ކުރިއަށްއޮތް ލޯކަލްކައުންސިލް އިންތިޚާބުގައި، ގދ. ފަރެސްމާތޮޑާ ކައުންސިލުގެ ރައީސް ކަމަށް އެމްޑީޕީގެ ޓިކެޓުގައި ވާދާކުރަނީ އެރަށު، މޯނިންގްހައުސް، މުޙައްމަދު ޞަބާހެވެ.

ސަބާހަކީ ކާކު؟

އޭނާއަކީ އުމުރުން އަށާރަ އަހަރު ފުރުމާއެކު އެމްޑީޕީއަށް ސޮއިކޮށްގެން އަދާ ހަމައަށް އެޕާޓީގެ މެންބަރެއްގެ ގޮތުގައި ދެމިހުރި ސިޔާސީއެކެވެ. އޭނާ ވަނީ މީގެ ކުރިން ވެސް ފަރެސްމާތޮޑާ ކައުންސިލްގެ މެންބަރުކަން ކޮށްފައެވެ. އޭގެ  އިތުރުން އެރަށު އިންޖީނުގޭ އެސިސްޓެންޓް މެނޭޖަރުކަން ވެސް ވަނީ ކޮށްފައެވެ. އަދި ފަރެސްމާތޮޑާ ސިއްހީ މަރުކަޒުގެ އިސްވެރިއެއްގެ ގޮތުން ވަނީ ޚިދުމަތްކޮށްދީފައެވެ.

ކައުންސިލްގެ ރައީސް ކަމަށް

އޭނާ މަގާމަށް ކުރިމަތިލީ ތަޖުރިބާ ވެސް ހުރެގެންނެވެ. ރައްޔިތުންގެ ކަންބޮޑުވުންތަކާއި އުދާސްތައް އެނގިގެންނެވެ. އޭނާގެ މަގުސަދަކީ ރައްޔިތުން އެދޭފަދަ ޚިދުމަތެއް ރައްޔިތުންނާ ގާތުން ދިނުމެވެ.

”އަޅުގަނޑުގެ އެންމެ ބޮޑު ބޭނުމަކީ ރައްޔިތުންނާ ގާތުން ރައްޔިތުން އެދޭގޮތަކަށް ޚިދުމަތް ދިނުން. އެކަން ކުރުމަށްޓަކައި ކައުންސިލާއި ރައްޔިތުންނާ ދެމެދު އިތުބާރު އުފައްދަންޖެހޭ. ގުޅުން ބަދަހި ކުރަންޖެހޭ. ރައްޔިތުންގެ ފައިސާއަށް ވާނުވާ  އެނގެންޖެހޭ. ރައްޔިތުންނާ ގުޅުންހުރި އެހެން ކަންކަމުގައި ވާނުވާ އެނގެން ޖެހޭ. އިރާދަކުރެއްވިއްޔާ އެކަންކަން ރައްޔިތުންނަށް އެނގޭނޭ ނިޒާމެއް ގާއިމްކޮށް ރައްޔިތުން ބަލައިގަންނާނޭ ޚިދުމަތެއް ދިނުމަށް ކައުންސިލުން މަސައްކަތްކުރާނަން،“

މަސްވެރިންނަށް

ފަރެސްމާތޮޑާގެ އާބާދީއަކީ އަށާރަސަތޭކައެއްހާ މީހުންނެވެ. އޭގެ ތެރެއިން ގިނަ ފިރިހެނުންނަކީ މަސްވެރިންނެވެ. މަސްވެރިކަމަކީ އެރަށަށް އާމްދަނީ ވަންނަ މައިގަނޑު މަސައްކަތެވެ. އެމީހުންނަށް ދިމާވާ ދަތިކަން ހައްލު ކޮށްދިނުމަކީ ކައުންސިލުން ކޮންމެހެން ކުރަން ޖެހޭކަމެއް ކަމަށް ޞަބާހު ބުންޏެވެ. މިވަގުތަށް މަސްވެރިން އެންމެ ބޭނުންވަނީ ބަނދަރު ޚިދުމަތްތައް ލުއިފަސޭހަ ކަމާއެކު ލިބޭނޭ އިންތިޒާމެއް ކަށަވަރު ކުރުމެވެ.

”ބަނދަރުމަތިން ދެވޭ ޚިދުމަތްތައް، ފަސޭހައިން ލިބޭނޭ އިންތިޒާމް ހަމަޖައްސައިދޭނަން. ފެނާއި ކަރަންޓު މަސްދޯނިފަހަރަށް ދިނުމުގައި މިހާރު ދިމާވަމުންދާ ގޮންޖެހުންތައް ދުވަހުން ދުވަހަށް ބަލައި ހައްލު ހޯދައިދޭނަން،“ އޭނާ ބުންޏެވެ.

އޭނާ ބުނީ މަސްވެރިންގެ ކަންކަން ނިންމާނީ މަސްވެރިންނާ ގުޅިގެން އެމީހުންގެ ޚިޔާލާއެއްކޮށް ކަމަށެވެ. ”މަސްވެރިކަމާ ގުޅުންހުރި ހުރިހާ ކަމެއް ކުރާނީ މަސްވެރިންގެ ލަފާ އަހައިގެން. ކުރިއަށް އޮތް އިންތިޚާބު ކާމިޔާބުވެއްޖެނަމަ، މަސްވެރިންނާ ދޭތެރެދޭތެރެއިން ބައްދަލުކޮށް އެމީހުންނަށް ދިމާވާ މައްސަލަތައް އޮޅުންފިލުވާނަން. އަދި އެމީހުން އެދޭގޮތަކަށް އެކަމެއް ހައްލުކޮށްދޭނަން އިރާދަކުރެއްވިއްޔާ،“ އޭނާ ވިދާޅުވިއެވެ.

އިގްތިސާދު

މަސްވެރިކަމަށް އެކަނި ބަރޯސާވުމަކީ އަމިއްލަ ފައިމައްޗަށް ތެދުވާން މަސައްކަތްކުރާ ކައުންސިލަކުން ކުރާނޭ ކަމެއްނޫނެވެ. މަސްވެރިންނަށް ދިމާވާ މައްސަލަތައް ހައްލުކޮށްދީ އިތުރަށް ތަރައްގީ ކުރުމާއެކު ލޯކަލްޓޫރިޒަމް އެރަށުގައި ތައާރަފް ކުރުމަކީ ކައުންސިލުން ކުރަންޖެހޭ ކަމެއްކަމަށް ޞަބާހު ބުންޏެވެ. އެކަމަށް ބޭނުންވާނޭ ބިންތައް ކަނޑައަޅައި، ކުލީ  ބިންދޫކޮށް ރަށުގެ ލޯކަލް ޓޫރިޒަމާއި ކުދި ވިޔަފާރިތައް ކުރިއެރުވުމަށް މަސައްކަތް ކުރުމަކީ ރަށުގެ މުސްތަގުބަލަށް ކޮންމެހެން ބޭނުންތެރި ކަމެކެވެ. އެހެން ކަމުން ރަށުގެ ކުދި ވިޔަފާރިތަކަށް ފުރުސަތު ފަހިކޮށްދީ ރަށަށް ލޯކަލް ޓޫރިޒަމް ތައާރަފްކޮށް ތަރައްގީ ކުރުމަށް އިސްކަމެއް ދޭނޭ ކަމަށް އޭނާ ބުންޏެވެ.

ރަށުވަންތަ ކައުންސިލެއް 

ރައްޔިތުން ވޯޓުދީގެން މަގާމަކަށް އަންނަބައެއްގެ އެންމެ އިސް  އެއްވާޖިބަކަށް ވާންޖެހޭނީ ރައްޔިތުން އެދޭފަދަ ޚިދުމަތެއް އަވަހަށް ފޯރުކޮށްދިނުމެވެ. ”ރައްޔިތުންނަށް ކޮށްދޭންޖެހޭ ކޮންމެ ކަމެއް ކޮށްދޭނީ ދެފުށް ފެންނަ ގޮތަކަށް. ރައްޔިތުންގެ ކަންކަން ފުރިހަމަކޮށްދިނުމަށް އޭރުއޮންނަ ސަރުކާރަކަށް އެއްބާރުލުން ދޭންޖެހޭ. އެކަން އަޅުގަނޑުމެން ކުރާނަން. އެއީ ބޮޑު ޒިންމާއެއް އެޒިންމާ އަދާކުރަން އަޅުގަނޑުމެން ފަހެއް ނުޖެހޭނަން. ރަށުގެ ކުރިމަގު ބައްޓަން ކުރުމުގައި އަޅުގަނޑުމެން ދެމިތިބޭނީ ރައްޔިތުންނާއެކު، ރައްޔިތުންގެ ޚާދިމުންގެ ގޮތުގައި،“

ކައުންސިލުންދޭ ޚިދުމަތް އަވަސް ކުރުން

ކައުންސިލުން ރައްޔިތުންނަށް ދޭންޖެހޭ ޚިދުމަތްތައް އަވަހަށް ފޯރުކޮށްދިނުމަށް އިސްކަން ދިނުމުގެ ސިޔާސަތުގެ ދަށުން އޮންލައިންކޮށް ޚިދުމަތްތަކަށް އެދެވޭނޭ އިންތިޒާމެއް ގާއިމް ކޮށްދޭނޭ ކަމަށް ޞަބާހު ބުންޏެވެ. ”އަމާޒަކީ ސިސްޓަމްގެ ތެރެއިން އީޖާދީ އަދި އީޖާބީ ބަދަލެއް ގެނައުން. މީގެ ސަބަބުން، ގޭގައި ތިބެގެން ކައުންސިލްގެ ޚިދުމަތްތައް ލިބިގަތުމުގެ ފުރުސަތު ފަހިވެގެންދާނެ. އެހެންކަމުން ވަގު ސަލާމަތް ކުރެވި، ޚަރަދު ކުޑަވެގެންދާނެ. ކަންކަމުގައި ކައުންސިލް އިދާރާއަށް ހިނގަން ނުޖެހި، ފަސޭހަކަމާއެކު ޑިޖިޓަލްކޮށް ޚިދުމަތްތައް އަޅުގަނޑުމެން (އިރާދަކުރެއްވިއްޔާ) ފޯރުކޮށްދޭނަން،“ އޭނާ ބުންޏެވެ.

ހަމައެއާއެކު، ކައުންސިލްގެ މަސައްކަތްތައް ހާމަކަންބޮޑު ގޮތެއްގައި ކުރިއަށްގެންދިއުމަށްޓަކައި، ކައުންސިލުން ބާއްވާ ގާނޫނީ ޖަލްސާތައް އާންމުންނަށް ފެންނާނެހެން ލައިވްކުރެވިގެންދާނެއެވެ. މިކަމުގެ ސަބަބުން ރަށުގެ ތަރައްގީއާ ގުޅޭގޮތުން ނިންމާ ނިންމުންތަކާއި، ބަޖެޓު ބޭނުންކުރާ ގޮތް ރައްޔިތުންނަށް ސާފުވެ، ކައުންސިލްގެ ޒިންމާދާރުކަން އިތުރުވެގެންދާނެއެވެ. ”ޖަލްސާތައް ލައިވްކުރުމުން، ރަށުން ބޭރުގައި އުޅޭ ރައްޔިތުންނަށްވެސް ރަށުގެ ކަންކަން ހިނގާގޮތް ބެލުމުގެ ފުރުސަތު ލިބިގެންދާނެ،“ އޭނާ ބުންޏެވެ.

ރަށުން ބޭރުގައި އުޅޭ ރަށު މީހުން

ރަށުން ބޭރުގައި އުޅޭ ރަށުގެ ރައްޔިތުންނަކީ ރަށުގެ މުހިންމު ބައެކެވެ. އެމީހުންނާ ގާތް ގުޅުމެއް ބާއްވައި ރަށުގެ ތަރައްޤީގެ ކަންކަމުގައި ބައިވެރިކުރުވުމަކީ ކައުންސިލުގެ ޒިންމާއެއް ކަމަށް ޞަބާހު ބުންޏެވެ. އޭނާ ފާހަގަކުރި ގޮތުގައި އެމީހުންގެ މަތިން ހަނދާން ކުރަންޖެހެނީ ހަމައެކަނި އިންތިޚާބުތަކާ ދިމާކޮށް ވޯޓު ހޯދުމަކަށް ނޫނެވެ. ރަށުގައި ދިރިނޫޅުނަސް އެމީހުންނަށް ރަށުގެ ކަންކަން އޮޅުންފިލުވައިދީ، އެހީތެރިވުމުގެ ފުރުސަތު ހަމަހަމަކަމާއެކު ފަހިކޮށްދޭންޖެހެއެވެ. މީގެއިތުރުން، ކައުންސިލުން ފޯރުކޮށްދޭ ޚިދުމަތްތައް ހޯދުމުގައި އެފަދަ ފަރާތްތަކަށް ލުއިފަސޭހަ ގޮތްތަކެއް ހަމަޖެހިފައި އޮތުމަކީ ނުހަނު ބޭނުންތެރި ކަމެކެވެ.

ޒުވާނުން

ޒުވާނުންނަކީ ކޮންމެ ރަށެއްގައިވެސް އެންމެ ނަގާކިޔާ މީހުންނެވެ. އިސް ސަފުގައި ބަސްބުނެވޭ އަދި ބުނަންޖެހޭ ބައެކެވެ. އެއީ ރަށުގެ މުސްތަގުބަލު ވެސް މެއެވެ. އެ މީހުން ބާރުވެރިކޮށް ހަރުދަނާ ބަޔަކަށް ހެދުމަށް ޞަބާހު ޚާއްޞަ އިސްކަމެއް ދެއްވާނެއެވެ. މިގޮތުން ދެ ޖިންސުގެ ޒުވާނުންނާ މަޝްވަރާކޮށް، އެމީހުންގެ މައްސަލަތައް ހައްލުކޮށްދީ، ގުޅިގެން މަސައްކަތްކުރުމަކީ އޭނާގެ މުހިންމު ސިޔާސަތެކެވެ.

މިކަންކަން ކުރެވޭނީ މިވިސްނުމުގެ މީހުން ކައުންސިލަށް އިންތިޚާބުކޮށްގެންނެވެ. އެހެންވީމާ އެޕްރީލް 4 ގައި އޮންނަ ލޯކަލް ކައުންސިލް އިންތިޚާބުގައި ”އަޅުގަނޑުމެންގެ ޓީމަށް ވޯޓު ދެއްވާ،“ އޭނާ ވިދާޅުވިއެވެ.