ޕާކިސްތާނުގެ އޮޑިޓަރ ޖެނެރަލް އާންމުކުރެއްވި 2023-24 ވަނަ މާލީ އަހަރުގެ ރިޕޯޓުގައި، އެ ގައުމުގެ ފެޑެރަލް މިނިސްޓްރީތަކާއި ދައުލަތުގެ މުއައްސަސާތަކުގައި 375 ޓްރިލިއަން ޕާކިސްތާން ރުޕީސް (1.32 ޓްރިލިއަން އެމެރިކާ ޑޮލަރު) ގެ މާލީ އޮޅުވާލުންތަކާއި ގަވާއިދާ ހިލާފު ކަންތައްތަކެއް ހުރިކަން ހާމަކޮށްފިއެވެ. މި ހޯދުންތަކާއެކު އެ ގައުމުގެ މާލީ ނިޒާމުގެ ހިންގުންތެރިކަމާ މެދު ވަނީ ބޮޑެތި ސުވާލުތަކެއް އުފެދިފައެވެ.
އޮޑިޓް ރިޕޯޓުގައި ފާހަގަކޮށްފައިވާ ގޮތުގައި، ދައުލަތުގެ ޚަރަދުތަކުގެ 87 އިންސައްތަ ހޭދަކޮށްފައިވަނީ ދަރަނި އަދާކުރުމަށާއި އިންޓްރެސްޓް ދެއްކުމަށެވެ. ތަރައްގީގެ މަޝްރޫއުތަކަށާއި އިޖުތިމާއީ ރައްކާތެރިކަމުގެ ޕްރޮގްރާމްތަކަށް ހޭދަކޮށްފައިވަނީ އެންމެ 13 އިންސައްތައެވެ. މިއީ އާންމު ރައްޔިތުންނަށް އިގްތިސާދީ ދަތިތަކާ ކުރިމަތިލާން ޖެހިފައިވާ ދަނޑިވަޅެއްގައި، ސަރުކާރުގެ މުއައްސަސާތަކުގެ މާލީ އުސޫލުތައް ހުރި ގޮތުން ފާހަގަވި ބޮޑު ފަރަގެކެވެ.
މި ރިޕޯޓުގައި އިތުރަށް ބަޔާންކޮށްފައިވާ ގޮތުގައި، މުދަލާއި ޚިދުމަތް ހޯދުމުގެ (ޕްރޮކިއުމަންޓް) ތެރެއިން 284 ޓްރިލިއަން ރުޕީސްގެ އޮޅުވާލުންތައް ވަނީ ފާހަގަކުރެވިފައެވެ. މީގެ އިތުރުން މަދަނީ މަސައްކަތްތަކުގެ މެނޭޖްމަންޓުން 85.6 ޓްރިލިއަން ރުޕީސްގެ މައްސަލަ އަދި ދައުލަތަށް ލިބެންޖެހޭ ފައިސާގެ ތެރެއިން ނުލިބިވާ 2.5 ޓްރިލިއަން ރުޕީސްގެ މައްސަލަ ވެސް ވަނީ ފާހަގަކޮށްފައެވެ.
ގާނޫނީ ގޮތުން ބަލާއިރު، ޕާލަމެންޓުގެ އެއްވެސް ހުއްދައެއް ނެތި 513.87 ބިލިއަން ރުޕީސްގެ ސަޕްލިމެންޓަރީ ގްރާންޓް ދޫކޮށްފައިވާކަން ވެސް އޮޑިޓުން ވަނީ ދައްކާފައެވެ. މިއީ ގާނޫނީ ގޮތުންނާއި ދައުލަތުގެ ބަޖެޓް ބެލެހެއްޓުމުގައި ހުރި ބޮޑެތި އިހުމާލުތަކެއްގެ ގޮތުގައި ވަނީ ބެލެވިފައެވެ.
އޮޑިޓަރ ޖެނެރަލްގެ ރިޕޯޓުގައި ސީދާ ޖިނާއީ ކުށެއްގެ ތުހުމަތު ކޮށްފައި ނުވި ނަމަވެސް، މާލީ ނިޒާމު ހަރުދަނާ ކުރުމަށްޓަކައި އެތެރޭގެ ކޮންޓްރޯލްތައް ވަރުގަދަ ކުރުމަށް ވަނީ އިރުޝާދު ދީފައެވެ. މީގެ ތެރޭގައި ޕްރޮކިއުމަންޓް ނިޒާމު ޑިޖިޓަލް ކުރުމާއި، މުއައްސަސާތަކުގެ މެދުގައި އޮންނަ ގުޅުން އިތުރަށް ހަރުދަނާކޮށް ދެފުށް ފެންނަ ނިޒާމެއް ގާއިމުކުރުން ހިމެނެއެވެ.
