ކެންޔާގެ ސެނެޓުން އަންނަ ހަފްތާގައި ބަހުސްކުރާނީ ނައިބު ރައީސް ރިގަތީ ގަޗަގުއާ މަގާމުން ޢަލުކުރުމާ މެދުގައި ކަމަށް ސެނެޓްގެ ރައީސް ވިދާޅުވެއްޖެ އެވެ. ގަޗަގުއާ ޢަޒުލު ކުރުމަށް ގާނޫނު ހަދާ މަޖިލީހުގެ މެމްބަރުން ވަނީ ބަހުސްކޮށް، އެ މައްސަލަ ސެނެޓަށް ފޮނުވުމަށް އަންގާރަ ދުވަހުގެ ދަންވަރު ވޯޓުލާފައެވެ. އެ ވޯޓުގައި، 281 މެމްބަރުން ވަނީ ގަޗަގުއާ އަޒުލު ކުރަން ފެންނަ ކަމަށް ވޯޓުލާފައެވެ. އަދި 44 މެމްބަރުން ވަނީ ދެކޮޅަށް ވޯޓުދީފައެވެ. އެއް މެމްބަރަކު ވޯޓުގައި ބައިވެރިއެއް ނުވެއެވެ. އެ އެމައްސަލަ ސެނެޓްގައި ބަހުސްކުރުމަށް ބޭނުންވާ ތިންބައިކުޅަ ދެބައި އަޣުލަބިއްޔަތަށް ވުރެ މާބޮޑު ޢަދަދެކެވެ.
ސެނެޓްގެ ރައީސް އަމަސަން ކިންގީ ވިދާޅުވީ ސެނެޓުން ނާއިބް ރައީސަށް ކުރެވޭ ތުހުމަތުތައް ތަހުގީގު ކުރާނީ އަންނަ ހަފްތާގެ ބުދަ ދުވަހާއި ބުރާސްފަތި ދުވަހު އެވެ. ނާއިބް ރައީސް ޢަޒުލު ކުރުމަށް ސެނެޓުގެ ދެބައިކުޅަ އެއްބައި މެމްބަރުން ވޯޓު ދީފިނަމަ ގަޗަގުއާ މަޤާމުން ވަކި ކުރާނެއެވެ. ގަޗަގުއާގެ މައްޗަށް 11 ތުހުމަތެއް ކޮށްފައި ވެއެވެ. އޭނާ ވަނީ އެ ތުހުމަތުތަކަށް ނޫނެކޭ ބުނެފައެވެ.
ގަޗަގުއާއާއި ރައީސް ވިލިއަމް ރޫޓޯއާ ދެމެދު މައްސަލަތަކެއް އުފެދިފައި ވެއެވެ. 2022 ވަނަ އަހަރުގެ އިންތިޚާބުވެ ވަޑައިގަތް ރޫޓޯއާ ދެމެދު މައްސަލަ އުފެދިފައިވަނީ ރޫޓޯ ޓެކްސް ބޮޑު ކުރުމަށް ނިންމުމާ ގުޅިގެންނެވެ. އޭނާއާ ދެކޮޅަށް ކޮށްފައިވާ މުޒާހަރާތަކުގައި ގަޗަގުއާ ވަނީ މުޒާހަރާ ކުރާ މީހުންނަށް ތާއީދުކޮށްފައެވެ.
ނާއިބް ރައީސް ޢަޒުލު ކުރުމާ ބެހޭ ގޮތުން ރޫޓޯ ވަކިއެއްޗެއް ވިދާޅެއް ނުވެ އެވެ.
