އެމްޑީޕީގެ ޓިކެޓުގައި ފަރެސްމާތޮޑާ ކައުންސިލަށް ވާދަކުރާ އަންހެން ކެންޑިޑޭޓު މަރްޔަމް މުޒައިނާ (މުޒޭ) ގެ އެންމެބޮޑު މަގުސަދަކީ މުޅިރަށުގެ ތަރައްގީއަށް މަސައްކަތް ކުރުމެވެ. ޚާއްސަކޮށް އަންހެނުންގެ ތަރައްގީއަށެވެ. ތަރައްގީގައި އަންހެނުންގެ ދައުރު ބޮޑުކަމަށާއި އެހެން ކަމުން އެކަމަށް އެންހެނުން ބާރުވެރި ކުރުވަންޖެހޭ ކަމަށް އޭނާ ބުންޏެވެ.

މުޒޭގެ ވިސްނުމަކީ ކައުންސިލާއި ޑަބްލިޔުޑީސީ ގުޅިގެން މަސައްކަތް ކުރުމެވެ. އެކަން އޭނާ ކުރާނެއެވެ. ”ބާރުވެރި ކުރުވަން ބޭނުންވާނީ މައުލޫމާތާއި، އިލްމާއި ހަކަތައާއި ހިތްވަރުދޭނޭ ބައެއް. އެބަޔަކަށް ވާންޖެހޭނީ (ސިޔާސީގޮތުން) ކައުންސިލަރުން. އަންހެނުންނަށް ހިތްވަރުދީ މިހާރަށްވުރެ ވަރުގަދަ ބަޔަކަށް ހަދާނޭ ކައުންސިލެއް މިފަހަރު އިންތިޚާބު ކުރުން ވަރަށް މުހިންމު،“ އޭނާ ބުންޏެވެ.

މުޒައިނާއަކީ ބިނާކުރަނިވި ތަރައްގީއެއްގެ ވިސްނުން ގެންގުޅޭ ޒުވާނެކެވެ. ޚާއްސަކޮށް އަންހެނުންގެ ތަރައްގީއަށް އިސްކަންދިނުމުގެ ރޫހުހުރި އަންހެނެކެވެ. ހަކަތަހުރި ލީޑަރެކެވެ. އަންހެނުންގެ ތަރައްގީއަށް މަސައްކަތްކުރާ ކޮމިޓީއާއެކު މަސައްކަތް ކުރާހިތުން ކުރާނޭ ހަރަކާތްތެރިއެކެވެ. އަންހެނުން ކުރީސަފަށްނެރެ ރަށުގެ ހުރިހާކަމެއްގައި އަންހެނުންގެ ބަސް ހިމަނަންޖެހޭ ކަމަށް ގަބޫލުކުރާ ވިސްނުންތެރިއެކެވެ.

އަންހެނުންގެ ތަރައްގީއަށް އެކަންޏެއް ނޫނެވެ. މުޅި ރަށާއި ރައްޔިތުންގެ ތަރައްގީއަށް މަސައްކަތް ކުރުމަކީ ކައުންސިލުގެ އެންމެ މުހިންމު ޒިންމާ ކަމަށް އޭނާ ބުންޏެވެ. ރައްޔިތުންނަށް ދަތިވާ ކަންކަމާއި ބޭނުންވާ ކަންކަން ހޯދައި ބަލައި އެކަންކަން ހައްލުކޮށްދިނުމަކީ ރަށުގެ އެއްބައިވަންތަކަމާއި އިޖުތިމާއީ ގުޅުން މިހާރަށްވުރެ ވަރުގަދަކުރަން އޭނާ އިސްވެހުރެގެން ކުރާނޭ ކަންކަމެވެ. ”ކައުންސިލުގެ މެންޑޭޓުގައި ހިމެނޭ ކަންކަން އެއޮތީ ކަޅާއި ހުދުން ލިޔެފައި. އޭގެ އިތުރުން ރައްޔިތުންނާ ގާތުން މަސައްކަތްކޮށް އެމީހުންނަށް ދިމާވާ ކަންކަން ދެނެގަނެ އެކަންކަން އަމަލީގޮތުން ކޮށްދޭނޭ ކައުންސިލެއް އޮތުމަކީ ރައްޔިތުންނަށް އެންމެ ރަނގަޅުގޮތް. އެހެން ކަމުން މިފަހަރު ކައުންސިލް އިންތިޚާބުގައި ވޯޓުދޭންވާނީ މިނިވަން ވިސްނުމަކުން ވިސްނާފައި. މިއީ ކަންކަން ބަދަލުކޮށްލުމަށް ރައްޔިތުންނަށް ލިބޭ ހަމައެކަނި ފުރުސަތު. މި ފުރުސަތު ނަގާނުލައި ރަނގަޅު ޓީމެއް ފަރެސްމާތޮޑާ ކައުންސިލަށް އިންތިޚާބު ކުރުމަކީ އަޅުގަނޑު ވަރަށްބޮޑަށް އެދޭކަމެއް. އެޓީމަކީ އެމްޑީޕީ ޓީމް. އެއީ އަޅުގަނޑުމެން،“

އޭނާ ބުނީ ރަށުގެ ތަރައްގީއަށްޓަކައި ބޮޑެތި މީހުންނަށް ކުލާސްތަކެއް ނަގައިދޭންޖެހޭ ކަމަށެވެ. ތައުލީމީ ފެންވަރު ރަނގަޅުކުރުމަށް މަސައްކަތްތަކެއް ކުރަންޖެހޭ ކަމަށެވެ. ”މިއީ ތައުލީމީ ޒަމާން. ޑިޖިޓަލް ޒަމާން. އެހެން ކަމުން އޮންލައިންކޮށްދޭ ޚިދުމަތްތައް ފޯނު ނުވަތަ ލެޕްޓޮޕް ބޭނުންކޮށްގެން އެދޭނޭގޮތް ދަސްކޮށްދޭންޖެހޭ. މިފަދަ ކަންކަމަށް މީހުން ހޭލުންތެރިކޮށް އަމިއްލައަށް އެކަންކަން ކުރުމަށް އެނގުމަކީ އެންމެގެ ވަގުތު ސަލާމަތް ކުރެވޭނޭ ކަމެއް. ތަރައްގީ އަވަސްވާނޭ ކަމެއް،“ އޭނާ ބުންޏެވެ.

އަންހެނުންގެ ސިއްހީ ދުޅަހެޔޮކަމަށްވެސް އޭނާ ވިސްނައެވެ. ދުޅަހެޔޮބައެއްގެ ގޮތުގައި އެވެރީން ދެމިތިބުމަށް ސިއްހީ ދާއިރާއާ ގުޅިގެން ސިއްހަތާބެހޭ ތަފާތު ޕްރޮގްރާމްތައް ހިނގުމަށް ޑަބްލިޔުޑީސީއާ ގުޅިގެން މަސައްކަތް ކުރާނީ ކުރާހިތުން ކަމަށް އޭނާ ބުންޏެވެ. މީގެ އިތުރުން ހޭލުންތެރި ކުރުމުގެ އެކިއެކި ޕްރޮގްރާމްތައް ހިންގައި އަންހެނުންނަށް އިތުބާރު ހޯދައި ދޭނޭ ކަމަށް އޭނާ ބުންޏެވެ.

ޖުމްލަކޮށް ރަށުގެ ހުރިހާކަމެއް މިހާރަށްވުރެ ބޮޑަށް ރަނގަޅު ކުރުމަށް ކުރަންޖެހޭ ހުރިހާ މަސައްކަތެއް އެންމެންނާ ގުޅިގެން އޭނާ ކުރާނެއެވެ. އެކަންކަން ކުރާނީ ރައްޔިތުން ގާތުން އަހައިގެންނެވެ. އޮޅުން ފިލުވައިގެންނެވެ. ޓީމެއްގެ ގޮތުގައެވެ.

އޭނާ ބުނީ ރަށެއް ހިންގަން ކައުންސިލެއް އިންތިޚާބުކޮށްފައިވާ ކަމަށްވާނަމަ އެކައުންސިލެއް ވާންޖެހޭނީ އިތުބާރުކުރެވޭ ތަނަކަށް ކަމަށެވެ. ”ހަގީގަތުގައި ފަރެސްމާތޮޑާ ރައްޔިތުންގެ އެއްވެސް އިތުބާރެއްނެތް މިހާރުގެ ކައުންސިލަށް. އަޅުގަނޑު ބޭނުންވަނީ ގެއްލިފައިވާ އިތުބާރު އަލުން ހޯދައިދީ، ރައްޔިތުންނާ ގުޅިގެން ރަށުގެ ތަރައްގީއާއި އެހެނިހެން ކަންކަން ކުރިއަށް ގެންދަން. އެ އިތުބާރު ހޯދައިދީ އަޅުގަނޑުމެން ތަފާތު ދައްކާނަން އިރާދަކުރެއްވިއްޔާ،“

އެއްބައިވަންތަކަމާއި އެއްބައެއް ވަންތަކަން ގާއިމް ނުކޮށް ރަށެއް ކުރިއަރާނޭ ކަމަށް މުޒޭ ގަބޫލެއް ނުކުރެއެވެ. އެހެން ކަމުން ރަށުގެ ރައްޔިތުންގެ އެއްބައިވަންތަ ކަމަށް އޭނާ އިސްކަމެއް ދޭނެއެވެ. އިހުތިރާމް ލިބިގެންވާ އަދި އިހްތިރާމް ކުރާ މުޖުތަމައެއް ބައްޓަން ކުރުމަށް ވެސް އޭނާ މަސައްކަތް ކުރާނެއެވެ. ”މިރަށަކީ އެއްބައިވަންތަ ރައްޔިތެއް ދިރިއުޅޭ ރަށަކަށް ހެދުމަކީ އަބަދުވެސް އަޅުގަނޑުގެ ވަރަށް ބޮޑު އުންމީދެއް. އަޅުގަނޑު ގަބޫލުކުރާ ގޮތުގައި ރަށެއް ކުރިއަރައި ތަރައްގީވާނީ ރަށުގެ ރައްޔިތުންނާ ކައުންސިލާ ގުޅިގެން މަސައްކަތްކޮށްގެން. އެކަންވެސް އިރާދަކުރެއްވިއްޔާ ވާނެ،“

”ފަރެސްމާތޮޑާ ރައްޔިތުންނަށް އަޅުގަނޑު ޔަގީންކަން އަރުވަނީ ކުރަންޖެހޭ ސޮޔެއް، ބުނަންޖެހޭ ބަހެއް ނުވަތަ ކުރަންޖެހޭ މަސައްކަތެއް ނުކުރެވިގެން ސަރުކާރުންވިއަސް ނުވަތަ ކައުންސިލުންވިޔަސް ރައްޔިތުންނާ ގުޅުންހުރި އެއްވެސް ކަމެއް ނުކުރެވި ލަސްވެގެން ނުދާނޭކަން. އަޅުގަނޑުމެން މަސައްކަތްކުރާނީ ދެފުށް ފެންނަ ގޮތަށް ރައްޔިތުންނާ ގުޅިގެން ރައްޔިތުންގެ ޚިޔާލާއި މަޝްވަރާ ހޯދައިގެން ޓީމެއްގެ ގޮތުގައި،“ އޭނާ ބުންޏެވެ.

މިކަންކަން މިގޮތަށް ކުރުމަށް ފަރެސްމާތޮޑާ އެންމެހާ ރައްޔިތުން އެޕްރީލް 4 ގައި އޮންނަ ލޯކަލްކައުންސިލް އިންތިޚާބުގައި މުޒައިނާއަށް ވޯޓު ދެއްވުމަކީ އޭނާގެ ވަރަށްބޮޑު އެދުމެކެވެ. އެއީ ޚިދުމަތްކޮށްދޭ ހިތުންހުރި ޒުވާނެކެވެ. އެފަދަ ޒުވާނުންނަށް ފުރުސަތު ނުދޭންވީ ސަބަބެއް ނެތެވެ. ”ތަރައްގީ ކުރެވޭނީ ރޫހެއް ހުރެގެން،“ މިއީ އޭނާގެ ވާހަކައިގެ ޚުލާސާއެވވެ.