އދ. ގައި ޓައިވާން ބައިވެރި ކުރުމަށް 9 ޤައުމަކުން އދ. ގެ ސެކްރެޓެރީ ޖެނެރަލަށް ހުށަހަޅައިފިއެވެ.
ޓައިވާންގެ ސެންޓްރަލް ނިއުސް އެޖެންސީ (ސީއެންއޭ) އިން ރިޕޯޓްކޮށްފައިވާ ގޮތުގައި ޓައިވާނަށް އދގައި ގޮނޑިއެއް ހޯދައި ދޭން ހުށަހެޅި ޑިޕްލޮމެޓިކް އެކުވެރި ނުވަ ޤައުމަކީ ބެލިޒް، އެސްވަޓީނީ، ގުއަޓެމާލާ، މާޝަލް އައިލެންޑްސް، ޕަލާއު، ސެއިންޓް ކިޓްސް އެންޑް ނެވިސް، ސެއިންޓް ލޫސިއާ، ސެއިންޓް ވިންސެންޓް އެންޑް ދަ ގްރެނޭޑައިންސް އަދި ޓޫވާލޫގެ ދާއިމީ މަންދޫބުންނެވެ. މިއީ އދގައި ހިމެނޭ އެންމެ ކުދި ޤައުމުތަކުގެ ތެރޭން ޤައުމުތަކެވެ.
އެ ސިޓީގައި ނުވަ ގައުމުގެ މަންދޫބުން ވަނީ ޓައިވާން ސްޓްރެއިޓްގައި މިހާރު އޮތް ހަމަޖެހުމަށް ނުރައްކާވެ، އިންޑޯ ޕެސިފިކް ސަރަހައްދުގެ ސުލްހައާއި އަމާންކަމަށް ނުރައްކާވާ ކަމަށް އެކުވެރި ގައުމުތަކުން ގަބޫލުކުރަން ޖެހޭނެ ކަމަށް ބުނެފައެވެ.
ޗައިނާއާއި އެގައުމަށް ވާގިވެރިވާ ޤައުމުތަކުން ދެކެނީ ޗައިނާގެ ދަރިފަސްކޮޅާއި ޗައިނާ މީހުން ތަމްސީލު ކުރާ ޤައުމަކީ ރިޕަބްލިކް އޮފް ޗައިނާ ކަމަށެވެ. އަދި ޗައިނާގެ ސަރަހައްދީ އެއްބައިވަންތަކަށް މި ޤައުމުތައް ފިޔަވައި ޗައިނާއަށް ސަޕޯޓުކުރާ އެހެން ޤައުމުތަކުން ގަބޫލުކުރެއެވެ. ޗައިނާ ބުނާ ގޮތުގައި ބޭނުން ޖެހިއްޖެނަމަ ގަދަކަމުންވެސް ޓައިވާނާއި ޗައިނާ އިއްތިޙާދު ކުރުމަށް ޗައިނާ އޮތީ ތައްޔާރަށް ކަމަށެވެ.
ޓައިވާނަކީ، ކުރިއަރާފައިވާ ސެމީކޮންޑަކްޓަރ އުފެއްދުމާއި އާޓިފިޝަލް އިންޓެލިޖެންސް ޓެކްނޮލޮޖީގައި މުހިންމު ދައުރެއް އަދާ ކުރާ ފަރާތެކެވެ.
އދ.ގައި ހުންނަވާ ގުއަޓެމާލާގެ ދާއިމީ މަންދޫބު ކާލާ މާރިއާ ރޮޑްރިގޭޒް މަންސިއާ ވަނީ ޓައިވާނަކީ ކުރިއަރަމުން އަންނަ ޑިމޮކްރަސީއެއްގެ ގޮތުގައި ފާހަގަ ކުރައްވައި ޓެކްނޮލޮޖީގެ ހަބެއްގެ ގޮތުގައި ޓައިވާނަށް ދަރަޖައެއް ލިބިގެންވާ ކަމަށް ވިދާޅުވެފައެވެ.
އދ.ގައި ހުންނަ ބެލިޒްގެ ދާއިމީ މަންދޫބު ކާލޯސް ފުލާ ވިދާޅުވީ ކަނޑުގެ ލޮނުގަނޑު އުފުލުމުން އެންމެ ނުރައްކާވާނޭ އެއްގައުމަކީ ޓައިވާން ކަމަށް ވިދާޅުވެފައެވެ.
ނިއުޔޯކުގައި ހުންނަ ޓައިޕޭ އިކޮނޮމިކް އެންޑް ކަލްޗަރަލް އޮފީހުގެ ވެރިޔާ ލީ ޗިއާންގް ވަކިން ނެރުނު ބަޔާނެއްގައި ވަނީ އދގައި ޓައިވާން ހިމެނުމަށް ވަރުގަދަ އެއްބާރުލުން ދިން ކަމަށްޓަކައި ޓައިވާންގެ އެކުވެރިންނަށް ޝުކުރު އަދާކުރައްވާފަ އެވެ.
