ޒައިތޫނި ބިންނަން ތިބި ފަލަސްތީނުގެ ބަޔަކަށް އިސްރާއީލުގެ ވަޒަންވެރިން ހަމަލާދީ، ތިން މީހަކު ޒަޚަމްކޮށްލައިފި ކަމަށް ވަފާނިއުސް އޭޖެންސީން ބުނެފިއެވެ.
އެ ނޫހުން ބުނެފައިވަނީ އިސްރާއީލުގެ ވަޒަންވެރީންނަކީ އެގައުމުގެ ސިފައިންގެ ހިމާޔަތުގައި ތިބި ބައެއް ކަމަށެވެ. އެމީހުން ހަމަލާދީފައިވަނީ ބޭތާ، ޖައްމާއީން، ޢަވާރުތާ، ޢަސީރާ އަލްޤިބްލިއްޔާ، ބައިތު ފޫރީކް އަދި ދައިރު ޝަރަފް އަވަށުގައި އޮލިވް ބިންނަން ތިބި ފަލަސްތީނުގެ އާންމުންނަށް ކަމަށެވެ.
މި ހަމަލާތަކުގައި ވަޒަންވެރިން ވަނީ އާންމުންގެ ގައިގައި ތަޅައި އަނިޔާކޮށްފައެވެ. އޭގެ ސަބަބުން ނާބުލުސްގެ ދެކުނުން އޮންނަ ބޭތާ އަވަށުން މީހަކަށް އަނިޔާވެފައިވެއެވެ. އަދި ދައިރު ޝަރަފް އަވަށުން ފިރިހެނަކާއި އޭނާގެ އަންހެނުންގެ ގައިގެ އެކި ތަންތަން ވަނީ މަށައިގެން ގޮސް ޒަޚަމްވެފައިވާ ކަމަށް އެނޫހުން ބުނެފައިވެއެވެ.
ޒައިތޫން ނުވަތަ އޮލިވް ބިންނަން ތިބި އާންމުންނާއި ބޭރުގެ އެކްޓިވިސްޓުންނާ ދެކޮޅަށް އިސްރާއީލު ސިފައިން ވަނީ އަޑުގަދަ ބޮމާއި ނުރައްކާތެރި ގޭސް ބޭނުންކޮށްފައެވެ.
