ޣައްޒާގެ އަލްޝިފާ ހޮސްޕިޓަލަށް ދިން ޖެނޮސައިޑް ހަމަލާތަކުގައި ބައިވެރިވި ކަމަށް ތުހުމަތުކުރެވޭ އިސްރާއީލުގެ ކުރީގެ ސިފައިންގެ މީހަކާ ދެކޮޅަށް ބްރަސަލްސްއަށް ނިސްބަތްވާ އިންސާނީ ހައްގުތަކާ ބެހޭ ޖަމިއްޔާއަކުން، ޗިލީގެ ކޯޓަކަށް ޖިނާއީ މައްސަލައެއް ހުށަހަޅައިފިއެވެ.
މި މައްސަލަ ހުށަހަޅާފައިވަނީ އިސްރާއީލާއި ޔޫކްރެއިންގެ ރައްޔިތެއް ކަމަށްވާ ރޮމް ކޮވްޓުންއާ ދެކޮޅަށެވެ. އޭނާއަކީ އިސްރާއީލް ގެ ޖެނޮސައިޑް ފޯސް ގެ ގިވާތީ ބްރިގޭޑްގައި ސްނައިޕަރެއްގެ ގޮތުގައި މަސައްކަތްކުރި މީހެކެވެ. ”ހިންދު ރަޖަބް ފައުންޑޭޝަން“ އިން މި މައްސަލަ ޗިލީގެ ސެންޓިއާގޯގެ 8 ވަނަ ގެރެންޓީ ކޯޓަށް ހުށަހެޅީ ޗިލީގެ ގާނޫނު ނަންބަރު 20.357 ގެ ދަށުންނެވެ. މި ގާނޫނަކީ ނަސްލު ނައްތާލުމާއި، އިންސާނިއްޔަތާ ހިލާފު ޖަރީމާތަކާއި، ހަނގުރާމައިގެ ކުށްތަކަށް އަދަބު ދިނުމަށް ކަނޑައަޅާފައިވާ ގާނޫނެކެވެ.
މި މައްސަލަ ހުށަހެޅި ”ހިންދު ރަޖަބް ފައުންޑޭޝަން“ އަކީ ޖެނުއަރީ 2024 ގައި އިސްރާއީލުން ފަލަސްޠީނުގެ ޖެނޮސައިޑް ހިންގުމުގެ ތެރޭގައި ދިން ހަމަލާއެއްގައި ޝަހީދުވި ފަލަސްތީނުގެ 5 އަހަރުގެ އަންހެން ކުއްޖެއް ކަމަށްވާ ހިންދު ރަޖަބްގެ ނަމުން ނަންދީފައިވާ ޖަމިއްޔާއެކެވެ. އެ ޖަމިއްޔާއިން ބުނި ގޮތުގައި، ކޮވްޓުން ޗިލީގައި ހުރިކަން އެނގުނީ އޭނާ އަމިއްލައަށް ސޯޝަލް މީޑިއާގައި އާންމުކުރި ފޮޓޯތަކުންނެވެ. އޭގެ ތެރޭގައި ޗިލީގެ ދެކުނުގެ ސަރަހައްދެއްގެ ކޯރެއްގެ ކައިރީގައި އޭނާ ޗުއްޓީ ހޭދަކުރަމުންދާ ފޮޓޯތައް ހިމެނެއެވެ.
ދުނިޔޭގެ ކޮންމެ ތަނެއްގައި ބޮޑެތި ޖަރީމާތައް ހިންގި ނަމަވެސް، އެކަން ކުރި މީހަކު ގައުމުގެ ސަރަހައްދެއްގައި ހުރެއްޖެނަމަ އެ މީހަކާ މެދު ފިޔަވަޅު އެޅުމުގެ ބާރު ޗިލީގެ ކޯޓުތަކަށް ލިބިގެންވެއެވެ. ކަމާބެހޭ ފަރާތްތަކުން ގަބޫލުކުރާ ގޮތުގައި ކޮވްޓުން އަދިވެސް ހުރީ ޗިލީގައެވެ.
ހުށަހަޅާފައިވާ މައްސަލާގައި ބުނެފައިވަނީ، މާޗް މަހާއި އޭޕްރީލް މަހާ ދެމެދު އިސްރާއީލުން އަލްޝިފާ ހޮސްޕިޓަލް ހިސާރުކޮށްގެން އުޅުނުއިރު ކޮވްޓުން އެކަމުގައި އަމަލީ ގޮތުން ބައިވެރިވި ކަމަށެވެ. އެ ހަމަލާތަކުގައި އާންމުންނާއި ކުޑަކުދިން މެރުމާއި، މެޑިކަލް ސްޓާފުން ވަގަށް ނެގުމާއި އެމީހުންނަށް އަނިޔާކުރި ކަމުގެ ހެކިބަސް ލިބިފައިވާ ކަމަށް އެ ޖަމިއްޔާއިން ބުނެއެވެ. އިސްރާއީލު ސިފައިން އެ ސަރަހައްދުން ފޭބި ފަހުން، ހޮސްޕިޓަލް ވަށައިގެންވާ ސަރަހައްދުތަކުން ސަތޭކައަށްވުރެ ގިނަ މީހުންގެ ހަށިގަނޑު ވަނީ ފެނިފައެވެ.
އދން ވަނީ އިޒްރޭލުން ހިންގާފައިވަނީ ފަލަސްޠީނުގެ ޖެނޮސައިޑް ކަމަށް ނިންމައި އެ ނަމުން ނަން ދީފައެވެ.
