ޖަރުމަނުވިލާތުން އިސްތިއުމާރީ ދުވަސްވަރު ނަމީބިއާގައި ހިންގި ލާއިންސާނީ އަމަލުތަކާއި، ޣައްޒާއާ ގުޅޭ ބައިނަލްއަގުވާމީ ޝަރީއަތުގެ މަޖިލީހުގައި ޖަރުމަނުން މިހާރު ގެންގުޅޭ ސިޔާސަތުތަކާ ގުޅިގެން ފާޑުކިޔުންތަކެއް އަމާޒުވެއްޖެއެވެ. މި މައްސަލައިގައި ނަމީބިއާގެ ފޮރިން މިނިސްޓްރީން ވަނީ ޖަރުމަނުގެ އަމަލުތަކާ މެދު ކަންބޮޑުވުން ފާޅުކޮށްފައެވެ.
ތާރީޚީ ރެކޯޑުތަކުން ދައްކާގޮތުގައި 1904 އާއި 1908 އާ ދެމެދު ޖަރުމަނުގެ އިސްތިއުމާރީ ބާރުތަކުން ވަނީ ނަމީބިއާގެ ހެރޭރޯ އަދި ނާމާ ދަރިކޮޅުގެ މީހުންނާ ދެކޮޅަށް ބޮޑުވެގެންވާ ގަތުލުއާންމެއް ހިންގާފައެވެ. މި ގަތުލުއާންމުގައި ހެރޭރޯ އާބާދީގެ 75 އިންސައްތަ އަދި ނާމާ އާބާދީގެ ދެބައިކުޅަ އެއްބައި މީހުން މަރާލާފައިވާ ކަމަށް ތާރީޚީ އިލްމުވެރިން ލަފާކުރެއެވެ. މިއީ 20 ވަނަ ގަރުނުގައި ހިންގި ފުރަތަމަ ގަތުލުއާންމު ކަމަށް ގިނަ ބަޔަކު ގަބޫލުކުރެއެވެ.
ޖަރުމަނުން މަރާފައި ވަނީ ފިރިހެނުންނެވެ. ޖަރުމަން ސަރުކާރުން އެއިރު އަންގާފައި އޮތީ ފިރިހެނުން މެރުމަށްފަހު އަންހެނުންނާ ދޮންމީހުން ގުޅުން ހިންގައި އިންސާނުންނަށްވާ ކަހަލަ ކުލަ އަލި ކުދިން ހޯދާށެވެ.
ޖަރުމަނުން ޖަރީމާއަށް އިއުތިރާފް ވެއެވެ. ނަމަވެސް ބަދަލު ދޭކަށް އެއްބަހެއް ނުވެއެވެ.
މި މައްސަލައިގައި ވާހަކަދެއްކެވި ބޭފުޅަކު ވަނީ، ޖަރުމަނުން ނަމީބިއާގައި ހިންގި ގަތުލުއާންމަށް ފުރިހަމަ ބަދަލު ދިނުމަށް އުޒުރުވެރިވަމުންދާއިރު، އައި.ސީ.ޖޭގައި އިސްރާއީލަށް ތާއީދުކުރާތީ އެކަމަށް ވަރަށް ބޮޑަށް ފާޑުވިދާޅުވެފައެވެ. ނަމީބިއާގެ ފޮރިން މިނިސްޓްރީން ބުނެފައިވަނީ، ޖަރުމަނުން އެ ގަތުލުއާންމު ގަބޫލުކޮށް މާލީ އެހީތެރިކަން ދޭނެ ކަމަށް ބުނި ނަމަވެސް، މިހާތަނަށް އެކަށީގެންވާ ބަދަލެއް ދީފައިނުވާ ކަމަށެވެ.
މީގެ އިތުރުން، ފަލަސްތީނުގެ ހައްގުގައި އެފްރިކާ އަދި ލެޓިން އެމެރިކާގެ ގައުމުތަކުން ދައްކަމުންދާ އެއްބައިވަންތަކަން މި ބަޔާނުގައި ފާހަގަކޮށްފައިވެއެވެ. މިއީ އިސްތިއުމާރީ ބާރުތަކާއި ބޭރުގެ ނުފޫޒުތަކާ ދެކޮޅަށް ދުނިޔޭގެ ފެންވަރުގައި ކުރެވެމުންދާ މަސައްކަތެއްގެ ގޮތުގައި ވަނީ ސިފަކޮށްފައެވެ.
