ދިވެހިރާއްޖޭގައި އުޅެމުންދާ ބިދޭސީންގެ ތެރެއިން ބައެއް ބައެއް މީހުން ދަންވަރުގެ ވަގުތުތަކުގައި ރަށުތެރޭގެ އާންމު މަސްލަހަތު ގެއްލޭފަދަ ކަންކަން ކުރަމުން ގެންދާ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
އެކްސްގައި މިއަދު ކުރެއްވި ޕޯސްޓެއްގައި އެމަނިކުފާނު ވިދާޅުވެފައިވަނީ ބައެއް ބިދޭސީން ގެންދަނީ މަސްލަހަތު ގެއްލޭ ކަންކަން ކުރުމުގެ އިތުރުން އާއްމު އިޖްތިމާއީ މިންގަނޑުތަކާއި ޚިލާފަށް އުޅެމުން ކަމަށެވެ.
ދިވެހިރާއްޖޭގައި އުޅެމުންދާ ބިދޭސީންގެ ތެރެއިން ބައެއް ފަރާތްތަކުން ރޭގަނޑުގެ ދަންވަރު ވަގުތުތަކުގައި ރަށުތެރޭގެ އާއްމު މަސްލަހަތު ގެއްލޭ ފަދަ ކަންކަން ކުރަމުންދާތީއާއި އާއްމު އިޖްތިމާއީ މިންގަނޑުތަކާއި ޚިލާފަށް އުޅެމުންދާތީ, ދަންވަރު 12:00 އިން ފެށިގެން ހެނދުނު 06:00 އާއި…
— Dr Mohamed Muizzu (@MMuizzu) December 17, 2025
އެހެން ކަމުން މިރެއިން ފެށިގެން ދަންވަރު ބާރައިން ފެށިގެން ހެނދުނު ހަޔަކާ ހަމައަށް، އާންމު ތަންތަނުގައާއި މަގުމަތީގައި އުޅޭ ބިދޭސީން ހުއްޓުވައި ސުވާލުކުރުމަށް ދިވެހި ފުލުހުންނާއި ކަމާބެހޭ އެހެން ފަރާތްތަކަށް ވާނީ އަންގަވާފައި ކަމަށް ރައީސް ވިދާޅުވެފައެވެ.
އެމަނިކުފާނު ވިދާޅުވެފައިވަނީ އެފަދަ މީހުން ސުވާލުކޮށް ކަންކަން އޮޅުންފިލުވަމުން ގެންދާއިރު ގާނޫނީގޮތުން އަޅަންޖެހޭ ފިޔަވަޅެއްވާނަމަ އެފިޔަވަޅު އެޅުމަށް ވެސް ވާނީ އަންގަވާފައި ކަމަށެވެ.
މިފަދަ މީހުންނާ ”ސުވާލުކޮށް އަދި ފާހަގަވާ ކަންކަމާއި ގުޅިގެން ޤާނޫނީގޮތުން އަޅަންޖެހޭ ފިޔަވަޅެއްވާނަމަ އެ ފިޔަވަޅުއެޅުމަށް މިރެއިން ފެށިގެން ދިވެހި ފުލުހުންނާއި ކަމާބެހޭ އެހެން އިދާރާތަކުން މަސައްކަތް ފަށަން ވާނީ ދަންނަވާފައި،“ ރައީސް ވިދާޅުވެފައިވެއެވެ.
