ދެމަފިރިން އެކަނި އުދެހެމުން ދަނިކޮށް، ފިރިމީހާގެ ހިތް ހުއްޓުމުން އަންހެންމީހާ ސަލާމަތުން ބޯޓު ދުއްވައިފިއެވެ. ނެވާޑާގެ ހެންޑާސަން އެގްޒެކެޓިވް އެއާޕޯޓުން ކެލިފޯނިއާގެ މޮންޓެރީއަށް ދަތުރުކުރަމުން ދަނިކޮށް ބޯޓުގެ ޕައިލެޓް އެލިއަޓް އަލްޕާއަށް މެޑިކަލް އެމަޖެންސީއެއް ކުރިމަތިވި އެވެ. އެއަށްފަހު ބޯޓު ދުއްވީ ކުރިން ބޯޓެއް ދުއްވުމުގެ ތަމްރީނެއް ލިބިފައި ނުވާ އޭނާގެ އަންހެނުން ޔުވޮން ކިނާނޭ-ވެލްސް އެވެ. ބޯޓު އުދުއްސައި، އެންމެ ކައިރި އެއާޕޯޓަށް ބޯޓު ތިރިކުރުމަށް ކުރަންޖެހޭ ހުރިހައި މަސައްކަތެއްގެ އިރުޝާދު ދީފައި ވަނީ، އެއާ ޓްރެފިކް ކޮންޓްރޯލުންނެވެ.

ކިނާނޭ-ވެލްސް ވަނީ 5،900 ފޫޓުން އުދުއްސާފައި އައިސް، އޭނާގެ ޓްވިން އިންޖީނު ބީޗްކްރާފްޓް ކިންގް އެއާ 90 ގެ ބޯޓު އެމީހުންގެ ދަތުރާ އެންމެ ކައިރީގައި އޮތް ކެލިފޯނިއާގެ ބެކަރސްފީލްޑްގެ މީޑޯސް ފީލްޑް އެއާޕޯޓުގައި ޖައްސާފައެވެ. މި ބޯޓު ޖެއްސިއިރު އެހީ ދޭފަރާތްތަކާއި އެމެޖެންސީގައި ހަރަކާތްތެރިވާ ފަރާތްތަކުން ބޯޓުގެ އިސްތިޤްބާލުގައި ތިއްބެވެ.