ސަމްސުއްނިސާގެ ބޮލުގައި ރިއްސާލިއެވެ. އަރުޝީގެ ހިތުގައި އޭނާއަށްޓަކާ ނަފްރަތު އުފެދެނީބާއެވެ؟ އެހެންވެއްޖެނަމަ ދެންވާނީ ކިނިހިނެއްބާއެވެ؟ އަނެއްކާ ނަފީސާ، އަރުޝީއަށްޓަކާ ދޫކޮށްފައި ދިޔަ ފޮތަކީ، އޭނާގެ ޙަޤީޤަތް ހާމަކޮށްފާއޮތް ފޮތެއް ނޫންބާވައެވެ. އަރުޝީގެ ވައްޓަފާޅިއަށް ބަދަލު އަންނަންފެށީ، އެފޮތުގައިވާ އެއްޗެއް ކިޔާފައި ބާވައެވެ؟ އެހެންވެއްޖެ ކަމުގައި ވާނަމަ ދެންވާނީ ކިހިނެއްބާއެވެ؟ އޭނާގެ ދަރިފުޅުގެ ދުލުން އޭނާއަށް މުޚާތަބުކޮށް މަންމާއޭ ގޮވާލާ އަޑެއް ދުވަހަކުވެސް އޭނާއަކަށް ނިވޭނެބާއެވެ؟ އަރުޝީ މުޅި އުމުރަށްވެސް އޭނާއަށް ކުރާނީ ނަފުރަތު ބާއެވެ؟ ސަމްސުއްނިސާއަށް ހަދާނެގޮތް ހުސްވިކަހަލައެވެ. މިއޮއް ހުރިހާދުވަހު އަރުޝީއާއި ދުރުގައި ހުރެގެން އޭނާ ދުވަސްތައް ގުނަމުން ގެންދިޔައީ، މިދުވަހަށް ޓަކައެވެ. ބީރައްޓެހި ރަށެއްގައި، އެކަނިމާ އެކަނި ދިރިއުޅެމުން ގެންދިޔައީ، އޭނާގެ ދަރިފުޅުގެ ޙައްޤުގައެވެ. އެހެންނަމަވެސް މިހާރު ފެންނަމުންދާ މަންޒަރުތަކުން ދައްކަނީ މުޅިން އެހެން ތަސްވީރެކެވެ. ސަމްސުއްނިސާ އުންމީދު ކުރިގޮތަށް ކަންކަން ނުދާނެކަމުގެ ބިރު ސަމްސުއްނިސާއަށް ހީވާން ފެށިއެވެ. ދަރިފުޅާއި ދުރުގައި ހުއްޓެއްކަމަކު، ދަރިޔަކު ހުރިކަން ހިނދުކޮޅަކަށްވެސް ސަމްސުއްނިސާ ހަނދާނެއް ނުނެތެއެވެ. އެކަން އަރުޝީއަށް ނޭންގި ކަމުގައިވެސް މެއެވެ. ”އަހަރެން ކިތަންމެ ދުރުގާ ހުރިކަމުގާ ވިޔަސް އަހަރެން މީ އަރުޝީގެ އުފަން މަންމަ ނޫންކަމަށް ނުވާނެ. އަރުޝީ އަހަރެން އަތުން ގެއްލިގެން ދިޔަކަ ނުދޭނަން. އެހެން ނޫނީ އަހަރެން މިއޮއް ހުރިހާ ދުވަހު ކުރި މަސައްކަތާ، ކުރި އިންތިޒާރުގެ އެއްވެސް ބޭނުމެއް ނެތެއްނު. އަހަރެން އަދި އޭނައާއި ވާހަކަ ދައްކާނަން. އަހަރުމެން ދެމައިން މިގޭގަ ރީތިކޮން އުޅޭނެ ދުވަސްވެސް އަދި ފެންނާނެ. މިއީ އަރުޝީގެ ގެއެއް. އެހެންވީއިރު އަހަރެންނަށްވެސް މިގެއަށް ބާރު ފޯރުވޭނެ. މީ އަހަރެންގެވެސް ޙައްޤެއް. މިގޭގަ ވެރިކަން ކުރާނީވެސް އަހަރެން. އެދުވަހަކަށް އަހަރެން އިންތިޒާރު ކުރާނަން. ޢަލީ ފިރާޤުވެސް އަހަރެންނަކަށް ލިބުނީކީ ނޫން. އެހެންވީމަ ދަރިފުޅު އަހަރެންގެ އަތުން ބީވެގެން ދިޔަކަ ނުދޭނަން. ކޮންމެފަދަ ޙާލަކާ ލައިގެންވެސް އަހަރެން އެކަން ޙާޞިލުކުރާނަން.“ ސަމްސުއްނިސާ އޭނާގެ ޚިޔާލީ ދުނިޔެއަށް ގެއްލިފާ އިނެވެ. ހިތާއިހިތުން އަމިއްލަ ނަފްސާއި ވާހަކަވެސް ދައްކަމުން ގެންދިޔައެވެ. އެވަޤުތު އޭނާ ސިއްސައިގެން ދިޔައީ ތަންކޮޅެއް ބާރު އަޑެއް އިވިގެންނެވެ. ހަމަ ހޭވެރިކަން ވެގެން ރަނގަޅަށް ބަލައިލިއިރު، އަރުޝީ ހުރީ އޭނާގެ އަލަމާރި ކައިރީގައެވެ. އަލަމާރީގެ ދޮރު ހުޅުވައިގެން ކޮންމެވެސް ކަމެއް ކުރަނީއެވެ. ސަމްސުއްނިސާ ހަމަޖެހިލާފައި ބަލައިލިއިރު މި އިނދެވުނީ އަރުޝީގެ ކޮޓަރީގައި، އޭނާގެ އެނދުމަތީގައިކަން ރެޔަކާލީ އަދި ކިރިޔާއެވެ. ކުއްލިޔަކަށް ފުންމައިގެން ތެދުވެ، ކޮޓަރިން ބޭރަށް ނިކުތުމަށް ހިނގައިގަތެވެ. ވަރަށް މަޑުމައިތިރި ކަމާއިއެކުގައެވެ. އޭނާ ނިކުންނަކަން އަރުޝީއަށް އަންގަން ބޭނުންނުވާ ކަހަލަ ގޮތަކަށެވެ. އަރުޝީ ކޮޓަރިއަށް ވަތްއިރު ސަމްސުއްނިސާ އެނދުމަތީގައި އިންދާ، އޭނާއަށް ފެނުނެވެ. އެހެނަސް ސަމްސުއްނިސާއަށް މާބޮޑު ސަމާލުކަމެއް ދޭކަށް އަރުޝީވެސް ބޭނުން ނުވާކަހަލައެވެ. އެހެނީ، ސަމްސުއްނިސާ ނިކުމެގެން ދިޔައިރު، އޭނާއާއި ދިމާއަށް ބަލައިލާކަށްވެސް އަރުޝީ ބޭނުމެއް ނުވެއެވެ.

ސަމްސުއްނިސާ ކޮޓަރިން ނިކުމެގެން ދިޔުމުން، އަރުޝީ ފުން ނޭވާއެއް ލުމާއިއެކު މަޑުމަޑުން ގޮސް އެނދުމަތީގައި އިށީނެވެ. ޙަޤީޤަތަށް ބުނާނަމަ، އަރުޝީ އަލަމާރި ކައިރީގައި ހުއްޓި ހުރީ އެއްވެސް ބޭނުމަކު ނޫނެވެ. އަލަމާރީގެ ދޮރުފަތް ހުޅުވާލުމާއި، ބާރަށް ލެއްޕުމުގެ މަޤުޞަދަކީ އެކަން ސަމްސުއްނިސާގެ ސަމާލުކަމަށް ގެނައުމެވެ. އެހެނީ އަރުޝީގެ ކޮޓަރީގައި ސަމްސުއްނިސާ އިނުން އެއީ އޭނާ ހިތްހަމަޖެހޭ ކަމަކަށް ނުވީތީއެވެ. އަރުޝީ އެނދުމަތީގައި އިށީންދެލުމާއިއެކު ވިސްނުމެއްގެ ތެރެއަށް ގެއްލިގެން ދިޔައެވެ. ސަމްސުއްނިސާއަކީ އޭނާގެ އުފަން މަންމަ ކަމުގައި މިހާރު އަރުޝީއަށް ޔަޤީންވެއްޖެއެވެ. އެހެންނަމަވެސް އެއީ އަރުޝީގެ ޙަޔާތުގެ އެންމެ ހިތި ޙަޤީޤަތެވެ. އޭނާގެ ހިތުގައި ނަފީސާއަށްޓަކާ އުފެދިފައިވާ ލޯތްބާއި އިހުތިރާމަށްވުރެ ބޮޑަށް ސަމްސުއްނިސާއަށް ކުރާ ނަފުރަތު އިތުރުވާހެންވެސް އަރުޝީއަށް ހީވާން ފެށިއެވެ. އެހެނީ، ސުވަރުގެ ވަނީ މައިމީހާގެ ފައިތިލަ ދަށުގައި ކަމަށް ބުނެވެއެވެ. ވީއިރު، އެމައިމީހާ ނިކަމެތި ކޮށްލުމަކީވެސް އަރުޝީގެ ހިތް ރުހޭކަމެއް ނޫނެވެ. އަނެއްކޮޅުން، ސަމްސުއްނިސާގެ އެކަނިވެރިކަމާއި ނިކަމެތިކަންވެސް އަރުޝީ ޤަބޫލުކުރެއެވެ. އެއީ އޭނާގެ މަންމައެވެ. އަރުޝީގެ ހިތަށް އެންމެ އުނދަގޫވާ ސަބަބަކީވެސް އެއީއެވެ. ސަމްސުއްނިސާގެ މައްޗަށް އަރުޝީގެ ހިތުގައި ނަފުރަތެއް އޮވެގެން، އާޚިރަތުގެ ބާއްޖަވެރިކަން ގެއްލިދާނެ ކަމުގެ ބިރުވެސް އޭނާގެ ހިތުގައި އޮތަތީވެސް މެއެވެ. ސަމްސުއްނިސާގެ ކުރިމަތީގައި ހަނު ހުރުމުގެ އެންމެ ބޮޑު އެއްސަބަބަކީވެސް އެއީއެވެ. ސަމްސުއްނިސާއަކީ، އޭނާގެ މަންމަކަމަށް ނުވިނަމަވެސް ނަފީސާގެ ގާތް މީހެއްގެ ހައިސިއްޔަތުން،

އަރުޝީގެ މައްޗަށް އޭނާއަށްޓަކާ އުފުލަންޖެހޭ ޒިންމާއެއް އެބައޮތްކަން އަރުޝީ ހަނދާން ނައްތައެއް ނުލައެވެ. ޚާއްޞަކޮށް ނަފީސާ ދުނިޔޭގައި ނެތްއިރު، އޭނާގެ މަންމައާއި ގުޅިފައިވާ ކޮންމެ ކަމަކީ، އޭނާގެ ޒިންމާއެއް ކަމުގައި އަރުޝީ ޤަބޫލުކުރެއެވެ. އެގޮތުގެ މަތިން ސަމްސުއްނިސާ އެގެއިން ފޮނުވާލާކަށް އަރުޝީ ނުވިސްނައެވެ. އެހެނެއްކަމަކު، ސަމްސުއްނިސާ ބޭނުންވާހާ ދުވަހަކު އެގޭގައި ހުރެވޭނެކަމަށް ސަމްސުއްނިސާ ކައިރީގައި އަރުޝީ ވަނީ މާކުރިންވެސް ބުނެފާތާއެވެ. ސަމްސުއްނިސާ އޭނާގެ ކުރިމަތީގައި ހުރުމުން އެތައް އުނދަގޫތަކެއް އުފުލަން ޖެހުނަސް އެންމެ ރަނގަޅުކަމަށް ޤަބޫލުކުރެވޭ އިރުވެސް މެއެވެ. އެތައް ޝަކުވާތަކެއް ސަމްސުއްނިސާއާއި ކުރަން ބޭނުންވާ ހިނދުވެސް މެއެވެ. ކަން އޮތީ ކޮންމެ ގޮތަކަށް ކަމަށްވިޔަސް އެއީވެސް އިންސާނެއްކަން އަރުޝީއަށް ވިސްނެއެވެ. އަރުޝީއަށް އޭނާގެ އުފަން މަންމަ، މައެއްގެ ގޮތުގައި ބަލައިގަންނަން އަދި އުނދަގޫވިޔަސް، އެއީ އެކަހެރިކޮށް، ދޫކޮށް ނުލެވޭނެ ފަރާތެއްކަންވެސް އަރުޝީ ޤަބޫލުކުރެއެވެ. ހަމައެހެންމެ، އޭނާގެ މަންމަ ނަފީސާގެ ޙަޔާތުގައި ދިމާވެފައިވާ ދަތި އުނދަގޫ ޙާލަތުގެ ޒިންމާ ސަމްސުއްނިސާ ނަގަން ޖެހޭނެކަންވެސް އަރުޝީގެ ހިތް ބުނަމުން ގެންދިޔައެވެ. އާނއެކެވެ. ސަމްސުއްނިސާގެ ބެލުމުގެ ދަށުން އަރުޝީ ތަރުބިއްޔަތު ވީނަމަ، އަރުޝީގެ ޙަޔާތުގެ ތަސްވީރު މުޅިން ތަފާތުވިސްކަން ޔަޤީނެވެ. އެހިނދު އަރުޝީއަށް މަޑުމަޑުން ލޯ މަރާލެވުނެވެ. ހަމަ އެއާއިއެކު ހިންވެސް ދިރުވާލެވުނެވެ.

އަރުޝީ ކުއްލިޔަކަށް ސިއްސައިގެން ދިޔައީ، އޭނާގެ ފޯނަށް ކޮންމެވެސް މީހަކު ގުޅި އަޑަށެވެ. ފޯނާއި ދިމާއަށް ބަލައިލިއިރު، ފޯނުގެ ޑިސްޕްލޭއަށް އަރާފައި އިނީ ސާމިރުގެ ނަމެވެ. ފުން ނޭވާއެއް ލުމާއިއެކު، މޫނުމަތި ރަނގަޅަށް ފޮހެލާފައި، ފޯނަށް ޖަވާބުދޭން ތައްޔާރުވެލިއެވެ. ފޯނު ނަގާ، ސަލާމް ގޮވާލުމުން އަނެއްކޮޅުންވެސް ސަލާމް ބަލައިގަތެވެ. އެއަށްފަހު، ސާމިރު ކޮށްލީ ސުވާލެކެވެ. ”މީގެ އިރުކޮޅެއް ކުރިންވެސް އަހަރެން ގުޅާލައިފިން. ފޯނެއް ނުނަގާ. މާ ބިޒީތަ؟“ ސާމިރުގެ ސުވާލަށް ޖަވާބު ދިނުމުގެ ކުރިން އަނެއްކާވެސް އަރުޝީއަށް ލެވުނީ ފުން ނޭވާއެކެވެ. އަދި ހަމަޖެހިލާކަމަށް ހަދާފައި ސާމިރުގެ ސުވާލަށް ޖަވާބު ދިނެވެ. ”ނޫނޭ. ބިޒީއެއް ނޫން. އަސްލު ފޯނު ރިންގުވީކަން ނޭންގުނީ.“ އަރުޝީގެ އަޑުގައި ހުރި މާޔޫސްކަމުގެ ކުލަވަރު ސާމިރު ދެނެގަތެވެ. ”އަރުޝީ، ކިހިނެއްވީ؟ ކަމަކާ ވަރަށް ހާސްވެފަ ހުރިހެން ހާދަ ހީވެޔޭ. ނޫނީ ބަލީތަ؟ އަހަރެން ތިގެއަށް ދަންތަ؟“ އެއްފަހަރާ އެތައް ސުވާލެއް ކުރަން ސާމިރު ބޭނުންވެފައި ހުރިކަހަލައެވެ. އެހެންނަމަވެސް ސާމިރުގެ އެސުވާލުތަކަށް އަރުޝީ ޖަވާބު ދިނީ ލުއިލުއި ހިނިތުން ވުމަކާއިއެކުގައެވެ. ”ނޫން ނޫން. އަހަރެން ހަމަ ރަނގަޅު. އެކަމަކު އަހަރެން ބޭނުން ސާމިރުއާ ބައްދަލު ކޮށްލަން.“ އަރުޝީގެ ފިކުރާއި ޙާލަތު ސާމިރުއަށް އަންގައިދޭން އަރުޝީ ބޭނުންވިއެވެ. އެއަށްވުރެ ބޮޑަށް އިތުބާރު ކުރެވޭ އިންސާނަކުވެސް މިހާރަކު އަރުޝީގެ ޙަޔާތަކު ނެތެވެ. ސާމިރުގެ ޙަޔާތުގެ ބައިވެރިޔަކަށް އަރުޝީ ހަދަން ބޭނުންވާއިރު، އަރުޝީއާއި ގުޅިފައިވާ އެއްވެސް ކަމެއް ސާމިރުއަށް ސިއްރުކޮށްގެން ނުވާނެކަމަށްވެސް އަރުޝީގެ ހިތް ބުނަމުން ގެންދިޔައީތީއެވެ. ”އާން ބުނޭ ކޮންއިރަކުން ކޮންތާކަށް ދާންވީ؟“ އަހަރެން މިއަދު މިހުރީ ވަރަށް ފްރީކޮން.“ އަރުޝީ ހާސްވެފައިވާ މިންވަރު ސާމިރުއަށް ދެނެގަނެވުނު ކަހަލައެވެ. ”އަހަރެން ތައްޔާރުވެލާފަ ސާމިރުއަށް ގުޅާލާނަން އިނގޭ.“ ”އެންމެ ރަނގަޅު.“ ސާމިރު ބުނެލިއެވެ.

އަރުޝީ ތައްޔާރުވާކަށް މާގިނަ ވަޤުތެއް ނުނަގައެވެ. އެހެނީ ދިހަވަރަކަށް މިނެޓު ތެރޭގައި ތައްޔާރުވެލައިގެން އޭނާ ބަލައި އައުމަށް ސާމިރުއަށް ޢިޝާރާތް ކޮށްލިއެވެ. ސާމިރުވެސް އަރުޝީއާއި ހަމައަށް އަންނާކަށް މާގިނަ ވަޤުތެއް ނުނަގައެވެ. އަރުޝީ، ސާމިރުގެ ސައިކަލަށް އެރުމުން ދާނެ ވަކިތަނެއް އެބައޮތްތޯ ސާމިރު ސުވާލު ކޮށްލިއެވެ. ވަކި ޚާއްޞަތަނެއް ނެތް ކަމަށް ބުނިގޮތުން، އަރުޝީގެ ޙާލަތު ސާމިރުއަށް އިހުސާސް ކުރެވުނު ކަހަލައެވެ. އެހެނީ އިތުރު އެއްވެސް ސުވާލެއް ނުކޮށް ސާމިރު އޭނާގެ ސައިކަލު ދުއްވާލިއެވެ. ދެމީހުންގެ މެދުގައި ވަނީ ހަމަހިމޭން ކަމެކެވެ. މުޅި ދަތުރު އެއްކޮން ދިޔައީ އެކަހަލަ ގޮތަކަށެވެ. އަރުޝީ ގޮވައިގެން ސާމިރު ދިޔައީ، ރަސްފަންނަށެވެ. ސައިކަލު ޕާކު ކުރުމަށްފަހު، ރަސްފަންނުގެ ތޮށިގަނޑު މަތީގައި ދެކުދިން އިށީންދެލިއެވެ. ރަނގަޅަށް ހަމަޖެހިލުމާއިއެކު، ދެމީހުންގެ މެދުގައިވާ ހަމަހިމޭންކަން ނައްތާލީ ސާމިރުއެވެ. ”ކޮބާ ދެން ތި ދައްކަން ބޭނުންވެގެން އުޅޭ ވާހަކައެއް ފަށާބަލަ. އަހަރެން މީނީ އަޑުއަހަން.“ ސާމިރުގެ ހިތް ތެޅެމުން ދިޔަކަން އޭނާގެ އަޑުގައި ހުރި ތުރުތުރުން އަރުޝީއަށް ދެނެގަނެވުނެވެ. ”އަހަރެންގެ ވާހަކަ ފެށުމުގެ ކުރިން ސާމިރުއާ ސުވާލެއް ކޮށްލަންތަ؟“ ”ކޮށްބަލަ.“ ސާމިރުގެ ހާސްކަން ނުދައްކަން އޭނާ ވަރަށް މަސައްކަތް ކުރަމުން ގެންދިޔައެވެ. އާނއެކެވެ. ސާމިރުގެ ވިސްނުން ހުރީ މުޅިން އެހެން ކަމަކަށެވެ. އޭނާ ވިސްނަމުން އެގެންދަނީ އޭނާގެ ހުށައެޅުމަށް އަރުޝީގެ ފަރާތުން އަންނާނެ ޖަވާބަކަށެވެ.  އިތުރު އެއްވެސް ކަމެއް އުޅެދާނެ ކަމަކަށް ސާމިރުއަށް އަންދާޒާ ކޮށްލަންވެސް ނޭންގެއެވެ. އެހެނީ، ސާމިރުގެ ޙަޔާތުގެ ބައިވެރިޔަކަށް އަރުޝީ ހަދަން ވިސްނި ހިސާބުން އޭނާގެ ހިތުގައި އޮންނަނީ ހަމައެކަނި އެޚިޔާލާއި ފިކުރެވެ. އިތުރު އެއްވެސް ކަމަކާ ސާމިރުއަށް ނުވިސްނޭ ކަހަލައެވެ. ވީއިރު،

އޭނާގެ ކަންބޮޑުވުމަކަށްވެސް ވާނީ އެކަންތާއެވެ. އެހުރިހާ ޚިޔާލެއްގެ ތެރެއިން ނިކުމެ، އަރުޝީގެ ސުވާލަށް ސާމިރު ވަރަށް ސާބިތުކަމާއިއެކީ ތައްޔާރުވެލިއެވެ. ”ސާމިރު ތީނީ އެއްވެސް ކަމަކާ ހާސްވެފަތަ؟ ނޫނީ އަހަރެން މިތަނަށް މިއައީ، ސާމިރުގެ ހުށައެޅުމަށް ޖަވާބެއް ދޭން ގެނައީ ކަމަށް ޤަބޫލުކުރެވެނީތަ؟“ ސާމިރު ފުން ނޭވާއެއް ލިއެވެ. އަދި ހަމަޖެހިލާފާ ޖަވާބު ދިނެވެ. އެހެނަސް ސުވާލެއްގެ ސިފައިގައެވެ. ”ތިއުޅެނީ އެވާހަކަ ދައްކާކަށް ނޫންތަ؟“ ލުއިލުއި ހިނިތުން ވުމަކާއިއެކީ ސާމިރުގެ ވާހަކަ ކުރިއަށް ގެންދިޔައެވެ. ”އަރުޝީގެ ފަރާތުން ކޮންމެފަދަ ޖަވާބެއް އަޔަސް އަހަރުމެން ދެމީހުންގެ ރަޙުމަތްތެރި ކަމަކަށް ކުޑަވެސް ބަދަލެއް ނާންނާނެކަން އަރުޝީ ޤަބޫލުކުރަންވާނެ އިނގޭ. ހަމަގައިމުވެސް އަހަރެންގެ ފަރާތުން އެކަން އޮންނާނީ އެހެން.“ ސާމިރުގެ އެސުވާލަށް އަރުޝީވެސް ޖަވާބު ދިނީ ހިނިތުންވުމަކާއި އެކީގައެވެ. ”ސާމިރުއަކީ އަހަރެންގެ އެންމެ ކުޑައިރުއްސުރެ ގާތް ރަޙުމަތްތެރިއެއްގެ ގޮތުގަ ދެކެމުން އަންނަ މީހެއް. އަހަރެންނަށް ސާމިރު ކައިރީގަ ދައްކަން ނުކެރޭނެ އެއްވެސް ވާހަކައެއް ނޯންނާނެ. އެހެންވީއިރު ރަޙުމަތްތެރިކަން ކެނޑުމަކީ އަދި މާދުރުގަ އޮތްކަމެއްތާ. އާން އަހަރެން ދައްކަން މިއުޅެނީ ތިބުނި ކަންތަކާ ވަރަށް ބޮޑަށް ގުޅުންހުރި ވާހަކައެއް. އެއީ ސާމިރުގެ ހުށައެޅުމަށް އަހަރެން ޖަވާބެއް ދިނުމުގެ ކުރިން އަހަރެންނާ ބެހޭގޮތުން ސާމިރުއަށް ކޮންމެހެން އެނގެންޖެހޭ ކަމެއް އޮތީތީ.“ އަރުޝީގެ ވާހަކައިން ސާމިރުއަށް ނެގުނީ ފައްސި މާނައެކެވެ. އެހެނީ ޖަވާބެއް ދިނުމުގެ ކުރިން އެނގެން ޖެހޭ އެއްޗެއް އޮންނާނީ ޖަވާބުވެސް ފައްސި ވާނެތީތާއެވެ. އެހެން ނޫންނަމަ އަރުޝީ ދައްކަން ބޭނުންވާ ވާހަކަ، ސާމިރުގެ ހުށައެޅުމާއި އަޅުވާކަށް ނުޖެހޭނެތާއެވެ. ”ދެން އެހެންވިއްޔާ ތިބުނަން ބޭނުންވާ އެއްޗެއް އަވަހަށް ބުނެބަލަ.“ އަރުޝީ މަޑުމަޑުން އިސްދަށަށް ޖަހާލިއެވެ. އަދި ފުންނޭވާއެއް ލުމާއިއެކު، އަރުޝީ އޭނަގެ ޙަޔާތުގެ ބޮޑު ސިއްރު ސާމިރުއަށް ކިޔައިދޭން ފެށިއެވެ. ”ސާމިރު، އަހަރެންނަކީ…“ އަރުޝީ ބުނަން އުޅުނު ޖުމުލަ އޭނާގެ ލަގޮނޑީގައި ތާށިވި ކަހަލައެވެ. ހިފެހެއްޓުމެއްނެތި ލޮލުން ކަރުނަ އޮހެން ފެށިއެވެ.  އެހެނަސް ސާމިރުއަކަށް އެކަރުނައެއް ނުފެނެއެވެ. އެހެނީ އަރުޝީ އިށީންދެގެން އިނީ މައިދާނުގައި ދިއްލާފައިވާ އަލިގަދަ ބޮކިތަކަށް ފުރަގަސް ދީގެންނެވެ. މޫނުމައްޗަށްވަނީ އަނދިރިކަން ވެރިވެފައެވެ. އޭނާގެ ކުރިމަތީގައި ފެންނަން އޮތީ މާސިންގާ ކަނޑެވެ. ”އަރުޝީ؟“ ސާމިރު މަޑުމަޑުން އަރުޝީއަށް ގޮވާލިއެވެ. ”އަރުޝީ ރޮނީތަ؟ އަސްލު ކިހިނެއްތަ ވެގެން ތިއުޅެނީ؟ މާބޮޑަށް މަންމަ މަތިން ހަނދާންވަނީ ދޯ؟“ އަރުޝީގެ އަތްމަތީގައި ސާމިރުގެ އަތް މަޑުމަޑުން ބާއްވާލިއެވެ. އޭނާއަށް ތަސައްލީއެއް ދިނުމުގެ ގޮތުންނެވެ. ”އާން އަހަރެން މަންމަ މަތިން އަދިވެސް ވަރަށް ހަނދާންވޭ. އެކަމަކު އެއީ އަހަރެންގެ…“ އަނެއްކާވެސް އަރުޝީގެ ޖުމުލަ ހުއްޓުނެވެ. އެވާހަކަތައް ސާމިރުއަށް ކިޔައިދޭން އަރުޝީއަށް އުދަގޫވީ ކަހަލައެވެ. ”އެންމެ ރަނގަޅު، އަރުޝީއަށް ވާހަކަދައްކަން އުނދަގޫ ވަންޏާ ދެން އިހަށް މަޑުކޮށްލާ. ރަނގަޅަށް ހަމަޖެހުނީމަ ފަހުން ތިވާހަކަ ދައްކާނީ އިނގޭ.“ ވަރަށް އޯގާތެރި ގޮތަކަށް ސާމިރު ބުނެލިއެވެ. ”ނޫނޭ. މީ އަހަރެންގެ ހިތާ ސިކުނޑީގަ އޮތް ވަރަށް ބޮޑު ބުރައެއް. މިވާހަކަތައް ސާމިރުއަށް ކިޔައި ނުދެވޭހާ ހިނދަކު އަހަރެންގެ ހިތަކަށް ހަމަޖެހުމެއް ނުލިބޭނެ.“ ސާމިރު ހައިރާންވާގޮތް ވިއެވެ. ”އެހެންވިއްޔާ އިހަށް ކުޑައިރުކޮޅަކު އަނގައިން ނުބުނެ އިނދޭ. އަހަރެންވެސް އަރުޝީއަކަށް އުނދަގުލެއް ނުކުރާނަން. ވާހަކަ ދެއްކޭނެކަމަށް އަރުޝީއަށް އަމިއްލައަށް ޤަބޫލުކުރެވުނީމަ ބުނޭ. އަހަރެން އެބަ އިނީމެއްނު ކައިރީގަ.“ ވަރަށް އޯގާތެރިކަމާއިއެކީ ސާމިރު ބުނެލިއެވެ. އަރުޝީ ދެލޯ މަރާލާފައި ފުންނޭވާއެއްލިއެވެ. އަދި ލޮލުން އޮހެމުންދިޔަ ކަރުނަތައް ވަރަށް ވަރުގަދައަށް ދެއަތުން ފޮހެލިއެވެ. އަދި ފިސާރި ތައްޔާރު ވެލާފައި އޭނާގެ ވާހަކަ ކުރިއަށް ގެންދަން ފެށިއެވެ. ”އާން އެންމެ ރަނގަޅު. އަހަރެން މިވާހަކަތައް ކިޔައިދިނީމަ ސާމިރުގެ ޖަވާބެއްވެސް ވީ އެންމެ އަވަހަކަށް އަހަރެން ބޭނުންވާނެ ކަންވެސް ސާމިރު ޤަބޫލުކުރަން ވާނެ އިނގޭ.“ ހައިރާނުން ފުރިގެންވާ ނަޒަރަކުން އަރުޝީއާއި ދިމާއަށް ސާމިރުއަށް ބަލައިލެވުނެވެ. އެހެނީ މީގެ ކުރިން ސާމިރު ދަންނަ އަރުޝީއަކީ ކެތްތެރިކަމުގެ ލާމަސީލު މިސާލެކެވެ. އެހެންނަމަވެސް މިރޭ ސާމިރުއަށް ފެންނަ އަރުޝީ ތަފާތެވެ. ކެތްތެރިކަން އެއީ ސާމިރުގެ ކައިރީގައި އިން އަރުޝީ ދަންނަ އެއްޗެއްހެންވެސް ހީނުވާ ކަހަލައެވެ. އެހެންނަމަވެސް އެކަމާ ގުޅޭގޮތުން އެއްވެސް ސުވާލެއް ކުރާކަށް ސާމިރު ނުވިސްނައެވެ. އެހެނީ އެއަށްވުރެ ބޮޑަށް ސާމިރު ބޭނުންވަނީ، އަރުޝީ ބުނަން ބޭނުންވާ ވާހަކައެއް އަޑުއަހާށެވެ. ”ދެން ތިކަމާ ވާހަކަ ދައްކާނީ ފަހުން ދޯ. އިހަށްދެން އަރުޝީ ދައްކަން ބޭނުންވާ ވާހަކަ އަހަރެންގެ ކައިރީގަ ބުނެލަބަލަ. އެހާ އަވަހަށް ޖަވާބެއް ބޭނުންވާ ވާހަކައެއް ވިއްޔާ އަހަރެންވެސް ބޭނުންވާނީ އަވަހަށް އަޑުއަހާލަންތާ ދޯ.“ ސަމާސާ ގޮތަކަށް ސާމިރު ބުނެލިއެވެ. އަރުޝީގެ ހާސްކަން ފިލުވާލަދޭންވެސް ސާމިރު ބޭނުންވެފައި ހުރުމާއިއެކުވެސް މެއެވެ. އަރުޝީއަށް އަނެއްކާވެސް ލެވުނީ ފުން ނޭވާއެކެވެ. ”އަހަރެން މީ އަހަރެންގެ މަންމަގެ ކުއްޖެއް ނޫނޭ ބުނެފިއްޔާ ސާމިރު ޤަބޫލުކުރާނަންތަ؟“ ވާހަކަ ފަށާނީ ކިހާ ހިސާބަކުންކަން އަރުޝީއަށް ނޭންގުނު ކަހަލައެވެ. ސާމިރުއަށް ލިބުނު ހައިރާންކަންވެސް

އިންތިހާއެވެ. ”އަރުޝީ މޮޔަ ގޮވަނީތަ؟ ތީ ކޮންކަހަލަ ސުވާލެއް؟ ކޮންމެ ގޮތެއްވިޔަސް އަރުޝީ ވާނީ އަރުޝީގެ މަންމަގެ ކުއްޖަކަށްނު.“ ދެފަރާތަށް ދެއަތް ފުރޮޅާލާފައި ސާމިރު ބުނެލިއެވެ. އަދި ހަމައެއާއިއެކީ އަރުޝީއާއި ދިމާއަށް އޭނާގެ ހިށިގަނޑު އަނބުރާލިއެވެ. އަރުޝީގެ މޫނުމައްޗަށް އެޅިފައިހުރި އަލިން، އޭނާގެ ލޮލުން ފައިބަމުން ދިޔަ ކަރުނަތައް ސާމިރުއަށް ފެނުނެވެ. ”ހެޔޮނުވާނެ އަރުޝީ، ތިވެގެން އުޅޭގޮތަކާ ބުނަން ބޭނުންވާ ވާހަކައެއް ތަންކޮޅެއް ސާފުކޮން ތަންކޮޅެއް ރަނގަޅަށް ކިޔާލަދީބަލަ.“ ”އާން ސާމިރު، އަހަރެން މީ އަހަރެންގެ މަންމަ ނަފީސާގެ ދަރިއެއް ނޫން. އެއީ އަހަރެންގެ އަސްލު މަންމައެއް ނޫން. އެއީ އަހަރެންގެ… ދޮންމަންމަ.“ އެހާ ހިސާބަށް ބުނެވުމާއިއެކު، އަރުޝީއަށް އޭނާގެ މޫނުމަތީގައި އަތް އަޅާލެވުނެވެ. އަދި އިސްދަށަށް ޖަހައިގެން އިނދެ ގިސްލަން ފެށިއެވެ. ސާމިރު މަޑުމަޑުން އަރުޝީގެ މޫނުމަތިން އަތްނަގަން މަސައްކަތް ކުރިއެވެ. އެހެންނަމަވެސް އަރުޝީ އިނީ، މޫނުމަތީގައި ބާރަށް އަތްއަޅާ ފިއްތާލައިގެންނެވެ. އަދި ސާމިރު އަތް ޖައްސާލުމުން ނޫނޭކޭ ބުނުމުގެ ގޮތުން ދެއަތަށް ބޯ ހޫރާލިއެވެ. ސާމިރު އޭނާގެ އަތް ދުރަށް ޖައްސާލާ، ހަމަޖެހިލިއެވެ. އަދި އަރުޝީ ބުނަން އެއުޅޭ އެއްޗެއް އިތުރަށް އޮޅުންފިލުވުމުގެ ގޮތުން ސުވާލުކޮށްލިއެވެ. އެހެނަސް އޯގާތެރިކަމާ އެކީގައެވެ. ”އަރުޝީ، އަސްލު އަރުޝީ ބުނަން ބޭނުންވެގެން ތިއުޅޭ އެއްޗެއް އަހަރެންނަކަށް އަދިވެސް ނުވިސްނޭ. އެކަމަކު އަރުޝީ ހިތްނުތަނަވަސް ކުރުވާ އެއްވެސް ކަމެއް އޮތިއްޔާ އަހަރެންނާ ހިއްޞާކޮށްލާ. އޭރުން އަރުޝީގެ ހިތަށްވެސް ހަމަޖެހުމެއް ލިބޭނެ. އަހަރެން މީނީ އަޑުއަހަން. ދެން ތިވެގެން އުޅޭގޮތެއް ރަނގަޅަށް ކިޔާލަ ދީބަލަ.“ އަރުޝީގެ މޫނުމަތިން އަތް ނެގިއެވެ. އަދި އޭނާގެ އަތްދަބަސް ތެރެއިން ޓިޝޫއެއްނަގާ، ރަނގަޅަށް މޫނުމަތި ސާފުކޮށްލުމަށްފަހު، ހަމަޖެހިލަން މަސައްކަތް ކުރިއެވެ. އަދި ވަރަށް ސާބިތުކަމާއިއެކީ، ސާމިރުއާއި ދިމާއަށް އެނބުރިލިއެވެ. ”ސާމިރު، އަހަރެން ދައްކަން މިއުޅޭ ވާހަކަ ވަރަށް ރަނގަޅަށް އަޑު އަހަށްޗޭ އިނގޭ.“ ސާމިރު މަޑުމަޑުން ބޯޖަހާލިއެވެ. އަރުޝީ އަނެއްކާވެސް އެނބުރިލީ، މޫދާއި ދިމާއަށެވެ. އަދި އިސްދަށަށް ޖަހައިގެން އިނދެ އޭނާގެ ވާހަކަ ފެށިއެވެ. ”އަހަރެން ދެންމެގަ މިބުނީ ހަމަ ތެދެއް. މިއޮއްހުރިހާ ދުވަހު އަހަރެން މަންމަ ކިޔައިގެން މިއުޅުނީ އަހަރެންގެ ދޮންމަންމައަށް. އެހެންނަމަވެސް އެއީ އަހަރެންގެ ދޮންމަންމަ ކަމަކަށް އަދިވެސް އަހަރެންނެއް ޤަބޫލެއް ނުކުރަން. އަދި އެފަދަ މަގާމެއް ނުވަތަ ނަމެއް، އެމަންމައަށް ދޭކަށްވެސް އަހަރެން ބޭނުމެއް ނޫން.“

އަރުޝީ ދައްކަމުން ގެންދިޔަ ވާހަކައިން ސާމިރުއަށް ލިބެމުން ދިޔައީ ހައިރާންކަމެވެ. އެހެނަސް އެކަން ދައްކާކަށް ސާމިރު ބޭނުމެއް ނުވިއެވެ. އެހެނީ އަރުޝީއަށް އޭނާގެ ހިތުގެ އުދާސްތައް ބޭރުކޮށްލަން އެޅޭ ހުރަހެއް ކަމުގައި ސާމިރު ވާން ބޭނުން ނުވީތީއެވެ. ”އަހަރެންގެ ޙަޔާތަށް އައިސް މިއޮތީ މީގެކުރިން އަހަރެން ހުވަފެނެއްގަވެސް ވިސްނާލަންވެސް ނޭންގޭ ވަރުގެ ބޮޑު އިންޤިލާބެއް.“ އަރުޝީ ދައްކަމުން ގެންދިޔަ ވާހަކަ ސާމިރު ވަރަށް ކަނުލާ އަޑުއަހަން އިނެވެ. ދައްކަން ބޭނުންވާ ހުރިހާ ވާހަކައެއް ދައްކާ ނިމެންދެނެވެ. އަރުޝީ ދުނިޔެއަށް އައުމަށް މެދުވެރިވި ސަބަބާއި، އޭނާގެ މަންމަ ނަފީސާގެ ފުރަތަމަ ކައިވެނީގެ ވާހަކައާއި، ސަމްސުއްނިސާގެ ޙަޤީޤަތާއި އެކުގައެވެ. އަރުޝީގެ ވާހަކަ ނިމުނުއިރު، ސާމިރުއަށްވެސް އިނީ ރޮވިފައެވެ. ”ސާމިރު ބުނެބަލަ، އަހަރެންގެ ޙަޤީޤަތް އެނގުނީމަ، އަދިވެސް ސާމިރުގެ ޙަޔާތުގެ ބައިވެރިޔަކަށް އަހަރެން ހަދަން ބޭނުންވޭތަ؟ އަހަރެން ކަހަލަ ކުއްޖަކާ ކައިވެނިކުރަން ސާމިރުގެ މައިންބަފައިން ރުހޭނެތަ؟“ ސާމިރު މަޑުމަޑުން އިސްދަށަށް ޖަހާލިއެވެ. ކުޑައިރުކޮޅަކު ހަނު އިނުމަށްފަހު، އަރުޝީއާއި ދިމާއަށް އިސްއުފުލާ ބަލައިލިއެވެ. އަދި އަރުޝީގެ އަތްތިލަ ނަގާ އޭނާގެ އަތްމައްޗަށް ލިއެވެ. ”އަހަރެންގެ ކައިރީގައި އިށީންދެލައިގެން މީނީ އަހަރެން އެންމެ ކުޑައިރުއްސުރެވެސް ދަންނަ ދެކެފަރިތަ އަރުޝީ. އަރުޝީގެ ޙަޔާތުގެ ހަޤީޤަތް އެނގުމަކީ، އަހަރެން އަރުޝީއާއި މެދު ދެކޭގޮތް ނުވަތަ އަހަރެން އަރުޝީ ދެކެވާލޯތްބަކަށް އެއްވެސް ބަދަލެއް އަންނާނެ ސަބަބެއް ނޫން. އެކަމަކު…“ ސާމިރުގެ ވާހަކައަށް ހުއްޓުމެއް އައެވެ. އެވަޤުތު އަރުޝީގެ މޭ ބާރަށް ތެޅެން ފެށިއެވެ. ސާމިރުގެ ދުލުން ބުނެލި އެންމެ ފަހުބަސް އެއީ އަރުޝީގެ ހިތަށް ޒާތެއްގެ ބިރުވެރިކަމެއް ގެނުވި ބަހަކަށް ވެގެން ދިޔައެވެ. ”އެކަމަކު ކިހިނެއްވީ؟“ ވަރަށް ކަންބޮޑު ވެގެން އިނދެ އަރުޝީ ސުވާލު ކޮށްލިއެވެ. ”އެކަމަކު އަހަރެންގެ މައިންބަފައިންގެ ވިސްނުން ހުންނާނެ ގޮތެއް އަހަރެންނަކަށް ނޭންގެ. މަންމަ އަބަދުވެސް އަރުޝީގެ މަންމަގެ ރަނގަޅު ވާހަކަޔާ، އޭނަގެ ހުލްޤު ހެޔޮކަމުގެ ވާހަކަ ދައްކާނެ. ޚުދު އަރުޝީއަކީވެސް މަންމަމެންނަށް ވަރަށް ކަމުދާ ކުއްޖެއް. އެކަމަކު އަރުޝީ ތިދެއްކި ވާހަކަތައް އަހަރެންގެ މައިންބަފައިންނަށް އެނގުމުން އެމީހުންގެ ވިސްނުން ބަދަލު ވެއްޖެއްޔާ އެއީ އަހަރުމެން ދެމީހުންގެ ގުޅުމަށް އެޅޭނެ ވަރަށްބޮޑު ހުރަހަކަށް ވާނެ. އަހަރެން މިބުނާ އެއްޗެއް އަރުޝީއަށް ވިސްނޭނެކަމަށްވެސް އަހަރެން އުންމީދުކުރަން.“ ސާމިރު ދެއްކި ވާހަކަ އަރުޝީ ޤަބޫލުކުރިއެވެ. ”އެންމެންގެ ވިސްނުން އެއްގޮތް ނުވާނެކަން އަހަރެންވެސް ޤަބޫލުކުރަން. އަހަރެން ބޭނުންނަމަ މިއިން އެއްވެސް ވާހަކައެއް ސާމިރު ކައިރީގަވެސް ނުބުނެ، އަހަރެން ސާމިރުއާ ގުޅެން އެއްބަސް ވެވުނީސްތާ ދޯ.

އެކަމަކު އޮޅުމެއްގެ ތެރޭގަ އެއްވެސް މީހަކު ބަހައްޓާކަށް އަހަރެން ބޭނުމެއް ނޫން. އަހަރެންގެ މަންމަގެ ތަރިބިއްޔަތަކީ އެއަށްވުރެ މާފިރިހަމަ

އެއްޗެއް.“ އަރުޝީ އަދިވެސް މަންމަ އެކިޔަނީ ނަފީސާއަށްކަން ސާމިރުއަށް އެނގެއެވެ. ވީއިރު ސަމްސުއްނިސާއާއި މެދު އަރުޝީ ކަންތައްކުރަން ވިސްނާފަ އޮތްގޮތެއް ސާމިރު ބަލަން ބޭނުންވިއެވެ. ”އަރުޝީ އަދިވެސް ނަފީސާދައްތައަށް ތިކިޔަނީ މަންމަ. އެއީ އަރުޝީ ޤަބޫލުކުރާ ގޮތްކަންވެސް އަހަރެންނަށް އެނގޭ. އެކަމަކު ސަމްސުއްނިސާދައްތައަށް އެކަން އަންގަންވެސް އަރުޝީ ބޭނުން ނުވަނީތަ؟ ނޫނީ އޭނަ ތިގޭގަ ބަހައްޓަނީތަ؟ ސާމިރު ކުރަން ބޭނުންވާ ސުވާލު، ކުރަން ނޭންގިގެން އުޅޭ ކަހަލަގޮތެއް ހުރިހެން އަރުޝީއަށް ހީވިއެވެ. ”އަހަރެންނަކަށް ނޭންގެ ސާމިރު ތިކުރަނީ ކޮންކަހަލަ ސުވާލެއް ކަމެއް. އެކަމަކު އަހަރެންގެ މަންމަގެ ގޮތުގަ އަދިވެސް އަހަރެން ބަލައިގަންނަން ބޭނުންވަނީ އަހަރެން ބަލާބޮޑުކުރި މަންމަ. ދެންހުރި މީހާއަކީ ބޮޑު މަކަރުވެރިއެއް. ހަމަގައިމުވެސް އަހަރެންނަށް ސިފަކުރެވެނީ އެގޮތަށް. އެހެންނަމަވެސް މަންމަ ވާނީ މަންމައަށްތާ ދޯ. އެހެންވީމަ އަހަރެން އޭނަ ދޫކޮށެއް ނުލާނަން. ރަނގަޅު ވަޤުތު ޖެހުނީމަ މިހުރިހާ ވާހަކައެއް އޭނަޔާ ހިއްސާވެސް ކުރާނަން. އޭނަގެ ވިސްނުން ހުރިގޮތެއްވެސް ބަލަން ޖެހޭނެތާ. މިހެން ކަންތައް ދިމާވީ ކީއްވެގެންތޯ އޭނަގެ ދުލުންވެސް އަޑުއަހާލަން އަހަރެން ބޭނުން. ހަމަގައިމުވެސް އޭނަގެވެސް ކޮންމެސް ސަބަބެއް އޮންނާނެތާ ދޯ.“ އަރުޝީގެ ހިތުގެ އުދާސްތައް ބޭރުކުރެވެމުން ދިޔަވަރަކަށް ހިތަށް ހަމަޖެހުން ލިބެމުން ދިޔަކަހަލައެވެ. އެހެނީ އަރުޝީގެ މޫނުމަތީގައިހުރި އުދާސްކަމެއް މިހާރަކު ފެންނާކަށް ނެތެވެ. އަދި އަޑުގައި ގިސްލުމެއްވެސް ނެތެވެ. ”އެކަމަކު އެއީ އަރުޝީގެ އަސްލު މަންމައެއްނު؟“ ”އާން ތިކަން އޮތީ ތިހެން. އެކަމަކު ސާމިރުވެސް ވިސްނާލަބަލަ. އަހަރެންނަށް މިދިމާވި ގޮތަށް ސާމިރުއަށް ދިމާވިނަމަ އޭނަޔާ ކުރިމަތިލާން އެހާ ފަސޭހަވީސްތަ؟ އަހަރެންނަށް އުޅެންވެސް މިޖެހެނީ އޭނަގެ ކުރިމަތީގަ. އެއްފުރާޅެއްގެ ދަށުގަ. ހުރިހާ ޙަޤީޤަތެއް ހިތުތެރޭގަ ފޮރުވައިގެން ނޫންކަމަށް ހަދައިގެން. އަހަރެންނަކަށްވެސް ފަސޭހައެއް ނޫން މިހެން އުޅޭކަށް. އެކަމަކު އަދި އޭނައާއި މިވާހަކަ ދައްކާކަށް އަހަރެންގެ ހިތެއް ނުރުހޭ.“ އަރުޝީގެ އިހުސާސްތައް ސާމިރު ދެނެގަތެވެ. އަދި އެކަމަށް އިހުތިރާމުވެސް ކުރިއެވެ. ”އެންމެ ރަނގަޅު. ދެން އެކަމަކު ތިކަން މާބޮޑަށް ދިގު ނުދަންމާތި އިނގޭ. އަހަރުމެންގެ ގުޅުމަށް ގޮތެއް ނިންމަންވެސް ފަސޭހަވާނީ އޭރުންކަމަށް އަހަރެންނަށް ޤަބޫލުކުރެވެނީ. އަހަރެން ބޭނުން އަރުޝީއާއެކު ރަނގަޅު ދިރިއުޅުމެއް ބިނާކުރަން. މަންމަމެންގެ ވިސްނުން ފައްސިގޮތަކަށް ދެމެހެއްޓޭތޯވެސް އަހަރެން މަސައްކަތް ކުރާނަން.“ ސާމިރު ބޭނުންވާގޮތް ބުނެދިނުމުން އަރުޝީއަށް ހިތްހަމަޖެހުމެއް ލިބުނެވެ. އެހެނީ އަރުޝީގެ މުޅި ދިރިއުޅުން މިހާރު ބިނާވެފައި އޮތީ، ސާމިރުގެ މައިންބަފައިން އަރުޝީއާއިމެދު ދެކޭނެ ގޮތަކަށް ބަލާފައެވެ.

• ނުނިމޭ –