މުސްލިމުން ދަންނަންޖެހޭ އެއްކަމަކީ ދުޝްމަނުންގެ ފޮރުވިފައިވާ މަގުސަދެވެ. އެމީހުންގެ ބޭނުމަކީ ދީނާއި ނަބިއްޔުންނާއި ރަސޫލުންނަކީ ނުވާ އެއްޗެއްކަމަށް މީހުންނަށް ވިސްނައިދިނުމެވެ. ޙައްޤު ދީނަށް އުޅެ ނަބިއްޔުން ގަބޫލުކުރާ ހަމައެކަނި ބަޔަކީ މުސްލިމުންނެވެ. ޢަދުއްވުންގެ ބޭނުމަކީ މުސްލިމުންނަކީ ބޯދާ އަދި ބާޠިލު ޢަޤީދާއެއްގައި ތިބި ބައެއްކަން މީހުންނަށް އާންމުކޮށް ވިސްނައިދިނުމެވެ. އަދި އިސްލާމް ދީނަކީ ބޯދާ ޒަމާނަށް ނުފެތޭ ހައިޖާނު އުފައްދާ ދީނެއްކަން ކަށަވަރުކޮށްދިނުމެވެ. އެމީހުންގެ ދެވަނަ މަގުސަދަކީ ފައިސާހޯދުމެވެ. އެމީހުން ހަގީގަތުގައި އަޅުކަންކުރަނީ ފައިސާއަށެވެ. އެހެންވެ މިހަޔާތުގައި އެމީހުންނަށް މުހިންމުވަނީ ފައިސާއާއި އުފަލާއި އަރާމުއެވެ. އެމީހުން ޖަހާ ކޮންމެ މަޅިއެއްގައި މުސްލިމުން ޖެހުމާއެކު އެމަޅި ޖެހި މީހުންނަށް ބިލިއަނުން ފައިސާލިބެއެވެ. ސަލްމާން ރަޝް ޑައި (ރުޝްދީ) ސެޓަނިކް ވަރސަސް ލިޔުމުން މުސްލިމުން ކެކިގެން އެރިއެވެ. ނަތީޖާއަކަށްވީ ތާކުންތާކު ނުޖެހޭ ފޮތެއް ދުނިޔޭގައި އެންމެ ގިނައިން ވިކޭ ފޮތަކަށް ވުމެވެ. އަދި އެފޮތް އެތައް ބަހަކަށް ތަރުޖަމާކުރެވުމެވެ. އާޚިރުގައި އެފޮތުން ސަލްމާން ރަޝް ޑައި އަށް މިލިއަނުން ފައިސާ ލިބުނެވެ. ހަމައެގޮތަށް އެމަޅީގައި މުސްލިމުން ޖެހުމާއެކު މުސްލިމުން ދުނިޔޭގައި ބަދުނާމުކޮށް ފަޟީހަތްކުރިއެވެ. މިއީ ދީނުގެ ޢަދުއްވުންގެ ބޭނުމާއި މަގުސަދެވެ. އެހެންވެ އުއްމަތުގެ ޢަދުއްވުން ހިންގާ އަމަލުތަކަށް އަޅުގަނޑުމެން ރައްދުދޭންޖެހެނީ ޙިކުމަތްތެރިކަމާއެކުއެވެ.
އަދުގެ މިހާލަތަށް ރިއާޔަތްކުރާއިރު އަޅުގަނޑުމެން މުސްލިމުން ކުރަންޖެހޭ އެންމެބޮޑު ކަމަކީ ރަސޫލުﷲ ﷺ އަށް މާތްކޮށްހިތުމެވެ. އެއީ އެކަލޭގެފާނު ޢިއްޒަތްތެރިކުރުމެވެ. އެކަލޭގެފާނަށް ހުރުމަތްތެރިކޮށްހިތައި އެކަލޭގެފާނަށް އިޙުތިރާމްކުރުމެވެ. އެކަލޭގެފާނަށް އެންމެފުރިހަމަ މާނައިގައި ތަބާވެ އެކަލޭގެފާނަށް ލޯބިކުރުމެވެ. ހަމައެފަދައިން އެކަލޭގެފާނުގެ ސުއްނަތުގައި އެންމެފުރިހަމަގޮތުގައި ހިފުމެވެ. ނަތީޖާއަކަށްވާނީ ހުރިހާ މާނައެއްގައި އެންމެ ފުރިހަމަ ނަމޫނާ މުޖުތަމަޢުއަކަށް އަޅުގަނޑުމެންވުމެވެ. ސުލްހަވެރިކަމާއި އަމާންކަމާއި ފާގަތިކަމުގައި އަޅުގަނޑުމެން މިސާލަކަށްވުމެވެ. ދުނިޔޭގެ ކުރިމަތީގައި އިސްލާމް ދީނާއި އުއްމަތުގެ ބުރުސޫރަ ރީތިވުމެވެ. އުއްމަތުގެ ޢަދުއްވުން ހިންގާ ކެހިވެރި މަޅިތަކުން ސަލާމަތްވެވުމެވެ. މިކަންކުރުމަށްޓަކައި ފުރަތަމަ ޖެހެނީ ރަސޫލުﷲ ﷺ ޢިއްޒަތްތެރިކޮށް އެކަލޭގެފާނަށް މާތްކޮށްހިތުމަކީ ކޮބައިކަން ދެނެގަންނާށެވެ.
މިލިޔުން ލިޔުމުގެ ބޭނުމަކީ ރަސޫލުﷲ ﷺ އަކީ ކޮބައިކަމާއި އެކަލޭގެފާނަށް ކަމޭހިތުމަކީ ކޮބައިކަން ބަޔާންކުރުމެވެ. މިލިޔުމުގައި ފުރަތަމަ މިބަލަނީ އަޅުގަނޑުމެންގެ ރައްބު ﷲ ތަޢާލާ އެކަލާނގެ ނަބިއްޔާ މުޙައްމަދު ﷺ އަށް ދެއްވި ޢިއްޒަތާއި މަގާމާއި ދަރަޖައާއި މަތިވެރިކަމަށެވެ. ﷲ އެކަލާނގެ ނަބިއްޔާ ﷺ އަށް ދެއްވި ލޯތްބާއި އިޙުތިރާމާއި ޝަރަފަށެވެ. މިލިޔުމުގައި ދެން މިބަލަނީ އަޅުގަނޑުމެންނަށް އެކަލޭގެފާނު މުހިންމުވާ މައިގަނޑު ސަބަބަށެވެ. އެއަށްފަހު މިލިޔުމުގައި މިބަލަނީ އެކަލޭގެފާނާމެދު މާތްކޮށް ހިތުމުގެގޮތުން އަޅުގަނޑުމެން ކަންކުރަންވީގޮތަށެވެ. ޢިލްމާނީ ނުވަތަ ސެކިއުލަރ ފިކުރަށް ގައުމު ގެނބިގެންދާ ވަގުތު މިމައުޟޫއަށް އިންސާފުކުރުމަކީ ކޮންމެވެސް ދިވެއްސަކު ކުރަންޖެހޭ ކަމެއްކަމުގައި ދެކެމެވެ.
-ނުނިމޭ
