އެއީ އިންވެސްޓްމެންޓް ފޯރަމާއި، އަސާސީޤަވާއިދު އިސްލާހުކުރުމާއި ޕޮލިސީތައް އެކަށައެޅުން ކަމަށް އޭނާ ވިދާޅުވިއެވެ. އެމްޑީޕީން މީގެކުރީން ކަނޑައެޅި ޕޮލިސީތަކުގެ ސަބަބުން ރައްޔިތުންނަށް އެތައް ފައިދާއެއް މިހާރުވެސް ލިބެމުންދާ ކަމަށް އޭނާ ވިދާޅުވިއެވެ.
ކުރީގެ ބައެއް ރައީސުންނާއި ސިޔާސީ ޕާޓީތަކާއި ބޭރުގެ ބައެއް ފަރާތްތަކަށް ދައުވަތު ދީގެން ބާއްވާ މި ކޮންގްރެސްގައި އެންމެ ބޮޑަށް ފާހަގަ ކޮށްލެވޭ އެއްކަމަކީ އިންވެސްޓްމެންޓް ފޯރަމް ކަމަށް ޝިފާޒު ވިދާޅުވިއެވެ. އެމްޑީޕީ އުފެދިގެން އައިއިރު ކުރަމުންއައި ވަކާލަތަކީ ފުދުންތެރި މުޖުތަމައެއް ބިނާކޮށް ރައްޔިތުން ބާރުވެރި ކުރުވައި ލާމަރުކަޒީ ނިޒާމުން ދައުލަތް ހިންގުން ކަމަށާއި، މި ފޯރަމަކީ އެ ކަންކަމަށް ބާރު އެޅުމުގެ ގޮތުން ބާއްވާ ފޯރަމެއް ކަމަށް ވެސް އޭނާ ވިދާޅުވިއެވެ.
"އިންވެސްޓްމެންޓް ފޯރަމަކީ ކައުންސިލަރުންގެ ފޯރަމެއް. ކައުންސިލްތަކުން ހިންގަން ބޭނުންވާ އެކިއެކި ޕްރޮޖެކްޓްތަކަށް ފައިނޭންސް ހޯދައި ކައުންސިލްތަކާ ގުޅިގެން އަމިއްލަ ފަރާތްތަކުން ހިންގަން ބޭނުންވާ ވިޔަފާރީގެ ފުރުސަތު ބުނެދީ މަޝްވަރާ ކުރުން ބޭނުމަކީ. މަދުވެގެން 34 ވަރަކަށް ކައުންސިލުން ޕްރޮޖެކްޓްތައް އެބަ ޕްރެޒެންޓްކުރޭ މި ފޯރަމުގައި. ޖުމްލަ 70 ވަރަކަށް ޕްރޮޖެކްޓް އެބައޮތް ލިބިފައި އިއުލާންކުރިއިރު. މިއަދަދު މިއަށްވުރެ އިތުރުވާނޭ ކަމަށް މިބަލަނީ މިހާރު،" ޝިފާޒު ވިދާޅުވިއެވެ.
ޝިފާޒު ވިދާޅުވީ ރާއްޖެއިން ބޭރުގެ ބައެއް ވިޔަފާރިތަކުން ވެސް މި ފޯރަމުގައި ބައިވެރިވުމަށްވަނީ އޮންލައިންކޮށް ރަޖިސްޓްރީ ކޮށްފައި ކަމަށެވެ. އިއްޔެއާ ހަމައަށް ފަންސާހަށްވުރެ ގިނަ ވިޔަފާރިތަކުން އޮންލައިންކޮށް ބައިވެރިވާން އެދިފައިވާ ކަމަށް ޝިފާޒު ވިދާޅުވިއެވެ. "އެހެންވީމާ މިކަމަށް ލިބޭ ތަރުހީބު ވަރަށްބޮޑު ކަމަށް މިދެކެނީ،" އޭނާ ވިދާޅުވިއެވެ.
ޝިފާޒު ވިދާޅުވީ ކޮންގްރެސްމަނުންގެ އިތުރުން 300 މީހުންނަށް ކޮންގްރެސްއަށް ދައުވަތު ދެއްވާފައިވާ ކަމަށެވެ.
