މުޅި ހަށިގަނޑު ފިނިވުމާއިއެކު އަހަރެންނަށް ލިބުނީ ހައިރާން ކަމެކެވެ. އޭނާއަށް އަހަރެންގެ ނަން އެނގުނީ ކިހިނަކުން ބާއޭ ހިތަށް އެރިއެވެ. އެހެންނަމަވެސް އެސުވާލު ކޮށްލާކަށް އަހަރެންނަކަށް ނުކެރުނެވެ. އެހެންނަސް އޭނާއަށް ޖަވާބު ދިނީމެވެ. ހަމައެކަނި ބޯ ޖަހާލުމަކުންނެވެ. ޖުމާނާއާއި ޖުވޭދާ ތިބީ ފަހަރަކު މީހަކަށް ބަލަބަލައެވެ. އެއްފަހަރު އޭނާއަށް ބަލައިލިއްޔާ އަނެއްފަހަރު އަހަރެންނާއި ދިމާއަށް ބަލައިލައެވެ. އޭރު ޖުވޭދާއަށްވެސް ކޮންމެވެސް އެއްޗެއް ވިސްނިއްޖެއެވެ. އެހެނީ ޖުމާނާ ކައިރީގައި ވަރަށް ސިއްރުން އެއީ ކޮންކުއްޖެއްތޯ ސުވާލު ކޮށްލިއެވެ.

މުޅި ޙަޔާތުގައިވެސް އަހަރެންގެ ކުރިމައްޗަށް އަންހެން ކުއްޖަކު އައިސް އަނގައިންބުނި މިއީ ފުރަތަމަ ފަހަރެވެ. އެކަން ކޮއްކޮމެންނަށްވެސް ވަރަށް ރަނގަޅަށް އެނގޭނެއެވެ. އެހެންކަމުން ކޮއްކޮމެންވެސް ތިބީ ހައިރާން ކަމާއި އުފަލާ ހިތުގައި އުފެދިފައި ހުރި ސުވާލުތަކުގެ ޖަވާބު ބޭނުންވެފައި ކަހަލަ އެތައް ޝުޢޫރުތަކެއް ޖަމާކޮށްގެންނެވެ. އޭނާގެ ގޮވާލުމަށް އަހަރެން އިޖާބަ ދިނުމުން ޖުމާނާއާއި ޖުވޭދާއަށް ވަކިވަކިން ބަލައިލިއެވެ. ”މިއީ ޖުނޭދުގެ ކޮއްކޮމެންތަ؟“ އެސުވާލުގެ ޖަވާބު ދިނީ ޖުވޭދާއެވެ. ”ލައްބަ، މީ ދޮންބެގެ ކޮއްކޮމެން. ތީ ކޮންކުއްޖެއްތަ؟“

ޖުވޭދާގެ އެ ސުވާލުން ޖުމާނާގެ ހިނިގަނޑު ފަޅައިގެން ދިޔައެވެ. އަނެއްކާވެސް ”ކޮންކުއްޖެއް“ މި ލަފުޒު ތަކުރާރު ވުމުންކަން އަހަރެންނަށް އެނގުނެވެ. އަހަރެން ކަންބޮޑުވާގޮތް ވިއެވެ. އެކަން ފޫބެއްދުމަށްޓަކާ އަހަރެން އޭނާއަށް ޖަވާބު ދިނީމެވެ. ”އާން… ލައްބަ..“ އެމަންޒަރު ފެނިފައި ޖުވޭދާ އަހަރެންނާއި ދިމާއަށް ހައިރާނުން ފުރިގެންވާ ނަޒަރަކުން ބަލައިލިއެވެ. ”ދޮންބޭ، ވާހަކަ ދައްކާ ކޮންމެސް އެއްދަރަޖަޔަކުން ވާހަކަ ދައްކަބަލަ. އޭނަވެސް ކޮންފިޔުޒް ނުވާނީ އޭރުންނެއްނު ދޯ މިސް ”ކޮންކުއްޖާ“.“ ސަމާސާ ރާގަކަށް ޖުވޭދާ ބުނެލިއެވެ. އަހަރެން ހުރީ ކަންބޮޑުވެފައެވެ. އޭނާ ހިތަށް އަރާނެ އެއްޗަކާމެދު ވިސްނުމުގައެވެ. އެހެނީ ޖުވޭދާގެ ވާހަކައިން އޭނާ ހިތްހަމަ ނުޖެހިދާނެ ކަމުގެ ބިރު އަހަރެންނަށް ހީވިއެވެ. އެހެންނަމަވެސް އޭނާ އެކަމަށްވެސް ކުރިމަތިލީ ހިނިތުން ވުމަކާއި އެކުގައެވެ. ”އަހަރެންނަށް ކިޔަނީ އައިޝާ. ބޭނުމިއްޔާ އައިޝް ކިޔާފަ މުޚާތަބު ކުރިޔަސް އެންމެ ރަނގަޅު.“ ވަރަށް މަޑުމައިތިރި ކަމާއި ހަމަ އެހާމެ އޯގާތެރިކަމާއިއެކީ އޭނާ އަމިއްލައަށް ތަޢާރަފު ވެލިއެވެ. އެވަޤުތު އަހަރެންގެ ހަނދާނަށް އައީ ޙާޝިމް އަހަރެންކައިރީގައި އޭނާގެ ނަން ބުނި ދުވަހެވެ. އާނއެކެވެ. އޭނާއަށް ކިޔަނީ އައިޝާއެވެ. އެކަހަލަ ވިސްނުމެއްގައި އަހަރެން ހުއްޓާ، ޖުމާނާ، އޭނާއާއި ސުވާލެއް ކޮށްލިއެވެ.

”އައިޝް، ދޮންބެ ދަންނަންތަ؟ މިހެން މިއަހާލީ އެންމެ ފުރަތަމަވެސް ދޮންބެގެ ނަމުން ގޮވާލީމަ.“ އެއީ ތެދެކެވެ. އޭނާއަށް އަހަރެންގެ ނަން އެނގުނީ ކިހިނަކުންބާއެވެ؟ އަނެއްކާ، އަހަރެން އޭނާއަށް ފާރަލީ ފަދައިން، އޭނާވެސް އަހަރެންނަށް ފާރަލަނީ ބާއެވެ؟ އޭނާއަށް އަހަރެން ކަމުދަނީ ބާއެވެ؟ އަހަރެންގެ ހިތުގައި އެއްފަހަރާ އެތައް ސުވާލުތަކެއް އުފެދުނެވެ. ޖަވާބު ބޭނުންވާ ސުވާލު ތަކެކެވެ. އެހެންނަމަވެސް އަހަރެންގެ ހިތުގެ އަޑު އޭނާއަށް އިވުނު ކަހަލައެވެ. އެހެނީ އޭނާ އަހަރެންގެ ނަން އެނގުނު ގޮތާއި ދަންނަ މިންވަރު ބުނެލަ ދިނެވެ. އެވަޤުތު އަހަރެންގެ ހަނދާނަށްވެސް އައީ އެންމެ ފުރަތަމަ އަހަރެންނަށް އޭނާ ފެނުނު ދުވަހެވެ. ގަރާޖުންނެވެ. އެދުވަހު ޚާޝިމް ތަކުރާރުކޮށް އަހަރެންގެ ނަން އޭނާގެ ކުރިމަތީގައި ކިޔަމުން ގެންދިޔައެވެ. އެވަޤުތު އޭނާގެ ސަމާލުކަން އަހަރެންގެ މައްޗަށް ހުރީތާއެވެ. އެހެންނޫންމަ، އަހަރެން ކަހަލަ އާދައިގެ މީހެއްގެ ނަން، އެތައް ދުވަހެއް ފަހުންވެސް ހަނދާނެއް ނުހުރީސްތާއެވެ. ކޮންމެއަކަސް އޭނާ ވާހަކަ ދައްކަމުން ގެންދިޔައިރު، އަޑު އެހުން ފިޔަވާ، މާބޮޑުކަމެއް އަހަރެންނަކަށް ނުކުރެވުނެވެ. އެހެންނަމަވެސް ކޮއްކޮމެން އޭގެ ފައިދާ ނެގިއެވެ. އެހެނީ އެކުދިން އޭނާއާއި އެތައް ވާހަކަތަކެއް ދައްކަމުން ގެންދިޔައެވެ. މުޅި ވަނަވަރު އޮޅުންފިލުވަން ބޭނުންވެފައި ހުރިކަހަލައެވެ.  އެކުދިން ތިބީ ވަރަށް އުފަލުންނެވެ. އެހާމެ ހިތްހަމަވެސް ޖެހިފައެވެ. މިއީ އެތައް ޒަމާންތަކަކަށްފަހު، އަހަރެންނަށް އެކުދިންގެ މޫނުމަތިން ފެނުނު އުޖާލާ ކަމެކެވެ. މިއަދަކީ ހަމަ ޙަޤީޤަތިގައިވެސް ވަރަށް އުފާވެރި ދުވަހެކެވެ. އެހާމެ ތާރީޚީ ދުވަހެކެވެ. އެހެނީ އަހަރެން ކޮއްކޮމެންނަށްޓަކާ ރެއާއި ދުވާލު ކުރި ބުރަ މަސައްކަތުގެ ފޮނި ނަތީޖާ ލިބުނު ދުވަހެވެ. ހަމަ އެހެންމެ، އަހަރެންގެ ހިތް  އެ އިންސާނަކަށްޓަކާ ފުރަތަމަ ފަހަރަށް ވިންދު ޖަހާލި އިންސާނާ އަހަރެންނާއި އެހާ ގާތުގައި ހުރުމެވެ.

ހިތާއި ހިތުން ހިނިތުން ވެލުމާއިއެކު ވިސްނުމުގެ ތެރެއަށް ގެއްލިފާ އަހަރެންނަށް ހުރެވުނީއެވެ. އެވަޤުތު އަހަރެން ސިއްސައިގެން ދިޔައީ އަނެއްކާވެސް އޭނާގެ މަޑުމައިތިރި ގޮވާލުމުންނެވެ. ”ޖުނޭދު، މާ ބޮޑު މައްސައަކަށް ނުވަންޏާ އަހަރެންނަށް ނަންބަރު ދީފާނަންތަ؟“ އަހަރެން ކަންބޮޑުވާގޮތް ވިއެވެ.  އެންމެ ފުރަތަމަ ބައްދަލު ވުމުން އަހަރެންގެ ނަންބަރު ހޯދަން އެއުޅެނީ ކީއްކުރަންބާއެވެ؟ އެހެންނަމެވެސް ކެތްތެރިކަން ކުޑަވެފާތިބި، އަހަރެންގެ ކޮއްކޮމެންނަށް އެކަންވީ ވަރަށް ރަނގަޅު ކަމަކަށެވެ. ”ތެދެއް ދޮންބޭ، އަވަހަށް ނަންބަރު ދީ. އަހަރެން ކިޔާލަދެންތަ؟“ ޖުވޭދާ ބުނެލިއެވެ. ޖުވޭދާ ނަންބަރު ކިޔައިދިނުމުގެ ކުރިން، އަހަރެން ވާހަކަ ދައްކަން ފެށީމެވެ. އޭނާގެ ސަމާލުކަން ޖުވޭދާގެ ކިބައިން ދުރުކުރުވުމުގެ ބޭނުމުގައެވެ. އެހެނީ އެއީ އެހާ ރަނގަޅު ކަމެއްކަމަށް އަހަރެންނަށް ނުފެނުނީތީއެވެ. އެއްޗެކޭ ހީނުކުރާމަތިން އަހަރެން ސުވާލެއް ކޮށްލަންތަ؟.. އައިޝާ!“ އަހަރެންނަށް އޭނާގެ ނަން ކިޔުނީ ވަރަށް މަސައްކަތުންކަން ޚުދު އޭނާވެސް ފާހަގަ ކުރިއެވެ. ”އަހާލަބަލަ.“ ވަރަށް އޯގާތެރިކަމާއެކީ އޭނާ ބުންޏެވެ. ”އަހަރެންގެ ނަންބަރު ބޭނުންވަނީ ވަރަށް މުހިންމު ކަމަކުތަ؟“ އޭނާގެ މޫނުމައްޗަށް ވެރިވީ ހިނިތުން ވުމެކެވެ. އެހެންނަމަވެސް އޭނާ ޖަވާބު ދިނީ ވަރަށް ވިސްނާފަ ކަހަލަ ގޮތަކަށެވެ. ކޮންމެވެސް ޖަވާބެއް ދޭން ޖެހޭނެތީ ކަހަލަ ގޮތަކަށެވެ. ”އާން. އަހަރެންގެ ސައިކަލުގެ މައްސަލައެއް އުޅުނަސް އަހަރެންނަށް ޖުނޭދުއަށް ގުޅާލައިގެން މައްސަލަ ހައްލު ކޮށްލަން ފަސޭވާނެ އެއްނު. ކަމެއް ދިމާވާނީ ކޮންވަޤުތަކު ކޮންތާކު ކަމެއް ނޭންގެނެއެންނު ދޯ. އެހެންވެގެން. އެކަމަކު ޖުނޭދު ބޭނުން ނުވަންޏާ ނުދިނަސް އެންމެ ރަނގަޅު.“ އޭނާގެ އެންމެ ފަހު ޖުމުލަ ބުނިއިރު މޫނުމައްޗަށް މާޔޫސްކަން ވެރިފައި ހުރި މަންޒަރު އަހަރެންނަށް ފެނުނެވެ. ކޮއްކޮމެންވެސް އެކަން ފާހަގަ ކުރިއެވެ. ”ކީއްތަވާނީ ނަންބަރު ދިނަކަސް. އޭނަ އެބުނީ ރަނގަޅު ވާހަކައެއްނޫންތަ ދޮންބޭ.“ އޭނާއާއި އެއްބަސްވަމުން ޖުމާނާ ބުނެލިއެވެ. ”އެންމެ ރަނގަޅު، ނޯޓު ކޮށްލާ.“ އަހަރެންގެ ޖަވާބުން އޭނާއަށް އުންމީދެއް އައުވިކަހަލައެވެ. އެހެނީ ވީ އެންމެ އަވަހަކަށް މޯބައިލް ފޯނު ނަގާ، ނަންބަރު ނޯޓު ކުރުމަށް ތައްޔާރު ވެލިއެވެ.

ނަންބަރު ކިޔައިދިނުމުން ނޯޓުކުރުމާއެކީ، އަހަރެންގެ ފޯނަށް ގުޅާލިއެވެ. އަދި އޭނާގެ ނަންބަރު އަހަރެންނަށް ދިނީ ކަމުގައި ބުނެލިއެވެ. އަހަރެންގެ މޫނުމަތިން ހައިރާންކަން ފެނުމުން އޭނާ ދިނީ ވަރަށް ސާދާ ޖަވާބެކެވެ. ”އަހަރެންގެ ނަންބަރު މިދިނީ އެއްވެސް ކަމެއް ދިމާވެގެން އަހަރެން ގުޅިޔަސް އެއީ އަހަރެންކަން އެނގޭނެ އެއްނު ދޯ.“ ”އަހަރުމެންނަށްވެސް ނަންބަރު ދޭންވީނު. އޭރުން ދޮންބެ ފޯނު ނުނެގިޔަސް އަހަރުމެންނަށް ގުޅާލީމަ ފަހަރެއްގަ ދޮންބެއާ ދިމާވެދާނެ އެއްނު ދޯ ދޮންތާ.“ ޖުވޭދާ ބުނެލިއެވެ. ”ދެން ތި މީހުން މާ ކަންތައް ބޮޑުކުރަން އުޅޭނެ ކަމެއްނެތް އިނގޭ.“ ދެލޯ ބޮޑުކޮށްލާފަ އަހަރެން ބުނެލީމެވެ. ”ސޮރީ.“ ޖުވޭދާ ބުންޏެވެ. ”އަސްލު ތީ ވަރަށް ރަނގަޅު ޚިޔާލެއް. އެކަމަކު މިވަޤުތު ނެތް މާގިނައިރު މަޑުކުރެވޭކަށްވެސް. ރައްޓެހިންނާއެކީ ލަންޗަކަށް އައީ، އެމީހުން އެތިބީ އަހަރެން ނުގޮސްގެން ލަސްވެފަ. ދަނީ އިނގޭ ޖުނޭދު. ތޭންކްސް ފޯ ދަ ނަންބަރ.“ އެހެން ބުނުމާއިއެކު ކޮއްކޮމެންނަށް ލޯބި ހިނިތުންވުމެއް ދީފާ އޭނާ ދިޔައީއެވެ. އަހަރެންގެ ހިތަށް ބުނެދޭން ނޭންގޭ ކަހަލަ އުފާވެރިކަމެއް ވެރިވެގެން ދިޔައެވެ. ވޭތުވެދިޔަ ދުވަސްތަކުގައި ކުރަމުންދިޔަ ފިކުރުތައްވެސް ހިނދުކޮޅަކަށް ނަމަވެސް ހަނދާންނެތުނު ކަހަލައެވެ. އޭނާ ދިޔުމުން ކޮއްކޮމެން އުފަލުން ފުންމައިގަތެވެ. ޖުމާނާ ބާރަށް ހަޅޭއްލަވައިގަންނަން ތައްޔާރުވީ ވަޤުތު، އަހަރެން އަވަހަށް އޭނާގެ އަނގަމަތީގައި އަތް އެޅީމެވެ. ”ތިހެން ނޫޅެބަލަ. އަދި އެއީ ކާކުކަމެއްވެސް ނޭންގޭނު.“ ވަރަށް ރަކިވެފައި ހުރި ޒާތަކަށް އިނދެފައި އަހަރެންނަށް ބުނެލެވުނެވެ. ”ދޮންބެ ދޮގު ނުހަދާ ބުނެބަލަ. އެއީ އެއްކަލަ ކުއްޖާ ދޯ؟“ ޖުމާނާ އަހަރެންނާއި ސުވާލުކޮށްލިއެވެ. އަހަރެން އާނއެކޭ ބުނުމުގެ ގޮތުން މަޑުމަޑުން ބޯޖަހާލީމެވެ. ޖުވޭދާ އިނީ ވާނުވާ ނޭންގިފައެވެ. ”ދޮންބޭ، އަހަރެންނަށް ސިއްރުން ތި ދެމީހުން ކޮންކަހަލަ ޖަރީމާއެއް ތި ހިންގަނީ؟“ ޖުވޭދާ ހިތްހަމަ ނުޖެހޭގޮތްވިއެވެ. ”ޖުވޭ ކޮއްކޯ، އަހަރުމެން ކޮއްކޮއަށް ސިއްރުން އެއްވެސް ކަމެއް ނުކުރަން. މީ ތަންކޮޅެއް ކުރިން ދޮންބެ ނިދީގަ އޮވެގެން ކޮންމެސް ކުއްޖަކަށް ގޮވީމަ މި އަހާލީ އެއީ އެކުއްޖާތޯ.“ ޖުމާނާގެ ވާހަކައިން އަހަރެން ހަނދާންވީ އެދުވަހު ކަންތައްވީ ގޮތެވެ. އެއީ ޖުމާނާއަށް އަހަރެންގެ ޙަޤީޤަތް ފަޅާއެރި ދުވަހެވެ. އޭގެފަހުން ބައްޕައާއި ކުރެވުނު ޒުވާބާއި ކަންހިނގާ ދިޔަގޮތް އަހަރެންގެ ލޮލުގެ ކުރިމަތިން ސިފަވެގެން ދިޔައެވެ.

އަހަރެން ސިއްސައިގެން ދިޔައީ، ކޮންމެވެސް މީހަކު، އަހަރެންގެ މޫނުމައްޗަށް ބާރު ފުއްޓަތްކެއް ޖެހި އަޑަށެވެ. ކޮންމެވެސް ވަރަކަށް ކަންބޮޑުވާގޮތް ވިއެވެ. އަހަރެންގެ ކުރިމަތީގައި ހުރީ ޝާމިލްއެވެ. ”ހޭ ބްރޯ، މިހާރު ހާދަ ދިމާނުވޭ ދޯ. ކޮންތާކުތަ ތިއުޅެނީ؟ ޙަސަންވެސް ބުނި މިހާރު ޖުނޭ ނުފެންނަ ވާހަކަ.“ ޝާމިލްއަކީ ކާކުކަން ޖުމާނާއަށް އެނގިދާނެތީ އަހަރެން ކަންބޮޑުވިއެވެ. ”އާން މިދުވަސްކޮޅު ތަންކޮޅެއް ބިޒީކޮން މިއުޅެނީ. ކޮއްކޮގެ އެގްޒާމް ނިމެންދެން އެކުދިން ކައިރީގަ ގޭގަ ގިނަވަޤުތު މަޑުކޮށްލީ.“ އަހަރެމެން ދެމީހުން ވާހަކަ ދައްކަން ތިބި މަންޒަރު ބަލަން ދެކުދިންވެސް ތިބީއެވެ. ”އޯކޭ ބްރޯ ދެން ގޮސްލާނަން އިނގޭ. ސީޔޫ.“ އަހަރެން މަޑުމަޑުން ބޯ ޖަހާލީމެވެ. ޝާމިލް ދިޔުމުން އަހަރެން ނޫންކަމަށް ހަދާފައި ޖުމާނާއާއި ދިމާއަށް ބަލައިލީމެވެ. އެއީ ކާކުކަން އޭނާއަށް އެނގިއްޖެއެވެ. އަހަރެން މަޑުމަޑުން އިސްދަށަށް ޖަހާލީމެވެ. އިތުރު އެއްޗެކޭ ބުނާނެ ހިތްވަރެއް ނުލިބުނެވެ. އަހަރެން ޖުމާނާއަށް ވަޢުދުވެފައިވީ ފަދައިން ޢަމަލުނުކުރެވުން އެއީ އޭގެ ސަބަބެއް ކަމަށް ވެދާނެއެވެ. އެހެންނަމަވެސް އަހަރެން ބޭނުންވަނީ މަސްތުވާ ތަކެއްޗާއި ދުރަށް ދާށެވެ. އެއީ ގޯހެކެވެ. ފާފައެކެވެ. އަހަރެންނަކީވެސް ކޮންމެވެސް ދުވަހަކުން މި ދުނިޔެއަށް އަލްވަދާޢު ކިޔާ، ﷲ ގެ ހަޟްރަތަށް ދާންޖެހޭނެ މީހެއްކަން އެނގެއެވެ. އެކުދިންގެ މުސްތަޤްބަލު ބިނާކުރަން ހުރި މީހަކީވެސް ޚުދު އަހަރެންނެވެ. އަހަރެންގެ އަމިއްލަ ޒާތީ ދިރިއުޅުމާއި ދޭތެރޭގައިވެސް  ވިސްނަން ޖެހޭނެތާއެވެ. އެހުރިހާ ކަމަކާމެދު ވިސްނާލުމާއިއެކު، ޝާމިލް އަދި ޙަސަންއާއި ދުރަށް ދިޔުމަށް އަހަރެން ވިސްނީމެވެ. އާނއެކެވެ. އެމީހުންވެސް މި އަނދަވަޅުން ނިކުމެ ހަރުދަނާ ދިރިއުޅުމެއް އުޅޭތަން ދެކެން އަހަރެން ބޭނުމެވެ. އެހެނީ އެއީ އަހަރެންގެ އެންމެ ކުޑައިރުގެ އެކުވެރިންނެވެ.  އެހީތެރިކަމަށް އެންމެ ބޭނުންވި ދުވަހު، އަހަރެންގެ މިތުރުންގެ ގޮތުގައި ތިބި ބަޔަކީ އެއީއެވެ. އެއީވެސް އިންސާނުންނެވެ. އެމީހުންނަށްވެސް އަޅާލާ، އޯގާތެރި ބައެއްގެ އެހީތެރިކަން ލިބުން ޙައްޤެވެ.  އެމީހުންނަށް ވިސްނައިދޭން އަދިވެސް މަސައްކަތް ކުރާނަމެވެ. މީގެ ކުރިންވެސް މަސައްކަތްކުރި ފަދައިންނެވެ. އެމީހުންގެ ޒިންމާގެ ދަށުގައި ބަޔަކު ނެތްކަން އެއީ އެމީހުން ހަމަ މަގަށް އެޅެން ބޭނުންނުވާ ސަބަބު ކަމަށްވެސް ވެދާނެއެވެ. އެހެންނަމަވެސް އުންމީދު ކަނޑައެއް ނުލާނަމެވެ. އެހެނީ އެމީހުން ހަމަ މަގަށް އެޅުން އެއީ އަހަރެންވެސް ހަމަޖެހޭ ދިރިއުޅުމަށް މަގުކޮށަން ފަސޭވާނެ ކަމަކަށް ވެގެންދާނެކަން ޔަޤީނެވެ. މި ވިސްނުން މިގޮތަށް މިގެންގުޅެނީ އަހަރެންގެ އަމިއްލަ ބޭނުންތަކެއް އޮވެގެންނޭ ބުންޏަސް އެންމެ ރަނގަޅުތާއެވެ. އެހެނީ، އެކަމުންވެސް އެހެންބަޔަކަށް ތެދުމަގު ފެނިގެން އެބަ ދެއެވެ.

އަނެއްދުވަހު އަހަރެން މަސައްކަތަށް ތައްޔާރުވެގެން ގަރާޖަށް ދިޔައީމެވެ. އަހަރެންނާއި އެންމެ ފުރަތަމަވެސް ދިމާވީ ޚާޝިމްއެވެ.  ޙާލު އަހާލުމަށްފަހު ކޮއްކޮމެންގެ ޙާލުވެސް އޭނާ އަހާލިއެވެ. އެއަށްފަހު އޭނާ ފެށީ ބޮޑު ވާހަކައެވެ. ”އޭ، އެނގޭތަ؟ އަހަރެން އެއްކަލަ ކުއްޖާގެ ވަނަވަރު ބަލައިފީމޭ. ކުރިންވެސް އޭނަގެ ނަން ބުނިން ދޯ. މިހާރު އެނގޭ އެއީ ކޮންތާކު އުޅޭ ކުއްޖެއްކަންވެސް. ޢުމުރު. ހުރިހާ އެއްޗެއް.“ ވަރަށްބޮޑު ތަޙުޤީޤެއް ނިންމާލައިގެން އައިސް ހުރިކަހަލަ ޝުޢޫރެއް  ޚާޝިމްގެ މޫނުމަތިން ފެންނަން ހުއްޓެވެ. އެހެންނަމަވެސް އަހަރެންގެ މޫނުމައްޗަށް ވެރިވެފައިވާ ހިނިތުންވުމުން ޚާޝިމްއަށް ކޮންމެވެސް ކަމެއް އެބަ އުޅޭކަން ފާހަގަވިއެވެ. ހަމަ އެވަޤުތުމެ،  ތަންކޮޅެއް ކައިރިޔަށް ޖެހިލާފައި، އަހަރެންގެ މޫނާއި ދިމާއަށް ވަރަށް ރަނގަޅަށް ބަލައިލިއެވެ. އަހަރެން ކައިރިޔަށް ހިނިއަންނަގޮތް ވުމުން ކޮންމެވެސް ކަމެއް ފޮރުވާހެން އޭނާއަށް ހީވިއެވެ. ”އޭ، ކޮންމެސް ކަމެއް އެބައުޅޭ. ޖުނޭ، އަނެއްކާ އެކުއްޖާޔާ ދިމާވީތަ؟ ނޫނީ އެއަށްވުރެ މައްޗަށް ކަންތައް ދިޔައީތަ؟“ ޚާޝިމްގެ ސުވާލަށް އަހަރެންނަށް ޖަވާބު ނުދެވި އުޅެނިކޮށް، ފަހަތުން އަހަރެންގެ ނަން ގޮވާލި އަޑު އިވިއްޖެއެވެ. ”ހައި ޖުނޭދު.“ ދެމީހުންނަށް އެއްފަހަރާ އެދިމާއަށް އެނބުރި ބަލައިލެވުނެވެ. އަހަރެމެންގެ ކުރިމަތީގައި ހުރީ ޢައިޝާއެވެ. އަހަރެން މަޑުމަޑުން އޭނައަށް ޖަވާބު ދިނީމެވެ. ޚާޝިމްހުރީ ބުނާނެ އެއްޗެއް ނޭންގިފައެވެ. ވަކި ވަރަކަށް އަނގަ ހުޅުވިފައެވެ. މަޑުމަޑުން ޚާޝީމްއާއި ކައިރިވެލާފައި އަނގަ ލެއްޕުމަށް ބުނެލީމެވެ. ޚާޝިމްވެސް ތެޅިގެންފައި ހަމަޖެހިލިއެވެ. އެހެންނަމަވެސް އެއްވެސް އެއްޗެއް ނުބުނެ މަޑުން ހުރީއެވެ. އަހަރެން ޢައިޝާއާއި ވާހަކަ ދައްކަނީ ކޮންގޮތަކަށްތޯ ބެލުމަށްޓަކައެވެ. އަހަރެންވެސް ޚާޝިމްއާއި ދިމާއަށް ވައްކަޅިން ބަލައިލުމާއިއެކު، ޢައިޝާ ކައިރިޔަށް ދިޔައީމެވެ. ”އަނެއްކާ ސައިކަލު ކޮށިއެރީތަ؟“ ސަމާސާ ރާގަކަށް އަހަރެން ބުނެލީމެވެ. އަހަރެންގެ ވާހަކަ ހުރިގޮތުން ޚާޝިމްގެ ޝައުޤުވެރިކަން އިތުރުވީހެން  ހީވިއެވެ. ”އާން. ބުރަކި ތަންކޮޅެއް  ދޫވެފަ އިންހެން ހީވާތީ ޗެކު ކޮށްލަން މި އައީ. ގުޅާލުމުގެ ކުރިން މިތަނުން ދިމާވޭތޯ ބަލާލަން މި އައީ.“ ޢައިޝާގެ އެންމެ ފަހު ޖުމުލަ އަޑުއިވުމާއިއެކު ޚާޝިމްގެ އަނގަ ފެޅިއެވެ. ”ގުޅާލުމުގެ ކުރިންނޭ؟ ޖުނޭގެ ނަންބަރުވެސް އެބައޮތްތަ؟“ އެވަޤުތު ޢައިޝާ އަހަރެންނާއި ދިމާއަށް ބަލައިލިއެވެ. ޖަވާބު ދިނުމުގެ ކުރިން އަހަރެންގެ ހުއްދައަކަށް އެދެން ބޭނުންވި ކަހަލަ ގޮތަކަށެވެ. ލުއިލުއި ހިނިތުން ވުމަކުން ހީލުން ފިޔަވާ އިތުރުކަމެއް އަހަރެންނަކަށް ނުކުރެވުނެވެ. ޢައިޝާ ހަމަޖެހިލާފައި ޚާޝިމްއަށް ޖަވާބުދިނެވެ. ”އެމީހަކު އަމިއްލަ އިޚްތިޔާރުގަ ދިނީމަ ނަންބަރުވެސް އޮވެދާނެ ދޯ. އެއީ އަނެއްކާ މައްސަލައެއްތަ؟“ ހީލާފައި ޢައިޝާ ބުނެލިއެވެ. ”ޖުނޭ؟“ ސުވާލުން ފުރިގެންވާ ނަޒަރަކުން އަހަރެންނާއި ދިމާއަށް ބަލައިލުމާއިއެކު ޚާޝިމް ގޮވާލިއެވެ. ”އާން އއިއްޔެގަ ރެސްޓޯރަންޓުން ދިމާވެގެން ދޯ ޢައިޝާ.“ ޚާޝިމް ހޭނެތިގެން ވެއްޓެން އުޅުނު ކަހަލައެވެ. ”އަހަރެންގެ ބޮލަށް އެބަ އެނބުރުން އަރާ.“ ދެފަރާތަށް ފާޑަކަށް ހެލިލާފައި ޚާޝިމް ބުނެލިއެވެ. ޢައިޝާ ކަންބޮޑުވާގޮތް ވިއެވެ. އެހެންނަމަވެސް އެކަމާ ހާސްނުވާން ޢައިޝާ ގާތުގައި އަހަރެން ބުނީމެވެ. އެވަޤުތު ވެގެން އުޅޭގޮތް ޢައިޝާއަށްވެސް ވިސްނުނެވެ. ”ބޭބޭ، ހަމަޖެހޭ. ޖުނޭދު އަހަރެންނަށް ނަންބަރު ދިނީ އަހަރެންގެ އެދުމުގެ މަތިން. ބޭބެ ހިތްހަމަ ނުޖެހެންޏާ އަހަރެން ޖުނޭދުއަކަށް ނުގުޅާނަން.“ ”ނޫނޭ ކޮއްކޯ، ކޮންމެސް އެހެން ނުހަދާތި. ކޮއްކޮ ބޭނުން ވަރަކަށް ޖުނޭދުއަށް ގުޅަންވީ. އަހަރެންގެ އިޒުނައަކަށް އެދޭނެކަމެއް ނެތް.“ ޢައިޝާ ހުރީ މިވަނީ ކިހިނެއްކަން ނޭންގިފައެވެ. ”ދެން ތި ސަކަރާތެއް ޖަހާނެކަމެއް ނެތް. ޢައިޝާ މިތަނަށް އެއައީ ޚިދުމަތެއް ހޯދަން. އޭނަ ބޭނުންވާ ކަންތައް ކޮށްލަ ދިނީމަ ހުންނާނީ ރަނގަޅަށް.“ އަހަރެން ވަރަށް ސީރިޔަށް ވެވޭތޯ މަސައްކަތް ކުރީމެވެ. އަދި އެވަޤުތު ސައިކަލު ކައިރިޔަށް ގޮސް މައްސަލަ ބަލަން އުޅުނީމެވެ. ސައިކަލުގެ ބުރަކި ތަންކޮޅެއް ދޫވެފައި ހުރިކަމަށް އަހަރެންނަށްވެސް ފާހަގަ ކުރެވުނެވެ. އެކަން ހައްލުކޮށްލާފައި ސައިކަލު ޢައިޝާއާއި ހަވާލުކޮށްލީމެވެ. މަސައްކަތުގެ އަގު އަހާލުމުން، އަގު ނުދިނަސް އެންމެ ރަނގަޅުކަމަށް އަހަރެން ބުނީމެވެ. އެހެންނަމަވެސް ކޮންމެވެސް އެއްޗެއް ނުދީ އެތަނުން ދިޔުމަކަށް ޢައިޝާގެ ހިތެއް ނުރުހުނެވެ. ސައިކަލަށް އަރާ ދުއްވާލުމުގެ ކުރިން، އަނެއްކާވެސް ސައިކަލުން ފައިބައިގެން އަހަރެންގެ ކައިރިޔަށް އައެވެ. އެވަޤުތު ޢައިޝާ ބުނަން ބޭނުންވަނީ ކީކޭތޯ އަޑުއެހުމަށްޓަކާ، ޚާޝީމް ކަންފަތް ދީގެން ހުއްޓެވެ. ”ޖުނޭދު ފްރީވީމަ ގުޅައްޗޭ އިނގޭ.“ އަހަރެންގެ މެޔަށް ހީވީ ފިނިފެން އެއްޗެއް އަޅާލިހެންނެވެ. ކީއްވެގެން ކަމެއް ނޭންގުނެވެ. ހަމަ އެހެންމެ ދޭނެ ޖަވާބެއްވެސް އަހަރެންނަކަށް ނޭންގުނެވެ. އެހެންނަމަވެސް ޚާޝިމްއަކަށް އަނގަމަޑުން ލައިގެންނެއް ނުހުރެވުނެވެ. ”އާން، އަހަރެން ޖުނޭއަށް ހަނދާން ކޮށްދޭނަން.“ ޢައިޝާ، ޚާޝިމްއާއި ދިމާއަށް ފާޑަކަށް ބަލައިލިއެވެ. އަދި ހީލއެވެ. އަހަރެން ކައިރިޔަށްވެސް ހިނިއަންނަ ގޮތްވިއެވެ.  މަޑުމަޑުން ބޯޖަހާލައިފާ ޢައިޝާ ސައިކަލަށް އަރައިގެން ދިޔައީއެވެ.

ޢައިޝާ ގޮސް އޮބާލަންދެން ބަލަހައްޓައިގެން ހުރުމަށްފަހު، ޚާޝިމް އަހަރެން ކައިރިޔަށް އައިސް ހުއްޓުނެވެ. އަދި އުކުޅުގައި އަތްވިއްދާލައިގެން، އިރުކޮޅެއް ވަންދެން އަހަރެންނާއި ދިމާއަށް ބަލަހައްޓައިގެން ހުއްޓެވެ. އަހަރެންވެސް ބުނާނެ އެއްޗެއް ނޭންގިފާ ހުރީމެވެ. އެހެންމަވެސް ވެރިވެފައިވާ ހަމަހިމޭންކަން ނައްތާލުމުގެ ނިޔަތުގައި އަހަރެން ވާހަކަ ދައްކަން ފެށީމެވެ. ”ހަމަ އަސްލުވެސް ތި ހީކުރާކަހަލަ އެއްވެސް ކަމެއް ނެތޭ. އަހަރެންނަކަށްވެސް ނޭންގެ އޭނަ އައިސް އަހަރެންނާ ވާހަކަ ދައްކަންފެށީ. އިއްޔެގަ.“ އަހަރެން ވާހަކަ ދައްކަދައްކާ ހުއްޓާ ކުއްލިޔަކަށް ޚާޝިމް އައިގޮތަށް އައިސް އަހަރެން އުރާލީއެވެ. އުފަލުގެ ކޮޅެއް ނެތްކަހަލަ ގޮތަކަށެވެ. އަހަރެން ހުރީ ހަދާނެ ގޮތެއް ނޭންގިފައެވެ. ”ޖުނޭ ހަމަ އަސްލުވެސް އަހަރެން ވަރަށް އުފާވެއްޖެ. ތީ އަހަރެން ބޭނުންވި ގޮތް. އަހަރެންނަށް ޖުނޭގެ ޙަޔާތުގައި ދިމާވި ކަންތައްތަކުގެ ވާހަކަތައް ކިޔައިދިން ދުވަހުން ފެށިގެންވެސް ޖުނޭއަށް އެނޫން ދުވަހެއް ދައްކަވާތޯ ވަރަށް ދުޢާކުރަން. އަލްޙަމްދިﷲ. އިންޝާﷲ، ދެން ހުރިހާ ކަމެއްވެސް ދާނީ ރަނގަޅަށް. އަހަރެން ބުނާނެ ވާހަކައެއްނެތް. ތި ލިބުނު ފުރުޞަތުގެ ބޭނުން ރަނގަޅަށް ހިފާތި. ރަނގަޅުގޮތުގަ ހިފާތި.“ ޚާޝިމްގެ ވާހަކައިން އަހަރެންނަށް އިތުރު ހިތްވަރެއް ލިބިގެން ދިޔައެވެ. ހިތުގައި ވަރުގަދަ ޢަޒުމެއް ކަނޑައެޅީމެވެ. ދެން ފަސް އެނބުރި ނުބެލުމަށެވެ. ވިޔާނުދާ ހުރިހާ ކަމެއް ދޫކޮށްލުމަށެވެ. އަލުން އައު ފެށުމަކުން ދިރިއުޅުން ފެށުމަށެވެ. ކޮއްކޮމެންގެ ކުރިމަގު އުޖާލާ ކުރުމަށް ގަދައަޅާ މަސައްކަތް ކުރުމަށެވެ. ފުން ނޭވާއެއް ލުމާއިއެކު، އަހަރެންގެ މަސައްކަތައިގެން ކުރިޔަށް ދިޔައީމެވެ. ހަމައެއާއިއެކު، ދުވަހުގެ މަސައްކަތް ނިންމާލުމަށްފަހު، އަހަރެން ދިޔައީ ގެއަށެވެ.

ފެންވަރާލައިގެން ނިކުމެ ކޮޓަރި އެނދުގައި އޮށޯވެލައިގެން އޮތީމެވެ. އެވަޤުތު ޖުމާނާ އައިސް ކޮޓަރި ދޮރުގައި ޓަކި ޖަހާލިއެވެ. އަހަރެންގެ އިޒުނައާއިއެކު ޖުމާނާ އެތެރެއަށް ވަނެވެ. ވަރަށް މަޑުމައިތިރި ކަމާއިއެކީ އައިސް އަހަރެން ކައިރީގައި އިށީންދެލިއެވެ. އެހެންނަމަވެސް ދުލަކުން އެއްވެސް ބަހެއް ބޭރެއް ނުކުރެއެވެ. އިރުކޮޅެއް ވަންދެން ބަލަހައްޓައިގެން އޮތުމަށްފަހު އަހަރެން ކޮޅަށް ތެދުވެލީމެވެ. އަދި ވީގޮތެއް އޮޅުންފިލުވާލުމަށް ސުވާލުކޮށްލީމެވެ. ޖުމާނާއަށް ރޮވޭގޮތް ވިއެވެ. ”މިހާރު ދެން ކިޔެވުމުގެ އެއް މަރުޙަލާ މި ނިމުނީނު ދޯ. އަހަރެން އިތުރަށް ކިޔަވަން ބޭނުން. އެކަމަކު ދޮންބެއަށް އިތުރަށް ބުރަކުރާކަށް އަހަރެން ބޭނުމެއް ނޫން. ޖުވޭ ކޮއްކޮވެސް އަދި އެހުރީނު.“ ވަރަށް ދެރަވެފައި އިނދެގެން ޖުމާނާ ވާހަކަ ދައްކަމުން ގެންދިޔައެވެ. ”ކާކު ބުނީ ކޮއްކޮމެންނަކީ އަހަރެންނަށް ބުރައެކޭ. އަހަރެން މަސައްކަތް މިކުރަނީވެސް ތި ދެކުދިންނަށްޓަކާ ދޯ. ކޮއްކޮ ކަންބޮޑު ނުވެބަލަ. ކޮއްކޮ ކިޔަވަން ބޭނުން ވަރަކަށް ދޮންބެ ކިޔަވައިދޭނަން. އެހެންވީމަ އޭލެވެލް ނުހަދަން ނޫޅެއްޗޭ އިނގޭ.“ ”އާން އަހަރެން ބޭނުން ކުރިޔަށް ދާން. އެކަމަކު އިއްޔެގަ ފެނުނު މަންޒަރުން އަހަރެންގެ ހިތަށް އެރީ، ދޮންބެވެސް އަސްލު ދިރިއުޅުމެއް ފަށަން ބޭނުންވާނެޔޭ. އޭގެ ހުރަހަކަށް އަހަރެން ވާކަށް ބޭނުމެއް ނޫނޭ.“ ޖުމާނާގެ ވާހަކަ ވަކި ހިސާބަށް ދިޔުމުން އޭނާ އަމިއްލައަށް އިސްދަށަށް ޖަހާލިއެވެ. އަހަރެން މަޑުމަޑުން ޖުމާނާގެ ކައިރިޔަށް ޖެހިލާފައި އޭނާގެ އަތްނަގާ އަހަރެންގެ އަތްމަތީގައި ބާއްވާލީމެވެ. ”ކޮއްކޯ، ކޮންކަމަކާތަ ތި ވިސްނަނީ؟ ދޮންބެ އެންމެ ފުރަތަމަ އިސްކަން ދޭނީ ތި ދެކުދިންނަށް. އެހެން އެއްވެސް ކަމެއް އަންނާނީ އެއަށްފަހު. ދޮންބެގެ ދިރިއުޅުން ބިނާވެފަ އޮންނާނީ ތިކުދިންގެ ކުރިމަގު ބިނާކުރަން ބޭނުންވާ މިސްރާބަކަށް. ދެން ހުރި ކަންކަމާ މެދު ކޮއްކޮމެން މިވަޤުތު އަދި ވިސްނާނެކަމެއް ނެތް. އިންޝާﷲ ހުރިހާ ކަމެއްވެސް ރަނގަޅުވާނެ.“ ޖުމާނާ މަޑުމަޑުން ދެލޯ ފޮހެލާފައި އަހަރެންނާއި ދިމާއަށް އެނބުރިލިއެވެ.

”އަހަރެމެން ދެބެންވެސް ދޮންބެއަށް އިތުބާރުކުރަން. އަހަރުމެންނަށް ދެރަގޮތެއް ވިޔަނުދޭނެކަންވެސް އެނގޭ. ދޮންބެ އަހަރުމެންނާ ދޭތެރޭގަ ވިސްނާހެން އަހަރުމެންވެސް ދޮންބެޔާ ދޭތެރޭގަ ވިސްނަން. އެހެންވެގެން މިހެން މިބުނީ.“ އަހަރެންގެ މޫނުމައްޗަށް ލުއިލުއި ހިނިތުންވުމެއް ވެރިވިއެވެ. އަހަރެން އެކުދިންނާއިމެދު ވިސްނާފަދައިން އެކުދިންވެސް އަހަރެންނާއިމެދު ވިސްނާނެކަން އެނގެއެވެ. އެހެންނަމަވެސް އަހަރެން މަންމައަށް ވެފައޮތް ވަޢުދު ހަނދާން ނައްތާލާފަ ކުރާނެ އިތުރުކަމެއް ނޯންނާނެއެވެ. އާނއެކެވެ. އަހަރެންނަށް ޢައިޝާދެކެ ލޯބި ވެވިއްޖެއެވެ. ފުރަތަމަ ނަޒަރުންނެވެ. އެހެންނަމަވެސް އަހަރެންގެ އަމިއްލަ ނަފްސު ކޮންޓްރޯލު ކުރަން މަޖުބޫރެވެ. އިންޝާﷲ އެކަން އަހަރެން ކުރާނަމެވެ. އަހަރެންގެ ޚިޔާލުތަކަށް ގެއްލިފައި އިންދާ ގޭތެރެއިން ވަރަށް ބާރަށް މީހަކު ގޮވާލާ އަޑު އިވުނެވެ. ދެމީހުން އެއްފަހަރާ ސިއްސައިގެން ދިޔައެވެ. ދުވެފައި ނިކުތީމެވެ. ގޭގެ ދޮރުމަތީގައި ހުރީ ދެވަނަ ދެމީހެއް ނޫނެވެ. އަހަރުމެންގެ ބައްޕައެވެ. ޖުވޭދާވެސް ދުވެފައި ބޭރަށް ނިކުތެވެ. ހީވާގޮތުން އޭނާއަށް އޮތީ ނިދިފައެވެ. އެހެނީ ޖުވޭދާ ހުރީ ލޯ ފޮހެލަ ފޮހެލައެވެ. ”މިހާ ގިނަދުވަސް ކޮށްލާފަ މިގޭ ދޮރާށި ފެނިގެން ތިއުޅެނީ އަނެއްކާ ކިހިނެއްވީ؟“ އަހަރެން ސުވާލު ކޮށްލީމެވެ. ”އަހަރެން މި އައީ ކަލޭ ހޯދާކަށް ނޫން. އަހަރެން މި އައީ ޖުމާނާ ބަލާ.“ އަހަރެންނަށް ލިބުނީ ހައިރާން ކަމެކެވެ. އެހެންނަމަވެސް ޖުމާނާވެސް އަދި ޖުވޭދާވެސް ގަތީ އަމަށަކު ބިރެއް ނޫނެވެ. ޖުވޭދާ ދުވަފައި ކަހަލަ ގޮތަކަށް އަހަރެން ކައިރިޔަށް އައިސް ހުއްޓުނެވެ. ޖުމާނާ ގަންނާކުރެއްވި ބިރުން ވަނީ އަހަރެންގެ ފުރަގަހަށެވެ. އަހަރެން އެދެކުދިންގެ ހިމާޔަތުގައި ނިކުތީމެވެ. ”އަނެއްކާ ކިހިނެއްވީ ޖުމާނާ ގެންދަން ތި އުޅެނީ؟“ ބައްޕަ ކުޑަތަންކޮޅެއް އެތެރެއަށް ވަދެލިއެވެ. އެހެންނަމެވެސް އަހަރުމެންގެ ކައިރިޔަށް އަންނާކަށް ނޫޅެއެވެ. ”ޖުމާނާ މިހާރު އެހުރީ ގުރޭޑު ދިހައެއް ނިމިފައޭ މީހަކު އަހަރެން ކައިރީގަ ބުނީމަ މިހާރުދެން އޭނައަށްވެސް ޢާމްދަނީ ހޯދަން މަސައްކަތް ކުރެވޭވަރު އެވީ. އެހެންވީމަ އަހަރެންނަށް ކާންދީ ބަލަހައްޓަން ބަލާ މި އައީ.“ އަހަރެންގެ ރުޅިގަނޑު އަރާ މަތިފަޑީގައި ހިފާލިއެވެ. ފުންމައިގެން އެދިމާއަށް ދާން ހިނގައިގަތީމެވެ. އެވަޤުތު ކޮއްކޮމެން ރޮއެގެންފާ އަހަރެން ހިފަހައްޓަން މަސައްކަތް ކުރިއެވެ. އެހެންނަމަވެސް އަހަރެންނަކަށް އެވަރަކުންވެސް މައިތިރިއެއް ނުވެވުނެވެ. އެދިޔަ ބާރުމިނުގައި ގޮސް ބަދިގެއަށްވަދެ އެތަނުގައި އޮތް އެންމެ ބޮޑު ވަޅި ނަގާ އަތަށް ހެޔޮވަރު ކޮށްލީމެވެ. އެމަންޒަރު ފެނިފައި ޖުމާނާ ދުވެފައި އައިސް އަހަރެންގެ ދެފައި މައްޗަށް ވެއްޓިގަތެވެ. ”ހެޔޮނުވާނެ ދޮންބޭ. އަހަރުމެން ދެބެންނަށްޓަކާވެސް ތިކަހަލަ ގޯހެއް ނުހަދާތި. އާދޭސްކޮށްފަ މިބުނީ.“ އަހަރެންނަށް އެދެކުދިންގެ ރުއިމުގެ އަޑުވެސް ނުއިވުނު ކަހަލައެވެ. އެހެނީ އަހަރެން ދިޔައީ ބައްޕައާއި ދިމާއަށެވެ. ވަޅި މަޅައިގެން ހުރެގެންނެވެ. އެވަޤުތު ބައްޕަ ފަހަތަށް ޖެހެމުން ދިޔައެވެ. އަދި އަހަރެންނަށް އިންޒާރު ދެމުން ގޭގެ ދޮރާއި ދިމާއަށް ހިނގައިގަތެވެ. ”ހަނދާން ކުރާތި. އަހަރެން އަދި އަންނާނަން. ޝަރީފާގެ ފަރާތުން ލިބުނު ޚިދުމަތް ތިތިބަ ދެ އަންހެން ކުދިންގެ ފަރާތުން އަހަރެން ނުނަގާނެ ގޮތެއް އެއީ ނެތްގޮތެއް.“ އެހެން ބުނަމުން ގެއިން ބޭރަށް ނިކުތުމަށް ދޮރު ހުޅުވާޅިއެވެ. ”ދޮންބޭ“ ޖުމާނާއާއި ޖުވޭދާ އެއްފަހަރާ އަހަރެންނަށް ގޮވާލިއެވެ. އަޑުގެ ކޮޅަށެވެ. އާނއެކެވެ. ބައްޕަގެ އެޖުމުލަ އަޑު އިވުމާއިއެކު، އަހަރެންގެ އަތުގައި އޮތް ވަޅި ބައްޕައާއި ދިމާއަށް ހޫރާލެވުނީއެވެ.

• ނުނިމޭ