އެމެރިކާ ސިފައިން އިރާޤުން ބޭރުކޮށްލުމަކީ އިރާޤުގެ ރައްޔިތުންނަށް ލިބުނު ތާރީޚީ ކާމިޔާބީއެއް ކަމަށާއި، މިއީ ހުޅަނގު އޭޝިއާގައި ބޭރުގެ ނުފޫޒު ނައްތާލުމަށް އެޅުނު މުހިންމު ފިޔަވަޅެއް ކަމަށް އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރު.ޖީ.ސީ) އިން ބުނެފިއެވެ.
ބުރާސްފަތި ދުވަހު ނެރުނު ބަޔާނެއްގައި އައި.އާރު.ޖީ.ސީ އިން ބުނީ، އެމެރިކާ ސިފައިން އިރާޤުން ފޭބުމަކީ އެޤައުމުގެ މިނިވަންކަން ދެމެހެއްޓުމަށް އިރާޤު ރައްޔިތުން ކުރި މަސައްކަތުގެ ނަތީޖާ ކަމަށެވެ. އަދި އެމެރިކާއާ ދެކޮޅު ހަރަކާތަށް ލިބުނު ބޮޑު ކާމިޔާބީއެއް ކަމަށް ވެސް ބުނެފައިވެއެވެ.
އިރާޤުގައި އެމެރިކާގެ ސިފައިން ތިބި 20 އަހަރު ދުވަހުގެ ތެރޭގައި އެއްވެސް ހަމަޖެހުމެއް ހޯދައިދެވިފައި ނުވާ ކަމަށާއި، އޭގެ ބަދަލުގައި ސަރަޙައްދުގައި އުފެދުނީ ހަމަނުޖެހުމާއި ނާމާންކަން ކަމަށްވެސް އެ ބަޔާނުގައި ބުނެފައިވެއެވެ.
މި ބަޔާނުގައި އެމެރިކާ ސިފައިން ބޭރުކޮށްލުން ސިފަކޮށްފައިވަނީ ވޮޝިންގޓަނަށް ލިބުނު ބޮޑު ނާކާމިޔާބީއެއްގެ ގޮތުގައެވެ. އަދި އެމެރިކާ އަމިއްލައަށް އިޢުތިރާފުވެފައިވާ ގޮތުގައި 5،000 އަށްވުރެ ގިނަ ސިފައިން މަރުވެ، 4 ޓްރިލިއަން ޑޮލަރު ހޭދަވި ނަމަވެސް، އިރާޤުގައި ހޭދަކުރި 20 އަހަރު ދުވަހުން އެމެރިކާއަށް އެއްވެސް ފައިދާއެއް ލިބިފައިނުވާ ކަމަށް ބުނެފައިވެއެވެ.
އައި.އާރު.ޖީ.ސީ އިން އިތުރަށް ބުނީ، މިއީ ހުޅަނގު އޭޝިއާ ސަރަޙައްދުން އެމެރިކާ ސިފައިން އެކީގައި ފޭބުމަށް އެޅުނު ފުރަތަމަ ފިޔަވަޅު ކަމަށާއި، އެމެރިކާއިން މި ސަރަޙައްދު ދޫކޮށް ގޮސް، ސަރަޙައްދީ ޤައުމުތަކަށް އެބައިމީހުންގެ އަމިއްލަ ސަލާމަތީ ކަންކަން ބަލަހައްޓަން ފުރުޞަތު ދޭންޖެހޭ ކަމަށެވެ. އަދި ހުޅަނގު އޭޝިއާއިން އެމެރިކާއާއި އިސްރާއީލުގެ ބާރުތައް ނައްތާލައި، "އަލްޤުދުސް މުޅިން މިނިވަންކުރެވޭންދެން" ސަރަޙައްދުގެ ރައްޔިތުންނާއެކު ސާބިތުވެ ތިބޭނެ ކަމަށް އައި.އާރު.ޖީ.ސީ އިން ވަނީ ވައުދުވެފައެވެ.
