ޝަމްސް ކަސްޓަމް ޑިޒައިން އެންޑް ޓެއިލަރިންގެ ވެރިޔާ، ހ. ފެއަރީ ޕެލަސް، އާއިޝަތު ޝަމްލާ (ޝަމް) މިވަނީ ކުރިއަށްއޮތް ކައުންސިލް އިންތިޚާބުގައި ހެންވޭރު އުތުރު ދާއިރާގެ އެމްޑީޕީ ޓިކެޓު ހޯދުމަށް އެޕާޓީގެ ޕްރައިމަރީގައި ވާދަކުރަން ނިންމައިފައެވެ.

ކީއްވެ؟

ކުޅަދާނަ ފެޝަންޑިޒައިނަރު ސިޔާސީ މައިދާނަށް ނިކުންނަން ނިންމެވީ އެތައް ބައެއްގެ ވޭން އަޑުއިވިއިވި ހިތަށް ކެތްނުވެގެންނެވެ. ޚުދު އަމިއްލައަށް ވެސް އެތައް ކަމެއް ތަޖުރިބާކުރެވިފައިވާތީ މީހުންގެ ކަންބޮޑުވުންތަކާއި ޝަކުވާތައް އޭނާއަށް ގަބޫލުކުރެވިގެންނެވެ. ޝަމްގެ ފަހާތަނަށް އަންނަ ގިނަ ކަސްޓަމަރުން ވެސް އެމީހުންނަށް ދިމާވެފައިވާ ދަތިކަންކަމާއި، ހިތްދަތިކަން ޝަމްއާ ހިއްސާ ކުރެއެވެ. އެހެން ކަމުން އެތައް ބައެއްގެ އެތައް ކަމެއް އޭނާއަށް އެނގެއެވެ. އެމީހުންގެ ވޭނާއި ޝަކުވާތައް ކަމާބެހޭ ފަރާތްތަކާ ޝަމް ހިއްސާ ކުރިއެވެ. ހައްލެއް ނުލިބުނެވެ. އެންމެފަހުން އޭނާ އަމިއްލައަށް މިނިކުތީ ޚިދުމަތެއް ކޮށްދިނުމުގެ ހައިސިއްޔަތު ހޯދުމަށެވެ. މާލޭ ސިޓީގެ މެންބަރުކަން އޭނާއަށް ލިބުމުން ހައިސިއްޔަތު ކަށަވަރުވާނެއެެވެ. އެކަން ކުރެވޭނީ އެމްޑީޕީގެ ޕްރައިމަރީ ކާމިޔާބު ވެގެންނެވެ. އެހެންކަމުން އޭނާ ބޭނުންވަނީ ހެންވޭރު އުތުރު ދާއިރާގެ އެންމެންގެ ވޯޓެވެ.

ޝަމްއަށް ވޯޓު ދޭންވީ ކީއްވެ؟

އިޖުތިމާއީ އެތައް މައްސަލައަކަށް ހައްލު ހޯދުމަށް މަސައްކަތް ކުރުމަށެވެ. މިހާތަނަށް ހައްލުނުވެފައިވާ އެތައްކަމަކަށް ވަކާލާތުކޮށް އެކަންކަމަށް ދާއިމީ ހައްލެއް ހޯދައިދިނުމަށެވެ. ޖުމްލަކޮށް އިޖުތިމާއީ މައްސަލަތައް ހައްލުކުރުމަކީ އޭނާގެ އެންމެ ބޮޑު އަމާޒެވެ. މާލޭ ރައްޔިތުން ކެކުޅެން ދޫކޮށްލާކަށް އޭނާ ބޭނުމެއް ނުވެއެވެ. މި ކެކުޅުންތަކަށް ނިމުން ގެންނަން އޭނާ ބޭނުންވެއެވެ. މިކަން ނިމުމަކަށް ގެނެވޭނީ ކެރިގެން ހަގީގީ މަސައްކަތެއް ކުރިވިގެންނެވެ. މިކަންކަމަށް އެކަނި ބެއްޔަސް ޝަމްއަށް ވޯޓު ދިނުމަކީ ދާއިރާއަށާއި މާލެއަށް އެންމެ ރަނގަޅު ގޮތްކަމަށް އޭނާ ގަބޫލު ކުރައްވައެވެ.

ދުވާރާއި ކަފިހި ހުރަސް މަތިން ނުހިނގޭ!

މާލޭގެ ޓްރެފިކް މައްސަލަ އިންތިހާއަށް ބޮޑުވެއްޖެއެވެ. ދުވާރު މަތިން ހިނގަން ދަތިވެއްޖެއެވެ. ދުވާރު މައްޗަށް އެއްބައި އަރާގޮތަށް ކޮންމެވެސް ކާރެއް ނުވަތަ ޕިކަޕެއް ޕާކުކޮށްފައި އޮވެގެންނެވެ. ނުވަތަ ކޮންމެވެސް މަރާމާތެއް ކުރަން ހަދައިގެންނެވެ. ”މަރާމާތު ވެސް ކުރަންވީ، ހުރިހާ ކަމެއްވެސް ކުރަންވީ. އެއީ ކުރަންވާނޭ ކަންކަން، އެކަމަކު މަރާމާތު ކުރަން ފެށުމުގެ ކުރިން މީހުންނަށް ހިނގޭނޭ ގޮތް ހަމަޖައްސައިފައި މެނުވީ ފެށުން ރަނގަޅެއްނޫން. އެތައް ބަޔަކު ދުވާރުން ވެއްޓި އަނިޔާވެފައި އެބަހުރި. ކަފިހި ހުރަހުން ހުރަސްކޮށްކޮށް ހުންނައިރު އެދިޔައީ ކާރެއް، ސައިކަލެއް ނޫނީ ކޮންމެވެސް ވެހިކަލެއް. މިއީތޯ މާލޭގައި އުޅޭމީހުންނަށް ހައްގުވާ މިންވަރު،“ ޝަމްލާ ވިދާޅުވިއެވެ.

އޭނާ ވިދާޅުވީ މިފަދަ އެތައް މައްސަލައެއްގެ ޝަކުވާ މިހާރު މާލޭގެ މޭޔަރަކަށް ހުންނެވި އާދަމް އާޒިމަށް ހުށަހެޅުއްވި ކަމަށެވެ. އެހެންނަމަވެސް ޒިންމާދާރު ޖަވާބެއް ނުލިބުނު ކަމަށެވެ. ޕާކުކުރުން މަނާތަންތާގައި ޕާކުކޮށްފައި ހުންނާތީ އާންމުންނަށް އުނދަގޫވެގެން ފުލުހުންނަށް މައްސަލަ ހުށަހެޅުމުން ދެއްވީ މާ ޒިންމާދާރުކަން ކުޑަ ޖަވާބެކެވެ. ”ވިދާޅުވީ ފޮޓޯ ނަގާފައި ފޭސްބުކަށް ލައިފައި ފުލުހުން ޓެގުކޮށްލާށޭ. މިއީ ރައްޔިތުންގެ ޓެކްސް ފައިސާއިން މުސާރަ ނަގައިގެން ތިބި ބަޔަކު ދީގެންވާނޭ ޖަވާބެއްނޫން. މިއީ ތަންފީޒީ އިދާރާއަކުން އެއްގޮތަށްކަވެސް ދީގެންވާނޭ ޖަވާބެއްނޫން. މޭޔަރު ވިދާޅުވީ ތިމަންމެންގެ މަސައްކަތަކީ މަގުތަކުގައި ރޮނގު ދެމުންކަމަށް. ގަވާއިދަށް އަމަލު ކުރަންޖެހޭނީ އާންމުން ކަމަށް. މިއީ ކީއްކުރަން އިންތިޚާބުކުރާ ކައުންސިލެއްތޯ؟ އަޅުގަނޑު މިނިކުންނަނީ މިކަންކަން ހައްލު ކުރުމަށް ޒިންމާދާރު މަސައްކަތެއް ކުރަން،“

ޝަމްލާ ވިދާޅުވީ އަމިއްލަ ދަރިފުޅު ގެއިން ބޭރަށް ގޮސްފައި ސަލާމަތުން އެނބުރި ގެއަށް އާދެވޭނޭ ކަމުގެ އެއްވެސް ކަށަވަރުކަމެއް މިހާރުނެތް ކަމަށެވެ. މަގުމަތީގެ އެކްސިޑެންޓެއްގައި އެތައް ކުދިންނެއް މިދުނިޔެ ދޫކޮށްފިއެވެ. މައިންގެ ލަނގޮޑިތަކަށް ކެތްވަނީއެއް ނޫނެވެ. މިހެންވަނީ ގާނޫނު ރަނގަޅަށް ތަންފީޒު ނުކުރެވިގެންނާއި މަގުތައް ނުބެލެހެއްޓޭތީ ކަމަށް އޭނާ ވިދާޅުވިއެވެ. މިހުރިހާ ކަމެއް ހައްލު ކުރެވޭނީ ސިޓީކައުންސިލަށް ޒިންމާދާރު މެންބަރުން ހޮވައިގެން ކަމަށް އޭނާ ވިދާޅުވިއެވެ.

ގޯތި ގެދޮރުގެ މައްސަލަ!

މަގުމަތީގެ ވާހަކަ މިހިސާބަށް ބާއްވަމާ ހިނގާށެވެ. އޭނާ ވިދާޅުވީ މާލޭ ރައްޔިތުން މިވަނީ މާލޭގެ ބިމުގައި ބިކަވެފައި ކަމަށެވެ. ރަށްރަށުން މާލެއަށް ހިޖުރަ ކޮށްފައިވާ މީހުންގެ އަތުން ތަންތަން ކުއްޔަށް ހިފައިގެން އުޅޭމީހުން މީހާރު މަދެއްނޫނެވެ. ”މާލޭ ރައްޔިތުން މާލޭގައި އުޅެނީ ރެފިޔުޖީންގެ ގޮތުގައި. މާލޭ ރައްޔިތުންނަށް އެއްވެސް ތަފާތެއްނެތި ގޯއްޗާއި ގެދޮރާއި، ފުލެޓު ލިބެންޖެހޭނެ. މިއީ އަސާސީ ހައްގެއް. މިކަންކަން ހައްލު ނުވެގެން މިދަނީ ހައްލުކުރަންޖެހޭ ”ބަޓަނަށް“ ނުފިއްތާތީ. ހައްލު ނުކުރެވޭނޭ ކަންކަން ހުރެގެންނުވާނެ. އަޅުގަނޑު މިނިކުންނަނީ މާލޭގެ ރައްޔިތުންނަށް ބޯހިޔާވަހިކަން ކަށަވަރުކޮށްދިނުމުގެ މަސައްކަތަށް އިރާދަކުރެއްވިއްޔާ،“

މާލެ ސާފުތާހިރު ވާންޖެހޭ!

ޝަމްލާ ވިދާޅުވީ މޮޅެތި ޝިއާރުތައް ނަންފިލާގަނޑެއްގައި ޖަހައިގެން މަޝްހޫރު ކުރިޔަސް މާލެ ސާފުތާހިރު ސިޓީއަކަށް ނުހެދޭނޭ ކަމަށެވެ. އެކަން ކުރެވޭނީ ސައުވީސްގަޑިއިރު މާލޭތެރެ ބެލެހެއްޓޭނޭ ނިޒާމެއް ގާއިމްކޮށްގެން ކަމަށް އޭނާ ވިދާޅުވިއެވެ. ”ސިންގަޕޫރުފަދަ ތަންތަނާ ރާއްޖެއާ އަޅާކިޔަނީ އަނގައިން. އަތަކުން އެއްވެސް ކަމެއްނުކުރެވޭ. މަގުތައް ސާފެއް ނުކުރޭ. ކުނި މެނޭޖެއް ނުކުރެވޭ. ދުވަހުން ދުވަހަށް ވަގުތުން ވަގުތަށް ކުނިނެގެން އެބަވޭ. ކުނިބުނީގެ ސަބަބުން ސިއްހީ މައްސަލަތަކުގެ އިތުރުން އިޖުތިމާއީ އެތައް މައްސަލައެއް އެބަނުކުމޭ. މިފަދަ ކަންކަން ހައްލުކުރަން އަޅުގަނޑު މާލޭސިޓީ ކައުންސިލަށް މިނުކުންނަނީ،“

ކީއްވެ އެމްޑީޕީ؟

ފެށުނީއްސުރެން ޝަމްލާއަކީ އެމްޑީޕީގެ މެންބަރެކެވެ. އެކްޓިވިސްޓެކެވެ. އޭނާ ގަބޫލުކުރާ ހަމަތަކާއި މިންގަނޑުތައް ގެންގުޅެނީ އެޕާޓީންނެވެ. ދެމެހެއްޓެނެވި ތަރައްގީގެ ޕްލޭންތަކެއް ގެންގުޅެނީ އެޕާޓީންނެވެ. އެމްޑީޕީއަކީ ވައުދުވެފައި ވައުދު ފުއްދާ ޕާޓީއެކެވެ. ބަސްބުނުމުގެ މިނިވަންކަން ތަންމިނަށް ހުޅުވާލެވިފައިވާ ޕާޓީއެކެވެ. ރާއްޖެއަށް ޑިމޮކްރަސީ ގެނެސްދިނީ އެމްޑީޕީގެ މެންބަރުންގެ ދަލާއި ލޭ އޮހޮރައިގެންނެވެ. ނޫސްވެރިކަމުގެ މިނިވަންކަމާއި އެއްވެ އުޅުމުގެ މިނިވަންކަމާއި ގަލަމުގެ މިނިވަންކަން ކަށަވަރުކޮށްދިނީ އެމްޑީޕީންނެވެ. އާސަންދަ ތަޢާރަފް ކުރީ އެއެމްޑީޕީންނެވެ. އެކަނިވެރި މައިންނަށް އެލަވަންސް ދޭން ފެށީ އެޕާޓީންނެވެ. ދޮށީއުމުރުގެ މީހުންނަށް ފައިސާދޭން ފެށީ އެމްޑީޕީންނެވެ. އެޕާޓީން އޭނާ ކުރިމަތި ލައްވަނީ މިހެން ވެގެންނެވެ.

އޭނާ ބައިވެރިނުވާ މުޒާހަރާއެއް މިހާތަނަށް އެމްޑީޕީން ބާއްވާފައެއް ނުވެއެވެ. ބައިވެރިނުވާ ޖަލްސާއެއް ބާއްވާފައި ނުވެއެވެ. އޭނާއަކީ ޕާޓީއަށް އިޚްލާސްތެރި ދަރިއެކެވެ. ވަފާތެރި ޚާދިމެކެވެ. ރައްޔިތުންގެ ހައްގުގައި ކުރަންޖެހޭ ކަމެއް ކުރުމަށް ފަހެއް ނުޖެހޭނެއެވެ. އެމްޑީޕީ ކެންޑިޑޭޓެއްގެ ގޮތުގައި އޭނާ ނިކުންނަ ސަބަބު އަދިވެސް ބައިވަރެވެ.

ނުވިކޭނެ، ފަސްނުޖެހޭނެ!

ޝަމްލާގެ ބަސް ވަރުގަދައެވެ. ނަފުސުގެ އިތުބާރު ބޮޑެވެ. ”ރައްޔިތުންގެ ހައްގުގައި ފަހަތަށް ނުޖެހޭނަން. ކެރިގެން ކުރިމަތިލާނަން. ނުއެއް ވިކޭނެ. އަބަދުވެސް އުޅެމުން މިދަނީ އަމިއްލަ މަސައްކަތުން ހޯދާ ހަލާލު ފައިސާއިން. އެހެންވީމާ އެއްވެސް މީހަކަށް، ބަޔަކަށް ނުވިކޭނެ. ރައްޔިތުންނަށްޓަކާ ޚިދުމަތް ކުރަން ބޭނުންވަނީ. އެހެންވީމާ އުންމީދީ ކުރިމަގަކަށްޓަކައި އަޅުގަނޑަށް ވޯޓުދެއްވައި ހެންވޭރު އުތުރު ދާއިރާގެ ގޮނޑި އަޅުގަނޑަށް ކަށަވަރު ކޮށްދެއްވާ،“ މިއީ ޝަމްގެ އިޚްލާސްތެރި އެދުމެކެވެ.

އޭނާ އަކީ ކުރިންވެސް ޚިދުމަތްތެރިއެކެވެ. މިހާރުވެސް ޚިދުމަތުގައެވެ. ދެންވެސް ހުންނާނީ ޚިދުމަތުގައެވެ. އޭނާއަށް ވަނީ ކްރިއޭޓިވްއާޓުސް ދާއިރާއިން އާންމު ޚިދުމަތުގެ ގައުމީ އިނާމު ލިބިފައެވެ. މިފަދަ އެތައް އިނާމެއް ޝަމްވަނީ ހާސިލް ކުރައްވައިފައެވެ. އޭނާގެ ޚިދުމަތުގެ ވާހަކަ މިހިސާބުން ކުރުކޮށްލީއެވެ.
މިގައުމަށާއި މާލޭސިޓީއަށް ބޭނުންވަނީ ޝަމްލާ ފަދަ ކެރޭ ކަނބަލުންނެވެ. ހީވާގި މަސައްކަތްތެރީނެވެ. ފަސްނުޖެހި ބަސްބުނާ ދަރީންނެވެ. ޚިދުމަތަށް ފައްކާވެފައިވާ ލީޑަރުންނެވެ. ރައްޔިތުންގެ އިހުސާސުގައި ރައްޔިތުންނާ ގާތުން މަސައްކަތް ކުރާނޭ ތެދުވެރީންނެވެ. ރައްޔިތުންގެ ވޭނީ އަޑު ލޯތްބާއެކު އަޑުއެހުމުގެ ގާބިލްކަން ހުރިމީހުންނެވެ. އެހެންވީމާ މާލޭސިޓީއަށް ފަހިކަން ދާއިމްވުމަށްޓަކައި އެންމެން ނުކުމެ ޝަމްލާއަށް ވޯޓުދިނުމަކީ އޭނާގެ އެދުމެކެވެ.

ޕްރައިމަރީގެ ވޯޓުލުން އޮންނާނީ ޖަނަވަރީ 16 ވާ ހުކުރު ދުވަހުއެވެ. ޝަމްލާގެ ކެންޑިޑޭޓު ނަންބަރަކީ 2 އެވެ. ވޯޓު ކަރުދާހުގައި ޝަމްލާގެ ނަންނަ އޮތް ގޮޅީގައި ހެޔޮފާހަގަ ޖަހާލީމާ ނިމުނީއެވެ. ދާއިރާގެ ފާގަތި ކަމަށްޓަކައި ބާކީ ބައި ޝަމްލާއާ ހަވާލެވެ.