މަޝްހޫރޫ ކަޝްމީރުގެ ދާލްކުޅި ދަންނަމުހެއްޔެވެ؟ އެއީ އިރެއްގައި ސާފު ފެން ލިބުނު ކުޅިއެކެވެ. ފްލޯޓިން ބަގީޗާތަކާއި، ހައުސްބޯޓުތަކަށް މަޝްހޫރުވި ތަނެކެވެ. މި ކުޅިއަކީ ކަޝްމީރުގެ ސްރީނަގަރުގެ، ފަތުރުވެރިކަމާއި ސަގާފީ ދިރިއުޅުމުގެ މައިމަރުކަޒެވެ. ނުވަތަ ހިތެވެ.
އެހެންނަމަވެސް ތިމާވެށްޓަށް އަންނަމުންދާ އަވަސް ބަދަލުތަކުގެ ސަބަބުން މިކަންކަން ދަނީ ބަދަލުވަމުންނެވެ. ހިތްދަނީ ހަލާކުވަމުންނެވެ. ފަތުރުވެރިކަންދަނީ ދަށްވަމުންނެވެ. ކުރިން ލިބުނު ސާފު ފެނެއް މިހާރު ނުލިބެއެވެ. ފެން ތަޣައްޔަރު ވެއްޖެއެވެ. ޕްލާސްޓިކް ކުނިތައް ގިނަވެއްޖެއެވެ. ބޭކާރު ވިނަތަކުން މަންޒަރު ހުތުރު ކޮށްފިއެވެ. މިކުޅިއަށް މިހާލަތު ދިމާވީ އެތައް ހާސް ރައްޔިތުންނާއި ވިޔަފާރިވެރީން ދަތުރުފަތުރަށާއި އާމްދަނީ ހޯދުމަށް މިކުޅިއަށް ބަރޯސާވެފައިވާ ދަނޑިވަޅެއްގައެވެ.
މި ކުޅިއަށް މައްސަލަ ދިމާވީ އެތައް ކަމެއްގެ ސަބަބުންނެވެ. އޭގެ ތެރޭގައި ތަޣައްޔަރުވުމުގެ މައްސަލަ ހިމެއެވެ. ޤަވާއިދާ ޚިލާފަށް އިމާރާތްކުރުން ހިމެނެއެވެ. ބިން ފޭރުމުގެ މައްސަލަ ހިމެނެއެވެ. މިއާއެކު މޫސުމީ ބަދަލުތައް ހިމެނެއެވެ. މި ބަދަލުތަކާއެކު ދާލް ކުޅީގެ ނާޒުކު ތިމާވެށިދަނީ ވަރަށް ބޮޑަށް ހަލާކުވަމުންނެވެ. އާބާދީ އިތުރުވުމަކީ ވެސް ތިމާވެށީގެ އެތައް މައްސަލައެއް ކުރިމަތިވާން ދިމާވި އެއް ސަބަބެވެ. އާބާދީ އިތުރުވަމުންދާ ވަރަކަށް ކުޅީގެ ސައިޒު ދަނީ ކުޑަވަމުންނެވެ. އެއާއެކު ޢިމާރާތްތައް ދަނީ ގިނަވަމުންނެވެ. މިއީ އިތުރު މައްސަލަތައް ކުރިމަތި ކުރުވާ ކަންކަމެވެ.
ކުޅި ހިމެނޭ ސަރަހައްދަށް މޫސުމީ ބަދަލުތައް އައިސް ފިނިހޫނުމަށް ބަދަލުއައުމާއި، ވާރޭވެހުމަށް ބަދަލުއައުމަކީ ކުޅީގެ ހާލަތު އިތުރަށް ގޯސްވުމަށް މަގުފަހިކުރުވާ ކަންކަމެވެ. ކަމާ ބެހޭ ފަރާތްތަކުން މި ކުޅި ގަވާއިދުން ސާފުކުރެއެވެ. ރައްކާތެރިކަމުގެ ފިޔަވަޅުތައް އަޅައެވެ. އެހެންނަމަވެސް މިހާރުގެ ހާލަތަށް ބަލާއިރު ކުޅީގެމުސްތަގުބަލު އޮތީ ނޭގުމެއްގެ ތެރޭގައެވެ. މިއީ މުޅި ކަޝްމީރު ވާދީއަށް ކުރިމަތިވެފައިވާ ތިމާވެށީގެ ބޮޑު ނުރައްކާތެރިކަން ރަމްޒުކޮށްދޭ ކަމެކެވެ.
Gallery
