”އަހަރެން ސާއިދުއަށް އިންތިޒާރު ކުރާނަމެވެ.  މުޅި ޢުމުރަށް ވިޔަސް އެންމެ ރަނގަޅެވެ. މުޅި ޢުމުރު މިގޮތުގައި  ހޭދަކޮށްލަންވެސް އަހަރެން މިހުރީ ތައްޔާރަށެވެ. އަހަރެން އަތުން ސާއިދު ބީވެގެން ދިޔައީ ޚުދު އަހަރެންގެ ސަބަބުންކަންވެސް ޤަބޫލުކުރަމެވެ.  އެ ހިތާމަ މުޅި އުމުރަށްވެސް އަހަރެންގެ ހިތުގައި އޮންނާނެއެވެ.“ ސާރާ އޭނާގެ އަމިއްލަ ނަފްސާއި ވާހަކަދައްކަމުން ގެންދިޔައެވެ. ސާފު ހުދު ދޫލައެއް ފަދައިން ފަތުރާލާފައި އޮތް އޮމާން ގޮނޑުދޮށަށް ބީއްސަމުން ދިޔަ ރާޅުތަކުން ސާރާގެ ގަދަ މުށިކުލައިގެ އަބާޔާގެ ފަސްބައި ތެމެމުން ދިޔައެވެ. އެހެނަސް ފަސްބައި ރައްކާތެރި ކުރުމުގެ މާބޮޑު ޚިޔާލެއް ސާރާގެ ނެތްކަހަލައެވެ. ޖައްވުގައި ވިހުރިލާ މަޑުމަޑު ވައިރޯޅިން އޭނާ އަޅާފައިވާ މަޑު މުށިކުލައިގެ ޝޯލް ވިހުރެމުން ދާއިރުވެސް، އެކަމުގެ ފަރުވާލެއްވެސް ނެތެވެ. އެހެނެއްކަމަކު، ސާރާ ބަލަހައްޓައިގެން އެއިނީ މާސިންގާ ކަނޑާއި ފަޅު ބެދުނު، މާދުރުގައިވާ އުދަރެހާއި ދިމާއަށެވެ. ހީވަނީ ހަމަ ދެންމެދެންމެ އެދިމާއިން އޭނާ ހިތްއެދި ގޮވާ ގޮވުމަށް އިޖާބަ ދީފާނެހެންނެވެ.  ސާރާގެ ހިތުގައި ސާއިދަށްޓަކާ އުފެދުނު ޖަޒުބާތަކީ، ނަފުރަތަކީ ލޯބީގެ ފެށުމޭ ބުނެވޭ ބީދައިން އުފެދިފައިއޮތް ޖަޒުބާތެކޭވެސް ބުނެވިދާނެއެވެ. އާނއެކެވެ. އެދުވަހު ސާއިދު ފުރައިގެން ދިޔައީ ހިތްދަތި އިހުސާސްތަކާއި އެކުގައެވެ. ސާއިދު، ސާރާ ބޭނުންވިއެވެ. އަދި މިހާރުވެސް ބޭނުންވެއެވެ. އެހެނަސް ސާއިދުގެ އާދޭހަށް  އޭރު ސާރާ ދިނީ ބީރު ކަންފަތެކެވެ. ސަބަބު ވަރަށް ސާފެވެ. ސާރާގެ ހަސަބާއި ނަސަބަށް ސާއިދު އަރާ އަރަފޯދިގެން ނުވުމެވެ. ސާރާއަކީ، ރަށުގެ ކަމުވޮށިވެގެންވާ، ފޯރުންތެރި ޢާއިލާއަކަށް ނިސްބަތްވާ ކަނބަލެކެވެ. ތަޢުލީމީ ޒުވާނެކެވެ. ބުރުސޫރަ އެހާމެ ފުރިހަމައެވެ. ގައިގެ ކުލަ އެންމެ ގާތްކުރަނީ މެދުއިރުމަތީގެ ކަނބަލެއްގެ ކުލައާއިއެވެ. ސާއިދުއަކީ ހެޔޮވަރު ވަރެއްގެ އިސްކޮޅެއްހުރި، ގައިގެ ކުލަ މާ އަލިނޫން ނޫކަށި ޒުވާނެކެވެ. އެހެނަސް ހެޔޮވަރުގެ އިސްކޮޅެއް ހުރި، ކޮންމެ ޖިންސުއްލަތީފެއްގެވެސް ހުވަފެނީ ބައިވެރިޔަކަށް އިޚްތިޔާރު ކުރާނެ ޒުވާނެކެވެ. ނިސްބަތްވަނީ އާދައިގެ މެދުފަންތީގެ ޢާއިލާއަކަށެވެ. ތަޢުލީމީ ފެންވަރަށް ބަލާއިރު، ސާރާއާއި އަރާ އަރަފޯދިގެން ނުވެޔޭ ބުނެވިދާނެއެވެ. ހަމައެކަނި މަތީ ޘާނަވީ ތަޢުލީމު ފުރިހަމަ ކޮށްފާ ހުރިކަމެވެ. ވަޒީފާއަށް ބެލިޔަސް ރިސޯޓެއްގެ ރިސެޕްޝަނިސްޓެއްގެ މަގާމެވެ. ސާރާއަކީ އެރަށުގެ ކައުންސިލް އިދާރާގެ ޑިރެކްޓަރެއްގެ މަގާމުގައި ހުރި ކަނބަލެކެވެ. ހިޔުމަން ރިސޯސްގެ ރޮނގުން އެއްވަނަ ދަރަޖައިގާ ފުރަތަމަ ޑިގްރީ ޙާޞިލުކޮށްފައިވާ، ހިންގުންތެރި ލީޑަރެކެވެ.  އެހެނަސް އަމިއްލަ ޢާއިލާއާއި ، ހިތް ރުހޭ ރައްޓެހި ރަޙުމަތްތެރިން ފިޔަވާ އިތުރު މީހަކު ސާރާއަށް ނުފެންނަ ކަހަލައެވެ. އެހެނީ މަގުމަތިން ހިނގާލާފައި ދާއިރުވެސް މީހަކާއި ދިމާއަށް އިސްއުފުލާ ބަލައިލުމަކީ، ސާރާ ކުރަން ބޭނުންވާ ކަމެއް ނޫނެވެ.  ގިނަ ޒުވާނުންގެ ހިތުގެ ވިންދު ސާރާއަށްޓަކާ އަވަސް ވެފައި ހުއްޓެއްކަމަކު، އެކަމަށްއެދި އިސްނަގާނެ ހިތްވަރު ހުރި ޒުވާނަކު ނޫޅެއެވެ. ސާއިދު ފިޔަވައެވެ. އެހެނަސް ސާރާގެ ހިތެއް އޭރަކު ސާއިދަކަށް ނުރުހުނެވެ. ހަމަ އެންމެ މައްސަލައެކެވެ. ޙަޔާތުގެ ބައިވެރިއެއްގެ ގޮތުގައި ސާރާ ބޭނުންވަނީ، ގިންތިއާއި ފަންތީގެ ގޮތުން މަތީ ބޭފުޅެކެވެ. މުދަލާއި ފައިސާ ހުރުމަކީ ޝަރުތެކެވެ. ތިމާގެ ހައިބަތަށްވުރެ އެންމެ ތަންފުކެއްވެސް ދަށްވެގެން ނުވާނެއެވެ. ތަޢުލީމީ ފެންވަރު ހަމަހަމަ ވާން ޖެހެއެވެ. ނުވަތަ އެއަށްވުރެ މަތިވުން މުހިންމެވެ. ސާރާ ޤަބޫލުކުރާ ގޮތުގައި އެހުރިހާ ކަމެއް ފުރިހަމަ ވެފައި ހުރެއްޖެނަމަ އެމީހަކީ ރަނގަޅު އަޚްލާގެއްގެ ވެރިޔަކަށްވެސް ވާނެއެވެ. ޙަޔާތުގެ ބައިވެރިޔާއާއިއެކު، ސީދާސާދާ ދިރިއުޅުމެއް ބިނާކުރެވޭނެއެވެ. އެހެން ނޫންނަމަ މުޅި ދިރިއުޅުން ބަރުބާދު ވާނެއެވެ. ސާރާއަށް ވިސްނިފައި ނެތް އެއްޗަކީ، އެއްވެސް އިންސާނަކީ ހުރިހާ ގޮތަކުން ފުރިހަމަ މީހަކަށް ނުވާނެކަމެވެ. ދަރަޖައާއި ފެންވަރުވެސް ތަފާތުވާނެކަމެވެ. އިންސާނާގެ ކިބައިގާ ހުންނަ އުނި ސިފަތައް ދެނެގަނެ، އެއާއިއެކު ދިރިއުޅެން ދަސްކުރުމަކީ ހުނަރެއް ކަން ސާރާއަށް ނޭންގޭ ކަހަލައެވެ. ސާއިދުގެ ހުށައެޅުމަށް ސާރާ ނޫނެކޭ ބުނީ އެހުރިހާ ސަބަބުތަކަށް ޓަކައެވެ. އެހެނަސް ސާއިދަކީ ކަންކަމުގައި ގޮތް ނިންމުމަށް ބުއްދި އިސްކުރާ ޒުވާނެކެވެ. އެހާ ފަސޭހައިން ބަލި ޤަބޫލުކުރާ އިންސާނެއްވެސް ނުމެ ނޫންމެއެވެ. ވީއިރު އެހާ އަވަހަށް ހަތިޔާރު ބަހައްޓާކަށްވެސް ސާއިދު ނުވިސްނާނެތާއެވެ.  އެގޮތުގެ މަތިން، އޭނާ ސާރާއަށްޓަކާ ކޮންމެފަދަ ޤުރުބާނީއެއްވެސް ވެދާނެޔޭ ބުނެވިދާނެއެވެ.

ސާއިދުއަކީ ޢަޒުމު ވަރުގަދަ ޒުވާނެކެވެ. ކުރަން ކުރިމަތިލީ ކޮންމެ ކަމެއްވެސް ކާމިޔާބު ކުރުމުގެ ހިތްވަރު ހުރި ފަހުލަވާނެކެވެ. އެ ހިތްވަރާއި ޢަޒުމާއެކު، ސާރާ އޭނައަށް ޙާޞިލު ކުރެވޭނެ ކަމުގެ ފުރިހަމަ ޔަޤީންކަން އަބަދުވެސް އޮވެއެވެ. އަމިއްލަ އުފަން ފަސްގަނޑާއި ލޯބިވާ ޢާއިލާއާއި ގާތް އެކުވެރިން ދޫކޮށްފައި އެދުވަހު ސާއިދު ފުރައިގެން ދިޔައީވެސް ހަމަ ސާރާގެ ޙައްޤުގައެވެ. ސާރާ، ސާއިދުގެ ކުރިމަތީގައި ހުށައެޅި ޝަރުތެއްގެ ސަބަބުންނެވެ. ސާރާގެ ގޮންޖެހުމަށް ޢިޖާބަ ދީގެންނެވެ.  ދުނިޔޭގައި ހުރިއްޔާ ކޮންމެވެސް ދުވަހަކުން ސާރާ ޙާޞިލު ކުރެވޭނެ ކަމުގެ ފޮނި އުންމީދުގައިވެސް މެއެވެ. އާނއެކެވެ. ސާއިދުއަށް މުދާވެރިޔަކަށް ވެވިދާނެއެވެ. މުޖުތަމަޢުގައި އޭނާގެ ޤަދަރުވެސް ރަމްޒީގޮތުން އުފުލިދާނެއެވެ. އެހެންނަމަވެސް ސާރާ ބޭނުންވާ ފަދަ ނަސަބަކަށް ނިސްބަތެއް ނުވެވޭނެތާއެވެ. އެހެނަސް ސާއިދު އުންމީދު ކަނޑާލަން ބޭނުންނުވާ އެއްކަމެއް އޮވެއެވެ. އެއީ، ކޮންމެވެސް ދުވަހަކުން ސާރާ، އޭނާގެ ލޯތްބަށް އިޙުތިރާމު ކުރާނެކަމެވެ. ސާއިދުގެ ޙަޔާތުގެ ޞަފްޙާތައް ސާރާގެ ލޯބިން ފުރާލަދޭނެކަމެވެ. ސާއިދު ފުރައިގެން އެދިޔައީވެސް އެ އުންމީދުގައެވެ.

ސާއިދުގެ ހިތުގައި ސާރާއަށްޓަކާ ވިންދުޖަހަންފެށީ، އޭނާގެ ވަރަށް ޅަ އުމުރުގައެވެ. މެދު މަދުރަސީ ދަޢުރުގައި އެކުގައި ކިޔަވަން އުޅުނު ދުވަސްވަރުގައެވެ. އޭރު އެވަނީ ކީއްކަމެއް ޚުދު ސާއިދަކަށްވެސް ބުނެދޭކަށް ނޭންގުނެވެ. އެހެންނަމަވެސް ކޮންމެ ކަމަކާ ކުރިމަތިލީ ކަމުގައިވިޔަސް އެކަމާ ސާރާ ވިސްނާނީ ކިހިނަކުންތޯ އަމިއްލަ ހިތާވެސް ސުވާލު ކުރެވެއެވެ. ކްލާހުގައި އެއްޗެއް ހުށައަޅާލަން ޖެހުނު ކަމުގައިވިޔަސް މެއެވެ. ޓީޗަރަކު ކުރައްވާ ސުވާލަކަށް ޖަވާބު ދޭންވިޔަސް، ސާއިދަށް އެންމެ ފުރަތަމަވެސް ވައްކަޅިން ބަލައިލެވެނީ ސާރާއާއި ދިމާއަށެވެ. ސާރާ ބަލިވެގެން ސްކޫލަށް ޙާޒިރު ނުވެވޭ ދުވަހެއްނަމަ، ސާއިދުގެ ހިތުގައި އުފެދެނީ ބުނެދޭން ނޭންގޭ ކަހަލަ ނުތަނަވަސް ކަމެކެވެ. ފިލާވަޅުތަކަށް ސަމާލުކަން ދިނުން ކުޑަވެއެވެ. ކުއްޖަކާ އަނގައިން ބުނާހިތެއް ނުވެއެވެ. އެންމެފަހުން އެކަން އޭނާގެ ގާތް ރައްޓެހިންވެސް ފާހަގަ ކުރަން ފެށީއެވެ. ދެން އެޖެހުނީ ކަންތަކާއެވެ. ސާރާއާއި ލައިދީ ކިޔަން ފެށީއެވެ. ލައިދީ ކިޔުމަކީ އިސްތިރިއެކޭ ބުނެ އުޅޭނޫންހެއްޔެވެ. އެގޮތުން ސާއިދުގެ ހިތުގައިވެސް ސާރާއަށްޓަކާ ޖަޒުބާތެއް އުފެދުނީއެވެ. އެއީ ލޯބިކަން ސާއިދުއަށް އިހުސާސް ކުރެވުނީ އެހިސާބުންނެވެ. އެހެންނަމަވެސް  ސާރާ، ސާއިދުދެކެ އަންނަނީ އަމަށަކު ރުޅިއެއް ނޫނެވެ. އޭނާގެ އެކުވެރިންނަށްވެސް އަންގާފައި އޮންނަނީ ސާއިދު ފެންނަ ހިސާބަށްވެސް ނުދިޔުމަށެވެ. އެގޮތުގެ މަތިން ސާރާވެސް ބަލަނީ، ސާއިދުއާއި އެއްޖަމާޢަތެއްގައި ޝާމިލުނުވެ ވޭތޯއެވެ. އެހެނަސް ތަޤުދީރުގެ މައްޗަށް ތަދުބީރަށް ބާރު ފޯރުވުނީ ކޮން އިރަކު ހެއްޔެވެ؟ ސްކޫލްއިން ރާވާ  ކަންކަމުގައި ގިނަފަހަރަށް  ދެކުދިންނަށް ތިބެންޖެހެނީ އެއް ގްރޫޕެއްގައެވެ. ގިނަފަހަރަށް ގްރޫޕްގެ ލީޑަރަކަށްވެސް ނަގަނީ ސާއިދުއެވެ. ތަޢުލީމީ ގޮތުން ސާރާއާއި އެއްހަމަ ނުކުރެވުނެއްކަމަކު، ސާއިދަކީ ކުޅިވަރާއި އެހެނިހެން އިތުރު ޙަރަކާތްތަކުގައި ތޫނުފިލި ވިސްނުމެއް ގެންގުޅޭ ކުޅަދާނަ ލީޑަރެކެވެ.

ދުވަހަކީ ދެކުދިންގެ ތަޢުލީމީ ޙަޔާތުގެ މަތީ ޘާނަވީ ނިމެން އޮތް ދުވަހެވެ. އެންމެ ޅަދުވަހުން ފެށިގެންވެސް ސާއިދުގެ ހިތުގައި އުފެދިފައިވާ އިހުސާސްތައް ސާރާއާއި ހިއްސާކުރަން ސާއިދު ޢަޒުމު ކަނޑައެޅިއެވެ. ހިތުގައި އުފެދިފައިވާ ޖަޒުބާތަށް ޙަޤީޤީ ސިފަ ގެންނަން އެދުވަހަށްވުރެ ވަކި މުނާސަބު ދުވަހެއް ނެތްކަމަށް ސާއިދުގެ ހިތް ބުނަމުން ގެންދިޔައެވެ. ކްލާސްރޫމްތެރޭގައި އަޑުފަށްގަނޑު ގަދަވެފައިވީ ވަޤުތެކެވެ. މަދުރަސީ ދައުރުގެ އެންމެފަހު ދުވަހަށް ވީތީ އެދުވަހުގެ ހަނދާންތައް ރައްކާކުރުމަށް ކޮންމެ ކުއްޖަކުވެސް މަސައްކަތް ކުރަމުން ގެންދިޔައެވެ. ފޮޓޯ ނެގުމާއި ޔުނިފޯމުގައި ސޮއިކުރުން ފަދަ ތަފާތު ކަންކަމުގެ ތެރެއިންނެވެ. ސާއިދުގެ ޔުނިފޯމުވެސް އޮތީ އެކި ކުލަކުލައިގެ މާކަރުގެ ދެލިން ފުރިފައެވެ. އޭގެތެރެއަށް ސާރާގެ އަތުންވެސް ކުރަހާލުމަށް ސާއިދު ބޭނުންވިއެވެ. ސާރާ ހުރީ އޭނާގެ ރައްޓެހިންގެ ގްރޫޕުގެ ތެރޭގައެވެ. ސާއިދު ހިތްވަރުކޮށްލާފައި ސާރާގެ ކައިރިއަށް ގޮސް ހުއްޓުނެވެ. ވަރަށް މަޑުމައިތިރި އަޑަކުން މީހަކު ގޮވާލިއަޑަށް ސާރާ އެނބުރި ބަލައިލިއެވެ. ކުރިމަތީގައި ހުރީ ސާއިދެވެ. ލޯބިވެތި ހިނިތުންވުމަކާއި އެކުގައެވެ. އަތުގައި އޮތީ ރަތްކުލައިގެ މާކަރެކެވެ. ވަރަށް ހިތްހެޔޮ ކަމާއިއެކީ އެ މާކަރު ސާރާގެ އަތަށް ދިއްކޮށްލިއެވެ. ”އޮޓޯގްރާފެއް ދީފާނަންތަ؟“ ވަރަށް ޖެހިލުންވެ ހުރެ ސާއިދު ބުނެލިއެވެ. އެވަޤުތު ސާރާގެ ކަޅި މަޑުމަޑުން ތިރިކޮށްލީ، މާކަރާއި ދިމާއަށެވެ. ދުލުން އެއްވެސް ބަހެއް ނުބުނެ އިރުކޮޅެއް ވަންދެން މާކަރާއި ދިމާއަށް ބަލަހައްޓައިގެން ސާރާ ހުރީއެވެ. އެއަށްފަހު ފުއްޕާހަމެއް ފަޅައިގެން ދިޔަހެން ހިނިގަނޑު ފަޅައިގެންގޮސް ބާރަށް ހޭންފެށިއެވެ. އޭނާގެ އެކުވެރިންވެސް އެކަމުގައި ބައިވެރި ވިއެވެ. ސާއިދުހުރީ ވާނުވާ ނޭންގިފައެވެ. އެހާ ބާރަށް ހޭންޖެހުނު ސަބަބެއް ނޭންގިފައެވެ. ”ސާއިދު ތި އައީ އަހަރެން ލައްވާ ސާއިދުގެ ޔުނީފޯމުގަ ސޮއެ ކުރުވަން؟ އަހަރެން އެކަން ކުރާނެކަމަށް؟ ހާދަ ޔަޤީންކަމެއްވެސް އެބައޮތޭ ދޯ!“ ބޮޑާވެރި ގޮތަކަށް ސާރާ ވާހަކަ ދެއްކިއެވެ. އަޑުގައި ހުރީ މަލާމާތުގެ ރާގެވެ. ސާއިދު ކޮންމެވެސް ވަރަކަށް ރަކިވާގޮތް ވިއެވެ. އެހެންނަމަވެސް ސާރާގެ އެސުވާލުތަކަށް ޖަވާބުދާރީވާން ސާއިދު ގަސްތުކުރިއެވެ. އަދި ހަމަޖެހިލާފައި ސާއިދު ވާހަކަދައްކަން ފެށިއެވެ. ”ކިހިނެއްވީ؟ ހުރިހާ ކުދިންވެސް އެކަކު އަނެކަކަށް އެކި ގޮތްގޮތުން ވަދާޢީ ސަލާމް ކުރަމުން ދޯ އެދަނީ. އަހަރެންވެސް މިއައީ ސާރާގެ ފަރާތުން އެކަމަށް އެދިގެން.“ ”އޯ، ވަދާޢީ ސަލާމް ދޯ. ތީ އެއްވެސް ކަމެއް ނޫނެއްނު. ސާއިދު ކައިރިން ސަލާމަތްވެވެން އޮތް ކޮންމެކަމެއް އަހަރެންވެސް ކުރަން ބޭނުން. އަވަހަށް ގެނޭ ތި މާކަރު.“ ސާރާ ބުނި އެއްޗަކަށް ސަމާލުކަންދޭން ސާއިދު ބޭނުންނުވި ކަހަލައެވެ. އެހެނީ އޭނާ ބޭނުންވީ ސާރާ ދިއްކޮށްލި އަތަށް މާކަރު ލާށެވެ. ސާރާގެ މަޤްޞަދު ބަލަންވެސް ބޭނުންނުވި ކަހަލައެވެ. ކޮންމެ ސިފައެއްގައި ނަމަވެސް ސާރާގެ ހަނދާނެއް އޭނާގެ ޔުނިފޯމުގައި ފެންނަން ހުންނާނެތާއެވެ. ސާރާ ލިޔަން ތައްޔާރުވެލުމުން، ސާއިދު އެނބުރިލާފާ އޭނާގެ ބުރަކަށި ދައްކާލިއެވެ. ”ހާދަ އަވަހަކަށޭ ތި ފުރަގަސްދިނީ. ތީތަ ސާއިދު ބޭނުންވާ ގޮތަކީ؟“ މަލާމާތުގެ ފާޑަކަށް ސާރާ ބުނެލިއެވެ. ސާރާގެ އެބަސްތަކުން ސާއިދުއަށް ފުން އަސަރެއް ކުރުވިކަހަލައެވެ. އެހެނީ ސާއިދުއަށް ބޭއިޚްތިޔާރުގައި ސާރާއާއި ދިމާއަށް އެނބުރިލެވުނެވެ. އަދި ވަޤުތުން އޭނާގެ މޭ ސާރާއާއި ދިމާއަށް ދިއްކޮށްލިއެވެ. ”އަހަރެން ސާރާއަށް ފުރަގަސްދޭނެ ގޮތެއް އެއީ ނެތްގޮތެއް. ތިހާ ބޭނުންވަންޏާ އަވަހަށް އަހަރެންގެ މޭމަތީގަ ލިޔެލާ. ކޮންމެ އެއްޗެކޭ ލިޔުނަސް އެންމެރަނގަޅު.“ ވަރުގަދަ ޢަޒުމަކާއިއެކީ ސާއިދު ބުނެލިއެވެ. ޒާތަކަށް އެއްމިޔަކަނުން ހީނލާފާ ސާރާ، ސާއިދުގެ މޭމަތީގައި ކޮންމެވެސް އެއްޗެކޭ ލިޔެލައިފިއެވެ. އެވަޤުތު ސާރާ ކައިރީގާ ތިބި އޭނާގެ ރައްޓެހިން ބާރަށް ހޭންފެށިއެވެ. ސާރާ ދިއްކޮށްލި މާކަރުގައި ހިފަމުން ސާއިދު އޭނާގެ މެޔާއި ދިމާއަށް ބަލައިލިއެވެ. ސާރާ ލިޔެލީ ވަރަށްވެސް ކުޑަކުޑަ ލަފުޒެކެވެ. އެހެނަސް އެއިން ވަރަށް ގިނަ ވާހަކަތައް ބުނެދޭކަން ދޭހަވެއެވެ. ސާރާ، ސާއިދުގެ މޭމަތީގައި ތާނަ އަކުރުން ލިޔެލީ، ”ސުމެއް“ މިހެންނެވެ. އެ ލަފުޒަށް ބަލައިލުމާއިއެކު، ސާއިދު ހިނިތުން ވެލާފައި ސާރާއަށް ޝުކުރުއަދާކުރިއެވެ. އެއަށްފަހު އިތުރު އެއްވެސް އެއްޗެއް ނުބުނެ، އެތަނުން ދިޔައީއެވެ. އޭނާގެ ރަޙުމަތްތެރިންނަށް އެމަންޒަރު ފެނިފައި އެކަމާ ފާޑުކިޔަން ފެށިއެވެ. އަމިއްލަ އަގު ވައްޓާލަން ދިޔައީތީއެވެ. އެހެނަސް އެއިން އެއްވެސް ވާހަކައަކުން ސާއިދުއަށް މާބޮޑު އަސަރެއް ނުކުރިއެވެ. އެއާއި ޚިލާފަށް ސާއިދުގެ ހިތުގައި ކަނޑައެޅީ ވަރުގަދަ ޢަޒުމެކެވެ. ސާރާ ޙާޞިލުކުރުމަށްޓަކައެވެ. އެކަމަށްޓަކާ އޭނާއަށް ކުރެވެން އޮތް މަސައްކަތެއް ކުރުމަށް ނިންމިއެވެ. އެދުވަހު ސާއިދު ސްކޫލްއިން ނިކުމެގެން ދިޔައީ، އޭނާއަކީ ސުމެއްގެ މީހެއް ނޫންކަން ސާރާއަށް ސާބިތުކޮށްދޭނެ ކަމުގެ ވަރުގަދަ ޢަޒުމުގައެވެ. އަދި އެދުވަހުން ފެށިގެން އޭނާ އެކަމަށް މަސައްކަތްވެސް ކުރަން ފެށިއެވެ. އެގޮތުން އޭނާއެޅި ފުރަތަމަ ފިޔަވަޅަކީ، ވަޒީފާއެއް ހޯދުމެވެ. އޭނާއަކީ ސުމެއްގެ މީހެއް ނޫންކަން އަންގައިދިނުމަށްޓަކާ ސުމަކުން ފަށަން ޖެހުނަސް އެކަންވެސް ކުރާނެކަން އޭނާގެ ގާތް މީހުންގެ ގާތުގައި ބުނަމުންވެސް ގެންދިޔައެވެ. އަދި ސާއިދު ކަންތައް ކުރީވެސް އެހެންނެވެ. އެހެންނަމަވެސް ސާއިދުއަށް ކުރެވުނީ ކުށްހީއެކެވެ. އެހެނީ ކަންވީ އޭނާ ހީކުރިގޮތާ މުޅިން ޚިލާފަށެވެ.

ސާއިދު ވިސްނައިގެން ހުރީ، ވަޒީފާއަކަށް ދިޔުމަކީ، ސާރާ ޙާޞިލުކުރުމަށް ކޮށިގެންދާނެ ފަސޭހަ މަގެއް ކަމަށެވެ. އެހެންނަމަވެސް ހިތް އަރާ އާސްމާންގައި އޮންނަ ސާރާއަކަށް އެއީ މާ ކަމުދާ ކަމަކަށް ނުވިއެވެ. ސާރާގެ ނަޒަރުގައި ޓައީ އަޅައިގެން އޮފީހެއްގެ ބޮޑު ގަނޑީގައި ނީންނަ މީހަކީ، އެއްވެސް އަގެއްހުރި މީހެއް ނޫނެވެ. އެމީހަކަށް ޤަދަރުކުރާނެ މީހަކުވެސް ނުހުންނާނެއެވެ. ސާރާގެ ނުރުހުމުގެ ބަސްތަކުން ސާއިދުއަށް ފުން އަސަރުތަކެއް ކުރުވި ކަމުގައި ވީނަމަވެސް، އޭނާ ހިތްވަރު ދެރައެއް ނުކުރެއެވެ. އުންމީދެއްވެސް ކަނޑައެއް ނުލައެވެ. ސާއިދު ބުނަމުން އައީ ހިތްވަރާއިއެކު މަސައްކަތްކުރާ ކޮންމެ އަޅަކަށްވެސް ﷲ ކޮންމެވެސް މަގެއް ދައްކަވާނެ ކަމަށެވެ. އެ ޢަޒުމުގައި ހުރެ ހިތްވަރު ކޮށްލާފައި ސާއިދު  ބޭނުންވާގޮތް ސާރާއަށް އެންގުމަށް، ގާތް ރަޙުމަތްތެރިއެއްގެ އެހީގައި އޭނާއާއި ހަމައަށް ފޯރުކުރުވިއެވެ. އެހެނަސް ފެށުމެއްގެ ގޮތުން ހަމައެކަނި ރަހުމަތްތެރިކަމުގެ ގުޅުމެއް ގާއިމްކުރުމުގެ ނިޔަތުގައެވެ. އޭނާގެ ހިތުގެ އިހުސާސްތައް ސާރާގެ ކުރިމަތީގައި ހުށައެޅުމަށް ކޮށާނެ މަގެއް ފަހިކުރިމުގެ ބޭނުމުގައިވެސް މެއެވެ. އެހެނަސް އެކަމުންވެސް ސާރާގެ ފަރާތުން ސާއިދުއަށް ރައްދުވީ މާލާމާތެވެ. ޚުދު ސާއިދުއަށް ކުރިމަތިލާން ނުކެރުނީ އެއީ ފިނޑިއަކަށް ވީތީ ކަމަށް ސާރާ ބުންޏެވެ. ސާރާގެ އެފަދަ ބަސްތަކަށްވެސް ސާއިދު ރައްދު ދިނީ ހިނިތުންވުމަކާއިއެކުގައެވެ. އެއްވެސް ނުރުހުމެއް ނެތިއެވެ. ސާރާގެ ފަރާތުން އަންނަ ކޮންމެ ގޮންޖެހުމެއްވެސް ސާއިދު ބަލައިގަންނަމުން ދިޔައީ ހިނިތުންވުމާއި އެކީގައެވެ.

އޭގެ ދުވަސްކޮޅެއް ފަހެވެ. ސާރާގެ ޢާއިލާ މެންބަރެއްގެ ކައިވެނި ޙަފްލާއަކަށް ދަޢުވަތު ލިބިގެން ސާއިދުއާއި އޭނާގެ ބައެއް ރައްޓެހިންވެސް ދިޔައެވެ. ދަޢުވަތު ދިނީ ކައިވެނިކުރި ފިރިހެން މީހާއެވެ. އެއީ ސާއިދުގެ އެންމެ ގާތް އެއް އެކުވެރިޔާއެވެ. ސާއިދު އެރޭ އެ ހަފްލާއަށް ދިޔައީ، ސާރާގެ ދުލުން އާނބަސް ބުނާނެ ކަމުގެ ފުރިހަމަ އުންމީދުގައެވެ. އެހެނީ ކައިވެނި ކުރި އަންހެން ކުއްޖާވެސް ސާއިދުފަދަ މީހަކާ ކައިވެނި ކުރުމަކީ ސާރާގެ ޢާއިލާގެ މެންބަރަކު ކޮށްފާނެ ކަމެއް ކަމަށްވާނަމަ، އެކަން އެގޮތަށް ސާރާ ނުކުރަންވީ ސަބަބެއް ނެތްތާއެވެ. އެއް ޢާއިލާއަކަށް ނިސްބަތްވާނަމަ ހަސަބާއި ނަސަބުވެސް ވާނީ އެއްވަރުތާއެވެ. ކައިވެނިކުރި ފިރިހެން މިހާއަކީވެސް ވަކި މާ މޮޅު ޢާއިލާއަކުން އައިސްހުރި މާ ފުރިހަމަ ތަޢުލީމެއް ލިބިފައިވާ މީހެއް ނޫނިއްޔާއެވެ. ވީއިރު ސާއިދުއަށް އެކަން ނުވާންވީ ސަބަބެއް ނެތްތާއެވެ. އެ ކައިވެންޏާއި ގުޅިގެން، ސާރާގެ ވިސްނުމަށްވެސް ކުޑަނަމަވެސް ބަދަލެއް އައިސްފާ ހުރެދާނެކަމަށް ސާއިދު އުންމީދުވެސް ކުރީތީއެވެ. ސާއިދު ހުރީ ޖޫސްތައްޓެއް ހިފަހައްޓާލައިގެން އޭނާގެ އެކުވެރިން ގާތުގައި ވާހަކަ ދައްކާށެވެ. ކުއްލިޔަކަށް އޭނާގެ ނަޒަރު ގޮސް ހުއްޓުނީ، ސާރާއާއި ދިމާއަށެވެ. ލައިގެން ހުރި މަޑު ނޫކުލައިގެ އަބާޔާގެ ވިދުމުން ސާރާގެ ކުލައަލި މޫނު އިތުރަށް އުޖާލާކަމަށް ދައްކައެވެ. ހަފްލާގެ މާހައުލު ޖަރީކޮށްފައިވާ ވިދާ ބޮކިތަކުންވެސް އެ އުޖާލާކަން ފަނޑުކޮށްލެވޭ ވަރެއް ނުވެއެވެ.  އެހާވެސް ފުރިހަމައެވެ. ސާރާވެސް ހުރީ އޭނާގެ ބައެއް ރައްޓެހިން ކައިރީގައި ހީނސަމާސާ ކުރާށެވެ. ކުއްލިޔަކަށް ސާރާގެ ނަޒަރުވެސް ގޮސް ހުއްޓުނީ ސާއިދުއާއި ދިމާއަށެވެ. އިތުރު އެއްވެސް ސަބަބެއް އޮވެގެންނެއް ނޫނެވެ. ސާއިދުގެ ކަޅި ސާރާއަށް ނޫން އެހެން ދިމާއަކަށް ނުދާތީއެވެ. އެކަމާއި ހުރެ، ވެފައިހުރި ފޫއްސެއްގެ ބޮޑުކަމުންނެވެ. ސާރާ ކައިރިޔަށް އައީ އަމަށަކު ރުޅުއެއް ނޫނެވެ. އަތުގައި ހުރި ޖޫސްތަށި މަޑުމަޑުން ކައިރީގައި ހުރި މޭޒުމަތީގައި ބެހައްޓާލިއެވެ. އެއަށްފަހު ބާރު ހިނގުމެއްގައި، ސާއިދުއާއި ދިމާއަށް ހިނގައިގަތެވެ. ސާރާ އަންނަތަން ފެނުމުން، ސާއިދުގެ ހިތް އުފަލުން ފޮޅުނުކަހަލައެވެ. އެހެނީ ސާރާގެ މިސްރާބުހުރީ ހަމަ ޔަޤީނުންވެސް އެދިމާއަށްކަން ސާއިދުއަށް އެނގުނެވެ. ސާއިދު ވަރަށް ރަނގަޅަށް ހަމަޖެހިލާފައި ލިބެން އޮތް ފުރުޞަތުގެ ބޭނުން ކުރަން ތައްޔާރުވެލިއެވެ. އޭނާގެ އިންތިޒާރު ނިމުމަކާ ގާތަށް އައީކަމަށްވެސް ސާއިދުއަށް ހީވާން ފެށިއެވެ. އެހެންނަމަވެސް ސާރާ އެހިސާބަށް އަރާ ހަމަވުމުން، ސާއިދުގެ ހުރިހާ އުންމީދުތަކެއް ފުނޑުފުނޑުވިހެން ހީވިއެވެ. އެހެނީ ސާރާ އައިގޮތަށް އައިސް ސާއިދުއާއި ދިމާއަށް އިނގިލި ދިއްކޮށްލާފައި ތުހުމަތު ކުރަންފެށީއެވެ. ”ކަލެޔާހެދި އަހަރެންނަކަށް ތަނަކު ހަމަޖެހިލައިގެން ހުރެވޭކަށްވެސް ނެތެއްނު. ބަލަ މަ މީ މަޢުރަޒެއްގަ ބަހައްޓާފަހުރި ރީތި މަންޒަރެއް ނޫނޭ. ކަޅި ޖަހާނުލާ މަށާދިމާލަށް ތިބަލަނީ.“ ސާރާ ކިޔާނެ އެއްޗެއް ކިޔަންދެން އޭނާ ދެއްކި ހުރިހާ ވާހަކައެއް އަޑުއަހަން ސާއިދު ހުރީއެވެ. ކިޔަމަންތެރި ދަރިވަރެއް ފަދައިންނެވެ. އެވަޤުތު ސާރާގެ ބައެއް ރައްޓެހިންވެސް އެތަނަށް ޖަމާވެއްޖެއެވެ. އެމީހުންގެ ކަމަކަށްވީ ސާރާ ކިޔަމުންދިޔަ އެއްޗިއްސަށް އާންހޫން ކިޔަމުން ދިޔުމެވެ. ވީގޮތެއް ބަލައިލަން އެތަނުން އެކަކުވެސް ބޭނުންނުވި ކަހަލައެވެ. އެހެނީ އެމީހުންގެ ނަޒަރުގައި ސާރާއަކީ ރަނިކަމަނާއެކެވެ. އޭނާ ބުނާ ކޮންމެ ބަހަކީ ތެދެވެ. އެހެންނަމަވެސް ސާއިދު ދިފާޢުކުރާނެ މީހުންވެސް މަދެއް ނޫނެވެ. އޭނާގެ ރައްޓެހިން ތައްޔާރުވެލީ ސާއިދުއާއި އެއްކޮޅަށް ނިކުމެ ސާރާގެ ކޮންމެ ބަހަކީ ދޮގެއްކަން ސާބިތުކޮށްދޭށެވެ. އެވަޤުތު މުޅި މާހައުލުގައި އަޑުފައްގަނޑު ގަދަވެގެން ދިޔައެވެ. ވަލީމާއަށް ޙާޒިރުވެތިބި އެންމެން ކަހަލަ ގޮތަކަށް އެތަނަށް ޖަމާވެއްޖެއެވެ. އެހެންނަމަވެސް ސާއިދުގެ ދުލުން ސާރާއަށްޓަކާ އެއްވެސް ކަހަލަ ނޭދެވޭ ބަހެއް ނުނިކުމެއެވެ. ސާރާ ބަދުނާމުވާނެ ގޮތަކަށް އެއްވެސްކަމެއް ކުރާކަށް ސާއިދުގެ ހިތެއް ނުރުހެއެވެ. އޭނާގެ ރައްޓެހިންވެސް ހައިރާންވާ ކަމަކީ އެއީއެވެ. ސާރާ އެހާވަރަށް ސާއިދުއަށް ފުރައްސާރަ ކުރާއިރުވެސް  ސާރާ ދިފާޢު ކުރަމުން ދާތީއެވެ. ”ސާއިދު މިއަދު އަނގަމަޑުން ލައިގެން ނުހުންނާތި. މިތާ ސާއިދުގެ މައްސަލައެއް ނެތްކަމަށް ބުނޭ.“ ސާއިދުގެ އެކުވެރި ހާޝިމް ބުނެލިއެވެ. އެހެންނަމަވެސް މިކަހަލަ މުނާސަބު މާހައުލެއްގެ ހަމަޖެހުމާއި އުފާވެރިކަން ނަގާލާކަށް ސާއިދު ބޭނުމެއް ނުވިއެވެ. އެތަނަށް ޖަމާވި އެންމެން ސުވާލުކުރަމުން ދިޔައިރުވެސް މެއެވެ. ސާއިދުއަށް ކުރެވުނުހާވެސް ކަމަކީ، އޯގާތެރި ހިނިތުންވުމަކާއިއެކު، ސާރާއާއި ދިމާއަށް ބަލަހައްޓައިގެން ހުރުމެވެ. ކުޑައިރުކޮޅަކު އެހެން ހުރުމަށްފަހު އެތަނުގައި ހިނގަމުންދިޔަ ހާޖާނުގަނޑު ނިމުމަކަށް ގެންނަން ގަސްތުކުރިއެވެ. އެހެނީ އެފަދަ މާހައުލެއްގެ އުފާވެރިކަމަށް ބަނަކަމެއް އަންނާނެފަދަ ކަމެއް ކުރަން ސާއިދު ބޭނުން ނުވީތީއެވެ. ”ހުރިހާވެސް މައްސަލަޔަކީ އަހަރެން. އަހަރެން ސާރާގެ ކިބައިން މަޢާފަށް އެދެން.“ ސާރާ ހިތްހަމަ ޖެހުމުގެ ނޭވާއެއްލިއެވެ. އެހެނީ އޭނާ ދެކޭ ގޮތުގައި މިފަހަރުވެސް ކާމިޔާބުވީ އެނާއަށެވެ. އެކަހަލަ ކޮންމެ ދަނޑިވަޅެއްގައިވެސް ސާރާ ބޭނުންވަނީ ސާއިދުގެ ކުޑަކަކޫ ޖައްސުވާށެވެ. ކަންވަނީވެސް އެހެންނެވެ. އެހެންނަމަވެސް  އެކަން އެގޮތަށް ސާރާއަށް ކާމިޔާބުވަނީ، ސާއިދުވެސް ރުހިންގެން ހުންނާތީކަމެއް ސާރާއަކަށް ނުވިސްނެއެވެ. ނުވަތަ އޭނާގެ ބޮޑާވެރިކަން އެފަދައިން ވިސްނުމަށް ތަންނުދެނީ ކަމަށްވެސް ވެދާނެއެވެ. ކޮންމެއަކަސް އެއްބަޔަކު އެގޮތަށް ރުހިގެން، އަނެއްބަޔަކު ހިތްހަމަނުޖެހި ތިބެގެން އެކަން ނިމިގެން ދިޔައީއެވެ. އަނެއްކާވެސް މާހައުލު ހަމައަކަށް އެޅިއްޖެއެވެ. އެހެންނަމަވެސް ސާރާގެ އެކުވެރިންގެ ތެރެއިން އެއްކުއްޖަކަށް ސާރާ ކަންތައް ކުރިގޮތް ކަމަކު ނުދިޔައެވެ. އެއީ ސާރާގެ އެކުވެރި ޝަފްނާއެވެ. މާހައުލުގެ ޢާންމު ޙާލަތަށް އެންމެން ރުޖޫއަވީއިރުވެސް ޝަފްނާ ހުރީ ހުރިތަނުގައެވެ. އެހެނީ ސާއިދުއާއި މާދުރުނޫން ހިސާބެއްގައެވެ. ހުރިހާ އެންމެން އެކި ތަންތަނަށް ގޮސް ހަމަޖެހިލުމުން ޝަފްނާ މަޑުމަޑުން އައިސް ސާއިދުގެ ކައިރިއަށް ހުއްޓިލިއެވެ. ”ހަމަ ޙަޤީޤަތުގަވެސް ސާއިދު މަޢާފަށް އެދެން ޖެހޭތަ؟“ ޝަފްނާގެ އެ ޖުމްލަ އަޑުއިވުމާއިއެކު، ސާއިދުވެސް އޭނާއާއި ދިމާއަށް ބަލައިލިއެވެ. ”ތި ބުނި އެއްޗެއް އަހަރެންނަކަށް ނުވިސްނުނު. ތީ ސާރާގެ ފްރެންޑެއް ދޯ.“ ސާއިދުގެ ފަހު ސުވާލަށް ޖަވާބުދިނުމުގެ ގޮތުން ޝަފްނާ މަޑުމަޑުން ބޯ ޖަހާލިއެވެ. ”އާން މީ ސާރާގެ ފްރެންޑެއް. އެކަމަކު ޙައްޤު ނޫން ކަންކަމަށް ނޫނެކޭ ބުނުމުގެ ހިތްވަރު އެބަހުރި.“ ވަރަށް ހިތްހަމަ ޖެހިލުމާއިއެކު ޝަފްނާ ބުނެލިއެވެ. ”އެހެންވިއްޔާ ވަރަށް ހިތްވަރުގަދަ… ތީ ޝަފްނާ ދޯ.“ ސާއިދުގެ ދުލުން ޝަފްނާގެ ނަން އިވުމުން އުފާވެރި ކަމުގެ ހިނިތުން ވުމެއް އޭނާގެ ތުންފަތް މައްޗަށް ވެރިވެގެން ދިޔައެވެ. ”އާން މީ ޝަފްނާ.“ ދެމީހުންވެސް އެއްފަހަރާ ލުއިލުއި ހިނިތުންވުމަކުން ހީނލިއެވެ. ”ކީއްވެގެން އަހަރެން މަޢާފަށް އެދުން ޙައްޤު ނޫނޭ ތިބުނީ؟“ ސާއިދު ސުވާލުކޮށްލިއެވެ. ”އެއީ މިތަނުގަ ކަންތައް ވެގެންދިޔަގޮތް އަހަރެންނަށް ވަރަށް ރަނގަޅަށް އެނގޭ. އަދި ސާއިދުގެ ހިތުގަ ސާރާއަށްޓަކާ އޮންނަ އިހުސާސްވެސް އަހަރެންނަށް އެނގޭ.“ ޝަފްނާގެ އެންމެފަހު ޖުމްލައިން ސާއިދުއަށް ލިބުނީ ހައިރާން ކަމެކެވެ. ”ތި ބުނީ ކީކޭ؟ އަހަރެންގެ ހިތުގެ އިހުސާސޭ؟ ޝަފްނާއަށް ކިހިނެއް އެނގެނީ؟ އެއީ އަހަރެން އަދި ސާރާ ކައިރީގަވެސް ނުބުނާ އެއްޗެއް.“ ސާއިދުގެ އެ ސުވާލަށް ޝަފްނާ ޖަވާބުދިނީ ހިނިތުން ވުމަކާއިއެކީގައެވެ. ”އަހަރެންނަށް ސާއިދުގެ ހިތުގެ ޙާލު އެނގޭ. ވަރަށް ކުރީއްސުރެވެސް އަހަރެން މި އަންނަނީ އެކަން ފާހަގަ ކުރަމުން. އެކަން ފާހަގަ ނުވަނީ ސާރާއަށް.“ ސާއިދުއަށް ޒާތެއްގެ ހިތްހަމަޖެހުމެއް ލިބުނު ކަހަލައެވެ. އެހެނީ ސާރާއާއި ހަމައަށް ސާއިދުގެ ލޯބި ފޯރުކޮށްދޭނެ ވަސީލަތެއް ލިބުނު ކަހަލަ އިހުސާސެއް ސާއިދުއަށް ކުރެވުނު ކަހަލައެވެ. ”ލޯބީގެ ޖަޒުބާތާ އިހުސާސް ވަރަށް ރަނގަޅަށް އެނގޭހެން ހާދަ ހީވެޔޭ. އެހެންވިއްޔާ ބުނެބަލަ، އެއްވެސް މީހަކު ދެކެ ލޯބިވިންތަ؟“ ސާއިދުގެ އެސުވާލަށް ޖަވާބު ދޭން ޝަފްނާއަށް އުނދަގޫވީ ކަހަލައެވެ. އެހެނީ އޭނާއަށް ހިންދިރުވާލުން ފިޔަވާ އިތުރު އެއްވެސް ކަމެއް ނުކުރެވުނެވެ. އެހެންނަމަވެސް އެސުވާލަށްވެސް ޖަވާބު ދޭނަމެ ޝަފްނާގެ ހިތަށް އެރިކަހަލައެވެ. އެހެނީ ޝަފްނާ ދޭ ޖަވާބަކުން ސާއިދުއަށް ކޮންމެވެސް އެއްޗެއް ވިސްނޭތޯ ބަލައިލަން ޝަފްނާ ބޭނުންވިއެވެ. އާނއެކެވެ. ޝަފްނާގެ ހިތުގައި ސާއިދުއަށްޓަކާ ވިންދު ޖަހަންފެށީ އިއްޔެއަކު މިއަދަކު ނޫނެވެ. ސްކޫލް ދައުރުން ފެށިގެންނެވެ. އެހެންކަމުން ސާއިދުގެ ކޮންމެ ހަރަކާތެއް ވަރަށް ރަނގަޅަށް ބަލާ އޮޅުން ފިލުވުމަކީ ޝަފްނާގެ ހޮބީއަކަށް ވެފައިވާ ކަމެކެވެ. އެގޮތުން ސާރާއަށްޓަކާ ސާއިދުގެ ހިތުގައި އޮންނަ އިހުސާސްތައް ދެނެގަންނަންވެސް ޝަފްނާއަށް ފަސޭހަވީއެވެ. ޝަފްނާއަކީ، ސާރާގެ އެންމެ ގާތް އެއް އެކުވެރިޔާއެވެ. ސާރާގެ ފަތިފުށްވެސް އެނގޭހާ ގާތެވެ. އެހެންކަމުން، ޝަފްނާ ކިތަންމެ ބޭނުންވިޔަސް ސާއިދުއާއި ދުރުގައި ހުރުމަށް ޝަފްނާވަނީ ނިންމާފައެވެ. އެހެނެއްކަމަކު، ހިތަކީ އެއްވެސް އިންސާނަކަށް ބާރުފޯރުވޭނެ އެއްޗެއް ނޫންތާއެވެ. ވީއިރު އޭނާގެ ހިތުގައި ސާއިދުއަށްޓަކާ އުފެދިފައި އޮތް ޖަޒުބާތެއްގެ މައްޗަކަށްވެސް އޭނާއަކަށް ބާރެއް ނުފޯރުވޭނެއެވެ. ކަން އޮތީ  އެހެންކަމުގައި ވީނަމަވެސް ސާރާގެ ހުންނަ ބައެއް ސިފަތައް ޝަފްނާއަކަށްވެސް ކަމަކު ނުދެއެވެ. ސާރާގެ ކިބައިގާވާ ކިބުރުވެރިކަމެވެ. އޭނާއަށް އޭނާ ފެނިފައި ހުންނަ ހުރުމެވެ. ތިމާއަށްވުރެ ދެރަ ނިކަމެތި ކޮންމެ މީހަކު ދަށްކޮށްލަން ވިސްނާ ވިސްނުމެވެ. އެކަންކަމާ ގުޅުވައިގެން ޝަފްނާ، ސާރާއަށް ނަސޭހަތްތެރިވެސް ވެއެވެ. އެކި ގޮތްގޮތުން ވިސްނައިދޭންވެސް މަސައްކަތް ކުރިއެވެ. އެހެންނަމަވެސް އެއިން އެއްވެސް ނަސޭހަތެއް ސާރާ ޤަބޫލުކުރިއްޔާތާއެވެ. ސާރާއަކީ އެނާއަށް އޭނާ ފެނިފައި ހުންނަ ކަނބަލެއްކަން ޝަފްނާވެސް ދަނެއެވެ. އެގޮތުގެ މަތިން ޝަފްނާވެސް ވާހަކަ ދައްކަނީ އޭނާގެ މިޒާޖަށް ބަލައިގެންނެވެ. އެންމެ ކުޑައިރުއްސުރެ އުފެދިފައި އޮތް ރަޙުމަތްތެރިކަމަށް ހުރަސް އެޅެން ބޭނުންވެސް ނުވާތީއެވެ. ޝަފްނާ ޚިޔާލުތަކަކަށް ގެއްލިފައި ހުރިހެން ހީވެގެން ސާއިދު އޭނާއަށް މަޑުމަޑުން ގޮވާލިއެވެ. ޝަފްނާ ސިއްސައިގެން ގޮސް ކީކޭތޯ އަހާލިއެވެ. ”ކޮބާ އަހަރެން ކުރި ސުވާލުގެ ޖަވާބު؟“ ސާއިދު ކުރިން ބުނި އެއްޗެއް ޝަފްނާ ހަނދާން ނެތިފައި ހުރިކަހަލައެވެ. އެހެނީ އެއީ ކޮންސުވާލެއްތޯ ޝަފްނާ އަހާލިއެވެ. އެހުރިހާ ވާހަކައެއް ދައްކަމުން ދިޔައިރު، ޝަފްނާގެ ހިތް ވަނީ އުފަލުން ފޮޅިފައެވެ. އެހެނީ، ސާއިދުއާއި މިހާ ކައިރީގައި ހުރެ ވާހަކަ ދައްކާލުމުގެ ފުރުޞަތު ލިބުމަކީ ޝަފްނާއަށް ކުލަރީތި ހުވަފެނެއް ފަދަ ކަމެކެވެ. ”ޝަފްނާ އެއްވެސް މީހަކުދެކެ ލޯބި ވިންތޯ؟“ ސާއިދު އަނެއްކާވެސް ސުވާލު ތަކުރާރު ކޮށްލިއެވެ. މިފަހަރު ޝަފްނާ ވަރަށް ހަމަޖެހިލާފައި އެހާމެ ހިތްވަރާއިއެކު ސާއިދުއާއި ހަތަރުކަޅި ހަމަކޮށްލިއެވެ. ”ޢުމުރުގެ މިހާހިސާބަށް އަންނައިރު، އަހަރެންގެ ހިތުގައިވެސް ކޮންމެވެސް މީހަކަށްޓަކާ ވިންދު ޖަހާނެތާ ދޯ. އެކަމަކު…“

• ނުނިމޭ –