އެމެރިކާއިން ފޯރުކޮށްދޭ ޖާސޫސީ ސަލާމަތ މައުލޫމާތުތަކަށް ބަރޯސާވާ މިންވަރު ކުޑަކޮށް، އަމިއްލަ ފައިމައްޗަށް ތެދުވުމުގެ މަގުސަދުގައި ޖަރުމަނުގެ ބޭރުގެ ޖާސޫސީ އިދާރާ (ބީ.އެން.ޑީ) ގެ ބާރުތައް ފުޅާކުރުމަށް އެ ގައުމުން ތައްޔާރުވާން ފަށައިފިއެވެ.

މި އިސްލާހުތަކުގެ ދަށުން ބީ.އެން.ޑީ އަށް ސައިބަރ އޮޕަރޭޝަންތައް ހިންގުމާއި، ރޭވުންތެރިކަމާއެކު ދޭ ހަމަލާތައް ހުއްޓުވުމުގެ އިތުރުން، އިސްނަގައިގެން ޖާސޫސީ މަސައްކަތްތައް ކުރުމުގެ ބޮޑެތި ބާރުތަކެއް ލިބިގެންދާނެއެވެ. ޖަރުމަނުން މިފަދަ ފިޔަވަޅެއް އަޅަން ނިންމީ، ކުރިއަށް އޮތް ތަނުގައި އެމެރިކާގެ ސަރުކާރުން ޔޫރަޕްގެ ގައުމުތަކާ މައުލޫމާތު ހިއްސާކުރުން މަދުކޮށްފާނެ ކަމަށް ބެލެވޭތީއެވެ.

ދެވަނަ ބޮޑު ހަނގުރާމައަށްފަހު، ޖަރުމަނުގެ ޖާސޫސީ އިދާރާތަކަށް އަމަލުކުރަން ޖެހިފައިވަނީ ވަރަށް ހަރުކަށި ގާނޫނީ އޮނިގަނޑެއްގެ ދަށުންނެވެ. މިއީ ކުރީގެ ނާޒީ ”ގެސްޓާޕޯ“ ނުވަތަ ”ސްޓާސީ“ ފަދަ އިދާރާތަކުން ހިންގާފައިވާ ފަދަ އިންސާނީ ހައްގުތަކަށް އަރައިގަތުމުގެ އަމަލުތައް ތަކުރާރުވިޔަ ނުދިނުމަށް އަޅާފައިވާ ފިޔަވަޅުތަކެކެވެ. ނަމަވެސް، މި ހުރަސްތަކުގެ ސަބަބުން ބީ.އެން.ޑީ ގެ ދައުރު މިހާތަނަށް އޮތީ ހަމައެކަނި މައުލޫމާތު އެއްކުރުމުގެ މައްޗަށް ހަނިވެފައެވެ.

ޖަރުމަނުގެ މިހާރުގެ ސަރުކާރުން ވަނީ ބީ.އެން.ޑީ ގެ ބަޖެޓު 26 އިންސައްތަ އިތުރުކޮށްފައެވެ. އަދި އާޓިފިޝަލް އިންޓެލިޖެންސް (އޭ.އައި) އާއި މޫނު ދެނެގަންނަ ޓެކްނޮލޮޖީ ފަދަ ވަސީލަތްތައް ބޭނުންކުރުމަށް މަގުފަހިކުރުމަށްޓަކައި، ޒާތީ މައުލޫމާތު ރައްކާތެރިކުރުމުގެ ގަވާއިދުތަކަށް ލުއި ދިނުމަށް ވެސް ދަނީ މަސައްކަތް ކުރަމުންނެވެ. މި ބަދަލުތަކުގެ ސަބަބުން، ވަކިން ހާއްސަކޮށް ރަޝިޔާއިން ދީފާނެ ހައިބްރިޑް ހަމަލާތަކާއި ރޭވުންތެރިކަމާއެކު ދޭ ގެއްލުންތަކުން ދިފާއުވުމަށް އެ އިދާރާއަށް ފުރުސަތު ލިބޭނެއެވެ.

ބީ.އެން.ޑީ އަށް އަލަށް ދޭ މި ބޮޑެތި ބާރުތައް ބޭނުންކުރެވޭނީ ޖާސޫސީ ޚާއްސަ ހާލަތެއް އިއުލާނު ކުރުމުންނެވެ. މި ހާލަތު އިއުލާނު ކުރުމަށް ޖަރުމަނުގެ ނޭޝަނަލް ސެކިއުރިޓީ ކައުންސިލްގެ ހުއްދަ ބޭނުންވާނެއެވެ. އަދި ޕާލަމަންޓުގެ އޯވަސައިޓް ކޮމިޓީގެ ތިންބައިކުޅަ ދެބައި އަޣުލަބިއްޔަތުން އެކަން ފާސްކުރަން ޖެހޭނެއެވެ.

މި އިސްލާހަށް ތާއީދުކުރާ ފަރާތްތަކުން ބުނާ ގޮތުގައި، މިހާރު ދުނިޔޭގެ މަސްރަހު އޮތް ގޮތުން މިއީ ގައުމުގެ ސަލާމަތަށް ކޮންމެހެން ބޭނުންތެރި ބަދަލެކެވެ. ނަމަވެސް، އިންސާނީ ހައްގުތަކަށް މަސައްކަތްކުރާ ފަރާތްތަކުން ކަންބޮޑުވުން ފާޅުކުރަމުންދަނީ، މީގެ ސަބަބުން ޒަމާނުއްސުރެ ޖަރުމަނުގައި އަމަލުކުރަމުން އައި ނާޒީ ވިސްނުން އާލާވެދާނެތީއެވެ.