޙުގައި ކަމަށް އޭނާ ވިދާޅުވިއެވެ.
"އެބޭފުޅުން ކޮންގްރެސްއަށް ވަޑައިގަންނަވާނީ އަމިއްލަ ޚަރަދުގައި. އެބޭފުޅުން ތިއްބަވާނީ އަމިއްލަ ޚަރަދުގައި. އެބޭފުޅުން ކެއިންބުއިމުގެ ކަންކަން އަމިއްލަ ޚަރަދުގައި. އެބޭފުޅުންގެ ޔުނިފޯމަކީ އެބޭފުޅުންގެ އަމިއްލަ ޚަރަދު. އަޅުގަނޑުމެން ޓައިއެއް ގަނެނުދެން، ބޮލުގައި އަޅާނޭ ބުރުގާއެއް ގަނެއެއް ނުދެން. އެބޭފުޅުންގެ ޕާޓީއަށް އެބޭފުޅުންގެ އަމިއްލަ ޝައުގުގައި ކޮށްދޭކަމެއް މިއީ. ތަން ތައްޔާރުކުރަނީ މިކަން ކުރަން ޝައުގު ހުރެގެން އެބޭފުޅުން އަމިއްލައަށް. އެގޮތަށް މުޅި ކޮންގްރެސް މިދަނީ،" އޭނާ ވިދާޅުވިއެވެ.
